LIKE SUANLƐ 27
?Ngue ti yɛ ɔ fata kɛ e sro Zoova-ɔ?
“Be nga be sro Zoova’n, be yɛ be nin i be tra janvuɛ kpa-ɔ.”—JUE. 25:14.
JUE 8 Zoova ti e fiawlɛ
I SU FITILƐa
1-2. ?Kɛ nga Jue Mun 25:14 fa kan’n sa’n, ngue yɛ ɔ fata kɛ e yo naan e nin Zoova e afiɛn w’a mantan kpa-ɔ?
?KƐ A niɛn i sa’n, kɛ ɔ ko yo naan sran kun nin i wiengu be afiɛn w’a mantan kpa’n, nzuɛn benin yɛ ɔ fata kɛ be yi i nglo-ɔ? Kɔlɛ’n á tɛ́ su kɛ ɔ fata kɛ be nɲɔn’n be klo be wiengu yɛ be suan be wiengu bo. Atrɛkpa’n a su tɛman su kɛ ɔ fata kɛ be sro be wiengu. Sanngɛ like suanlɛ nga nun’n, é wá wún kɛ be nga be kunndɛ kɛ be nin Zoova be afiɛn mantan kpa’n, ɔ fata kɛ be “sro i.”—An kanngan Jue Mun 25:14 nun.
2 Kannzɛ e su Zoova w’a cɛ-o, annzɛ ɔ nin cɛman-o, ɔ fata kɛ e sro i. ?Kɛ be se kɛ e sro Ɲanmiɛn’n i bo’n yɛle benin? ?Ngue yɛ é yó naan y’a sro Zoova-ɔ? ?Ngue yɛ Abdiasi nin Ɲanmiɛn ɲrun jranfuɛ dan Zoyada, ɔ nin Famiɛn Zoasi be su ndɛ’n kle e Ɲanmiɛn i srolɛ’n su-ɔ?
?KƐ BE SE KƐ BE SRO ZOOVA’N I BO’N YƐLE BENIN?
3. ?Sɛ ɔ ju wie naan srɛ kun e’n, ngue ti yɛ i sɔ’n ti kpa-ɔ?
3 Sɛ e wun kɛ like yaya wie kwla yo e’n, srɛ kwla kun e. Kɛ srɛ kun e sɔ’n ɔ ti kpa. Afin i sɔ’n kwla yo maan e fa ajalɛ kpa. I wie yɛle kɛ sɛ e o lika nglonglo wie su’n naan e kunndɛman kɛ é tɔ́’n, e su mɛntɛnmɛn i nuan’n su lɔ. Annzɛ sɛ e kunndɛman kɛ sa ɲan e’n, e su faman e wun e wlaman ninnge nga be kwla yo maan sa ɲan e’n be nun. Annzɛ kusu’n, sɛ e kunndɛman e nin sran wie mɔ e klo i kpa’n e afiɛn saci’n, e su kanman ndɛ wie annzɛ e su yoman like wie m’ɔ kwla lo i ngasi-ɔ.
4. ?Wafa sɛ yɛ Satan kunndɛ kɛ sran’m be sro Zoova-ɔ?
4 Wafa nga Satan kunndɛ kɛ sran’m be sro Zoova’n ɔ timan su. Satan kunndɛ kɛ e bu i kɛ Zoova i like yolɛ yo ya, naan ɔ yaciman sa cɛman, naan i klun kwla jɔman e wun le. I sɔ ndɛ yɛ ɔ yoli maan Elifazi kannin-ɔn. (Zɔb. 4:18, 19) Satan kunndɛ kɛ e sro Zoova tratra su naan e yaci i sulɛ. Kɛ ɔ ko yo naan y’a tɔman Satan i aya sɔ’n nun’n, ɔ fata kɛ e sro Zoova kɛ ng’ɔ nin i fata’n sa.
5. ?Kɛ be se kɛ be sro Zoova’n i bo’n yɛle benin?
5 Sran ng’ɔ sro Zoova kɛ ng’ɔ nin i fata’n sa’n, ɔ klo i yɛ ɔ kunndɛman kɛ ɔ́ yó like wie mɔ maan ɔ nin i be afiɛn sáci-ɔ. Kɛ Zezi ‘sroli’ Ɲanmiɛn sɔ-ɔ. (Ebr. 5:7) W’a sroman Zoova w’a tratraman su. (Eza. 11:2, 3) Ɔ kloli Zoova tankaan kpa yɛ i ɲin yili i. (Zan 14:21, 31) Kɛ Zezi sa’n, e kusu e ɲin yi Zoova kpa, afin e si kɛ ɔ klo sran, ɔ ti ngwlɛlɛfuɛ, ɔ yo sa i nuan su yɛ ɔ le tinmin. Asa’n, e si kɛ Zoova klo e kpa, yɛ kɛ e sɔ ukalɛ m’ɔ uka e’n i nun klanman’n, i sɔ’n yo i fɛ kpa. E ayeliɛ’n kwla jɔ i klun annzɛ ɔ bo i wla.—Jue. 78:41; Ɲan. 27:11.
?NGUE YƐ É YÓ NAAN Y’A SRO ZOOVA-Ɔ?
6. ?Ninnge nga e kwla yo naan y’a sro Zoova’n i kun yɛle benin?
6 E nin Zoova i srolɛ’n e finman e nin klun. Ɔ fata kɛ e suɛn i sɔ yolɛ. (An kanngan Jue Mun 34:11 nun.) Like kun mɔ e kwla yo’n, yɛle kɛ maan e fa e ɲin e sie i ninnge nga Zoova yili be’n be su. Kɛ e yo sɔ mɔ e wun kɛ ɔ ti ngwlɛlɛfuɛ, ɔ le tinmin, yɛ ɔ klo sran’n, e ɲin yi i yɛ e klo i kpa tra laa’n. (Rɔm. 1:20) Aniaan bla kun m’ɔ suan Adriɛnin seli kɛ: “Kɛ n fa min ɲin n sie i ninnge nga Zoova yili be’n be su’n, n wun kɛ ɔ ti ngwlɛlɛfuɛ dan. I sɔ’n ti’n, n lafi su kpa kɛ ɔ si like ng’ɔ ti kpa man min’n.” Ɔ kan guali su kɛ: “?Ngue ti yɛ maan ń kó yó like wie mɔ maan e nin Ɲanmiɛn e afiɛn’n sáci-ɔ?” Lemɔcuɛ nga nun’n, fa blɛ kan bu ninnge nga Ɲanmiɛn yili be’n be nun kun su akunndan. Sɛ a yo sɔ’n ɔ ɲin yí Zoova kpa, yɛ á kló i kpa trá laa’n.—Jue. 111:2, 3.
7. ?Wafa sɛ yɛ Zoova i srɛlɛ’n ɔ uka e naan y’a sro i kɛ ng’ɔ nin i fata’n sa-ɔ?
7 Ninnge nga e kwla yo naan y’a sro Zoova’n i kun yɛle kɛ maan e srɛ i titi. Kɛ e srɛ Zoova titi’n, e wun i wlɛ kɛ ɔ ti sran jrɛiin. Blɛ kwlaa nga e srɛ i kɛ ɔ uka e naan y’a kwla jran sa wie ɲrun kekle’n, e kle kɛ e wun i wlɛ kɛ i tinmin’n leman wunsu. Kɛ i wa m’ɔ fa mannin e’n ti’n e le ase’n, e kle kɛ e lafi su kɛ ɔ klo sran. Yɛ kɛ e srɛ i tankaan kpa kɛ ɔ uka e naan e wun sa wie i trawlɛ’n, e kle kɛ e si kɛ i ngwlɛlɛ’n leman wunsu. Kɛ e srɛ Zoova kɛ ngalɛ’n sa’n, e ɲin yi i kpa tra laa’n. Kpɛkun i sɔ’n yo maan e fua kpa kɛ e su yoman like fi m’ɔ kwla saci e nin i e afiɛn-ɔn.
8. ?Ngue yɛ e kwla yo naan nán y’a yaciman Ɲanmiɛn i srolɛ-ɔ?
8 Sɛ e waan é sró Ɲanmiɛn titi’n, kɛ é súan Biblu’n nun like’n maan e fa e ɲin e sie i be nga be kleli ajalɛ kpa’n, ɔ nin be nga b’a kleman ajalɛ kpa’n be su. Maan e kan Zoova i sufuɛ kpa nɲɔn be ndɛ. Kun yɛle famiɛn Akabu i sufuɛ Abdiasi, yɛ kun ekun yɛle Ɲanmiɛn ɲrun jranfuɛ dan Zoyada. I sin’n, é wá kan Zida famiɛn Zoasi i ndɛ. Ɔ boli Zoova i sulɛ bo klanman bɔɔ cɛ, sanngɛ i sin’n ɔ yacili i sulɛ.
MAAN E YO YAKPAFUƐ KƐ ABDIASI SA
9. ?Wafa sɛ yɛ Zoova i srolɛ’n ukali Abdiasi-ɔ? (1 Famiɛn Mun 18:3, 12)
9 Abdiasib i su ndɛ klikli nga Biblu’n kan’n yɛle kɛ “i ɲin yi Zoova kpa liɛ su.” (An kanngan 1 Famiɛn Mun 18:3, 12 nun.) ?Wafa sɛ yɛ Ɲanmiɛn srolɛ’n ukali Abdiasi-ɔ? I sɔ’n yoli maan ɔ yoli sran mɔ be kwla lafi i su-ɔ. I sɔ’n ti’n, famiɛn’n fɛli i awlo lɔ ninnge mun mɛnnin i kɛ ɔ nian su. (An nian Neemin 7:2 nun.) Asa’n, kɛ m’ɔ sro Ɲanmiɛn’n ti’n i sɔ’n wlɛli i yakpa. Afin i blɛ su’n, Akabu m’ɔ “yoli sa tɛ Zoova i ɲrun trali be kwlaa nga be dunnin mmua i ɲrun’n” yɛ ɔ ti famiɛn-ɔn. (1 Fam. 16:30) Asa’n, Akabu i yi Zezabɛli m’ɔ su Baali’n ɔ kpɔ Zoova tɛ kpa. Ɔ kunndɛ kɛ ɔ́ yó naan sran’m b’a suman Zoova mlɔnmlɔn Izraɛli i nglo lɔ lika’n nun lɔ. I kpa bɔbɔ’n, ɔ kunnin Ɲanmiɛn nuan ijɔfuɛ kpanngban. (1 Fam. 18:4) Nanwlɛ, Abdiasi i blɛ su’n Zoova i sulɛ’n w’a yoman pɔpɔ.
10. ?Wafa sɛ yɛ Abdiasi kleli kɛ ɔ ti yakpafuɛ-ɔ?
10 ?Wafa sɛ yɛ Abdiasi kleli kɛ ɔ ti yakpafuɛ-ɔ? Kɛ Zezabɛli kunndɛlɛ kɛ ɔ́ kún Ɲanmiɛn i nuan ijɔfuɛ mun’n, ɔ fali be nun 100 fiali. Ɔ ‘fiali ablenun (50) yɔbuɛ buɛ kun nun, yɛ ɔ fiali ablenun (50) yɔbuɛ buɛ uflɛ nun. Kpɛkun ɔ mannin be aliɛ titi.’ (1 Fam. 18:13, 14) Sɛ ɔ ti kɛ be trɛli i’n, nn be kunnin i. Ɔ maan srɛ kunnin i. Sanngɛ ɔ kloli Zoova nin i sufuɛ trɛli i bɔbɔ i nguan’n.
Aniaan kun mɔ be nvle’n liɛ’n nun lɔ’n, be tannin be Zoova sulɛ’n ɔ su fa e fluwa mun mán aniaan wie mun. (An nian ndɛ kpɔlɛ 11 nun.)c
11. ?Wafa sɛ yɛ be nga be su Zoova andɛ’n be yo kɛ Abdiasi sa-ɔ? (An nian foto’n wie.)
11 Andɛ’n, e niaan kpanngban be tran lika nga be tannin be Zoova i sulɛ’n be nun. Aniaan sɔ’m be ɲin yi mɛn siefuɛ mun, sanngɛ kɛ Abdiasi sa’n be fa like ng’ɔ ti Zoova liɛ’n be mɛn i. Yɛle kɛ be yaciman Zoova i sulɛ. (Mat. 22:21) Be kle kɛ be sro Ɲanmiɛn, yɛle kɛ i ndɛ liɛ’n su yɛ be fa-ɔ. (Yol. 5:29) I lɛ nun’n, be bo jasin fɛ’n titi yɛ be yo aɲia mun nvialiɛ nun. (Mat. 10:16, 28) Be uka be niaan mun naan b’a ɲan ninnge nga be miɛn i wun naan be nin Zoova be afiɛn w’a mantan titi’n. I wie yɛle e niaan kun mɔ be flɛ i kɛ Anri’n i liɛ’n. Ɔ tran Sran ble mɛn’n nun nvle kun mɔ blɛ wie nun’n be tanninnin be Zoova sulɛ’n i nun. Blɛ sɔ’n nun’n i klun klo su’n ɔ fali e fluwa mun ko mannin aniaan mun titi. Ɔ seli kɛ: “N sa ɲan. Ɔ maan n lafi su kpa kɛ min ɲin m’ɔ ɲin Zoova dan’n yɛ ɔ ukali min naan m’an kwla yo sɔ-ɔ.” ?Kɛ a niɛn i sa’n a kwla yo yakpafuɛ kɛ Anri sa? Sɛ a sro Zoova kɛ ng’ɔ nin i fata’n sa’n á kwlá yó sɔ.
MAAN E SU ZOOVA KPA TITI KƐ ƝANMIƐN ƝRUN JRANFUƐ DAN ZOYADA SA
12. ?Wafa sɛ yɛ Ɲanmiɛn ɲrun jranfuɛ dan Zoyada nin i yi Zosabeati be kleli kɛ be su Zoova kpa titi-ɔ?
12 Ɲanmiɛn ɲrun jranfuɛ dan Zoyada suli Zoova kpa, yɛ ɔ wlɛli i wiengu’m be fanngan kɛ be yo sɔ wie. Blɛ mɔ Atali m’ɔ ti Zezabɛli i wa bla’n deli famiɛn bia’n Zida lɔ’n, yɛ Zoyada yili i sɔ liɛ’n i nglo kpa-ɔ. Nvlefuɛ’m be sro Atali. I klun yo wi, yɛ kɛ m’ɔ kunndɛ kɛ ɔ́ dí famiɛn’n ti’n ɔ kunnin i anunman mɔ be kwla di famiɛn’n i aja’n. (2 Ɲol. 22:10, 11) Sanngɛ ɔ fali ba sɔ’m be nun kun m’ɔ suan Zoasi’n fiali. I sɔ mɔ be yoli’n ti’n, Davidi i osu’n w’a nunnunman. Zoyada w’a kpɔciman Zoova Atalia i wun srɛ ti.—Ɲan. 29:25.
13. ?Kɛ Zoasi ɲannin afuɛ nso’n, wafa sɛ yɛ Zoyada yili i nglo ekun kɛ ɔ su Zoova kpa titi-ɔ?
13 Kɛ Zoasi ɲannin afuɛ nso’n Zoyada yili i nglo ekun kɛ ɔ su Zoova kpa titi. Ɔ fali ajalɛ kun. Sɛ ajalɛ ng’ɔ fali’n i bo’n klanman’n, Zoasi m’ɔ ti Davidi i afinliɛ nunfuɛ’n ɔ́ káci famiɛn. Sanngɛ sɛ i bo w’a guaman klanman’n bé kún i. Sanngɛ Zoova fanngan nun’n, ajalɛ ng’ɔ fali’n i bo’n guali klanman. Klɔ kpɛn mun nin Levifuɛ’m be suannin Zoyada bo. Be yoli maan Zoasi kacili famiɛn, kpɛkun be kunnin Atalia. (2 Ɲol. 23:1-5, 11, 12, 15; 24:1) I sin’n, Zoyada “yoli maan Zoova nin famiɛn’n ɔ nin nvlefuɛ mun be trali aenguɛ naan bé yó Zoova i nvle titi. Asa ekun’n, ɔ yoli maan famiɛn’n nin nvlefuɛ’m be trali aenguɛ.” (2 Fam. 11:17) Asa’n Zoyada “fali anuan sunianfuɛ mun siesieli i Zoova i sua’n i anuan’m be nun lɛ. Ɔ yoli sɔ naan sran ng’ɔ timan sanwun’n, w’a kwlá wluman lɔ mlɔnmlɔn.”—2 Ɲol. 23:19.
14. ?Wafa sɛ yɛ Zoova yrali Zoyada su-ɔ?
14 Zoova seli kɛ: “Be nga be bu min sran’n, ń bú be sran wie” Ɔ maan kɛ mɔ Zoyada buli i sran’n ti’n ɔ yrɛli i su. (1 Sam. 2:30) Ɔ yoli maan be klɛli Ɲanmiɛn ɲrun jranfuɛ sɔ’n i su ndɛ Biblu’n nun naan ɔ́ fá klé e like. (Rɔm. 15:4) Kɛ Zoyada wuli’n “be sieli i Davidi Klɔ’n su lɔ, famiɛn’m be wun lɛ. Afin Ɲanmiɛn Kpli i sulɛ’n nun’n nin Ɲanmiɛn sua’n i kplanlɛ’n nun’n, ɔ yoli sa kpakpa mun Izraɛli lɔ.” I sɔ’n ti i suyralɛ dan kpa.—2 Ɲol. 24:15, 16.
Kɛ Ɲanmiɛn ɲrun jranfuɛ Zoyada sa’n, srolɛ mɔ e sro Ɲanmiɛn’n ti’n, maan e tu e klun e uka e niaan mun. (An nian ndɛ kpɔlɛ 15 nun.)d
15. ?Ngue yɛ Zoyada i su ndɛ’n kle e-ɔ? (An nian foto’n wie.)
15 Zoyada i su ndɛ’n uka e naan y’a sro Ɲanmiɛn. Asɔnun kpɛnngbɛn’m be kwla nian Zoyada i ajalɛ’n su. Yɛle kɛ maan be fa be ɲin be sie i Ɲanmiɛn i sufuɛ’m be su, kpɛkun be nian be lika. (Yol. 20:28) Zoyada i su ndɛ’n kle e niaan nga b’a yo kpɛnngbɛn’m be kɛ sɛ be sro Zoova naan be su i kpa titi’n, ɔ kwla fa be yo i klun sa. Ɔ su yiman be blo. Gbanflɛn nin talua’m be kusu be kwla nian Zoova i ajalɛ’n su. Yɛle kɛ Zoova yoli Zoyada i cɛcɛ, kpɛkun ɔ buli i sran. Be kusu, maan be bu aniaan nga b’a yo kpɛnngbɛn’n be sran. I li be nga be su Zoova w’a cɛ kpa’n yɛ ɔ fata kɛ be ɲin yi be kpa’n niɔn. (Ɲan. 16:31) Kpɛnngbɛn nin Levifuɛ mɔ be suannin Zoyada bo’n be kusu be kle e ajalɛ kpa wie. Yɛle kɛ maan e suan ‘be nga be kle e atin’n’ be bo, yɛ e nanti ndɛ nga be kan’n su.—Ebr. 13:17.
NÁN E YO KƐ FAMIƐN ZOASI SA
16. ?Ngue yɛ ɔ kle kɛ Famiɛn Zoasi ɔ nin Zoova be afiɛn w’a mantan kpa-ɔ?
16 I nun mɔ Zoyada i ɲin o su’n, ɔ ukali Famiɛn Zoasi naan w’a yo sran kpa. (2 Fam. 12:2) Ɔ maan Zoasi kunndɛli kpa kɛ Zoova i klun jɔ i wun. Sanngɛ kɛ Zoyada wuli’n, Zida lɔ sran dandan mɔ be suman Zoova’n be ndɛ liɛ’n su ɔ fali-ɔ. I sɔ’n ti’n, ɔ nin i sran’m be ‘sɔli waka nga sran’m be sɔ be’n, nin amuin mun.’ (2 Ɲol. 24:4, 17, 18) I sɔ’n yoli Zoova i ya dan. Ɔ maan “ɔ sunmɛnnin i nuan ijɔfuɛ mun be sin titi naan be sa be sin Zoova wun. […] sanngɛ b’a sieman be su.” Asa’n, w’a tieman Zakari m’ɔ ti Ɲanmiɛn nuan ijɔfuɛ nin Ɲanmiɛn ɲrun jranfuɛ’n i ndɛ’n. Kusu’n ɔ nin i be ti ngawangawa. I kpa bɔbɔ’n, Famiɛn Zoasi yoli maan be kunnin Zakari. I sɔ’n kle kɛ ɔ siman ye kaan sa. Afin Zakari i si Zoyada nin i nin ti yɛ b’a kunmɛn i-ɔ.—2 Ɲol. 22:11; 24:19-22.
17. ?Wafa sɛ yɛ awieliɛ’n wieli Zoasi-ɔ?
17 Zoasi w’a sroman Zoova w’a guɛmɛn i ti nin i bo. Yɛ i bo w’a guaman kpa w’a mɛnmɛn i. Zoova seli kɛ: “Be nga be yo min finfin’n, ń yó be finfin wie.” (1 Sam. 2:30) Kɛ ɔ́ kɔ́ i ɲrun’n, Sirifuɛ mɔ be sonja’m b’a sɔnman’n, be kwlali Zoasi i “sonja kpanngban kpa” mun, kpɛkun “like yaya kpa” yoli i. Kɛ Sirifuɛ’m be ɔli’n i bɔbɔ i sufuɛ’m be wa kunnin i, Zakari m’ɔ kunnin i’n ti. I klun m’ɔ yo wi dan ti’n, “b’a siemɛn i kan be sie famiɛn’m be lɔ’n.”—2 Ɲol. 24:23-25; Mat. 23:35.
18. ?Kɛ nga Zeremin 17:7, 8 fa kan’n sa’n, ngue yɛ é yó naan y’a yoman kɛ Zoasi sa-ɔ?
18 ?Ngue yɛ Zoasi i su ndɛ’n kle e-ɔ? Zoasi ti kɛ waka mɔ i bo olui’n mlɔnman asiɛ’n nun kpa mɔ be fali waka be suɛnnin i bo’n sa. Kɛ Zoyada m’ɔ suɛn i bo’n wuli’n mɔ be nga be suman Zoova kpa’n be wa mannin be wun su’n, w’a kwlá jranman kekle. I sɔ’n kle kɛ e niaan klisifuɛ mun nin e osufuɛ’m be kwla uka e naan y’a sro Zoova. Sanngɛ nɛ́n i sɔ ngunmin ti yɛ ɔ fata kɛ e sro Zoova-ɔ. Sɛ e kunndɛ kɛ e nin Zoova e afiɛn mantan kpa’n, ɔ fata kɛ e tinuntinun e suan Biblu’n nun like, e bu su akunndan yɛ e srɛ Ɲanmiɛn titi. Sɛ e yo sɔ’n, é kló Ɲanmiɛn kpa yɛ é ɲin yí i.—An kanngan Zeremin 17:7, 8 nun; Kol. 2:6, 7.
19. ?Ngue yɛ Zoova kunndɛ kɛ e yo-ɔ?
19 Zoova seman e le kɛ e yo like nga e kwlɛmɛn i yo’n. Like nga Zoova kunndɛ kɛ e yo’n, Akunndanfuɛ’n 12:13 kɛn i ndɛ. Ɔ se kɛ: “Sro Ɲanmiɛn Kpli yɛ nanti i mmla’m be su, afin like ng’ɔ fata kɛ klɔ sran yo’n, i ti nin i bo’n yɛ ɔ o lɛ-ɔ.” Sɛ e sro Ɲanmiɛn’n, é kwlá nían Abdiasi nin Zoyada be ajalɛ’n su. Yɛle kɛ é kwlá jrán sa nga bé wá tɔ́ e su e ɲrun lɔ’n be ɲrun kekle. Yɛ like fi su kwlá yoman naan e nin Zoova e afiɛn w’a saci.
JUE 3 Ɔ su yɛ e fa e wla gua-ɔ
a Biblu’n nun’n kɛ be kan “srolɛ” ndɛ’n i bo’n sɔnnin. Wie liɛ’n be fa kan sran mɔ sro i wiengu’n m’ɔ usu i ɲrun’n i ndɛ. Wie liɛ kusu’n be fa kan sran mɔ i ɲin yi i wiengu annzɛ ɔ klo i kpa’n i ndɛ. Like suanlɛ nga nun’n é wá kán srolɛ wafa ng’ɔ kwla yo naan y’a su e si Ɲanmiɛn yakpa su’n i ndɛ.
b Abdiasi nga be kɛn i ndɛ wa’n nɛ́n i yɛle Abdiasi m’ɔ klɛli Biblu’n nun fluwa kun mɔ i dunman o su’n.
c FOTO’N I SU NDƐ’N: Aniaan kun mɔ be nvle’n liɛ’n nun lɔ’n be tannin be Zoova sulɛ’n ɔ su fa e fluwa mun mán aniaan wie mun.
d FOTO’N I SU NDƐ’N: Aniaan bla kpɛnngbɛn kun su kle aniaan talua kun wafa nga be fa telefɔnun’n be bo jasin fɛ’n. Aniaan kpɛnngbɛn kun su bo jasin fɛ’n nzra nun, i sɔ’n kle kɛ ɔ ti yakpafuɛ. Aniaan kpɛnngbɛn kun su kle aniaan wie mun Ɲanmiɛn Sielɛ’n Sua’n nun lɔ junman wie’m be dilɛ.