Maan e bo jasin fɛ’n i kpa tra laa: Maan e yo naan sran’n man e atin kɛ e ko niɛn i osu ekun

?Ngue ti yɛ ɔ ti cinnjin ɔn?: Kɛ e to sran kun mɔ Ɲanmiɛn ndɛ’n lo i’n, e kunndɛ kɛ é sá e sin é kó níɛn i osu blɛ ng’ɔ o awlo’n. Sɛ Ɲanmiɛn ndɛ’n ti waka mma’n nn é sé kɛ, i liɛ’n, é kó gúa su nzue naan ɔ fifi. (1 Kor. 3:6) I sɔ’n ti’n, kwlaa naan y’a wɔ e ɲrun’n, maan e lualua sran’n naan ɔ kplin su kɛ e ko niɛn i osu ekun. Asa ekun’n, sɛ e man kosan kun mɔ e kwla koko su yalɛ cɛn uflɛ su’n, ɔ ti kpa. Afin sɛ e yo sɔ’n, e ndɛ tiefuɛ’n kúnndɛ kpa kɛ e bla ekun. Sɛ kosan kusu nga e usali’n o fluwa nga e yacili i i sa nun’n nun’n, i wun blíblí i yɛ ɔ́ kánngan nun ɔn. Sɛ e yo sɔ naan sran’n man e atin kɛ e ko niɛn i osu ekun’n, e yalɛ kokolɛ’n yó pɔpɔ. Afin ndɛ nga é kókó su yalɛ’n e nuan w’a dun mmua w’a sɛ su. Ɔ maan w’a bu i sɔ liɛ’n i akunndan w’a sie. Kɛ e kɔ i osu nianlɛ’n, maan e yiyi nun kɛ kosan nga acɛnnin sin’n e usali’n, i su tɛlɛ yɛ e bali ɔ. Kpɛkun, maan e tɛ su.