?Ɔ nin i fata kɛ amun jrɛn i?

Titi’n kɛ aniaan’m bé bó jasin fɛ’n, ɔ le dɔ kun mɔ i su yɛ be jran be junman’n niɔn. Ɔ kwla yo amindi su. Ɔ ju wie’n, aniaan wie’m be su sa’m be ti’n, ɔ nin i fata kɛ be jran jasin bolɛ’n dɔ trele kun su. ?Sanngɛ i sɔ’n ti yɛ amun yó sɔ wie ɔ? ?Annzɛ kɛ mɔ amun lika nun lɔ’n, ɔ le dɔ kun mɔ titi i su yɛ aniaan’m be jran jasin bolɛ’n i ti yɛ amún yó sɔ wie ɔ? Like nga amun kwla yo naan amun a bo jasin’n i kan ekun’n, yɛle jasin fɛ’n i wafa uflɛ bolɛ’n. I wie yɛle jasin bolɛ akpɔ’m be nuan’n. Asa’n, kɛ amún kɔ́ awlo’n, amun kwla ko nian sran kun annzɛ nɲɔn mɔ amun boli jasin kleli be’n, be osu. Sɛ bɔbɔ sran kunngba cɛ yɛ amun to i’n, annzɛ periodiki wie yɛ amun fa man’n, nán amun bu i like kaan! Sɛ ɔ nunman nun kɛ san fii e jran e junman’n, jasin bolɛ kan ekun’n ti kɛ e su uka ‘manmanlɛ nga e manman Ɲanmiɛn’n,’ i su ekun sa.​—Ebr. 13:15.