Maan e fa e wun e mantan Ɲanmiɛn
‘Blɛ nga a kleli’n, sɛ ɔ ju naan a flɛ min’n ń sró’
NANWLƐ, kɛ e ɲin bo lɛ’n, e awlɛn su sran kun fɛ lele m’ɔ wu’n, ɔ yo ya dan. Kɛ i sɔ sa’n ju’n, e wla bo e wun. Sanngɛ kɛ e si kɛ Ɲanmiɛn Zoova m’ɔ ti e Yifuɛ’n ɔ wun e awlabɔɛ’n, i sɔ’n cici e wla. Asa ekun’n, like ng’ɔ cici e wla kpa’n, yɛle kɛ i wun blibli i kɛ ɔ́ cɛ́n be nga be wuli’n. E wla cicilɛ ndɛ o Zɔb 14:13-15 nun. Maan e fa e ɲin e sie su e nian.
Zɔbu ti sran m’ɔ lafi Ɲanmiɛn su tankaan kpa ɔ. Sanngɛ ɲrɛnnɛn kpanngban wie’m be tɔli i su. Yɛle kɛ i sa nun ninnge kwlaa be sacili, i mma m’ɔ klo be kpa’n be kwlaa be wuli. Kpɛkun tukpacɛ tɛ wie wa tɔli i su. Kɛ ɲrɛnnɛn’n tinnin i su kpa’n, ɔ kpan flɛli Ɲanmiɛn kɛ: ‘Ee! Min Ɲanmiɛn, sɛ ɔ ti kɛ a fa min fia [ndia nga be sie klɔ sran kwlaa nun’n] lɔ-ɔ yo ye’n, wuun ń fía lɔ cɛ, wuun ń fía lɔ lele saan ɔ ya’n ɔ́ sín.’ (Ndɛ mma 13) Zɔbu liɛ’n i waan ndia’n ti i wunmiɛn lolɛ lika. Lɔ’n ɔ́ káci kɛ bɛtrɔ wie mɔ Ɲanmiɛn fa sieli’n sa. Ɲrɛnnɛn fi su kɛnmɛn i kun.a
?Sanngɛ Zɔbu ká ndia’n nun lɔ mlɔnmlɔn? Zɔbu bumɛn i sɔ. I srɛlɛ’n nun’n, ɔ kan guali su kɛ: “Ee! [...] á klé cɛn, sɛ ɔ ju’n, kpɔkuun ɔ wla kpɛ́n min su.” Zɔbu lafili su kpa kɛ ɔ su cɛman ndia nun lɔ, naan Zoova i wla su fimɛn i su. Ɔ fali blɛ ng’ɔ́ dí i ndia’n nun lɔ’n, ɔ sunnzunnin ‘junman difuɛ b’ɔ minndɛ lelee’n.’ Ɔ maan ɔ fata kɛ saan fii ɔ minndɛ lɔ. ?Ɔ́ mínndɛ lele dí blɛ nɲɛ? Ɔ seli kɛ “lelee, kpɔkuun be fa sran kaci i.” (Ndɛ mma 14) I kacilɛ’n sɔ’n i bo’n yɛle kɛ ɔ́ fín ndia’n nun fíte. Sɛ é kwlá sé’n, bé cɛ́n i nguan!
?Ngue ti yɛ Zɔbu lafili su kpa kɛ ɔ́ ɲɛ́n i ti ɔ? Afin ɔ si kɛ klolɛ mɔ Ɲanmiɛn Kpli klo i sufuɛ mun’n ti’n, ɔ sokpɛmɛn i gbanflɛn difuɛ le. Zɔbu seli kɛ: “Sɛ ɔ ju naan a flɛ min’n ń sró, afin n ti ɔ sa nuan like.” (Ndɛ mma 15) Zɔbu si kɛ Ɲanmiɛn yɛ ɔ yili i ɔ. E nguan Manfuɛ’n yɛ maan be wunnzɛli Zɔbu mɔ be wuli i ɔ. Ɔ maan sɛ ɔ wu’n, ɔ kwla fɛ i sɛ i sin nguan nun ekun.—Zɔb 10:8, 9; 31:15.
Zɔbu i ndɛ’n kle e kɛ Zoova klo e. Be nga Zoova klo be kpa’n, yɛle be nga be fa be nguan’n be wlɛ i sa nun kɛ Zɔbu liɛ’n sa’n. Be ti Zoova i sa nun kɛ ufa sa, yɛ ɔ fa be kaci sran’n i wafa ng’ɔ klo’n. (Eza. 64:7) Zoova i sufuɛ kpa’m be ti i awlɛn su like. I sufuɛ kpa nga be wuli’n be liɛ’n ‘sɛ ɔ ju naan ɔ flɛ be’n bé sró,’ yɛle kɛ i ɲin o be sin. Fluwa sifuɛ kun seli kɛ Ebre nun ndɛ sɔ’n “yɛ be fa kan like nga be ɲin o i sin kpa’n i ndɛ ɔ.” Nanwlɛ, nán Zoova i wla yɛ ɔ kpɛn i sufuɛ’m be su sa ngbɛn ɔn, sanngɛ i wun blibli i kɛ ɔ́ cɛ́n be nguan.
Zɔbu fluwa’n ti Biblu’n nun fluwa nga be dun mmua klɛli’n be nun kun. Ɲanmiɛn sa, mɔ Fluwa sɔ’n nun’n Zoova yili i nglo kleli e kɛ ɔ́ cɛ́n be nga be wuli’n niɔn.b Ɲanmiɛn kunndɛ kɛ amun wun amun awlɛn su sran nga be wuli mun ekun. Kɛ e bu i sɔ liɛ’n i akunndan’n, ɔ yo maan kɛ e awlɛn su sran wu’n, e wla boman e wun dan. Sɛ amun klo’n, amun kwla suan Ɲanmiɛn sɔ m’ɔ klo sran’n i su like. Kpɛkun wafa nga amun kwla fa amun wun mɛn i naan w’a fa amun a yo sran’n i wafa ng’ɔ klo’n, amun kwla suɛn i wie. I sɔ maan amún wún wafa nga i klun sa’n kpɛ́n su’n.
[Ja ngua lɛ ndɛ mun]
a Kɛ Zɔbu seli kɛ ‘a fa min fia’n,’ fluwa kun waan ndɛ sɔ’n i bo’n wie yɛle kɛ “a fa min fia kɛ wɔ awlɛn su like sa naan sa fi w’a ɲanman min.” Fluwa kun ekun se i liɛ kɛ i ndɛ sɔ’n i bo’n yɛle “fa min fia kɛ bɛtrɔ sa.”
b Sran nga bé cɛ́n be mɔ bé trán mɛn uflɛ’n nun’n, sɛ amun waan amún súan i su ndɛ nga Biblu’n kan’n, an kwla nian fluwa ?Ngue like yɛ Biblu’n kle i sakpasakpa ɔ? i ndɛ tre 7 nun. Zoova i Lalofuɛ mun yɛ be yili ɔ.