Maan e nin Ɲanmiɛn e nanti naan e ɲan like ng’ɔ ti kpa’n
‘Sɛ ń kwlá sé’n, aunmuan yɛ amun luali ɔ, seke m’ɔ tu’n kusu yɛ amún wá tí ɔ.’—OZE 8:7.
1. ?Wafa sɛ yɛ e nin Zoova e kwla nanti ɔ?
WIE liɛ’n, amun waan amún tú ajalɛ kɔ́ lika wie. Kusu’n, lika sɔ’n i nun kɔlɛ’n leman ba. Sɛ sran kun m’ɔ si lɔ atin’n kpa’n ɔ ko sunman amun’n, saan amún jú lɔ klanman. Sanngɛ, sɛ amun waan saan fii amun ngunmin amún fá amun ɲin kekle kɔ́’n, ɔ su yoman ngwlɛlɛ ayeliɛ. ?Nɛ́n i ɔ? Kɛ blɛ nga e o nun yɛ’n ti sɔ ɔ. Mɛn tɛ nga e o nun yɛ mɔ be wunmɛn i ɲrun be wunmɛn i sin’n, Zoova seli kɛ ɔ́ klé e atin nga e ko fa su naan y’a fite nun’n. Ɔ maan, nga m’ɔ ti ngwlɛlɛ ayeliɛ’n yɛle kɛ ɔ fataman kɛ e bɔbɔ e fa e atin liɛ, sanngɛ maan e fa atin nga Zoova kle e’n su. ?Wafa sɛ yɛ e nin Ɲanmiɛn e kwla nanti ɔ? Sɛ e waan é kpɛ́ i kpo’n, yɛle kɛ atin nga ɔ kle e i Ndɛ’n nun’n, e nanti su.
2. ?Ngue yɛ é wá kókó su yalɛ like suanlɛ nga nun ɔn?
2 Ɲanmiɛn nuan ijɔfuɛ’n i ndɛ’n ng’ɔ o Oze ndɛ tre 1 lele 5 nun’n m’ɔ ti kɛ anɔ yilɛ sa’n, like suanlɛ ng’ɔ sinnin lɔ’n yiyili nun. Kɛ nga e fa wunnin i’n sa’n, sa sɔ’m be su afɔtuɛ’n kwla uka e andɛ naan e nin Ɲanmiɛn y’a nanti. Siɛn’n, maan e fa e ɲin sie i ndɛ tre 6 lele 9 be nun kpɔlɛ cinnjin wie’m be su. Maan e dun mmua e bo ndɛ tre nnan sɔ’m be kpɔlɛ naan y’a wun sa sɔ’m be wlɛ kpa.
Ndɛ’n i kpɔlɛ bolɛ kpe kan
3. Amun bo Oze i ndɛ tre 6 lele 9 i kpɔlɛ kpe kan.
3 I klikli nun’n, Zoova sunmannin Oze kɛ ɔ ko kan sa wie mɔ bé wá tɔ́ Izraɛli i nglo lɔ famiɛn diwlɛ’n su’n, be ndɛ kle be. Efraimu m’ɔ ti nvle sɔ’n i awlobo’m be nun dan’n, i dunman’n yɛ be fa flɛ nvle’n i wunmuan’n niɔn. Izraɛli akpasua blu sɔ’n kacili i sin sili Ɲanmiɛn. Kɛ ɔ fɛ i ndɛ tre 6 lele 9 nun’n, e wun i kɛ nvlefuɛ’m be ayeliɛ’n kleli kɛ be nin Zoova bubuli nun, kpɔkun be yoli klunwi ninnge mun. (Oze 6:7) Kɛ ɔ yo naan be lafi Zoova su’n, aenguɛ nga be nin nvlenvle’m be trali’n, be su yɛ be lafili ɔ. Kɛ mɔ b’a wlaman be nzuɛn tɛ’n i ase’n ti’n, i bo’n w’a guaman be kpa. Afin be dili be jɔlɛ yɛ be buli be fɔ! Sanngɛ, ndɛ fɛ o Oze i ndɛ nga ɔ kannin’n nun wie. Ɲanmiɛn nuan ijɔfuɛ’n guali be awlɛn su nzue kɛ, sɛ be kaci be sin si sa tɛ yolɛ’n nanwlɛ su’n, Zoova sí be aunnvuɛ ɔ́ yáci be wun sa’n cɛ́ be.
4. ?Ɲanmiɛn nuan ndɛ nga Oze kannin’n i nun afɔtuɛ cinnjin mennin yɛ é wá wún e like suanlɛ nga nun ɔn?
4 Ɲanmiɛn nuan ndɛ nga Oze kɛnnin i ndɛ tre nnan sɔ’m be nun’n, ɔ kwla man e afɔtuɛ kpanngban ekun naan e nin Ɲanmiɛn y’a nanti. Amun e fa e ɲin sie i afɔtuɛ nnan mɔ be kwla uka e kpa’n be su: (1) Sran kun i ayeliɛ’n yɛ ɔ kle weiin kɛ sa tɛ nga ɔ yoli i laa’n ɔ yo i nsisɔ naan ɔ su yomɛn i kun ɔn, nɛ́n i nuan nun ndɛ’n niɔn. (2) Tɛ yilɛ ngunmin’n jɔman Ɲanmiɛn klun. (3) Kɛ Zoova i sufuɛ’m be kaci be sin si i’n, ɔ yo i ya kpa. Kpɔkun, (4) sɛ e waan é ɲán like nga ɔ ti kpa’n, ɔ fata kɛ e yo like kpa.
Wafa nga be yi i nglo kɛ b’a wla nzuɛn tɛ’n i ase sakpa’n
5. Amun kan Oze 6:1-3 nun ndɛ cinnjin ng’ɔ o nun’n, i ndɛ.
5 Ɲanmiɛn nuan ndɛ nga Oze kannin’n, ɔ man e sa tɛ’n i ase wlalɛ’n nin aunnvuɛ silɛ’n be su afɔtuɛ kpanngban. Oze 6:1-3 nun’n, e kɛnngɛn i kɛ: ‘Kpɔkun amún sé kɛ: “Yoo! Amun maan e wɔ, e sa e sin Anannganman wun lɔ. I yɛ ɔ boli e kannin’n niɔn, sanngɛ i bɔbɔ kunngba’n yɛ ɔ́ wá fúa yɛ ɔ́ wú ɔ. I yɛ ɔ boli e fɛ ɔ, sanngɛ i bɔbɔ kunngba’n yɛ ɔ́ wá cící su ɔ. Wa nin le nɲɔn’n ɔ́ yó maan é ɲán nguan ekun, é tíntín e sa ase i fanngan nun. Kpɔkun i le nsan su’n, ɔ́ mán e su é yó juejue, é wá trán nguan nun i ɲrun ekun. Maan e si Anannganman. Amun maan e kunndɛ kɛ é sí i, afin i balɛ’n ti kɛ aliɛ m’ɔ cɛn m’ɔ to fuanman’n sa. I balɛ’n wá yó kɛ nzue m’ɔ kpiti kpli tɔ’n sa. Ɔ́ wá yó kɛ munngun nun nzue mɔ maan asiɛ’n jɔ’n sa.”’
6-8. ?Ngue yɛ ɔ o Izraɛlifuɛ’m be nzuɛn tɛ’n mɔ be waan b’a wlɛ i ase’n, i sin ɔn?
6 ?Wan yɛ ɔ kan ndɛ ngalɛ’n niɔn? Fluwa sifuɛ wie’m be waan Izraɛlifuɛ sa tɛ yofuɛ mun ɔn. Kpɔkun be waan, nvlefuɛ sa tɛ yofuɛ mɔ be tɔn be wun suɛn kɛ b’a yaci sa tɛ yolɛ’n be yɛ be seli sɔ naan Ɲanmiɛn si be aunnvuɛ ɔ. Wie’m be kusu be waan Ɲanmiɛn nuan ijɔfuɛ Oze yɛ ɔ kan ndɛ sɔ’n fa wla nvlefuɛ’m be fanngan kɛ be sa be sin Zoova wun ɔn. Sanngɛ i kwlaa yoli o, kosan nga ɔ ti cinnjin kpa’n yɛle kɛ: ?Izraɛli nvle akpasua blu’n be ngba yɛ be sa tɛ yolɛ’n yoli be nsisɔ maan be sali be sin Zoova wun ɔn? Cɛcɛ. Zoova sin Oze ja su seli kɛ: ‘?Efraimufuɛ mun, ngue li bɔ cɛ yɛ amun waan n yo n man amun ɔn? ?Zidafuɛ mun kusu, amun waan n yo amun sɛ? Amun Ɲanmiɛn klolɛ’n ti kɛ ɲanmiɛn ble mɔ be wun i nglɛmun nun’n sa, ɔ ti kɛ nglɛmun ɲansue’n sa, be wielɛ yoman ya.’ (Oze 6:4) Nanwlɛ, amun nian kɛ Ɲanmiɛn i nvle’n o ɲrɛnnɛn nun ɔn! Afin Ɲanmiɛn i nvle’n ɔ kpɔnzɔli mlɔnmlɔn Ɲanmiɛn bɔbɔ i ninnge’m be nun. Klun ufue yolɛ’n sɛ é kwlá sé’n, ɔ tuli nvle’n nun mlɔnmlɔn kɛ ɲanmiɛn ble mɔ be wun i nglɛmun nun mɔ kɛ wia’n jaso’n, ɔ wie’n sa. Kannzɛ bɔbɔ nvlefuɛ’m be tɔnnin be wun suɛn kɛ be wlali sa tɛ yolɛ’n i ase’n, sanngɛ Zoova liɛ’n w’a wunman kɛ be nin aunnvuɛ silɛ fata. ?Ngue sa ti ɔ?
7 Nzuɛn tɛ mɔ Izraɛlifuɛ’m be waan be wlɛli i ase’n, ɔ yoli be nuan bui su. Oze 7:14, ɔ kan ya mɔ Zoova w’a fɛ i nvle’n i wun’n, i ndɛ’n. I waan: ‘Be kpan flɛ min kɛ n wa de be, sanngɛ min flɛlɛ sɔ’n ɔ jɔman be klun kpa. Kɛ be la’n, be buman be ɲinma, be kpli be bɛ’n su kplakplakpla.’ Ndɛ mma 16 kan gua su kɛ: ‘Ɔ le be sran nga be sa be sin be bɛ i sin’n, nán min ɔn.’ Yɛle kɛ ‘b’a saman be sin Ɲanmiɛn sulɛ wafa kun m’ɔ le ɲrun’n i nun.’ Nvlefuɛ’m b’a kunndɛman kɛ bé káci be ayeliɛ naan bé sá be sin Zoova i sulɛ wafa m’ɔ ti fuwa’n i nun, naan be nin Zoova be afiɛn w’a sɛ ekun. Nanwlɛ, be kloman kɛ be nin Ɲanmiɛn nánti mlɔnmlɔn!
8 Izraɛlifuɛ’m b’a kaciman be nzuɛn’n. Yɛle kɛ nvlefuɛ’m b’a wlaman ndrunmun dilɛ’n, ɔ nin sran kunlɛ’n, ɔ nin awie wualɛ’n, ɔ nin amuɛn sɔlɛ’n, ɔ nin nvlenvle’m be aenguɛ tralɛ m’ɔ nin i fataman’n, be ase. Oze 7:4 nun’n, be fa nvlefuɛ’m be sunnzun “fur” annzɛ lika nga be tɔn kpaun nun’n, afin be konvi m’ɔ sɔ sa tɛ yolɛ’n ɔ ti kɛ sin yɛ ɔ trɔ be klun sa. ?Kɛ mɔ Ɲanmiɛn ninnge’m be nun b’a kpɔnzɔ mlɔnmlɔn kɛ ngalɛ’n sa’n niɔn, be nin aunnvuɛ silɛ fata? Ɔ si’ɛ! Oze kan nvlefuɛ ɲin keklefuɛ’m be sa tɛtɛ nga be yoli’n i ndɛ kle be. Ɔ se kɛ Zoova ‘su buman nɲa guaman su,’ kpɔkun “ɔ́ tú be fɔ sa tɛ sɔ’m be ti.” (Oze 9:9) Ɔ su yaci cɛman be mlɔnmlɔn!
9. ?Ajalɛ mennin yɛ Oze i ndɛ’n kle e e sa tɛ’n i ase wlalɛ nin aunnvuɛ silɛ’n, be su ɔ?
9 ?Afɔtuɛ mennin yɛ ndɛ mɔ Oze kannin’n ɔ man e sa tɛ’n i ase wlalɛ nin aunnvuɛ silɛ’n, be su ɔ? Izraɛlifuɛ ɲin keklefuɛ’m be ajalɛ’n kle e kɛ, sɛ e waan Zoova si e aunnvuɛ’n, ɔ fata kɛ e sa tɛ yolɛ’n yo e nsisɔ nanwlɛ su naan e wlɛ i ase. ?Wafa sɛ yɛ e kwla yi i sɔ liɛ’n i nglo ɔ? Be kwlá faman be nuan nun fɛfɛ, annzɛ be ɲinmuɛn lakaman Zoova. Sran kun i ayeliɛ’n nun yɛ ɔ yi i nglo weiin kɛ, sa tɛ nga ɔ yoli i laa’n yo i nsisɔ. Sɛ sa tɛ yofuɛ kun kunndɛ kɛ be si i aunnvuɛ’n naan be yaci i wun sa’n cɛ i’n, ɔ fata kɛ ɔ wla sa tɛ yolɛ’n i ase, naan ɔ nanti Zoova i mmla mɔ be ti kpa dan’n be su titi.
Tɛ yilɛ’n ngunmin’n jɔman Zoova klun
10, 11. ?Kɛ nga e fa wun i Izraɛlifuɛ’m be liɛ’n nun’n sa’n, ngue ti yɛ tɛ yilɛ’n i ngunmin jɔman Zoova klun ɔn?
10 Maan e fa e ɲin sie i afɔtuɛ’n i nɲɔn su m’ɔ kwla uka e naan e nin Zoova y’a nanti’n, i su. Yɛle kɛ: Tɛ yilɛ’n i ngunmin’n jɔman Zoova klun. Oze 6:6 se kɛ: ‘N [Zoova] klo aunnvuɛ nga be si sran’n tra tɛ nga be yi be man min’n. Kɛ be si kɛ n ti Ɲanmiɛn’n, ɔ jɔ min klun tra tɛ nga be yi ɔ be yrɛ i nnɛn’n kɔlikɔli’n.’ Amun sieli i nzɔliɛ kɛ aunnvuɛ nga be si sran’n annzɛ klolɛ nanwlɛ su’n, m’ɔ ti like kun m’ɔ fin sran’n i awlɛn nun’n, yɛ Zoova klo i ɔ. Like nga Zoova klo i ekun’n yɛle kɛ be si kɛ ɔ ti Ɲanmiɛn. Sanngɛ, amun kwla usa amun wun kɛ: ‘?Ngue ti yɛ Biblu’n nun ndɛ mma nga se kɛ Zoova klun jɔ aunnvuɛ silɛ’n su tra ‘tɛ nga be yi be man Zoova’n’ nin ‘tɛ nga be yi ɔ be yrɛ i nnɛn’n kɔlikɔli’n’ niɔn? ?Moizi Mmla’n w’a seman kɛ be yo ninnge sɔ mun?’
11 Ɔ ti su kɛ Moizi Mmla’n kleli kɛ be yi tɛ mun yɛ be yi tɛ nga be yrɛ i nnɛn’n kɔlikɔli’n. Sanngɛ, Oze i blɛ su sran’m be ayeliɛ’n timan falɛ liɛ mlɔnmlɔn. Yɛle kɛ, Izraɛlifuɛ wie’m be kunndɛ kɛ bé klé kɛ be su Ɲanmiɛn kpa liɛ su. Ɔ maan, be yi tɛ nga be yrɛ i nnɛn’n kɔlikɔli’n. Sanngɛ kɛ be wie i sɔ yo’n, kpɔkun be ja nun lɛ’n, be su yo sa tɛ’n ekun. Be sa tɛtɛ yolɛ’n kleli kɛ klolɛ nanwlɛ su’n nunman be awlɛn’n nun. Kpɔkun, be kleli ekun kɛ be siman Ɲanmiɛn, afin be mɛn dilɛ’n kleman kɛ be si i kpa. ?Kɛ mɔ nvlefuɛ’m be yoli klunwi mɔ be mɛn dilɛ’n kusu w’a yoman Ɲanmiɛn liɛ’n su’n ti’n, i lɛ’n nun’n, tɛ nga be yi be’n be kwla ɲan ɲrun? Nanwlɛ, Ɲanmiɛn ɲrun’n, tɛ nga be yili’n, be yoli Ɲanmiɛn i klɔklɔlɛ like!
12. ?Ndɛ mennin yɛ ɔ o Oze 6:6 m’ɔ ti andɛ sran’m be su nun wlalɛ ndɛ ɔ?
12 Oze i ndɛ’n ɔ wla be nga andɛ be te kɔ asɔnun tɛtɛ’m be nun’n be su nun kpa. Be di be asɔnun’n nun junman annzɛ be yo asɔnun ninnge wie’m be man Ɲanmiɛn kɛ tɛ mɔ be yi ɔ, be yrɛ i nnɛn’n kɔlikɔli be mɛn i’n sa. Sanngɛ, be ayeliɛ’n kleman kɛ be su Ɲanmiɛn sakpa. ?Sɛ sran sɔ’m be awlɛn’n suman be bo kɛ be si Ɲanmiɛn kpa naan be niɛn i mmla’m be su be nanti’n, naan be wla sa tɛ yolɛ’n i ase’n, Ɲanmiɛn klun kwlá jɔ́ be wun? Nán maan sran fi bu i kɛ asɔnun’n nun junman dilɛ’n i ngunmin yɛ ɔ jɔ Ɲanmiɛn klun ɔn. Be nga be yo be wun kɛ be su Zoova sa mɔ sanngɛ be niɛnmɛn i Ndɛ’n su’n be nantiman’n, i klun jɔman be wun.—2 Timote 3:5.
13. ?E mɔ e ti Klistfuɛ’n, tɛ yilɛ wafa mennin yɛ ɔ fata kɛ e yi ɔ? ?Yɛ kɛ e yi tɛ sɔ’n, ngue yɛ ɔ fata kɛ e wla kpɛn su ɔ?
13 Kɛ mɔ e ti Klistfuɛ kpa’n ti’n, ɔ fata kɛ e fa sie e klun kpa kɛ tɛ yilɛ ngunmin sa’n, ɔ jɔman Ɲanmiɛn klun. Ɔ ti su kɛ e liɛ’n, e faman nnɛn e yiman tɛ e manman Zoova. Sanngɛ, ɔ fata kɛ e ‘manmanlɛ nga e manman Ɲanmiɛn titi’n ɔ yo kɛ asenna like mɔ e fa man Zezi kɛ ɔ fa mɛn i’n sa. Kɛ é yó sɔ’n e bo i dunman.’ (Ebre Mun 13:15) Ɔ maan i ti’n, aya nga Oze i blɛ su Izraɛlifuɛ sa tɛtɛ yofuɛ’m be tɔli nun’n, nán maan e tɔ nun wie mlɔnmlɔn. Yɛle kɛ, nán maan e bu i kɛ e kwla yi tɛ e man Ɲanmiɛn, naan w’a blu sa tɛ nga e yoli’n su. Amun e fa sunnzun ase kun. Aniaan bla talua kun mɔ nvialiɛ nun ɔ tɔli bian kunndɛlɛ sukusuku aya’n nun’n, ɔ seli kasiɛn su kɛ: “N boli jasin fɛ’n trali laa liɛ’n, afin n buli i kɛ i sɔ liɛ’n kwla nunnun sa tɛ nga n yoli’n.” Like kunngba’n yɛ Izraɛlifuɛ sa tɛtɛ yofuɛ’m be yoli ɔ. Sanngɛ, sɛ e awlɛn’n ti kpa naan e ayeliɛ’n kusu kle kɛ e su Ɲanmiɛn sakpa’n, Zoova i klun jɔ́ i sɔ liɛ’n su.
Kɛ Zoova i sufuɛ’m be kaci be sin si i’n, ɔ yo i ya kpa
14. ?Kɛ nga e fa wun i Oze i ndɛ’n nun sa’n, wafa sɛ yɛ e nzuɛn’n yo Zoova ɔ?
14 Like nsan su mɔ Oze ndɛ tre 6 lele 9 kle e’n yɛle wafa nga kɛ Zoova i sufuɛ’m be kpɔci i’n, i sɔ’n yo i’n. Ɲanmiɛn le wunmiɛn kpɔkun ɔ si sran aunnvuɛ kpa, annzɛ kusu ɔ kwla yi i nglo kpa kɛ i klun ti jɔwa. Be nga be yo sa tɛ mɔ be kaci be sa’n, i klun jɔ be wun yɛ ɔ si be aunnvuɛ. Sɛ i nvle’n yaciman sa tɛ’n yolɛ’n, ɔ kwla tu be fɔ kekle kpa. Afin, Ɲanmiɛn klo kɛ e yo kpa, yɛ kɛ e nin i nanti’n ɔ jɔ i klun. Jue Mun 149:4 waan: ‘Anannganman [Zoova] i nvlefuɛ’m be ti, i klun ti jɔwa.’ ?Sanngɛ, kɛ Zoova i sufuɛ’m be nantiman ndɛnman su’n, i sɔ’n yo i sɛ?
15. ?Kɛ nga Oze 6:7 fa kan’n sa’n, ngue sa yɛ Izraɛlifuɛ wie’m be yoli ɔ?
15 Kɛ Zoova kán Izraɛlifuɛ mɔ be kpɔcili i’n be ndɛ’n, ɔ seli kɛ: ‘Adam klɔ lɔ yɛ amun nin min buli nun ɔn, lɛ yɛ amun kacili amun sin sili min ɔn.’ (Oze 6:7) Ebre aniɛn nun ndɛ mma nga be kacili i kɛ ‘amun kacili amun sin sili min’n,’ i bo’n wie ekun yɛle kɛ “be bu sran’n i lufle” annzɛ “be diman sran’n i nanwlɛ.” Malasi 2:10-16 nun’n, Ebre aniɛn nun ndɛ mma kunngba sɔ’n yɛ be fa kannin Izraɛlifuɛ mɔ be ayeliɛ’n kleli kɛ b’a diman be aja mɔ be jali’n su kun’n, i ndɛ ɔ. Fluwa kun kannin Oze 6:7 i ndɛ. Ɔ seli kɛ Ebre aniɛn nun’n, ndɛ mma nga be fa yiyi ndɛ sɔ’n nun’n, be fa sunnzun “sran nɲɔn mɔ be te o aja nun’n. Sanngɛ be nun kun kunndɛ bian annzɛ bla i wiengu bo.”
16, 17. (a) ?Wafa sɛ yɛ Izraɛlifuɛ’m be buli aenguɛ nga Zoova nin be nvle’n trali’n niɔn? (b) ?E ninnge’m be yolɛ’n nun’n, ngue yɛ ɔ fata kɛ e wla kpɛn su ɔ?
16 Zoova fa Izraɛli fa sunnzun i yi, afin ɔ nin nvle sɔ’n be trali aenguɛ. I sɔ’n ti’n, kɛ nvlefuɛ’m be ɲinfu be saci aenguɛ sɔ’n, ɔ ti kɛ b’a kunndɛ bian Ɲanmiɛn i bo sa. Sɛ é kwlá sé’n, Zoova ti bian kpa. Sanngɛ, i nvle m’ɔ ti kɛ i yi sa’n ɔ kunndɛ bian i bo!
17 ?Yɛ e li? I lɛ nun’n, e wun kɛ sɛ e nin Zoova e nanti’n, ɔ yo i fɛ. Sɛ kusu e nin i e nantiman’n, ɔ yo i ya. Nán maan e wla fi su le kɛ Zoova yɛ ɔ ‘ti sran klofuɛ’n niɔn,’ naan e ayeliɛ’n ɔ jɔ i klun annzɛ ɔ yo i ya. (1 Zan 4:16) Sɛ sa tɛ yɛ e yo’n, ɔ kwla yo i ya, yɛ ɔ su jɔmɛn i klun le mlɔnmlɔn. Sɛ e wla kpɛn ngalɛ’n su titi’n, ɔ kwla sasa e dan kpa naan y’a tɔman sa tɛ’n nun.
Wafa nga e kwla ɲan like ng’ɔ ti kpa’n
18, 19. ?Mmla mennin yɛ ɔ o Oze 8:7 nun ɔn? ?Yɛ wafa sɛ yɛ i sɔ mmla’n kpɛnnin su Izraɛlifuɛ’m be lika ɔ?
18 Afɔtuɛ nnan su nga Oze i ndɛ’n man e’n, amun e fa e ɲin sie su. ?Yɛle kɛ, wafa sɛ yɛ e kwla ɲan like nga ɔ ti kpa’n niɔn? Kɛ Oze kán Izraɛlifuɛ’m be Ɲanmiɛn kpɔcilɛ m’ɔ kle be sinnzin nin be wun yalɛ klelɛ ngbɛn’n i ndɛ’n, ɔ se kɛ: ‘Sɛ ń kwlá sé’n, aunmuan yɛ amun luali ɔ, seke m’ɔ tu’n kusu yɛ amun wá tí ɔ.’ (Oze 8:7) Ndɛ nga Ɲanmiɛn nuan ijɔfuɛ’n kɛn i lɛ’n, ɔ fata kɛ ɔ ka e ti nun titi wie. Yɛle kɛ like nga e yo i andɛ’n, yɛ é ɲɛ́n i su akatua e ɲrun lɔ ɔ. ?Wafa sɛ yɛ ndɛ sɔ’n kpɛnnin su Izraɛlifuɛ mɔ b’a nantiman ndɛnman su’n be lika ɔ?
19 Kɛ mɔ Izraɛlifuɛ sɔ’m b’a yaciman sa tɛ’n i yolɛ’n ti’n, sɛ é kwlá sé’n, be luali sa nga ɔ ti tɛ’n. ?Bé ká sa tɛ’n i yolɛ su sa mlɔnmlɔn naan be su isɛmɛn i bo nzuɛn’n? Ɔ si’ɛ! Saan bé dí be jɔlɛ le. Oze 8:13 waan: ‘Nán kɛ n [Zoova] wla wá fí be sa tɛ sɔ’n niɔn. Ń tú be fɔ.’ Kpɔkun Oze 9:17 nun’n, e kɛnngɛn i lɔ kɛ: ‘Min Ɲanmiɛn ɔ́ wá yí be mán gua’n, b’a tiemɛn i nuan nun ndɛ’n ti ɔ́ wá yí be mán gua’n. Wlanwlanlɛ finfin’n sa yɛ bé wá wlánwlán mɛn uflɛ’m be nun ɔn.’ Nanwlɛ, be sa tɛ yolɛ’n ti’n, Zoova wá tú be fɔ. Sɛ sa tɛ’n ti like mma yɛ be luali’n, nn é sé kɛ bé wá tí i su mma tɛtɛ’n kusu. Yɛle kɛ Ɲanmiɛn dili be jɔlɛ kpɔkun ɔ buli be fɔ. Afuɛ 740 nun ka naan Zezi blɛ’n w’a ju’n, kɛ Asirifuɛ’m be kwlali Izraɛli akpasua m’ɔ ti nglo lɔ famiɛn diwlɛ’n, mɔ be fali famiɛn diwlɛ sɔ’n i nunfuɛ mun ɔli lomuɛn’n, yɛ fɔ bulɛ sɔ’n kpɛnnin su ɔ.
20. ?Ngue yɛ sa ng’ɔ juli Izraɛlifuɛ’m be su’n, ɔ kle e ɔ?
20 Sa ng’ɔ juli Izraɛlifuɛ sɔ’m be su’n, ɔ kle e nanwlɛ ndɛ cinnjin kun. Be timan amanngo mma lomin waka su. Afin, like nga e lua’n yɛ e ti ɔ. Ɲanmiɛn Ndɛ’n wla e sun nun kpa kɛ: ‘Nán an laka amun wun. Be kwlá yoman Ɲanmiɛn finfin, afin like nga sran kun lua’n yɛ ɔ ti ɔ.’ (Galasifuɛ Mun 6:7) I sɔ ti’n, sɛ e yo sa tɛ’n, i sin mma nga é tí’n, ɔ́ yó tɛ. Yɛle kɛ be nga be kunndɛ bian annzɛ bla sukusuku’n, bé ɲɛ́n i su afɛ’n. Ɔ́ cɛ́ ɔ, ɔ́ cɛ́ ngbɛn ɔn, sran kwlaa nga ɔ yo sa tɛ m’ɔ kacimɛn i sa’n ɔ́ ɲɛ́n i su akatua’n.
21. ?Wafa sɛ yɛ e kwla ɲan like ng’ɔ ti kpa’n niɔn?
21 ?Sɛ ɔ ti sɔ’n, wafa sɛ yɛ e kwla ɲan like nga ɔ ti kpa’n niɔn? E kwla fa sunnzun ase kun e tɛ kosan ngalɛ’n su: ?Sɛ fie difuɛ kun waan ɔ́ ɲán able mma’n, awie yɛ ɔ́ lúa ɔ? Ɔ si’ɛ mlɔnmlɔn! Like nga fie difuɛ’n kunndɛ kɛ ɔ́ tí’n, yɛ ɔ lua i mma ɔ. I kunngba’n, sɛ sa ng’ɔ ti kpa’n yɛ e kunndɛ kɛ é tí’n, ɔ fata e lua like ng’ɔ ti kpa’n. ?E kunndɛman kɛ, kɛ é sé yɛ’n, e mɛn dilɛ’n man e aklunjuɛ naan e ɲan anannganman nguan Ɲanmiɛn i mɛn uflɛ nun lɔ? Sɛ ɔ ti sɔ’n, ɔ fata kɛ e lua like ng’ɔ ti kpa’n titi. Yɛle kɛ maan e nian Ɲanmiɛn i mmla mɔ be leman wunsu’n be su naan e nin i e nanti titi.
22. ?Like mennin yɛ e suannin i Oze ndɛ tre 6 lele 9 nun ɔn?
22 Oze ndɛ tre 6 lele 9 nun’n, e suannin like nnan mɔ be kwla uka e naan e nin Ɲanmiɛn y’a nanti ɔ. Yɛle kɛ: (1) E ayeliɛ’n yɛ ɔ kle kɛ y’a kaci e sin y’a si sa tɛ yolɛ’n niɔn. (2) Nán tɛ nga e yi man Ɲanmiɛn’n i ngunmin sa yɛ ɔ jɔ i klun ɔn. (3) Kɛ Zoova i sufuɛ’m be kaci be sin si i’n, ɔ yo i ya kpa. Kpɔkun (4) sɛ e waan é ɲán like ng’ɔ ti kpa’n, ɔ fata kɛ sa ng’ɔ ti kpa’n yɛ e lua ɔ. ?Wafa sɛ yɛ ndɛ ng’ɔ o Biblu’n nun fluwa sɔ’n i ndɛ tre nnun kasiɛn’m be nun’n, ɔ kwla uka e naan e nin Ɲanmiɛn y’a nanti ɔ?
?Wafa sɛ yɛ amún tɛ́ kosan’m be su ɔ?
• ?Wafa sɛ yɛ be yi i nglo kpa kɛ b’a yaci sa tɛ’n i yolɛ ɔ?
• ?Ngue ti yɛ tɛ nga be yi’n i ngunmin jɔman Ɲanmiɛn klun ɔn?
• ?Kɛ Ɲanmiɛn i sufuɛ’m be jaso i sin’n, wafa sɛ yɛ ɔ yo i ɔ?
• ?Sɛ e lua like ng’ɔ ti kpa’n, ngue yɛ é tí ɔ?