Zoova i like ng’ɔ kle’n be ti nanwlɛ
“Anannganman i like ng’ɔ kle’n be ti nanwlɛ. Be kle sran ng’ɔ siman sa’n i ngwlɛlɛ.”—JUE. 19:8.
?AMÚN TƐ́ SU SƐ?
?Anannganman “i like ng’ɔ kle’n,” i wie yɛle benin?
?Wafa sɛ yɛ Zoova i like ng’ɔ kle’n, be uka e andɛ ɔ?
?Ngue ti yɛ ɔ fata kɛ e lafi Zoova i like ng’ɔ kle’n su ɔ?
1. ?E aɲia’m be bo’n, ndɛ benin yɛ be ta be nun yiyi ɔ? ?Ngue ti yɛ i sɔ mɔ be yo’n, ɔ ti kpa ɔ?
CƐN wie kɛ e ngunmin é súan Sasafuɛ Tranwlɛ’n uflɛuflɛ kun i nun like’n, e jran e se kɛ: ‘Ndɛ nga, b’a dun mmua yiyi nun le.’ Sɛ amun kɔ aɲia’m be bo titi’n, atrɛkpa’n, amun a sie i nzɔliɛ kɛ be ta ndɛ wie’m be nun yiyi. Ndɛ sɔ’m be nun wie yɛle Ɲanmiɛn Sielɛ’n nin e ti kpɔlɛ tɛ’n, ɔ nin sran’m be like klelɛ naan b’a kaci Zezi i sɔnnzɔnfuɛ’n. Wie liɛ ekun be kan Ɲanmiɛn nin sran klolɛ’n nin Ɲanmiɛn sulafilɛ’n, be ndɛ. Kɛ e suan i sɔ ndɛ mun e flan nun’n, ɔ uka e kpa naan y’a lafi ‘Nyanmiɛn Ndɛ’n nga e ti’n su naan y’a tiemɛn i ngbɛn.’—Zak 1:22.
2. (a) ?Anannganman “i like ng’ɔ kle’n,” i wie yɛle benin? (b) ?Ngbaciɛ benin yɛ ɔ o Zoova i mmla’n ɔ nin sran’m be liɛ’n be afiɛn ɔn?
2 Ebre nun ndɛ nga be kacili i kɛ Anannganman “i like ng’ɔ kle’n,” wie liɛ’n yɛle Ɲanmiɛn i mmla mun annzɛ sa nga Ɲanmiɛn waan i sufuɛ’m be yo’n, annzɛ sa ng’ɔ fa be sie i sufuɛ’m be ɲrun’n. Zoova i mmla’m be timan kɛ mmla nga sran’m be kpɛ be’n sa. Afin sran’m be liɛ’n, nán blɛ kwlaa nun yɛ mmla nga be kpɛ’n, be kwla di su ɔ. Ɔ maan, be kaci be. Sanngɛ Zoova liɛ’n, i mmla’m be ti nanwlɛ. Kɛ e fa be su’n, e liɛ yo ye titi. E si kɛ mmla nga Zoova kpɛli be’n, wie’m be o lɛ e diman be su andɛ. Sanngɛ nán kɛ be timan kpa ti ɔ. Afin Jue tofuɛ’n seli kɛ: “Sa nga a fa be sie min nyrun’n, be ti i nuan su tititi.”—Jue. 119:144.
3, 4. (a) ?Zoova i like ng’ɔ kle’n, i wie yɛle benin? (b) ?Ngue yɛ ɔ fata kɛ Izraɛlifuɛ’m be yo naan Zoova w’a yo be ye ɔ?
3 Zoova i like ng’ɔ kle’n, wie liɛ’n, yɛle sa ng’ɔ fa sie i sufuɛ’m be ɲrun kɛ be yo annzɛ nán be yo’n. I nuan ijɔfuɛ’m be fɛli i sɔ sa sieli Izraɛlifuɛ’m be ɲrun titi. I wie yɛle ndɛ nga kɛ ɔ ka kan Izraɛlifuɛ’m bé wá jú mɛn nga Ɲanmiɛn seli kɛ ɔ́ fá mán be’n i nun lɔ’n, Moizi kan kleli be’n. Ɔ seli be kɛ: “Amun nian amun wun kpa. Nán amun ti nun saci, nán amun yaci atin kpa’n lɛ amun ko su amuɛn mun, nán amun koto be bo. Sɛ ɔ yo sɔ-ɔ, Anannganman fá amun wun ya.” (Mml. 11:16, 17) Sɛ e kanngan Biblu’n nun’n, é wún kɛ sa nga Zoova fa sie i sufuɛ’m be ɲrun kɛ be yo annzɛ nán be yo’n, be diman be yalɛ.
4 Zoova seli i sufuɛ mun titi kɛ be ɲin yi i, be fɛ i nuan ndɛ’n su yɛ nán be yo i dunman’n i finfin. (Mml. 4:29-31; 5:28, 29) Sɛ be yo sɔ’n, ɔ́ yó be ye dan.—Sau. 26:3-6; Mml. 28:1-4.
WAFA NGA IZRAƐLIFUƐ’M BE SƆLI ƝANMIƐN I LIKE NG’Ɔ KLE’N NUN’N
5. ?Ngue ti yɛ Ɲanmiɛn kunnin Famiɛn Ezekiasi i ti alɛ ɔ?
5 Blɛ kwlaa nga Izraɛlifuɛ’m be ɲin yili Ɲanmiɛn’n, ɔ yoli be ye kɛ ng’ɔ fa kannin’n sa. I wie yɛle Famiɛn Ezekiasi i liɛ’n. I blɛ su’n, Sankeribu m’ɔ ti Asiri Famiɛn’n, ɔ ko utuli Zida klɔ’n. Kpɛkun, ɔ kunndɛli kɛ ɔ́ tú Ezekiasi bo famiɛn bia’n su. Kɛ ɔ yoli sɔ’n, Zoova w’a tranman lɛ w’a nianman. Ɔ sunmannin i anzi kun. Kpɛkun kɔnguɛ kunngba nun’n, anzi’n kunnin Asiri “sonja nga be ti safunyrɛn’m be kwlaa nin sonja’m be nun kaklaakla’m be ngba.” Ɔ maan Sankeribu fɛli i sɔ nyannzuɛn’n sɛli i sin i mɛn’n nun. (2 Nyo. 32:21; 2 Fam. 19:35) ?Ngue ti yɛ Ɲanmiɛn kunnin Famiɛn Ezekiasi i ti alɛ ɔ? Yɛle kɛ Ezekiasi “mantannin Anannganman, w’a kpɔci-mɛn i le. Ɔ fali mmla nga Anannganman fa mannin Moiz’n su.”—2 Fam. 18:1, 5, 6.
6. ?Wafa sɛ yɛ Zoziasi kleli kɛ ɔ lafi Zoova su ɔ?
6 Sran kun ekun m’ɔ fali Zoova i like ng’ɔ kle’n su’n, yɛle Famiɛn Zoziasi. Kɛ ɔ fɛ i ba kaan nun’n, “like nga bɔ be yo Anannganman fɛ’n yɛ ɔ yoli-ɔ. Ajalɛ klanman nga i nannan David fali’n, i kunngba’n yɛ ɔ fali-ɔ, w’a kaci-mɛn i.” (2 Nyo. 34:1, 2) Wafa nga Zoziasi kleli kɛ ɔ lafi Zoova su’n, yɛle kɛ ɔ bubuli klɔ’n nun amuɛn mun. Kpɛkun ɔ ukali nvlefuɛ mun naan b’a su Ɲanmiɛn kpa kɛ laa’n sa. I sɔ mɔ Zoziasi yoli’n ti’n, Ɲanmiɛn yoli i ye nin nvlefuɛ’m be kwlakwla.—An kanngan 2 Be Nyoliɛ 34:31-33 nun.
7. ?Kɛ Izraɛlifuɛ’m b’a faman Zoova i like ng’ɔ kle’n su’n, i bo guali sɛ mannin be?
7 Izraɛlifuɛ’m b’a faman Zoova i like ng’ɔ kle’n su titi. Be ɲin w’a yimɛn i, be yoli sɔ lele ɔ cɛli kpa. Kɛ b’a lafiman Ɲanmiɛn su kun’n, be yoli kɛ nga akoto Pɔlu fa kannin’n sa. Yɛle kɛ be “kɔ wa kɔ wa kɛ mmeli bɔ aunngban’n fɛ i kɔ wa kɔ wa’n sa.” (Efɛ. 4:13, 14) Ɔ maan, be wunnin be ɲrun fiaan kɛ nga Ɲanmiɛn kan kleli be’n sa.—Sau. 26:23-25; Zer. 5:23-25.
8. ?Ngue yɛ ɔ kle kɛ wafa nga Zoova nin e tran’n, ɔ nin wafa ng’ɔ nin Izraɛlifuɛ’m be trannin’n ti kun ɔn?
8 ?Ngue yɛ ɔ kle kɛ wafa nga Zoova nin e tran’n, ɔ nin wafa ng’ɔ nin Izraɛlifuɛ’m be trannin’n ti kun ɔn? Yɛle kɛ andɛ Zoova tu e fɔ yɛ ɔ kle e ngwlɛlɛ kɛ nga ɔ fa kleli Izraɛlifuɛ mun’n sa. (2 Piɛ. 1:12) Asa ekun’n, kɛ e kanngan Ɲanmiɛn Ndɛ’n nun’n, e wun sa nga Ɲanmiɛn fa be sie e ɲrun’n. Sɛ é fá be su o, sɛ é yó e bɔbɔ e like liɛ ng’ɔ ti kpa e ɲrun’n nin o, ɔ ti kɛ e bɔbɔ sa. (Nya. 14:12) Nanwlɛ, e kwla fa e wla gua like nga Zoova kle’n su. Like nga ti yɛ ɔ ti sɔ’n, ɔ nin i su mmlusuɛ nga é ɲɛ́n i’n, é wá kán be nun wie’m be ndɛ.
MAAN E FA LIKE NGA ZOOVA KLE’N SU NAAN SA TO FUAN E
9. ?Kɛ Izraɛlifuɛ’m be o aawlɛ flɛnnɛn’n nun lɔ’n, wafa sɛ yɛ Zoova kleli kɛ ɔ nin be o nun ɔn?
9 Izraɛlifuɛ’m be nantili ‘aawlɛ flɛnnɛn dan sroesroe’n’ nun afuɛ 40. Kwlaa naan b’a ju lika sɔ nun’n, Zoova w’a kleman be wafa trele ng’ɔ́ klé be atin’n, ɔ nin wafa ng’ɔ́ sásá be m’ɔ́ nían be lika’n. Sanngɛ ɔ yili i wun nglo kleli Izraɛlifuɛ mun sa kpanngban nun kɛ be kwla lafi i su, naan be kwla fɛ i like ng’ɔ kle’n su. Yɛle kɛ wia nun’n, Zoova fali wɛnsrɛn kleli be atin. Kpɛkun kɔnguɛ’n, ɔ fali sin kpajali be ɲrun. Zoova yoli sa kwlaa sɔ mun naan Izraɛlifuɛ’m be wun i wlɛ kɛ ɔ nin be o nun. (Mml. 1:19; Tul. 40:36-38) Asa ekun “b’a mian-man like fi wun.” Yɛ “be tralɛ’m b’a titi-man, be ja’m b’a wunwun-man.”—Nee. 9:19-21.
10. ?Wafa sɛ yɛ Zoova kle e atin annzɛ ɔ kpaja e ɲrun ɔn?
10 E mɔ e ti Ɲanmiɛn i sufuɛ andɛ’n, ɔ ka kan é wá wlú mɛn klanman’n nun. ?E lafi su kɛ Zoova nin e o nun naan like nga é yó naan y’a fin ‘ɲrɛnnɛn dan’n’ nun y’a fite’n, ɔ kle e? (Mat. 24:21, 22; Jue. 119:40, 41) E si kɛ Zoova su faman wɛnsrɛn kleman e atin annzɛ sin kpajaman e ɲrun. Sanngɛ, i anuannzɛ’n kle e like ng’ɔ fata kɛ e yo naan e nin i e afiɛn w’a mantan kpa’n. I wie yɛle kɛ, anuannzɛ’n wla e fanngan kɛ e kanngan Biblu’n nun, e nin e awlofuɛ mun e su Ɲanmiɛn awlo lɔ, e wɔ aɲia’m be kwlaa be bo naan e bo jasin fɛ’n i titi. ?E mian e ɲin e yo sɔ? Sɛ e mian e ɲin e yo’n, é láfi Ɲanmiɛn su kpa lele é wlú mɛn klanman’n nun.
11. ?Ngue yɛ ɔ kle kɛ e ndɛ lo Ɲanmiɛn kpa ɔ?
11 Zoova i anuannzɛ’n kle e like naan e lafi Ɲanmiɛn su kpa titi. Sanngɛ, ɔ kle e like naan e fa ajalɛ kpa wie. I wie yɛle kɛ, ɔ kle e kɛ nán e kunndɛ ninnge kpanngban naan e ɲinma’n yo kpa naan awlaboɛ’n w’a kunman e. Asa ekun’n, anuannzɛ’n kle e kɛ e yiyi e ɲin su kɛ ɔ nin i fata’n sa. Kpɛkun ɔ kle e kɛ e wlawla e wun kpa, yɛ e nian e wun su suklu tɛnndɛn dilɛ’n i lika. Ɔ kle e ekun kɛ e nian e sua nin e loto mun, ɔ nin Ɲanmiɛn Sielɛ sua’m be lika. Yɛ e buabua e wun e sie naan sɛ sanvuɛ sa wie kɛ nzue m’ɔ tɔ di lika’n sa’n ɔ tɔ’n, y’a kwla fite nun. I kwlaa sɔ’n kle kɛ e ndɛ lo Ɲanmiɛn kpa.
ZOOVA I MMLA’M BE TI’N KLISTFUƐ KLIKLI’M BE SULI I KPA TITI
12. (a) ?Ngue yɛ Zezi seli i sɔnnzɔnfuɛ mun titi kɛ be yo ɔ? (b) ?Ngue yɛ Zezi yoli mɔ Piɛli i wla w’a fiman su le ɔ? ?Ngue yɛ ɔ fata kɛ e kusu e ɔ?
12 Like nga Ɲanmiɛn waan i sufuɛ’m be yo’n, ɔ kleli be flannin nun Zezi blɛ su. I wie yɛle kɛ Zezi seli i sɔnnzɔnfuɛ mun titi kɛ be yo wun ase kanfuɛ. Kpɛkun i bɔbɔ yoli sa wie kleli kɛ ɔ ti wun ase kanfuɛ naan i sɔnnzɔnfuɛ’m be nian su. I wie yɛle sa ng’ɔ yoli i sin naan b’a trɛ i’n. Titi’n, awlo nun junman difuɛ mun yɛ be wunnzin be min’n i ja ɔ. Sanngɛ kɛ Zezi nin i akoto’m bé dí Delɛ cɛn aliɛ’n, i bɔbɔ jaoli aliɛ’n sin, ɔ wunnzinnin i akoto’m be ja. (Zan 13:1-17) Nanwlɛ, Zezi i wun ase kanlɛ sɔ’n, i akoto’m be wla w’a fiman su le. I wie yɛle akoto Piɛr liɛ’n. Kɛ afuɛ 30 sinnin’n, ɔ wlali i niaan Klistfuɛ mun be fanngan kɛ be yo wun ase kanfuɛ. (1 Piɛ. 5:5) Nzuɛn kpa sɔ mɔ Zezi kleli’n, ɔ fata kɛ e kwlaa e nian su.—Fil. 2:5-8.
13. ?Ngue yɛ Zezi seli i sɔnnzɔnfuɛ mun kɛ ɔ ti cinnjin kpa wie kɛ be yo ɔ?
13 Zezi seli i sɔnnzɔnfuɛ mun ekun kɛ be lafi Ɲanmiɛn su kpa. Cɛn kun’n, i sɔnnzɔnfuɛ’m b’a kwlá fuanman asiɛ usu kun m’ɔ o gbanflɛn kun su’n. Ɔ maan be usali Zezi kɛ: “?Nguɛ ti yɛ y’a kwlá fuan-man asiɛ usu sɔ nin-ɔn?” Zezi tɛli be su kɛ: “Nyanmiɛn su bɔ an lafi-man’n ti-ɔ. Nanwlɛ, sɛ an lafi Nyanmiɛn su bɔ kaan b’ɔ ju kɛ mutard mma sa’n, [...] sa fi nun-man lɛ bɔ an su kwlɛ-mɛn i yo-ɔ.” (Mat. 17:14-20) Kpɛ sunman’n, Zezi kan kleli i sɔnnzɔnfuɛ mun kɛ ɔ ti cinnjin kpa kɛ be lafi Ɲanmiɛn su kpa. (An kanngan Matie 21:18-22 nun.) I sɔ wie yɛ ɔ ti cinnjin kpa kɛ e yo ɔ. Kɛ ɔ ko yo naan y’a kwla yo sɔ’n, ɔ fata kɛ e tran aɲia kanngan nin aɲia dandan kwlaa be bo. ?I sɔ yɛ e yo ɔ? Kɛ e tran aɲia’m be bo’n, e nin e niaan mun e di aklunjuɛ. Sanngɛ like bɔbɔ nga ti yɛ e kɔ aɲia’m be bo’n yɛle kɛ, e kunndɛ kɛ é klé Zoova kɛ e lafi i su.
14. ?Ngue ti yɛ ɔ cinnjin kpa kɛ Klistfuɛ’m be klo be wiengu ɔ?
14 Biblu’n i bue nga laa be klɛli i Glɛki nun mɔ be flɛ i ekun kɛ Aenguɛ uflɛ’n i nun’n, Ɲanmiɛn sufuɛ’m be kannin sran klolɛ’n i ndɛ kpɛ sunman. Zezi seli kɛ mmla i nɲɔn su m’ɔ ti dan’n yɛ: “Klo ɔ wiengu kɛ a fa klo ɔ bɔbɔ wun’n sa.” (Mat. 22:39) I niaan bian Zaki kusu seli kɛ “mmla nga wie nun-mɛn i sin’n” yɛle sran klolɛ’n. (Zak 2:8) Akoto Zan liɛ’n, ɔ seli kɛ: “N sran kpa mun, nán mmla uflɛ yɛ ń klɛ́ blɛ́ amun-ɔn, sanngɛ mmla laa liɛ kunngba nga be fa mannin amun i bo bolɛ nun nin-ɔn. [...] Sanngɛ ɔ nin i sɔ’n ngba’n, ɔ ti kɛ mmla uflɛ yɛ n su fa man amun sa.” (1 Zan 2:7, 8) ?Mmla onin yɛ Zan flɛ i ‘mmla laa’n’ niɔn? Mmla sɔ’n yɛle ng’ɔ se kɛ e klo e wiengu’n. Like nga ti yɛ Zan flɛ i ‘mmla laa’n,’ yɛle kɛ Zezi kɛnnin i ndɛ “i bo bolɛ nun.” Kpɛkun like nga ti yɛ ɔ flɛ i ‘mmla uflɛ’n,’ yɛle kɛ siɛn’n, Zezi i sɔnnzɔnfuɛ’m be wiengu mun ti’n, bé wá fá be wun mán. Nanwlɛ, like nga Zoova kle e’n ti’n, e kloman e wiengu mun e nuan bui su kɛ be nga be sumɛn i’n sa. Sanngɛ e klo be kpa. I sɔ’n ti’n, é lá Zoova i ase dan.
15. ?Like cinnjin kpafuɛ nga ti yɛ Zezi bali mɛn nun’n yɛle benin?
15 Sran’m be ndɛ loli Zezi kpa. Ɔ maan, ɔ yoli tukpacifuɛ’m be juejue yɛ ɔ cɛnnin sran wie mun. Sanngɛ nɛ́n i sɔ yolɛ’n ti yɛ ɔ bali mɛn’n nun ɔn. Like cinnjin kpafuɛ nga ti yɛ Zezi bali mɛn nun’n yɛle kɛ ɔ́ kán Ɲanmiɛn ndɛ klé sran mun. I lifuɛ’n yɛ ɔ́ yó sran’m be ye titi ɔ. Afin amun e nian. Be nga Zezi yoli be juejue’n, be wa tɔli tukpaciɛ ekun. Yɛ be ng’ɔ cɛnnin be’n, be wa sali be sin be wuli. Sanngɛ be nga be fali Ɲanmiɛn ndɛ m’ɔ kan kleli be’n su’n, be lafili su kɛ bé ɲán anannganman nguan.—Zan 11:25, 26.
16. ?Ngue yɛ ɔ kle kɛ jasin fɛ bolɛ junman nga Zezi boli i bo’n, andɛ e di i kpa liɛ su?
16 Zezi seli i sɔnnzɔnfuɛ mun kɛ: “An wɔ ko kle nvle-nvle’n kwlaa be like maan be kaci n sɔnnzɔnfuɛ.” (Mat. 28:19) Junman sɔ mɔ Zezi bɔbɔ boli i bo’n, i sɔnnzɔnfuɛ klikli’m be dili. Yɛ andɛ’n, e di i kpa liɛ su. Afin e bo jasin fɛ’n nvlenvle 230 tra su nun yɛ e kle sran kpanngban kpa be Biblu’n nun like. E kwlaa mɔ e di i sɔ junman’n, e ti sran akpinngbin nso tra su mɛn wunmuan’n nun. Junman dan sɔ mɔ e di’n, ɔ kle weiin kɛ e o mɛn’n i bue nuan.
MAAN E LAFI ZOOVA SU WIE ANDƐ
17. ?Ngue yɛ Pɔlu nin Piɛli be seli be niaan Klistfuɛ mun kɛ be yo ɔ?
17 Ɲanmiɛn i like ng’ɔ kle’n ti’n, Klistfuɛ klikli’m be lafili i su kpa titi. I wie yɛle ndɛ nga i nun mɔ Pɔlu o bisua lɔ’n, ɔ kan kleli Timote’n. Ɔ seli i kɛ: “Fa ndɛ nanwlɛ nga n kan kleli wɔ’n su, nian su yo.” (2 Tim. 1:13) Ndɛ sɔ’n wlali Timote i fanngan kpa. Piɛli kusu wlali i niaan’m be fanngan kɛ be klo be wiengu, be tra be awlɛn, yɛ be nian be wun su. I sin’n, ɔ seli kɛ: “An si sa sɔ mun, yɛ an lafi ndɛ nanwlɛ nga an tili’n su kpa, sanngɛ n su yaci-man amun wla kpɛnlɛ sa sɔ’m be su.”—2 Piɛ. 1:5-8, 12.
18. ?Kɛ aniaan’m be tili ndɛ nga Pɔlu nin Piɛli be kan kleli be’n, ngue yɛ be yoli ɔ?
18 ‘Ndɛ nga Nyanmiɛn nuan ijɔfuɛ’m be kannin’n’ yɛ Pɔlu nin Piɛli be fa kpɛnnin be niaan’m be wla ɔ. (2 Piɛ. 3:2) ?Kɛ aniaan’m be tili ndɛ sɔ mun’n, ngue yɛ be yoli ɔ? Be sɔli nun klanman kɛ Ɲanmiɛn yɛ ɔ su kle be atin ɔn. Afin ɔ klo be yɛ ɔ kunndɛ kɛ be su i titi.—2 Piɛ. 3:18.
19, 20. ?Ngue ti yɛ ɔ fata kɛ e lafi Zoova i like ng’ɔ kle’n su ɔ? ?Sɛ e yo sɔ’n, wafa sɛ yɛ i bo gúa mán e ɔ?
19 Zoova i like ng’ɔ kle’n, be o i nuan Ndɛ’n nun. Sɛ andɛ e lafi be su’n, ɔ́ yó kpa mán e. Afin ndɛ nga Zoova kan’n, ɔ kaciman. (An kanngan Zozie 23:14 nun.) Biblu’n kle e wafa nga laa’n, Ɲanmiɛn nin sran wie’m be nantili’n. Be klɛli i kwlaa sɔ’n kɛ bé fá klé e ngwlɛlɛ. (Rɔm. 15:4; 1 Kor. 10:11) Zoova i like ng’ɔ kle’n, i wie yɛle ndɛ nga i nuan ijɔfuɛ’m be kannin’n. Ndɛ sɔ’m be nun wie’m be kpɛn su kpa andɛ. I wie yɛle kɛ, be seli kɛ “cɛn wie lele’n,” sran kpanngban kpa bé wá sú Zoova. (Eza. 2:2, 3) Be kannin ekun kɛ lika’n wá yó kekle. Kpɛkun kɛ e fa kannin’n sa’n, jasin fɛ’n mɔ e bo i kpa mɛn wunmuan’n nun’n, ɔ kle kɛ ndɛ nga Zezi kannin’n su kpɛn su.—Mat. 24:14.
20 Kɛ ɔ fɛ i laa lele’n, e Si Ɲanmiɛn kleli kɛ e kwla lafi i su. ?Kɛ ɔ fa sa mun sie e ɲrun’n, e nanti be su? I sɔ yɛ ɔ fata kɛ yo ɔ. Aniaan bla kun m’ɔ suan Rozelini seli kɛ: “N fali min wla kwlaa guɛli i Zoova su. Ɔ maan m m’a wunnin i wlɛ kɛ ɔ klo min naan ɔ jin min sin.” Maan e kusu e nian Zoova i like ng’ɔ kle’n su e nanti titi. Sɛ e yo sɔ’n, e liɛ yó ye.
[Foto, bue 7]
[Foto, bue 8]
Zoziasi fali Zoova i like ng’ɔ kle’n su ti’n, nvlefuɛ’m be wa suli Ɲanmiɛn kpa kɛ laa’n sa. (An nian ndɛ kpɔlɛ 6 nun.)
[Foto, bue 10]
Kɛ e fa Zoova i like ng’ɔ kle’n su’n, e nian e aɲia sua’m be lika. (An nian ndɛ kpɔlɛ 11 nun.)