Maan e fa di junman blɛ kwlaa nun
1. ?Wafa sɛ yɛ fluwa nɲa ?Amun kunndɛ kɛ amún sí ndɛ ng’ɔ ti nanwlɛ’n? kwla uka e ɔ?
1 Be yili fluwa nɲa ?Amun kunndɛ kɛ amún sí ndɛ ng’ɔ ti nanwlɛ’n? kɛ e fa bo sran’m be Biblu’n nun like klelɛ bo. Sanngɛ kusu ɔ ti fluwa kpa kun mɔ e kwla fa uka sran mun naan b’a ti nanwlɛ ndɛ’n niɔn. Sɛ é kwlá sé’n, sɛ nanwlɛ’n ti waka mma’n, nn fluwa sɔ’n úka e naan y’a lua waka mma sɔ’n. (Aku. 11:6) Ajalɛ nga e kwla fa su naan y’a fa fluwa nɲa sɔ’n y’a di junman kpa’n, é wá kán be nun wie’m be ndɛ.
2. ?Wafa sɛ yɛ e kwla fa fluwa nɲa’n, e bo yalɛ kokolɛ bo ɔ?
2 E kwla fa bo yalɛ kokolɛ bo: E kwla fa fluwa nɲa’n e man sran’n. Yɛ e fa kosan nsiɛn nga be o i bue klikli’n su e kle i, yɛ e usɛ i kɛ: “?Kosan nga’m be nun’n, benin yɛ w’a fa usa ɔ wun le ɔ?” Kɛ sran’n ko tɛ e su’n, wafa nga be tɛli kosan nga ɔ fa kleli e’n be nun kun su’n, maan e fɛ i ɲin e sie su. Yɛ Biblu’n nun ndɛ mma nga be klɛli be fluwa’n nun’n, maan e kanngan be nun kun nun. I sin’n, maan e kanngan fluwa’n i bue kasiɛn’n nun annzɛ e bo i kpɔlɛ e kle i. Kpɛkun maan e fa fluwa Biblu’n kle e mɛn i. Kannzɛ bɔbɔ w’a faman’n, sanngɛ fluwa’n nɲa m’ɔ sɔli nun’n, ɔ kwla yo naan ndɛ nanwlɛ’n w’a wla ndin i awlɛn’n nun.—Mat. 13:23.
3. ?Sɛ sran’n i sa o like nun’n, ngue yɛ e kwla yo ɔ?
3 Sɛ sran’n i sa o like nun’n: E kwla se i kɛ: “Kɛ mɔ ɔ sa o like nun’n, ń yáci fluwa nɲa nga ɔ sa nun. Kosan cinnjin nsiɛn be o su. Sran sunman be fa usa be wun. Yɛ wafa nga Biblu’n tɛ be su kunngunngun’n, ɔ kan be ndɛ. Cɛn uflɛ’n, wafa nga fluwa’n i nun ndɛ’n yoli wɔ’n, a kwla bo su kle min.”
4. ?Kɛ e bo jasin’n akpɔ nuan’n, ngue ndɛ yɛ e kwla kan naan y’a fa fluwa nɲa’n y’a man ɔn?
4 Kɛ e bo jasin’n akpɔ nuan’n: Maan e yo sran’n i like. Yɛ e usɛ i kɛ: “?W’a fa kosan nga’m be nun wie w’a usa ɔ wun le? [Maan sran’n tɛ kosan’n su.] Biblu’n tɛ be su weinwein, ɔ maan sran klun jɔ fɔuun. I kwlaa sɔ’n wo fluwa nga nun.” Sɛ ɔ le blɛ’n, e nin i e kwla koko kosan’m be su tɛlɛ sɔ’m be nun kun su yalɛ. Kpɛkun e kwla fa fluwa Biblu’n kle e mɛn i bɔbɔ.
5. ?Sɛ e toman sran’m be awlo’n, wafa sɛ yɛ cɛn kunngun’n, e kwla fa fluwa nɲa’n e di junman ɔn?
5 Be nga e toman be awlo’n: Jasin bowlɛ wie nun’n, sɛ jasin bofuɛ’m b’a toman awlofuɛ’n, be yaci fluwa’n i awlo lɛ. Be sie i lika nga i ngunmin kwla wun i’n. Sɛ amun lɔ’n, be tɛ i sɔ yo’n, cɛn kunngun amun nian ajalɛ sɔ’n su be yaci fluwa nɲa ?Amun kunndɛ kɛ amún sí ndɛ ng’ɔ ti nanwlɛ’n? sran’m be awlo lɔ. Kɛ amun sa amun sin lɔ ekun’n, amun kwla se sran’n kɛ: “Acɛnnin sin’n, e sinnin wa y’a toman wɔ. E fali fluwa nɲa nga e wlali ɔ anuan’n bo. ?Kosan nga’m be nun’n, benin yɛ a klo kɛ e tɛ su e man wɔ ɔ?”
6. ?Ngue ti yɛ kɛ be fa fluwa nɲa ?Amun kunndɛ kɛ amún sí ndɛ ng’ɔ ti nanwlɛ’n? bo jasin fɛ’n, ɔ ti pɔpɔ ɔ?
6 Fluwa nɲa ?Amun kunndɛ kɛ amún sí ndɛ ng’ɔ ti nanwlɛ’n? kan ndɛ nanwlɛ’n i trele yɛ i wlɛ wunlɛ yoman ya. Kannzɛ sran’n i Ɲanmiɛn sulɛ wafa’n annzɛ i finwlɛ’n ti sɛ ti sɛ o, fluwa’n i nun ndɛ’n ló i. I fa manlɛ kusu yoman ya. Ba kanngan mun ɔ nin jasin bofuɛ uflɛuflɛ mun bɔbɔ be kwla fa man. ?Blɛ kwlaa ng’ɔ nin i fata’n nun’n, amun fa fluwa sɔ’n di junman?