Amun ka amun osu nun lɛ, yɛ amun nian delɛ nga Zoova wá dé amun’n!
“Amun li amun ko jranjran, kpɛkuun amun ka amun osu nun lɛ, yɛ amun wa wun delɛ nga Anannganman dé amun’n.”—2 BE NYOLIƐ 20:17.
1, 2. ?Ngue ti yɛ ‘Magɔgu mɛn’n nun lɔ famiɛn nga ɔ suan Gɔgu’n,’ i alɛ mɔ w’a mantan koko’n i su sa’n yó dan trá mɛn wunmuan’n nun kakawlongafuɛ’m be sa tɛtɛ mun ɔn?
KƐ SRAN wie’m bé kán kakawlongafuɛ’m be abɔlɛ sa’m be ndɛ’n, be waan ɔ ti like m’ɔ bo klɔ ɔ. Nanwlɛ, ɔ nin i fataman kɛ e fa kakawlongafuɛ’m be sa tɛtɛ yolɛ’n e di aɔwi. Sanngɛ andɛ’n, sa dan kpa kun mɔ i tɛ’n tra kakawlongafuɛ’m be liɛ’n, w’a mantan koko. I sɔ sa liɛ’n, mɛn wunman nun’n sran’m be faman be ɲin sieman su. ?Ngue sa yɛle i sɔ’n?
2 Sa sɔ’n, yɛle nga Ezekiɛli ndɛ tre 38 kɛn i ndɛ Biblu’n nun’n. I waan ɔ ti ‘Magɔgu mɛn’n nun lɔ famiɛn nga ɔ suan Gɔgu’n,’ i alɛ. ?Kɛ be se kɛ alɛ sɔ’n i su sa’n yó tɛ́ trá mɛn wunmuan’n nun kakawlongafuɛ’m be sa tɛtɛ mun’n, nán ndɛ blɔlɛ yɛle i sɔ’n? Cɛcɛ, ɔ timan sɔ mlɔnmlɔn. Afin, nán klɔ sran’m be awa mun yɛ Gɔgu nin bé kún ɔn. Ɔ nin Ɲanmiɛn bɔbɔ m’ɔ o nglo lɔ’n i Sielɛ Blɛ’n yɛ bé kún ɔn. Kɛ alɛ tɔ klɔ kun su’n, sran’m be kwlá jrɛnmɛn i mlɔnmlɔn. Ɲanmiɛn timan kɛ klɔ sran sa. Kannzɛ bɔbɔ alɛ’n w’a kpi sɛ o, sanngɛ i liɛ’n, i sɔ’n timan like fi i ɲrun, ɔ kwla jrɛn i.
Gɔgu wla Ɲanmiɛn Sielɛ Blɛ’n i sin alɛ
3. ?Afuɛ 1914 nun’n, ngue yɛ be seli asiɛ’n su wa famiɛn’m be kɛ be yo ɔ? ?Yɛ wafa sɛ yɛ be tɛli su ɔ?
3 Afuɛ 1914 nun’n, kɛ Ɲanmiɛn seli i Famiɛn’n ɲanmiɛn su lɔ cɛ’n, yɛ ɔ nin Satan be alɛ kunlɛ’n boli i bo ɔ. I blɛ sɔ nun’n, be seli asiɛ’n su wa Famiɛn’m be kɛ be koto Ɲanmiɛn i Famiɛn mɔ sieli’n, i bo. Sanngɛ, b’a kplinman su. Biblu’n kannin be ayeliɛ sɔ’n i ndɛ se kɛ: “Asiɛ’n su wa famiɛn’m b’a jaso. Be bo ɔ’a yo kun Anannganman nin i sran ng’ɔ sieli i famiɛn’n be wun. Be ko se kɛ: ‘E ɲannji ɲanman nga be fa ci e’n ke. E yi jrɔkɔ mun e gua be blo mmua lɔ.’” (Jue Mun 2:1-3). Gɔgu i alɛ blɛ nun yɛ asiɛ’n su wa famiɛn’m bé klé weiin kpa kɛ be kpɔ Ɲanmiɛn i Siɛlɛ Blɛ’n niɔn.
4, 5. ?Wafa sɛ yɛ sran’m be nin Ɲanmiɛn i Sielɛ Blɛ’n m’ɔ o nglo lɔ’n, be kwla kun ɔn?
4 Nanwlɛ, e kwla usa e wun kɛ: ?Wafa sɛ yɛ klɔ sran’m be nin Ɲanmiɛn i Sielɛ Blɛ’n m’ɔ o nglo lɔ’n, mɔ be wunmɛn i’n be kwla kun alɛ ɔ? Kɛ Biblu’n kan Ɲanmiɛn i Sielɛ Blɛ sɔ’n i ndɛ’n, ɔ kle weiin kɛ ‘sran akpiakpi ya sran akpiakpi ablanan nin nnan (144.000) mɔ be kpɔli be ti asiɛ’n su’n,’ be nin ‘Bua Gbaflɛn’ Zezi Klist, be yɛ be ti i nun sran mun ɔn (Sa Nglo Yilɛ 14:1, 3; Zan 1:29). Kɛ mɔ Ɲanmiɛn i Sielɛ’n sɔ’n wo nglo lɔ’n, i ti yɛ be flɛ i ‘ɲanmiɛn su lɔ uflɛ’n’ niɔn. Kpɔkun sran nga ɔ́ síe be asiɛ’n su’n, be yɛ be ti ‘asiɛ uflɛ’n’ niɔn (Ezai 65:17; 2 Piɛr 3:13). Sran akpiakpi ya sran akpiakpi ablanan nin nnan (144.000) nga be nin Klist bé dí famiɛn’n, be nun suman be suli Ɲanmiɛn lele be guɛli i ti nin i bo naan b’a wu. Ɔ maan ɲanmiɛn su lɔ’n, be kwla di junman uflɛ nga Ɲanmiɛn fá mán be’n.
5 Sran akpiakpi ya sran akpiakpi ablanan nin nnan (144.000) akpasua kaan sɔ’n be onga’n te o asiɛ’n su wa. Afuɛ 2002 nun’n, sran miliɔn blu nin nnun (15.000.000) tra su nga be yiali E Min’n i Aliɛ’n i Cɛn dilɛ’n i bo’n, be nun sran akpi mɔcuɛ sran ya nso ablesiɛn (8.760) cɛ yɛ be kleli kɛ be flɛli be ɲanmiɛn su lɔ junman’n i dilɛ bo wie ɔ. Ɔ maan, sran kwlaa nga ɔ fa alɛ wla be sin’n, nn Ɲanmiɛn i Sielɛ Blɛ’n yɛ w’a fa alɛ w’a wlɛ i sin ɔn.—Sa Nglo Yilɛ 12:17.
Famiɛn’n nin i kpɔfuɛ’m bé kún naan ɔ́ kwlá be.
6. ?Wafa sɛ yɛ Zoova nin Zezi be bu yalɛ nga be kle i nvle’n niɔn?
6 Zoova i Sielɛ Blɛ’n i ɲrun mɔ famiɛn’m be tanndan’n, i su like nga Zoova bɔbɔ yo’n, Biblu’n dun mmua kɛn i ndɛ se kɛ: ‘Kɛ be kɛn i sɔ’n, ɔ kle Zoova i srilɛ. Ɔ o ɲanmiɛn su lɔ ɔ to be mma. W’a fa ya kpa yɛ ɔ nin be kan ɔn. Ya dan sɔ’n m’ɔ fali’n ti maan srɛ’n kunman be ngowa. I waan: “M bɔbɔ min yɛ n sieli famiɛn mɔ n fɛli i Siɔn m’ɔ ti min oka’n i su lɔ’n niɔn.”’ (Jue Mun 2:4-6). Blɛ nga mɔ Zoova maan Klist nin i ‘kpɔfuɛ’m bé kún naan ɔ́ kwlá be’n,’ w’a ju (Sa Nglo Yilɛ 6:2). ?Wafa sɛ yɛ blɛ sɔ nun’n, Zoova bu yalɛ nga be fa kle i nvle’n niɔn? Zoova ɲrun’n, ɔ ti kɛ ɔ nin i Famiɛn’n yɛ be su kle be yalɛ ɔ. I sɔ ti’n, ɔ seli kɛ: ‘Sran nga ɔ kan amun’n, nn w’a fɛ i sa w’a wɔ min ɲin su.’ (Zakari 2:12). Zezi kusu jrannin su kpa seli kɛ, like nga sran kun yo man i niaan nga be kpali be sieli be ngunmin’n be nun kun’n, nn i yɛ be yoli mɛnnin i ɔ. Sɛ kusu sran kun w’a yoman like w’a manman i niaan sɔ mun’n, nn i yɛ b’a yoman b’a mɛnmɛn i ɔ.—Matie 25:40, 45.
7. ?Ngue ti yɛ Gɔgu wla “sran kpanngban kpa” nga Sa Nglo Yilɛ 7:9 kan be ndɛ’n, be sin alɛ wie ɔ?
7 Nanwlɛ, sran nga be uka be nga Ɲanmiɛn fɛli i wawɛ’n mannin be’n be onga’n, Gɔgu fá alɛ wlá be sin wie. Sran sɔ mun yɛ bé trán Ɲanmiɛn i ‘asiɛ uflɛ’n,’ su’n niɔn. Be ti ‘sran kpanngban kpa, yɛ be fin mɛnmɛn’n kwlaa nin nvlenvle’n kwlaa nun, nin sran wafawafa’n kwlaa o be nun, be ijɔ aniɛn wafawafa’n kwlaa.’ (Sa Nglo Yilɛ 7:9). “Be jinjin bia’n nin Bua Gbaflɛn’n be ɲrun lɛ, yɛ tralɛ ufue o be wun.” Yɛle kɛ, Ɲanmiɛn nin Zezi Klist be klun jɔ be wun. ‘Mme nɲa o be sa nun,’ yɛ be kpan be manman Zoova mɔ i kunngba cɛ yɛ ɔ kwla sie mɛn wunmuan’n, ɔ nin Zezi Klist ‘i Bua Gbaflɛn’n,’ m’ɔ sieli i Famiɛn’n.—Zan 1:29, 36.
8. ?Gɔgu i alɛ’n ti’n, ngue yɛ Klist yó ɔ? ?Yɛ i agualiɛ’n yó sɛ?
8 Gɔgu i alɛ sɔ ti’n, sran nga Ɲanmiɛn sieli i Famiɛn’n, ɔ́ jáso, yɛ ɔ nin i bé kún. Be alɛ sɔ’n yɛ be flɛ i Armagedɔn alɛ’n niɔn (Sa Nglo Yilɛ 16:14, 16). Sran nga b’a kplinman su kɛ Ɲanmiɛn sie be’n, bé wún be ɲrun kpa. Sanngɛ, be nga Ɲanmiɛn Sielɛ Blɛ’n i sin jranlɛ’n ti’n, be wunnin ɲrɛnnɛn’n, bé dí alaje tititi. I sɔ liɛ’n, akoto Pɔlu yiyili nun se kɛ: ‘I sɔ’n kle e weiin kpa kɛ Ɲanmiɛn yo sa i nuan su. Ɔ bu amun kɛ amun nin i famiɛn dilɛ’n wie fata, afin i ti yɛ an wun ɲrɛnnɛn’n niɔn. Nanwlɛ, Ɲanmiɛn wá yó sa nga ɔ ti su’n, ɔ́ klé be nga be kle amun ɲrɛnnɛn’n be ɲrɛnnɛn wie, yɛ ɔ maan e nin amun mɔ an wun ɲrɛnnɛn’n, é ɲán e ti. Kɛ e Min Zezi wá yí i wun nglo’n, m’ɔ nin i anzi’m mɔ be le fanngan dan’n, bé fín ɲanmiɛn su lɔ bé jrá’n, yɛ ɔ́ yó i sɔ ɔ. Ɔ́ bá sin m’ɔ jue’n nun naan ɔ́ tú be nga be siman Ɲanmiɛn’n nin be nga be faman e Min Zezi i jasin fɛ’n su’n be fɔ.’—2 Tɛsalonikfuɛ Mun 1:5-8.
9, 10. (a) ?Wafa sɛ yɛ Zoova yoli maan Zidafuɛ’m be kwlali be kpɔfuɛ mɔ be le wunmiɛn kpa’n niɔn? (b) ?Ngue yɛ ɔ fata kɛ andɛ Klistfuɛ’m be yo i titi ɔ?
9 E ɲrun lɔ ɲrɛnnɛn dan mɔ i ketewa lika’n yɛle Armagedɔn alɛ’n, i blɛ nun yɛ Klist wá núnnún sa tɛ’n kwlaa ɔ. Sanngɛ, kɛ nga Zidafuɛ’m be blɛ su’n, alɛ tɔli mɔ be bɔbɔ b’a kunman sa’n, Zezi i sufuɛ’m be kusu be su boman wɛ be kunman alɛ wie. Laa blɛ sɔ nun’n, Zoova yɛ ɔ kunnin alɛ’n yɛ ɔ fali kwlalɛ’n mannin Zidafuɛ mun ɔn. Biblu’n kɛn i ndɛ se kɛ: ‘Anannganman maan sannganlɛ tɔli Amɔnfuɛ mun, nin Moabufuɛ mun, nin Edɔmufuɛ mun mɔ be bali Zidafuɛ’m be su tɔlɛ’n be afiɛn. Be ngunminngunmin be kpɛli be ɲin be kunnin. Amɔnfuɛ mun nin Moabufuɛ’m be tɔli Edɔmufuɛ’m be su be kunnin be lele be wieli weiin. I sin be blili be ɲin be kunnin be bɔbɔ be wun. Kɛ Zidafuɛ’m be juli kan bé jrán lɛ ɔ, be kwla wun aawlɛ flɛnnɛn’n lɛ’n, bé nían ɔn, be kpɔfuɛ’m be fuɛn mun yɛ be tru asiɛ’n su yɛ, be wunnin kɛ be nun kun sa w’a ɲɛnmɛn i ti.’—2 Be Nyoliɛ 20:22-24.
10 Zoova seli Zidafuɛ’m be kɛ: ‘Nán amun yɛ amún wá kún alɛ nga ɔ.’ Ndɛ sɔ’n yɛ ɔ kpɛnnin su ɔ (2 Be Nyoliɛ 20:17). Kɛ Zezi Klist wá jáso m’ɔ nin i ‘kpɔfuɛ’m bé kún naan ɔ́ kwlá be’n,’ Klistfuɛ’m bé fá ndɛ kunngba sɔ’n su wie. Kɛ ɔ́ yó sɔ nn, Klistfuɛ’m be nin sa tɛ’n be kun alɛ titi. Sanngɛ, nán alɛ ninnge jrɛiin sa yɛ be fa be kun ɔn. Ɲanmiɛn i alɛ ninnge mun yɛ be fa kun ɔn. Ɔ maan ‘be nga be yo e tɛ’n, e yo be kpa lele e kwla be.’—Rɔmfuɛ Mun 6:13; 12:17-21; 13:12; 2 Korɛntfuɛ Mun 10:3-5.
?Wan yɛ ɔ́ fá Gɔgu i alɛ’n i nun ta’n niɔn?
11. (a) ?Wan yɛ Gɔgu fá be kún i alɛ’n niɔn? (b) ?Lafilɛ mɔ be lafiman Ɲanmiɛn ninnge’m be nun’n, i bo’n yɛle mennin?
11 Mmusu’m be si Satan yɛle Gɔgu m’ɔ fin klɔ nga be flɛ i Magɔgu’n. Kɛ afuɛ 1914 nun be fuɛnnin i ɲanmiɛn su lɔ’n, yɛ ɔ ɲannin dunman sɔ’n niɔn. Kɛ m’ɔ ti aolia nun sran’n ti’n, ɔ nin sran’m be kwlá kunman alɛ trele sa. I sɔ’n ti’n, ɔ́ fá klɔ sran mun yɛ bé yó i klun sa’n niɔn. ?Wan yɛle sran sɔ mun mɔ bé yó Satan i klun sa’n? Biblu’n yiyiman nun sa trele. Sanngɛ, ɔ kle e nzɔliɛ ninnge wie mun mɔ be kwla uka e naan y’a wun sran sɔ’m be wlɛ ɔ. Kɛ ndɛ nga Biblu’n dun mmua kannin’n bé kpɛ́n su’n, nn é wún sran sɔ’m be wlɛ. Zoova i sufuɛ’m be simɛn i sɔ liɛ’n i su akplowa lele. Sanngɛ kusu be lafiman. Yɛle kɛ, sa nga Biblu’n kan be ndɛ mɔ be ju politiki nin Ɲanmiɛn sulɛ wafa’m be su’n, be ɲin kpaman su.
12, 13. ?Alɛ kasiɛn nga Ɲanmiɛn nuan ijɔfuɛ Daniɛli kɛnnin i ndɛ’n yɛle mennin?
12 Ɲanmiɛn nuan ijɔfuɛ Daniɛli yiyi alɛ kasiɛn nga bé fá wlá Ɲanmiɛn nvle’n i sin’n, i nun. I waan: ‘Ɔ́ [nglo lɔ famiɛn’n] fá ya kpa, ɔ maan ɔ́ kó kún sran kpanngban kpa. Ɔ́ kplɛ́n i tannin sua mun jenvie’n nin Ɲanmiɛn i oka m’ɔ o mɛn mɔ i klanman’n leman wunsu’n be afiɛn.’—Daniɛl 11:44, 45.
13 “Jenvie” nga Biblu’n kɛn i ndɛ’n yɛle Jenvie Dan’n, mɔ be flɛ i Mediterane’n. Yɛ ‘Ɲanmiɛn i oka’n,’ yɛle Siɔn. Siɔn sɔ’n yɛ Zoova kɛn i ndɛ se kɛ: ‘M bɔbɔ min yɛ n sieli famiɛn’n mɔ n fɛli i Siɔn m’ɔ ti min oka’n i su lɔ’n niɔn.’ (Jue Mun 2:6; Zozie 1:4). Sanngɛ, lika nga ɔ o ‘jenvie’n nin Ɲanmiɛn i oka m’ɔ o mɛn mɔ i klanman’n leman wunsu’n be afiɛn’n,’ ɔ ti Ɲanmiɛn ninnge’m be nun nzɔliɛ like. Ɔ kle kɛ Ɲanmiɛn ninnge’m be nun’n, like kwlaa yo ye Klistfuɛ nga Ɲanmiɛn fɛli i wawɛ’n mannin be’n, be sa nun. Nán be yɛle sran nga be buman Ɲanmiɛn nin i ndɛ’n be like fi’n, mɔ be ti kɛ jenvie sa’n. Sanngɛ be liɛ’n, be minndɛ kɛ be nin Klist Zezi bé dí Famiɛn ɲanmiɛn su lɔ. Kɛ e fa wun i lɛ’n, nglo lɔ famiɛn’n ɔ́ fɛ́ i ɲin cí Ɲanmiɛn i sufuɛ nga ɔ kpali be sieli be ngunmin’n, ɔ nin be janvuɛ mun mɔ be ti sran kpanngban kpa’n. Kpɔkun, kɛ nga Ɲanmiɛn nuan ijɔfuɛ Daniɛli fa kannin’n sa’n, ɔ́ kúnndɛ kún be nun kpanngban kpa.—Ezai 57:20; Ebre Mun 12:22; Sa Nglo Yilɛ 14:1.
?Ngue yɛ Zoova i sufuɛ’m bé yó ɔ?
14. ?Kɛ bé fá alɛ wlá Ɲanmiɛn i nvle’n i sin’n, like nsan mennin yɛ ɔ́ yó ɔ?
14 ?Ngue yɛ Ɲanmiɛn i sufuɛ’m bé yó i alɛ nga bé fá wlá be sin’n i nun ɔn? Alɛ sɔ nun’n, like nga Zozafati blɛ su’n Ɲanmiɛn i nvle’n yoli’n, i kunngba’n yɛ andɛ i sufuɛ’m bé yó ɔ. Maan e sie i nzɔliɛ kɛ Ɲanmiɛn seli i nvlefuɛ’m be kɛ be yo like nsan: (1) be jranjran, (2) be ka be osu nun, kpɔkun (3) be wá wún delɛ nga Zoova wá dé be’n. ?Wafa sɛ yɛ andɛ Ɲanmiɛn i nvlefuɛ’m bé yó i sɔ kunngba’n niɔn?—2 Be Nyoliɛ 20:17.
15. ?Zoova i nvlefuɛ’m be jranjranlɛ’n, i bo’n yɛle mennin?
15 Amun jranjran: Ɲanmiɛn i nvle’n jran i Sielɛ Blɛ’n i sin titi, be angunndan’n timan nɲɔnnɲɔn. Ajalɛ nga be fɛli i kɛ be timan mɛn nunfuɛ’n, be jran su tititi. Bé ‘jrán kekle, be wun su usuman be.’ Ɔ maan bé dí Zoova i junman’n i kpa kɔ́ i ɲrun, kpɔkun bé kán i klun ufue’n m’ɔ o lɛ titi’n i ndɛ bé fá mɛ́nmɛ́n i tititi (1 Korɛntfuɛ Mun 15:58; Jue Mun 118:28, 29). Be jranjranlɛ sɔ’n m’ɔ ti Ɲanmiɛn liɛ’n su’n, andɛ nin ainman like fi kwlá kpɔnzɔman nun le.
16. ?Zoova i sufuɛ’m be osu nun lɛ mɔ be ka’n i bo yɛle mennin?
16 Amun ka amun osu nun: Yɛle kɛ, Zoova i sufuɛ’m be su kpliman be ti, sanngɛ bé fá be wla’n kwlaa gúɛ i Zoova su. Zoova kunngba cɛ yɛ ɔ kwla de i sufuɛ mun mɛn tɛ nga nun ɔn. I sɔ kusu yɛ ɔ seli kɛ ɔ́ yó ɔ (Ezai 43:10, 11; 54:15; Ngwlɛ Yilɛ 3:26). E wla’n mɔ e fa gua Zoova su’n, i bo’n ekun yɛle kɛ, be nga Ɲanmiɛn kleli be i atin’n i afuɛ ya tra su yɛ’n, e fa e wla e gua be su wie. Kɛ alɛ sɔ’n wá bó i bo’n, ɔ fata kɛ Klistfuɛ’m be fa be wla gua be niaan nga Zoova nin i Famiɛn’n be sieli be kpɛnngbɛn’n, be su kpa tra laa’n. Afin sran sɔ mun mɔ be lafi Ɲanmiɛn su kpa’n, bé síe Ɲanmiɛn i nvle’n. Ɔ maan sran nga ɔ yo ɲin kekle be su’n, nn ɔ su fa ɲrɛnnɛn wie’n i atin su.—Matie 24:45-47; Ebre Mun 13:7, 17.
17. ?Ngue ti yɛ Zoova i sufuɛ’m bé wún delɛ nga ɔ́ dé be’n niɔn?
17 Amun wá wún delɛ nga Zoova dé amun’n: Yɛle kɛ, Klistfuɛ kwlaa nga be kwlá saciman be wun mɔ be fa be wla gua Zoova su kɛ ɔ kwla de be’n, bé ɲán be ti. Lele naan e blɛ liɛ’n i awieliɛ’n w’a ju’n, lika nga Zoova i sufuɛ’m be wunmiɛn’n kwla fa be ju lɛ’n, bé bó Zoova i jɔlɛ dilɛ cɛn’n i jɔ tititi. Afin, ɔ fata kɛ asiɛ’n su sran’m be kwlaa be si kɛ Zoova yɛ ɔ ti Ɲanmiɛn Kpli’n niɔn, naan ɔ le i sufuɛ kpa mun asiɛ’n su. Zoova m’ɔ sie mɛn wunmuan’n i like sɛsɛsɛ yolɛ’n i su ndɛ liɛ’n, ɔ su manman sran’m be atin kɛ be si su akplowa kun lele naan w’a kpɛ i sɔ ndɛ liɛ’n nun.—Ezekiɛl 33:33; 36:23.
18, 19. (a) ?Wafa sɛ yɛ jue nga ɔ o Ezipt Lɔ tulɛ’n ndɛ tre 15 nun’n, ɔ yi sran nga bé ɲán be ti Gɔgu i alɛ nun’n be angunndan’n, i nglo ɔ? (b) ?Ngue yɛ ɔ fata kɛ Ɲanmiɛn i nvle’n yo i andɛ ɔ?
18 Wafa kunngba nga kɛ Izraɛlifuɛ’m be kpɛli Ndɛma Jenvie’n be ja nun’n, be tuli be klun be toli jue’n, kɛ Ɲanmiɛn i nvle’n wá wlú mɛn uflɛ’n nun’n, ɔ́ tú i klun tó i ti ɲanlɛ jue wie. Zoova i sufuɛ’m be tinuntinun annzɛ be kwlaa be su yaciman Zoova m’ɔ deli be’n, i ase lalɛ le. Bé tó jue bé mɛ́nmɛ́n i kɛ nga laa nun i sufuɛ wie’m be toli jue be seli kɛ: ‘Ń tó jue ḿ mánmán Anannganman, afin kwlalɛ nga w’a kwla yɛ’n ɔ leman wunsu. [...] Anannganman ti alɛ kunfuɛ, ɔ ti safuɲrɛn. I dunman’n yɛle Zoova. [...] Anannganman, ɔ sa fama’n bubuli ɔ kpɔfuɛ’m be nun sa kpokpokpo. Ɔ dan mɔ a ti’n ti, be nga be jaso ɔ wun’n, be tu be langa be ɲin aanga lɔ. Kɛ ɔ ya’n jue kɛ sin sa’n, ɔ yra be kɛ ijre sa. [...] A deli ɔ sran mun wɔ aunnvuɛ silɛ dan’n ti, ɔ nin ɔ tinmin mɔ a le i’n ti. A su tinngɛ be naan á fá be kɔ́ mɛn nga ɔ ti ɔ liɛ klonglo’n, mɔ a kan kleli be kɛ á fá mán be’n i nun lɔ. [...] A su fa be kɔ ɔ oka’n su naan be ko tran lɔ. Lika sɔ’n yɛ wɔ Anannganman, a siesieli i kɛ ɔ bɔbɔ á kplán ɔ sua nun’n niɔn. Zoova, ɔ liɛ’n, a ti famiɛn titi.’—Ezipt Lɔ Tulɛ 15:1-19.
19 Kɛ mɔ y’a wun i wlɛ weiin siɛn’n kɛ anannganman nguan wo e ɲrun koko lɛ’n ti’n, ɔ fata kɛ blɛ nga e o yɛ nun’n, Zoova i sufuɛ’m be tu be klun be su Zoova m’ɔ ti be Famiɛn m’ɔ o lɛ tititi’n i kpa liɛ su!—1 Be Nyoliɛ 29:11-13.
?Amun kwla yiyi nun?
• ?Ngue ti yɛ Gɔgu fá alɛ wlá be nga Ɲanmiɛn fɛli i wawɛ’n mannin be’n, ɔ nin be nga be ti bua’m be wie mun’n be sin ɔn?
• ?Wafa sɛ yɛ Ɲanmiɛn i nvle’n ɔ jranjran ɔn?
• ?Kɛ be se kɛ be ka be osu nun lɛ’n, i bo’n yɛle mennin?
• ?Wafa sɛ yɛ Ɲanmiɛn i nvle’n ɔ́ wún delɛ nga Zoova dé i’n niɔn?