Ndɛ tre kun
?Bo kun yolɛ Ɲanmiɛn sulɛ nun’n i bo’n yɛle benin andɛ?
1, 2. (a) ?Ngue like yɛ mɛn wunmuan’n nun’n, sran kpanngban be su yo i andɛ ɔ? (b) ?Like ɲɛnmɛn benin yɛ sran nga be awlɛn ti kpa’n be lafi su kɛ bé ɲɛ́n i ɔ?
MƐN wunmuan’n nun’n, sran kpanngban be kunndɛ kɛ be bo yo kun Ɲanmiɛn sulɛ nun. Sran akpinngbin tra su nga be bo ti kun sɔ’n, be fin nvlenvle’n kwlaa nin mɛnmɛn’n kwlaa be nun, yɛ be aniɛn’n ti ngunminngunmin. Afuɛ nuan kwlaa nun’n, sran kpanngban ekun be wa uka be su. Biblu’n flɛ sran sɔ mun kɛ Zoova i “lalofuɛ mun” nin “sran kpanngban kpa.” Be su Ɲanmiɛn “wia nun nin kɔnguɛ.” (Ezai 43:10-12; Sa Nglo Yilɛ 7:9-15) ?Ngue ti yɛ be yo sɔ ɔ? Afin be wunnin i wlɛ kɛ Zoova kunngba cɛ yɛ ɔ ti Ɲanmiɛn’n niɔn. I sɔ’n yoli maan be mɛn dilɛ nun’n be nantili Ɲanmiɛn i mmla’m be su. Asa ekun’n, be suɛnnin i kɛ mɛn tɛ nga ‘su kɔ i bue nuan,’ naan ɔ ka kaan Ɲanmiɛn wá núnnún i. Kpɛkun ɔ́ fɛ́ i mɛn uflɛ m’ɔ ti klanman’n, ɔ́ káci mɛn tɛ sɔ’n.—2 Timote 3:1-5, 13; 2 Piɛr 3:10-13.
2 Ɲanmiɛn Ndɛ’n ta e nda kɛ: ‘Ɔ ka kaan sa, be su wunman klunwifuɛ’n kun. Yalɛfuɛ [annzɛ wun ase kanfuɛ] mun yɛ mɛn’n ɔ́ wá yó be liɛ ɔ. Be wun jɔ́ be kpa fɔuun.’ (Jue Mun 37:10, 11) ‘Mɛn’n ɔ́ yó sran kpa’m be liɛ. Bé trán su tititi.’ (Jue Mun 37:29) ‘Ɲanmiɛn núnnún be ɲinmuɛn’n kwlaa, wie’n su tranman lɛ kun. Be su yoman sɛ kun, be su sunman kun, be su wunman ɲrɛnnɛn kun, afin laa ninnge sɔ’m be su tranman lɛ kun.’—Sa Nglo Yilɛ 21:4.
3. ?Wafa sɛ yɛ Ɲanmiɛn sulɛ nun’n, sran’m be bo’n su yo kun kpa ɔ?
3 Be nga andɛ be bo yo kun be su Ɲanmiɛn’n, be yɛ bé yó mɛn uflɛ sɔ’n i nun sran klikli mun ɔn. Be suannin Ɲanmiɛn klun sa’n, kpɛkun kɛ be wunmiɛn kwla ju lɛ’n, i su yɛ be nian be yo Ɲanmiɛn klun sa’n niɔn. Zezi kleli kɛ Ɲanmiɛn i klun sa’n i silɛ’n nin i yolɛ’n be ti cinnjin. Ɔ seli kɛ: ‘Kɛ be se kɛ bé ɲán anannganman nguan’n, i bo’n yɛle kɛ bé sí wɔ mɔ ɔ kunngba cɛ yɛ a ti Ɲanmiɛn’n nin Zezi Klist mɔ a sunmɛnnin i’n.’ (Zan 17:3) Akoto Pɔlu klɛli i kɛ: ‘Mɛn’n nin i nun ninnge kwlaa mɔ sran ɲin blo su’n, bé wíe, sanngɛ sran ng’ɔ yo Ɲanmiɛn klun sa’n, ɔ́ ká lɛ tititi.’—1 Zan 2:17.
?Bo kun yolɛ’n i bo kpa’n yɛle benin?
4. (a) ?Sran kpanngban kpa mɔ be yia’n, mɔ be bo yo kun be su Ɲanmiɛn andɛ’n, i bo kpa’n yɛle benin? (b) ?Wafa sɛ yɛ Biblu’n kan sran’m be ti yialɛ sɔ’n i ndɛ ɔ?
4 ?Andɛ’n, sran kpanngban nga be bo ti kun mɔ be yia be su Ɲanmiɛn likawlɛ sɔ’n, i bo kpa’n yɛle benin? I sɔ’n kle weiin kɛ mɛn tɛ nga i nunnunlɛ’n w’a mantan koko kpa. Naan kɛ be ko nunnun mɛn tɛ nga cɛ’n, Ɲanmiɛn i mɛn uflɛ’n ɔ́ wá bó i bo. Sran’m be ti yialɛ dan sɔ’n i su ndɛ mɔ Ɲanmiɛn nuan ijɔfuɛ’m be kannin’n, e wun kɛ ɔ su kpɛn su. Ɲanmiɛn nuan ijɔfuɛ’m be ndɛ sɔ’n i kun yɛle kɛ: ‘Cɛn wie lele [mɛn’n i awieliɛ blɛ nga nun’n] Anannganman i kpɔlɛ’n su sua’n [i sulɛ kpafuɛ’n m’ɔ le ɲrun dan’n], oka ndɛnndɛn kpa mun [Ɲanmiɛn sulɛ wafa uflɛ’m be kwlaa] be ti su lɔ yɛ bé kó kplɛ́n i ɔ. Kpɛkun mɛn nunfuɛ’m be kwlaa be ti wá yía lɛ. Nvlenvle’m be nunfuɛ’m bé tú ajalɛ bé kɔ́, bé sé kɛ: “An bla maan e wɔ Anannganman i oka’n su lɔ. E wɔ Zakɔbu i Ɲanmiɛn’n i sua’n nun lɔ naan ɔ kle e kɛ e nanti’n, naan e nanti i atin’n su, afin Siɔn lɔ yɛ mmla’n fin ɔn. Zerizalɛmu lɔ yɛ Ɲanmiɛn ndɛ’n fin ba ɔ.”’—Mise 4:1, 2; Jue Mun 37:34.
5, 6. (a) ?Wafa sɛ yɛ Mise 4:1, 2 ɔ kpɛn su andɛ ɔ? (b) ?Kosan benin mun yɛ ɔ fata kɛ e usa e wun ɔn?
5 Kɛ nga Ɲanmiɛn nuan ijɔfuɛ’m be dun mmua kannin’n sa’n, andɛ’n, nvlenvle’m be kwlaa be nun sran akpinngbin tra su be ba Zoova i sua’n nun. Kɛ sran sɔ’m be suan ninnge nga Ɲanmiɛn Zoova waan klolɛ su ɔ́ yó be’n, mɔ be suan sran’n i wafa nga Ɲanmiɛn ti’n i su like’n, i sɔ liɛ’n yo maan be kaci be nzuɛn’n. Be wun ase kanlɛ yɛ be fa kunndɛ Ɲanmiɛn i klun sa’n i silɛ’n niɔn. Wafa nga be srɛ Ɲanmiɛn’n, ɔ ti kɛ jue tofuɛ’n i liɛ’n sa. I waan: ‘Kle min ɔ klun sa’n i yolɛ’n. Wɔ yɛ a ti min Ɲanmiɛn’n niɔn.’—Jue Mun 143:10.
6 ?Sran kpanngban kpa mɔ Zoova su yia be kɛ be bo yo kun naan be su i’n, e wun kɛ e o be nun wie? ?Ninnge nga e suannin be Zoova i Ndɛ’n nun’n, be nuan su ajalɛ nga e fa’n, ɔ kle kɛ e wun i wlɛ kɛ Ndɛ sɔ’n fin Zoova sakpasakpa? ?Wafa sɛ yɛ é wá “nánti i atin’n su” ɔ?
Wafa nga bo kun yolɛ’n ɔ su yo ye’n
7. (a) ?Wan nin wan mun yɛ be bo yó kun Ɲanmiɛn sulɛ’n nun ɔn? (b) ?Ngue ti yɛ ɔ fata kɛ ndɛndɛ kpa e kaci Zoova i sufuɛ andɛ ɔ? ?Yɛ wafa sɛ yɛ e kwla uka e wiengu mun naan b’a yo sɔ wie ɔ?
7 Like nga Zoova waan ɔ́ yó’n, yɛle kɛ klɔ sran nin aolia nun sran m’ɔ yili be’n be bo yo kun be su i kpa. Nanwlɛ, cɛn nga like kwlaa nga be lo wunmiɛn’n bé sú Zoova mɔ i kunngba cɛ yɛ ɔ ti Ɲanmiɛn’n, e su minndɛ kpa kɛ ɔ ju! (Jue Mun 103:19-22) Sanngɛ, kwlaa naan i sɔ liɛ’n w’a yo ye’n, ɔ fata kɛ Zoova nunnun be kwlaa nga be kunndɛman kɛ bé yó i klun sa’n. Sanngɛ kusu nn i klun sa sɔ’n ti like kpa. Kɛ m’ɔ si aunnvuɛ’n ti’n, ɔ dun mmua kan sa ng’ɔ́ wá yó be’n be ndɛ naan lika kwlaa nun’n, sran’m b’a kwla kaci be nzuɛn’n. (Ezai 55:6, 7) I sɔ’n ti’n, andɛkɛn’n, Zoova i Lalofuɛ’m be se ‘mɛnmɛn nin nvlenvle’n kwlaa nun’n, ɔ nin be kwlaa nga be aniɛn’n ti fanunfanun’n, ɔ nin sran wafawafa’n kwlaa,’ be kɛ: ‘Maan amun ɲin yi Ɲanmiɛn, an mɛnmɛn i, afin sran’m be ndɛ bulɛ blɛ’n w’a ju. I m’ɔ yili ɲanmiɛn su lɔ’n, nin asiɛ’n, nin jenvie’n, ɔ nin nzue ti mun’n, an koto i bo!’ (Sa Nglo Yilɛ 14:6, 7) ?Y’a kplin flɛlɛ sɔ’n su? Sɛ e kplinnin su’n, nn e cenjele like yɛle kɛ e yia sran uflɛ mun kɛ be si Ɲanmiɛn Kpli naan be su i wie.
8. ?Kɛ e ko suan like nga Biblu’n kle’n i bo bolɛ ninnge mun’n, ngue like ekun yɛ ɔ fata kɛ e tu e klun e yo ɔ?
8 Sran nga be su Zoova be nuan bui su mɔ sanngɛ be bɔbɔ be klunklo ninnge mun yɛ be ɲin blo be kunndɛlɛ’n su’n, nɛ́n i sɔfuɛ mun yɛ Zoova kunndɛ kɛ be su i ɔ. Ɲanmiɛn kunndɛ kɛ sran’m be “si i klun sa’n kpa” naan be nian su nanti. (Kolɔsfuɛ Mun 1:9, 10) I sɔ’n ti’n, be nga be si ye’n, mɔ be suannin like nga Biblu’n kle’n i bo bolɛ ninnge mun’n, be mian be ɲin be yo sran. Like nga be klo i’n yɛle kɛ bé sí Zoova kpa trá laa’n, naan b’a wun wafa nga i Ndɛ’n ti kploun’n i wlɛ kpa. Kpɛkun bé nían su bé nánti. Be kunndɛ kɛ bé yí e Si m’ɔ o ɲanmiɛn su lɔ’n i nzuɛn fanunfanun’m be nglo naan bé bú ninnge’m be su akunndan kunngba nga ɔ bu’n wie. I sɔ’n wla be fanngan maan sran’m be nguan delɛ junman mɔ Zoova maan be su di i asiɛ’n su’n, be kunndɛ i dilɛ’n i wun atin. ?Like kunngba sɔ’n yɛ e klo kɛ é yó ɔ?—Mark 13:10; Ebre Mun 5:12–6:3.
9. ?Wafa sɛ yɛ bo kun yolɛ’n kwla yo ye andɛ ɔ?
9 Biblu’n waan ɔ fata kɛ be nga be su Zoova’n, be bo yo kun. (Efɛzfuɛ Mun 4:1-3) Kannzɛ bɔbɔ mɛn nga e o nun yɛ’n i nunfuɛ’m be bubu be wun nun, kpɛkun fɔ ng’ɔ o e nun’n, ɔ tin e su’n, sanngɛ dɔ nga su ɔ nin i fata kɛ e bo yo kun. Zezi tuli i klun srɛli Ɲanmiɛn kɛ i sɔnnzɔnfuɛ’m be kwlaa be yo sran wunmuan. ?I sɔ liɛ’n i bo’n yɛle benin? I klikli su’n, yɛle kɛ be nin Zoova nin i Wa’n be afiɛn’n mántan kpa. I nɲɔn su’n yɛle kɛ be nin be wiengu’m be bo yó kun. (Zan 17:20, 21) I sɔ’n ti’n, Klistfuɛ’m be asɔnun’n yɛ Zoova fa kle i nvle nunfuɛ’m be like ɔ.
Ajalɛ nga ti yɛ e bo kwla yo kun’n
10. (a) ?Kɛ e bɔbɔ e fa Biblu’n e kunndɛ kosan nga e wunman be wlɛ’n be su tɛlɛ’n, ngue like nun yɛ e kɔ e ɲrun ɔn? (b) Nian kosan nga be o ndɛ kpɔlɛ nga nun’n be su, naan bu ninnge nga be yo maan Klistfuɛ’m be bo yo kun’n be su akunndan.
10 Ninnge cinnjin nso mɔ be yo maan e bo kwla yo kun’n Ɲanmiɛn sulɛ nun’n, be o ndɛ kpɔlɛ nga nun. Kɛ é tɛ́ kosan’m be su’n, maan e bu wafa nga be kan e nin Zoova e afiɛn mantanlɛ’n. Kpɛkun wafa nga e nin e niaan Klistfuɛ mun e afiɛn’n kwla mantan’n, maan e bu i akunndan wie. Sɛ e bu kosan sɔ’m be su akunndan’n, naan e kanngan be wun lɛ Biblu’n nun ndɛ mma’m be nun’n, i sɔ’n úka e naan ngwlɛlɛ m’ɔ fin Ɲanmiɛn’n, y’a si i y’a tra laa’n. I sɔ’n úka e ekun naan y’a si akunndan bu, naan y’a wun sa wlɛ. Nzuɛn sɔ’m be ti e ngba e cinnjin. (Nyanndra Mun 5:1, 2; Filipfuɛ Mun 1:9-11) Maan e bu ninnge sɔ’m be akunndan kunngunngun e nian.
(1) E kplin su kɛ Zoova yɛ ɔ le atin kle like ng’ɔ ti kpa’n nin ng’ɔ ti tɛ’n niɔn. ‘Nán lafi ɔ bɔbɔ wɔ akunndan liɛ’n su. Anannganman i su yɛ lafi ɔ. Sɛ á fín ase o á jáo o, Anannganman i dunman, yɛ bo ɔ. Sɛ a bo i dunman’n, ɔ́ bó ɔ ɲrun atin’n.’—Nyanndra Mun 3:5, 6.
?Ngue ti yɛ kɛ é fá ajalɛ mun’n, ɔ fata kɛ e kunndɛ kɛ Zoova man e afɔtuɛ naan ɔ kle e atin’n niɔn? (Jue Mun 146:3-5; Ezai 48:17)
(2) Ɲanmiɛn Ndɛ’n kle e atin. ‘Ɲanmiɛn i ndɛ mɔ e kan kleli amun’n, an tili yɛ an fali su. Amun a bumɛn i kɛ ɔ ti sran liɛ, sanngɛ an wunnin i kɛ ɔ ti Ɲanmiɛn ndɛ sakpa m’ɔ kwla yo amun mɔ an lafi Klist su’n, amun wun sa ye.’—1 Tɛsalonikfuɛ Mun 2:13.
?Sɛ e yo like nga e “bu i kɛ” ɔ ti kpa’n, ngue ti yɛ i sɔ’n kwla yo tɛ man e ɔ? (Nyanndra Mun 14:12; Zeremi 10:23, 24; 17:9)
?Sɛ e siman ndɛ nga Biblu’n kɛn i like wie su’n, ngue yɛ ɔ fata kɛ e yo ɔ? (Nyanndra Mun 2:3-5; 2 Timote 3:16, 17)
(3) E ngba e di Ɲanmiɛn ninnge’m be nun aliɛ kunngba’n. ‘Amun mma’m be kwlaa bé yó min sɔnnzɔnfuɛ.’ (Ezai 54:13) “Maan e bu e wiengu’m be akunndan e wla be fanngan naan be klo be wun yɛ be yo sran ye. Nán maan e yaci yialɛ’n kɛ sran wie’m be yo’n sa. Sanngɛ maan e yia e tu e wun fɔ. Siɛn’n mɔ an wun kɛ e Min’n i cɛn’n su mantan’n, an yo i sɔ tra su.” (Ebre Mun 10:24, 25)
?Ninnge mɔ Zoova siesieli kɛ ɔ́ fá tá sran mun Ɲanmiɛn ninnge’m be nun’n, mmlusuɛ benin yɛ be nga be di be su’n, bé ɲɛ́n i ɔ? (Ezai 65:13, 14)
(4) Zezi Klist yɛ ɔ sie e ɔ, nán klɔ sran ɔn. ‘Amun liɛ’n, nán an yo amun wun kɛ be flɛ amun Nannan, afin amun su kpɛn m’ɔ ti amun like klefuɛ’n ti kunngba cɛ, yɛ amun kwlaa an ti niaan. Nán an flɛ klɔ sran fi amun si, afin amun Si’n ti kunngba cɛ, i yɛ ɔ o ɲanmiɛn su lɔ’n niɔn. Nán an yo amun wun kɛ be flɛ amun sran’m be su’n kpɛn, afin amun su kpɛn’n ti kunngba cɛ, yɛle Klist.’—Matie 23:8-10.
?Ɔ nin i fata kɛ e nun kun sa bu i kɛ i kpa tra i wiengu? (Rɔmfuɛ Mun 3:23, 24; 12:3)
(5) E lafi su kɛ Ɲanmiɛn Sielɛ Blɛ’n i kunngba cɛ yɛ ɔ kwla uka sran mun ɔn. ‘I sɔ’n ti’n, amun liɛ’n, an se kɛ: “E Si mɔ a o ɲanmiɛn su lɔ’n, maan sran’m be wun i wlɛ kɛ wɔ ngunmin yɛ a ti Ɲanmiɛn’n niɔn, maan ɔ sielɛ blɛ’n ju, maan e mɔ e wo asiɛ’n su wa’n e yo ɔ klun sa kɛ be mɔ be o ɲanmiɛn su lɔ’n be yo’n sa.”’ ‘An dun mmua fa amun wun man Ɲanmiɛn maan ɔ sie amun, yɛ an yo i klun sa’n, i sin ɔ́ wá fá ninnge sɔ’n kwlaa úka su mán amun.’—Matie 6:9, 10, 33.
?Wafa sɛ yɛ kɛ ‘e dun mmua fa e wun man Ɲanmiɛn maan ɔ sie e’n,’ i sɔ’n uka e naan e bo w’a yo kun titi ɔ? (Mise 4:3; 1 Zan 3:10-12)
(6) Klistfuɛ’m be bo kun yolɛ nun’n, Ɲanmiɛn wawɛ’n uka Zoova i sufuɛ mun naan b’a yi nzuɛn nga be ti kpa’n be nglo. ‘Sa nga Ɲanmiɛn wawɛ’n maan sran yo’n yɛ: ɔ maan be klo Ɲanmiɛn nin sran, be klun jɔ, be wla gua ase, be tra be awlɛn, be yo sran ye, be yo aklunye, be di nanwlɛ, be yo wɛtɛɛ, yɛ be yo sa i nuan su.’—Galasifuɛ Mun 5:22, 23.
?Ngue like yɛ ɔ fata kɛ e yo naan y’a kwla yi sa nga Ɲanmiɛn wawɛ’n maan sran yo’n, i nglo ɔ? (Sa Nga Be Yoli’n 5:32)
?Wafa sɛ yɛ kɛ Ɲanmiɛn wawɛ’n sie e’n, i sɔ liɛ’n yo maan e nin e niaan Klistfuɛ mun e tranlɛ’n yo kpa ɔ? (Zan 13:35; 1 Zan 4:8, 20, 21)
(7) Ɲanmiɛn i sufuɛ nanwlɛfuɛ’m be kwlaa be bo Ɲanmiɛn Sielɛ Blɛ’n i jasin fɛ’n. ‘Bé wá kán Ɲanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Ɲanmiɛn ndɛ’n. I sin yɛ mɛn i awieliɛ’n ɔ́ jú ɔ.’—Matie 24:14.
?Ngue like yɛ ɔ fata kɛ ɔ wla e fanngan naan y’a tu e klun y’a di jasin fɛ’n bolɛ junman sɔ’n i wie ɔ? (Matie 22:37-39; Rɔmfuɛ Mun 10:10)
11. ?Kɛ e mɛn dilɛ nun’n, e fa ndɛ nanwlɛ ng’ɔ o Biblu’n nun i su’n, i bo’n gua sɛ?
11 E bo m’ɔ yo kun Zoova sulɛ nun ti’n, e nin Zoova e afiɛn’n mantan kpa, kpɛkun i sɔ’n yo maan e nin e niaan nga e nin be su Ɲanmiɛn’n, e tran klanman. Jue Mun 133:1 waan: ‘Nanwlɛ, kɛ aniaan’m be tran likawlɛ’n i sɔ’n ti kpa, ɔ yo ɲɛnmɛn.’ Kɛ e kpɔci mɛn’n nin i nun sran mun mɔ be bu be bɔbɔ be ngunmin be wun akunndan’n, ɔ nin i nun bian nin bla kunndɛlɛ sukusuku’n, ɔ nin i nun nzaje sa yolɛ’n, mɔ e nin be nga be klo Zoova sakpa’n, mɔ be fɛ i mmla’m be su’n e tran’n, nanwlɛ, i sɔ’n yo ɲɛnmɛn dan!
Maan e wla e wun nun bubulɛ ninnge’m be ase
12. ?Ngue ti yɛ ɔ fata kɛ e wla Ɲanmiɛn i su ɲin kekle yolɛ’n, ɔ nin i mmla’m be kpalolɛ’n be ase ɔ?
12 E like nanndoliɛ’n yɛle e bo m’ɔ ti kun mɛn wunmuan’n nun’n. I sɔ’n ti’n, kɛ ɔ ko yo naan i sɔ liɛ’n w’a saciman’n, ɔ fata kɛ e wla ninnge kwlaa nga be kwla yo maan e bubu e wun nun’n, be ase. Ninnge sɔ’m be nun kun yɛle Ɲanmiɛn i su ɲin kekle yolɛ’n, ɔ nin i mmla’m be kpalolɛ’n. Zoova uka e naan y’a wla i sɔ ayeliɛ’n i ase, afin ɔ kle e kɛ i sɔ ninnge’m be fin Bae Satan. (2 Korɛntfuɛ Mun 4:4; Sa Nglo Yilɛ 12:9) Satan yɛ ɔ yoli maan Adam nin Ɛvu be ɲinfu be yili Ɲanmiɛn i ndɛ’n i ase, kpɛkun be fali ajalɛ m’ɔ nin Ɲanmiɛn klun sa’n kɔman likawlɛ’n niɔn. I bo nzuɛn’n yɛle ɲrɛnnɛn m’ɔ tɔli be bɔbɔ be su ɔ nin e su’n. (Bo Bolɛ 3:1-6, 17-19) Ɲanmiɛn i su ɲin kekle yolɛ’n, ɔ nin i mmla’m be kpalolɛ’n w’a tru mɛn wunmuan’n nun. Ɔ maan, sɛ e akunndan’n ti sran’n, nn é sé kɛ ɔ fata kɛ e sie i naan e kle i atin.
13. ?Ngue like yɛ ɔ́ klé weiin kɛ e su buabua e wun naan y’a tran Ɲanmiɛn i mɛn klanman mɔ sa kpa yofuɛ’m bé trán nun’n, i nun wie ɔ?
13 Ɲanmiɛn su lɔ nin asiɛ uflɛ’n mɔ ‘be nga be yo sa kpa’n bé trán’ nun’n, mɔ Zoova tali e nda kɛ ɔ́ mán e’n, amun e bu be akunndan e nian. (2 Piɛr 3:13) ?Ɔ fataman kɛ i sɔ’n wla e fanngan naan y’a buabua e wun y’a minndɛ blɛ nga sa kpa yolɛ’n wá trú mɛn wunmuan’n nun’n? I sɔ’n kle e kɛ e fa afɔtuɛ klanman nga Biblu’n man e yɛ’n su: ‘Nán an klo mɛn dilɛ’n, nán an klo ninnge nga be o mɛn’n nun’n. Sran ng’ɔ klo mɛn dilɛ’n, nn ɔ kloman e Si’n.’ (1 Zan 2:15) I sɔ’n ti’n, e kpalo akunndan nga mɛn nunfuɛ’m be bu’n, mɔ i wie yɛle ɲin kekle yolɛ’n, ɔ nin e bɔbɔ e wun akunndan bulɛ ngboko’n, ɔ nin bian nin bla kunndɛlɛ sukusuku’n, ɔ nin nzaje sa yolɛ’n. Kpɛkun, kannzɛ bɔbɔ fɔ m’ɔ o e nun’n ti’n, e konvi sɔ sa tɛ yolɛ’n, sanngɛ e fa Zoova i nuan ndɛ’n i tielɛ’n nin e klun mɔ e tu e fɛ i ndɛ’n su’n, e kaci e nzuɛn. E mɛn dilɛ wafa’n i kwlaa kle weiin kɛ akunndan nga e bu be’n, ɔ nin like nga ɔ o e awlɛn’n nun mɔ maan e yo ninnge mun’n, i kwlaa’n ti Ɲanmiɛn klun sa yolɛ ngunmin.—Jue Mun 40:9.
14. (a) ?Ngue ti yɛ ɔ ti cinnjin kɛ blɛ nga nun’n, e fa ajalɛ e suan Zoova i mmla mun naan e nanti be su ɔ? (b) ?Biblu’n nun ndɛ mma nga be o ndɛ kpɔlɛ’n nun’n, be su akunndan benin yɛ e bɔbɔ e bu ɔ?
14 Kɛ blɛ nga Zoova sieli i kɛ ɔ́ núnnún mɛn tɛ nga nin be nga be klo mɛn sɔ’n i nun ninnge mun ɔ́ wá jú’n, ɔ su cuɛncuɛnmɛn i ja ase. Be nga be suan Ɲanmiɛn i klun sa’n yolɛ’n, mɔ sanngɛ be te klo mɛn’n i nun ninnge mun dan’n, nán be ti yɛ Ɲanmiɛn sú blɛ sɔ’n i siɛn annzɛ ɔ́ káci i mmla mun naan w’a yo be liɛ’n su ɔ. Blɛ nga nun yɛ ɔ fata kɛ e fa ajalɛ ɔ! (Lik 13:23, 24; 17:32; 21:34-36) Zoova fɛ i Ndɛ’n nin i anuannzɛ’n fa kle sran kpanngban kpa’m be atin. I sɔ’n ti’n, kɛ e wun kɛ be nian ajalɛ sɔ’n su be bo yo kun be nanti i atin m’ɔ́ yó maan bé trán mɛn klanman nun’n i su’n, nanwlɛ, i sɔ’n yo ɲɛnmɛn dan! Ɔ maan, kɛ é súan Zoova su like kɔ́ i ɲrun’n, é wá kló i dan trá laa’n kpɛkun é kúnndɛ kɛ é sú i.
I nun flanlɛ
• ?Sran’m be Ɲanmiɛn sulɛ wafa nun’n, ngue yɛ Zoova kunndɛ ɔ?
• ?Kɛ e ko suan like nga Biblu’n kle’n i bo bolɛ’n, ngue like ekun yɛ ɔ fata kɛ e tu e klun yo ɔ?
• ?Ngue like yɛ e bɔbɔ e kwla yo naan e nin Zoova i sufuɛ’m be onga’n e bo w’a yo kun ɔn?
[Foto i su ndɛ, bue 4]
‘Wun ase kanfuɛ mun yɛ mɛn’n ɔ́ wá yó be liɛ ɔ. Be wun jɔ́ be kpa fɔuun!’