Kɛ be ko yo wɔ batɛmun’n, ‘su Zezi su titi’

1-2. ?Kɛ be yo sran kun i batɛmun’n, i su ye benin yɛ ɔ ɲɛn i-ɔ?

KƐ E wun kɛ be yoli e batɛmun naan e wo Zoova i sufuɛ’m be nun wie’n i sɔ’n yo e fɛ dan. Be nga be fɛli i sɔ ajalɛ mɔ be nin Zoova be afiɛn mantan’n, be wun kɛ ndɛ kun mɔ Davidi kannin’n, ɔ ti nanwlɛ. Ɔ seli kɛ: “Sran nga a kpɛ i mɔ a fɛ i mantan ɔ wun kɛ ɔ tran ɔ awlo’n nun’n, i liɛ su ti ye.”—Jue. 65:4.

² Nán sran kwlaa yɛ Zoova kplin su kɛ ɔ fɛ i wun mɛntɛn i-ɔ. Kɛ nga e fa wunnin i like suanlɛ ng’ɔ sinnin lɛ’n nun sa’n, be nga be kle kɛ be klo kɛ be nin i afiɛn mántan’n, i sɔfuɛ mun yɛ ɔ fɛ i wun mantan be-ɔ. (Zak. 4:8) Kɛ a fa ɔ wun man Zoova mɔ be yo wɔ batɛmun’n, wafa nga a nin i be afiɛn mantan’n, ɔ ti i liɛ ngunmin. Kɛ be ko yo ɔ batɛmun’n, a kwla lafi su kɛ ɔ́ ‘yrá ɔ su lele naan like fi su mianman ɔ sa.’—Mal. 3:10; Zer. 17:​7, 8.

3. ?Kɛ e ko fa e wun ko man Ɲanmiɛn mɔ be yo e batɛmun’n, ngue yɛ ɔ fata kɛ e yo-ɔ? (Akunndanfuɛ’n 5:​4, 5)

³ Kɛ be ko yo wɔ batɛmun’n, ɔ ti kɛ w’a bo wanndilɛ bo sa. Kɛ ɔ fɛ i lɛ’n, kannzɛ sa wie’m be tɔ ɔ su’n, annzɛ sɛ a bu sa tɛ wie yolɛ akunndan’n, á fúa kpa kɛ á mían ɔ ɲin naan w’a yia nda nga a tali Zoova’n i nuan. (An kanngan Akunndanfuɛ’n 5:​4, 5 nun.) Kɛ mɔ w’a kaci Zezi i sɔnnzɔnfuɛ’n ti’n, ɔ fata kɛ a fɛ i ndɛ’n su, yɛ a niɛn i ajalɛ’n su kpa. (Mat. 28:​19, 20; 1 Piɛ. 2:21) Like suanlɛ nga wá úka wɔ naan w’a kwla yo sɔ.

KANNZƐ SA’M BE TƆ Ɔ SU’N, ‘SU ZEZI SU TITI’

4. ?Ngue ti yɛ Zezi seli kɛ i sɔnnzɔnfuɛ’m bé wá súa ɲrɛnnɛn waka’n niɔn? (Liki 9:23)

⁴ Kɛ be ko yo wɔ batɛmun’n, nán bu i kɛ sa fi su tɔman ɔ su kun. Zezi seli kɛ i sɔnnzɔnfuɛ’m bé súa “ɲrɛnnɛn waka’n.” I kpa bɔbɔ’n bé yó sɔ “cɛn kwlakwla.” (An kanngan Liki 9:23 nun.) ?Zezi i ndɛ sɔ’n kle kɛ i sɔnnzɔnfuɛ’m bé wún be ɲrun sa trilili? Cɛcɛ. Ɔ su se kɛ kannzɛ bɔbɔ Ɲanmiɛn wá yrá be su’n, sanngɛ sa wie’m bé tɔ́ be su. Yɛ kɛ ɔ ko yo naan b’a jran sa sɔ’m be nun wie’m be ɲrun kekle’n, ɔ su yoman pɔpɔ.—2 Tim. 3:12.

5. ?Be nga be su Zezi su’n, ngue yɛ Zezi seli kɛ bé ɲɛ́n i-ɔ?

⁵ Atrɛkpa’n, ɔ awlofuɛ’m be tanndannin ɔ ɲrun. Annzɛ kusu’n, kɛ ɔ ko yo naan Ɲanmiɛn Sielɛ’n w’a yo ɔ cinnjin w’a tra like kwlaa’n, a yacili aɲanbeun ninnge wie’m be kunndɛlɛ. (Mat. 6:33) Sɛ ɔ ti sɔ’n, a kwla lafi su kɛ Zoova sie like kwlaa nga a yo mɛnnin i’n i nzɔliɛ. (Ebr. 6:10) Zezi seli kɛ: “Sran kwlaa nga min nin jasin fɛ’n ti’n, ɔ yacili i awlo, annzɛ i niaan bian, annzɛ i niaan bla, annzɛ i nin, annzɛ i si, annzɛ i wa, annzɛ i fie, blɛ nga e o nun yɛ’n nun’n sran sɔ’n ɲán ninnge sɔ mun kpɛ ya (100) trá su. Ɔ́ ɲán sua, nin niaan bian, nin niaan bla, nin niɛn, nin ba, nin fie, ɔ nin i su yalɛ klelɛ. Kpɛkun mɛn ng’ɔ́ bá lɔ’n nun’n, ɔ́ ɲán nguan m’ɔ leman awieliɛ’n.” (Mar. 10:​29, 30) Atrɛkpa’n, a wunnin kɛ ndɛ sɔ’n ti nanwlɛ. Ninnge nga Zoova fa mannin wɔ’n, be sɔnnin tra ninnge nga i sulɛ’n ti’n, a kpɔcili be’n be lele.—Jue. 37:4.

6. ?Ngue ti yɛ kɛ be ko yo wɔ batɛmun’n, ɔ fata kɛ a mian ɔ ɲin titi naan a kpalo “ninnge nga klɔ sran konvi sɔ be’n” niɔn?

⁶ Sanngɛ kɛ be ko yo wɔ batɛmun’n, ɔ fata kɛ a mian ɔ ɲin titi naan a kpalo “ninnge nga klɔ sran konvi sɔ be’n.” (1 Zan 2:16) Afin fɔ wo ɔ nun. Ɔ ju wie’n, wafa nga akoto Pɔlu i wun fa yoli i’n, ɔ wun kwla yo ɔ sɔ wie. Ɔ seli kɛ: “Min klun lɔ’n, n klo Ɲanmiɛn i mmla’n kpa. Sanngɛ n wun kɛ mmla uflɛ o min wunnɛn’n nun. Ɔ ti kɛ mmla sɔ’n ɔ nin mmla ng’ɔ o min akunndan’n nun’n, be kun alɛ sa. Ɔ maan kasiɛn su’n, sa tɛ’n i mmla m’ɔ o min wunnɛn’n nun’n, yɛ ɔ kwla-ɔ. Kpɛkun n kaci i kanga.” (Rɔm. 7:​22, 23) Kɛ m’ɔ ju wie’n, ɔ konvi sɔ sa tɛ yolɛ’n ti’n, ɔ sa sin kwla bubu wɔ. Sanngɛ sɛ a bu nda nga a tali Zoova kɛ á sú i titi’n i akunndan’n, i sɔ’n wlá ɔ fanngan naan w’a jran kekle. I kpa bɔbɔ’n, sɛ a wun kɛ a su wa yo sa tɛ wie’n, nda nga a tali Zoova’n ɔ́ úka ɔ. ?Wafa sɛ yɛ i sɔ’n úka wɔ-ɔ?

7. ?Kɛ sran kun fɛ i wun man Zoova’n, wafa sɛ yɛ i sɔ’n ukɛ i naan ɔ nin i b’a nanti klanman-ɔn?

⁷ Kɛ sran kun fɛ i wun man Zoova’n, ɔ klɛn i wun mlɔnmlɔn. Yɛle kɛ sɛ ninnge ng’ɔ klo be yolɛ’n be timan Zoova liɛ’n su’n, ɔ yoman be. (Mat. 16:24) Ɔ maan sɛ sa kekle wie wo i su’n, annzɛ ɔ wun kɛ sa wie nun’n ɔ su wa fɔn Ɲanmiɛn mmla’n, i akunndan’n su yoman nɲɔnnɲɔn. Ɔ si kɛ like ng’ɔ fata kɛ ɔ yo’n yɛle Zoova i mmla’n i su nantilɛ. Ɔ fua kpa kɛ ɔ́ yó Zoova i klun sa kɛ Zɔbu sa. Ɲrɛnnɛn ng’ɔ tɔli Zɔbu su’n w’a yoman blɛblɛ. Sanngɛ ɔ seli kɛ: “N su yaciman seiin nantilɛ le.”—Zɔb. 27:5.

8. ?Kɛ á fá ɔ wun mán Ɲanmiɛn’n, srɛlɛ nga a srɛli i’n, sɛ a bu su akunndan’n, wafa sɛ yɛ i sɔ’n úka wɔ naan w’a jran kekle-ɔ?

⁸ Kɛ á fá ɔ wun mán Zoova’n, a srɛli i kɛ á yó i klun sa’n titi. Sɛ a bu i sɔ liɛ’n i akunndan’n, i sɔ’n úka wɔ naan w’a jran kekle naan w’a fɔnmɛn i mmla’n. I wie yɛle kɛ a nin sran uflɛ yi annzɛ sran uflɛ wun be su traman ndalie. Afin w’a dun mmua w’a ta Zoova i nda kɛ a su yoman ninnge kɛ ngalɛ’n sa mun. Sɛ a yo sɔ’n, akunndan tɛ wie su baman ɔ ti nun naan i sin’n w’a se kɛ á mían ɔ ɲin wlɛ́ i ase. Ɔ maan a ‘su faman klunwifuɛ’m be atin’n su wie.’—Ɲan. 4:​14, 15.

9. ?Wafa sɛ yɛ ɔ wun mɔ a fa mannin Ɲanmiɛn’n i su akunndan bulɛ’n kwla uka wɔ naan i sulɛ’n w’a yo ɔ cinnjin w’a tra like kwlaa-ɔ?

⁹ Wienun-ɔn, b’a se ɔ kɛ a di junman kun. Sanngɛ sɛ a sɔ nun’n, a su kwlá tranman aɲia’m be kwlaa be bo. I lɛ nun’n, a si ajalɛ ng’ɔ fata kɛ a fa’n. Afin kwlaa naan b’a se wɔ sɔ’n, a dun mmua fali ajalɛ kɛ sɛ be man ɔ junman wie naan i sɔ’n ti’n a su kwlá tranman aɲia’m be bo’n, a su kplinman su. Ɔ maan a su seman kɛ á sɔ́ junman sɔ’n nun, naan i sin’n w’a fa ajalɛ wie mun w’a kle kɛ Zoova i sulɛ’n ti ɔ cinnjin tra like kwlaa. I lɛ nun’n, sɛ e bu ajalɛ nga Zezi kle e’n i su akunndan’n, é ɲán su ye dan. Zezi fuali kpa kɛ ɔ́ yó i Si i klun sa. Sɛ e wun kɛ Ɲanmiɛn mɔ e fali e wun mɛnnin i’n i klun jɔman like kun su’n, maan e kpalo like sɔ’n i ndɛndɛ kɛ Zezi sa. Nán e sisi e bo kaan sa.—Mat. 4:10; Zan 8:29.

10. ?Kɛ be ko yo wɔ batɛmun’n, wafa sɛ yɛ Zoova úka ɔ naan w’a kwla ‘su Zezi su titi-ɔ’?

¹⁰ Kɛ sa kekle’m be tɔ e su’n, annzɛ sɛ sa tɛ wie yolɛ ba e akunndan nun’n, e kwla kle kɛ y’a fua kpa kɛ é ‘sú Zezi su titi.’ Maan e lafi su kɛ Zoova úka e naan y’a su Zezi su titi. Biblu’n se kɛ: “Ɲanmiɛn ti nanwlɛfuɛ. Ɔ su kplinman su kɛ sa ng’ɔ tɔ amun su’n, ɔ tra amun kpɛn. Sɛ sa tɔ amun su’n, ɔ́ fá ajalɛ naan amun a kwla jrɛn i ɲrun kekle.”—1 Kor. 10:13.

?WAFA SƐ YƐ E KWLA SU ZEZI SU TITI-Ɔ?

11. ?Like cinnjin kun m’ɔ fata kɛ a yo naan w’a kwla su Zezi su titi’n yɛle benin? (An nian foto’n wie.)

¹¹ Zezi tuli i klun suli Zoova, yɛ ɔ srɛli i titi. (Lik. 6:12) Kɛ be ko yo wɔ batɛmun’n, yo ninnge nga be kwla uka wɔ naan a nin Zoova amun afiɛn w’a mantan kpa’n. Like cinnjin kun m’ɔ fata kɛ a yo naan w’a su Zezi su titi’n yɛ ɔ o lɛ-ɔ. Biblu’n se kɛ: “Kan kwlaa nga y’a wɔ e ɲrun y’a ju lɛ’n, maan e fa ajalɛ kunngba’n e wɔ e ɲrun tititi.” (Fip. 3:16) Ɔ ju wie’n, á tí aniaan wie mɔ be tu be klun be suli Zoova’n be su ndɛ. Atrɛkpa’n aniaan sɔ’m be dili Ɲanmiɛn Sielɛ’n i Jasin Bofuɛ’m be Suklu’n wie, annzɛ kusu be tu ko trannin kan be mian jasin bofuɛ’m be wun lɔ’n. Sɛ a ɲɛn i wun alaje’n, a kwla yo sɔ wie. Zoova i sufuɛ’m be fa ajalɛ wie mun naan b’a kwla bo jasin fɛ’n i kpa b’a tra laa’n. (Yol. 16:9) ?Yɛ sɛ ɔ liɛ’n, a kwlá yoman sɔ wie dɔ nga su’n nin? Sɛ ɔ ti sɔ’n, nán bu i kɛ be nga be kwla fɛ i sɔ ajalɛ’n be ti kpa tra wɔ. Like ng’ɔ ti cinnjin kɛ a yo’n, yɛle kɛ a tra ɔ awlɛn su Ɲanmiɛn titi. (Mat. 10:22) Nán ɔ wla fi su kɛ sɛ a yo ɔ liɛ nga a kwla yo’n, Zoova i klun jɔ́ ɔ wun. Kɛ be ko yo sran kun i batɛmun’n, like cinnjin kun m’ɔ fata kɛ ɔ yo naan w’a kwla su Zezi su titi’n, yɛ ɔ o lɛ-ɔ.—Jue. 26:1.

12-13. ?Sɛ a wun kɛ wafa nga a su Ɲanmiɛn’n ɔ su kan ase’n, ngue yɛ ɔ fata kɛ a yo-ɔ? (1 Korɛntifuɛ Mun 9:​16, 17) (Nian kuku nga be flɛ i kɛ “Nán yaci wanndilɛ” nun wie.)

¹² ?Yɛ sɛ a sie i nzɔliɛ kɛ, kɛ á srɛ́ Ɲanmiɛn’n ndɛ nga a kan’n i bo’n timan kploun kun kɛ laa’n sa’n nin? ?Annzɛ sɛ a sie i nzɔliɛ kɛ a kloman jasin fɛ’n i bolɛ kpa kun kɛ laa’n sa’n nin? ?Annzɛ kusu sɛ a sie i nzɔliɛ kɛ Biblu’n nun kannganlɛ’n ɔ yoman ɔ fɛ kpa kun kɛ laa’n sa’n nin? Sɛ b’a yo ɔ batɛmun naan sa kɛ ngalɛ’n sa’m be ju ɔ su’n, nán bu i kɛ Zoova i wawɛ’n nunman ɔ su kun. Nán ɔ wla fi su kɛ a kwla fɔn, yɛ ɔ ju wie kusu’n ninnge wie’m be yolɛ’n su yoman e fɛ. I sɔ’n ti’n sɛ a wun kɛ wafa nga a su Ɲanmiɛn’n ɔ su kan ase’n, bu akoto Pɔlu i su ndɛ’n i akunndan. Pɔlu miɛnnin i ɲin naan ɔ́ nían Zezi i ajalɛ’n su. Sanngɛ ɔ wunnin i wlɛ kɛ ɔ ju wie’n i sɔ yolɛ’n su yomɛn i fɛ. (An kanngan 1 Korɛntifuɛ Mun 9:​16, 17 nun.) Ɔ seli kɛ: “Kannzɛ n di i klunngbɔ su bɔbɔ’n, Ɲanmiɛn m’ɔ te lafi min su’n yɛ ɔ mannin min junman sɔ’n kɛ n di-ɔ.” Ndɛ sɔ’n kle kɛ Pɔlu fuali kpa kɛ kannzɛ bɔbɔ junman nga be fa wlɛli i sa nun’n i dilɛ yomɛn i fɛ blɛ wie nun’n, ɔ́ míɛn i ɲin dí.

¹³ E kusu nán e jran wafa nga e wun yo e’n su naan e fa ajalɛ. Sɛ ɔ fata kɛ e yo like kpa wie naan i yolɛ’n yoman e fɛ bɔbɔ’n, sanngɛ maan e mian e ɲin e yo. Sɛ e mian e ɲin e yo ninnge sɔ mun’n, kɛ ɔ́ kɔ́ i ɲrun’n, é kló ninnge sɔ’m be yolɛ. Sɛ b’a yo ɔ batɛmun’n, mian ɔ ɲin naan ɔ ngunmin suan Biblu’n nun like titi, srɛ Ɲanmiɛn, tran aɲia’m be bo, yɛ bo jasin fɛ’n titi. I sɔ’n úka wɔ naan w’a su Zezi su titi. Asa’n kɛ aniaan’m be wun kɛ a tra ɔ awlɛn su Zoova’n, i sɔ’n wlá be fanngan.—1 Tes. 5:11.

“AN BU AMUN KLUN LƆ TITI BE NIAN”

14. (1) ?Ngue yɛ ɔ fata kɛ a bu i akunndan titi-ɔ? (2) ?Yɛ ngue ti yɛ ɔ fata kɛ a yo sɔ-ɔ? (2 Korɛntifuɛ Mun 13:5)

¹⁴ Kɛ be ko yo ɔ batɛmun’n, ɔ fata kɛ a bu wafa nga a su Ɲanmiɛn’n i akunndan titi. (An kanngan 2 Korɛntifuɛ Mun 13:5 nun.) Cɛn kunngun’n, ɔ fata kɛ a bu ɔ klun lɔ nian, sɛ a srɛ Ɲanmiɛn cɛn kwlakwla-o, sɛ a kanngan Biblu’n nun yɛ a suan nun like-o, annzɛ a kɔ aɲia’m be kwlaa be bo-o, annzɛ a bo jasin fɛ’n nin-o. Ajalɛ ng’ɔ fata kɛ a fa be naan ninnge sɔ’m be yolɛ’n w’a yo ɔ fɛ naan kusu w’a ɲan su ye’n, fɛ i sɔ ajalɛ mun. I lɛ nun’n, a kwla usa ɔ wun kɛ: ‘?N kwla yiyi Biblu’n nun ndɛ’n i bo bolɛ ninnge’m be nun n kle min wiengu mun? ?Ngue yɛ n kwla yo naan jasin fɛ’n i bolɛ’n w’a yo min fɛ-ɔ? ?Kɛ ń srɛ́ Ɲanmiɛn’n, n kan like trele wie’m be ndɛ? ?Asa’n wafa nga n srɛ Ɲanmiɛn’n ɔ kle kɛ n fa min wla kwlaa n guɛ i su? ?N tran aɲia’m be kwlaa be bo titi? ?Ń yó sɛ naan m’an fa min ɲin m’an sie i ndɛ nga be kɛn i aɲia’m be bo lɔ’n be su kpa m’an tra laa’n?’

15-16. ?Ngue like yɛ aniaan bian Robɛɛ i su ndɛ’n kle e-ɔ?

¹⁵ Wafa nga a kwla kaci ɔ sa ninnge wie’m be yolɛ’n nun’n, ɔ fata kɛ a wun i wlɛ wie. Aniaan bian kun mɔ be flɛ i Robɛɛ’n i su ndɛ’n kle sɔ. Ɔ seli kɛ: “I nun mɔ n le afuɛ kɔe 20, n di junman kan n fa nian min wun lika. Cɛn kun’n, kɛ e wieli junman’n i di’n, bla kun mɔ e nin i e di junman’n ɔ yiali min i awlo lɔ. Ɔ seli kɛ sran nunman awlo lɔ naan sɛ e ju lɔ’n, e kwla yo e wun yrɛyrɛ kan. I klikli’n nun’n, m’an semɛn i trele kɛ n kɔman. Sanngɛ i agualiɛ su’n, n dili i nanwlɛ n kleli i. Kpɛkun n yiyili sa nga ti yɛ min waan n kɔman’n i nun weinwein n kleli i.” Rɔbɛɛ w’a tɔman sa tɛ yolɛ’n nun. I sɔ’n ti’n, ɔ nin mo yolɛ fata. Sanngɛ i sin’n, kɛ ɔ wa buli sa sɔ’n i akunndan’n, ɔ wunnin i wlɛ kɛ like kun o lɛ’n, sɛ ɔ ti kɛ ɔ yoli’n, nn ɔ yoli kpa dan. Ɔ seli kɛ: “M’an kaman lɛ m’an semɛn i kɛ n kplinman su, yɛ m’an kanman ndɛ’n i juejue su kɛ nga Zozɛfu fa yoli i Potifaa i yi’n i liɛ’n nun’n sa. (Bob. 39:​7-9) Kɛ n se i kɛ n kplinman su’n, i sɔ’n yoli kekle mannin min. Nanwlɛ, i sɔ liɛ’n yɛ ɔ bo min nuan-ɔn. Sa sɔ’n ti’n n ma wunnin i wlɛ kɛ ɔ fata kɛ n mian min ɲin naan e nin Zoova e afiɛn’n mantan kpa.”

¹⁶ Sɛ e bu wafa nga e su Ɲanmiɛn’n i su akunndan kɛ nga Robɛɛ fa yoli’n sa’n, é ɲán su ye wie. Kannzɛ bɔbɔ a jrannin kekle naan w’a yoman sa tɛ wie’n, sanngɛ a kwla usa ɔ wun kɛ: ‘?N sisili min bo kan naan m’an se kɛ n yoman sa tɛ sɔ’n?’ Sɛ a wun kɛ ɔ fata kɛ a kaci ɔ sa ninnge wie’m be nun’n, nán ɔ sa sin bubu wɔ. Kɛ mɔ w’a wun like ng’ɔ kle ɔ yalɛ’n i wlɛ siɛn’n, fa wlɛ i srɛlɛ’n nun. Asa’n yo ninnge nga be kwla man ɔ wunmiɛn naan w’a nanti Zoova i mmla’m be su’n.—Jue. 139:​23, 24.

17. ?Kɛ Robɛɛ nin Zoova be nantili klanman’n, wafa sɛ yɛ i sɔ’n yoli maan Zoova ɲannin ɲrun-ɔn?

¹⁷ Robɛɛ i su ndɛ’n kle e like uflɛ ekun. Ɔ seli kɛ: “Kɛ bla’n yiali min mɔ m’an kplinman su’n, i sin’n ɔ seli min kɛ: ‘Min waan ń sá wɔ ń nían ti-ɔ.’ N usɛli i kɛ i ndɛ sɔ’n i bo’n yɛle benin. Ɔ tɛli min su kɛ i janvuɛ kun mɔ laa’n ɔ ti Zoova i Lalofuɛ’n ɔ seli kɛ gbanflɛn nin talua nga be ti Zoova i Lalofuɛ’n be kwlaa be fia be yo sa tɛ. I sɔ’n ti’n, ɔ seli i janvuɛ sɔ’n kɛ ɔ́ wá sá min nían naan sɛ ndɛ ng’ɔ kannin’n ti nanwlɛ-o. Ɔ maan kɛ n wunnin i wlɛ kɛ m’an saciman Zoova i dunman’n i sɔ’n yo min fɛ kpa.”

18. ?Sɛ be yoli ɔ batɛmun’n, ngue yɛ w’a fua kɛ á yó-ɔ? (Nian kuku nga be flɛ i kɛ “Ndɛ akpasua nɲɔn mɔ be kwla uka ɔ kpa’n” i nun wie.)

¹⁸ Kɛ a ko fa ɔ wun ko man Zoova mɔ be ko yo ɔ batɛmun’n, a kle kɛ kannzɛ sa nga be tɔ ɔ su’n be ti sɛ ti sɛ’n, á yó naan Zoova i dunman’n yo sanwun titi. Asa’n, lafi su kɛ Zoova wun sa kwlaa nga be tɔ ɔ su’n, ɔ nin sa nga a jran be ɲrun kekle naan w’a yoman sa tɛ’n. Sɛ a nin i nanti klanman titi’n, ɔ́ yrá ɔ su. Nán ɔ wla fi su kɛ Zoova fɛ́ i wawɛ’n fá wlá ɔ fanngan naan a nin i b’a kwla nanti klanman. (Lik. 11:​11-13) Kɛ be ko yo ɔ batɛmun’n, Zoova i fanngan nun’n, a kwla su Zezi su titi.