Like dan kpafuɛ nga Ɲanmiɛn yoli mannin e’n, i su ye silɛ
1. ?Like trele benin ti yɛ ye nga e si Zoova’n ti dan ɔn?
1 ‘Like kpa’ nga Zoova “fa man sran’n” be diman be yalɛ. Sanngɛ i awlɛn su Ba’n m’ɔ fa mannin naan ɔ fɛ i wun kpɔ e ti’n, i lifuɛ’n, ɔ lemɛn i wunsu. (Zak 1:17) Ye nga i sɔ’n ti e di’n, be flɛman. I wie yɛle kɛ Ɲanmiɛn kwla yaci e sa tɛ’n cɛ e. (Efɛ. 1:7) I ti yɛ Ɲanmiɛn i asenna’n wieman e nuan nun le’n niɔn. Ɔ maan, kɛ blɛ nga Zezi wuli nun’n ko ju’n, e tran e bu like nanndoliɛ kpa nga Ɲanmiɛn yoli mannin e’n, i su akunndan kpa.
2. ?Ngue yɛ e kwla yo naan ye nga e bɔbɔ nin e fuɛ mun’n e si i’n e ti kpɔlɛ tɛ’n su’n, w’a yo dan ekun ɔn?
2 Ajalɛ nga é fá naan e ye silɛ’n w’a yo dan’n: E Wla Kpɛnlɛ Cɛn’n tɔ Marsi anglo nga i le 30 su. Ɔ maan, le mɔcuɛ nga bé sín kwlaa naan cɛn sɔ’n w’a ju’n, e nin e fuɛ mun e kwla suan su like blɛ nga e su Ɲanmiɛn awlo lɔ’n nun. I liɛ’n e ye silɛ’n yó dan. Kpɛkun Biblu’n nun ndɛ ng’ɔ fata kɛ e kanngan nun blɛ sɔ nun’n m’ɔ ti i liɛ ngunmin kun’n, maan e nin be kanngan nun cɛn kwlaa. Kusu, maan e tinuntinun e tran e bu ye nga e ti kpɔlɛ tɛ’n yoli e’n, i akunndan. Kɛ e wunnin Zezi i wun m’ɔ fa kpɔli e ti’n i bo’n, wafa nga i sɔ’n kacili e akunndan bulɛ wafa’n, maan e tran e bu su akunndan wie. I wie yɛle wafa nga siɛn’n e bu e bɔbɔ e wun, ɔ nin Zoova, nin sran uflɛ, nin e ɲrun lɔ sa mun, mɔ laa’n e bumɛn i sɔ’n. E jue uflɛuflɛ i 8 su nin i 109 su nga é tó be E Wla Kpɛnlɛ Cɛn Aɲia i bo’n, sɛ e suan be tolɛ’n, i sɔ’n úka e wie.—Jue. 77:13.
3. ?Wafa sɛ yɛ e kwla yi e ye silɛ’n i nglo ɔ?
3 E ye silɛ’n i nglo yilɛ: Sɛ e si e ti kpɔlɛ tɛ’n i su ye’n, saan é yí Zoova i dunman’n ɔ nin i sran klolɛ dan mɔ i ti’n ɔ fɛli i Wa’n mannin’n, be nglo. (Jue. 145:2-7) Marsi, Avrili nin Mɛ anglo’m be nun’n, awloboawlobo wie’m be siesie be wun naan be nunfuɛ’m be nun kun annzɛ kun tra su w’a yo cɛn kunngun atin bofuɛ. Be yo sɔ be fa yi be ye silɛ’n i nglo. Sɛ amun kwla yoman cɛn kunngun atin bofuɛ’n, atrɛkpa an kwla “kunndɛ blɛ” naan amun a uka amun jasin fɛ’n bolɛ’n su. (Efɛ. 5:16, NW) E ye silɛ’n ti’n, nga e kwla yo i ekun’n yɛle kɛ e yia sran uflɛ E Wla Kpɛnlɛ Cɛn Aɲia’n i bo. (Ngl. 22:17) I lɛ nun’n, maan e dun mmua klɛ be nga é yía be’n be dunman fluwa kun su. Be yɛle be nga e ko nian be osu’n, be nga e kle be Biblu’n nun like’n, e osufuɛ mun, e wiengu junman difuɛ ɔ nin e mantanfuɛ mun. Kpɛkun, kɛ é bó sran’m be yialɛ fluwa’n i cɛcɛlɛ bo’n, maan e fa e wun wla junman sɔ nun naan e di i kpa.
4. ?Ninnge kpa benin mun yɛ e kwla yo be anglo nga nun ɔ nin anglo nɲɔn nga bé bá lɛ’m be nun ɔn?
4 Anglo nga nun mɔ é yó E Wla Kpɛnlɛ Cɛn Aɲia’n ɔ nin anglo nɲɔn nga bé bá lɛ’m be nun’n, e kwla yi i nglo kpa ekun kɛ e si Zoova m’ɔ fɛli i wa’n mannin’n, i ye dan. Blɛ sɔ nun’n, ‘Krist i anyanbeun’n m’ɔ cɛnnin mɔ be kwla kɛn-mɛn i be nuan nun’ nin i wun m’ɔ fa kpɔli e ti’n, ajalɛ nga e ko fa naan be su ye silɛ’n w’a yo dan naan y’a yi i nglo’n, maan e fa.—Efɛ. 3:8.