Nán e yaci seiin nantilɛ’n!
“Min liɛ’n, n nantili sein, m’an fɔn-man.”—JUE. 26:11.
1, 2. ?Ndɛ benin yɛ Zɔbu kɛnnin i i nantilɛ’n su ɔ? ?Yɛ Zɔb fluwa’n i ndɛ tre 31 nun’n, ngue ndɛ yɛ be kɛn i Zɔbu su ɔ?
LAA’N, waka toe yɛ be fa sunnzun ninnge mun ɔn. Kɛ be yo toe sɔ’n sa: be ja waka kun ngbinngbin nun, kpɛkun be fa kun ekun be bobo i afiɛn. Be fa kpongbo nɲɔn be sende i tiwatiwa’m be su. Be fa like nga be waan bé súnnzun’n be sie i kpongbo kun nun, kpɛkun be fa toe’n i yɛbuɛ’n be sie i kun nun. Ɲanmiɛn seli i sufuɛ’m be kɛ ɔ fataman kɛ be fa toe nga be fa di ndrunmun’n be sunnzun ninnge mun.—Nya. 11:1.
2 Kɛ Satan klé Zɔbu m’ɔ ti Ɲanmiɛn sufuɛ i yalɛ’n, Zɔbu seli kɛ: “Maan [Zoova] fa toe nga ɔ ti sɛsɛ’n, ɔ fa sunnzun min. I bɔbɔ ɔ́ wá sí kɛ n ti sein.” (Zɔb 31:6) I sin’n, Zɔbu boli ninnge wie mɔ be kwla yo naan sran kun yaci seiin nantilɛ’n be su. Sanngɛ ndɛ nga Zɔbu kɛnnin i Zɔb fluwa’n i ndɛ tre 31 nun’n, ɔ kle kɛ w’a yaciman seiin nantilɛ’n. I ajalɛ klanman sɔ’n kwla wla e fanngan naan y’a yo kɛ i sa wie, naan y’a kwla kan ndɛ kunngba’n nga jue tofuɛ Davidi kannin’n wie. Ɔ seli kɛ: “Min liɛ’n, n nantili sein, m’an fɔn-man.”—Jue. 26:11.
3. ?Ngue ti yɛ ɔ ti cinnjin kɛ ninnge kanngan nin ninnge dandan’m be nun’n, e nanti seiin Ɲanmiɛn ɲrun ɔn?
3 Kannzɛ be kleli Zɔbu i ɲrɛnnɛn lele’n, sanngɛ w’a kpɔciman Ɲanmiɛn. Wie’m be kwla se kɛ yalɛ nga be kleli Zɔbu’n ɔ nin wafa nga ɔ fa jrannin kekle’n, awlanmannun’n, sran fi nin a yomɛn i sɔ le. Kɛ é sé yɛ’n, e wunman e ɲrun kɛ Zɔbu sa. Sanngɛ kɛ ɔ ko yo naan y’a jran Ɲanmiɛn i atin m’ɔ le i sie nglo’n nin asiɛ’n i sin naan y’a kpɔcimɛn i’n, ɔ fata kɛ ninnge kanngan nin ninnge dandan’m be nun’n, e nanti seiin.—An kanngan Lik 16:10 nun.
Ɔ ti cinnjin kɛ e nzuɛn’n yo kpa titi
4, 5. ?Kɛ mɔ Zɔbu nanti seiin ti’n, ngue yɛ w’a yoman ɔn?
4 Kɛ ɔ ko yo naan y’a kpɔciman Zoova’n, ɔ fata kɛ e nanti i mmla’m be su kɛ Zɔbu sa. Ɔ seli kɛ: “N tali nda kɛ n fa-man min nyinma n kpɛ-man talua wie kannglɛ. [...] Sɛ bla wie kunndɛlɛ akunndan kpɛnnin min klun’n, sɛ n sali min wiengu wie anuan nun’n, maan min yi’n ɔ di sran uflɛ junman. Maan sran uflɛ’m be nin i be la.”—Zɔb 31:1, 9, 10.
5 Zɔbu fuali kpa kɛ ɔ su kpɔciman Ɲanmiɛn ti’n, w’a nianman bla kun sa lelee w’a bumɛn i kunndɛlɛ akunndan. Ɔ le bla ti’n, ɔ nin talua wie fi w’a traman ndalie. Annzɛ sran uflɛ yi kunndɛlɛ akunndan w’a bɛmɛn i klun. Ndɛ nga Zezi kɛnnin i oka’n su lɔ’n nun’n, ɔ kannin bian nin bla kunndɛlɛ’n i su ndɛ kekle kpa. Nanwlɛ, be nga be kunndɛ kɛ bé nánti seiin’n, ɔ fataman kɛ be wla fi ndɛ sɔ’n su.—An kanngan Matie 5:27, 28 nun.
Nán e yo gblɛfuɛ
6, 7. (a) ?Kɛ nga ɔ fa yoli Zɔbu sa’n, sɛ e ti seiinfuɛ annzɛ e timɛn i sɔfuɛ’n, ngue yɛ Ɲanmiɛn fa sunnzun e ɔ? (b) ?Ngue ti yɛ ɔ fataman kɛ e yo gblɛfuɛ yɛ nán e di ndrunmun ɔn?
6 Sɛ e kunndɛ kɛ be bo e dunman be nga be nanti seiin be nun wie’n, ɔ fataman kɛ e yo gblɛfuɛ. (An kanngan Nyanndra Mun 6:16-19 nun.) Zɔbu seli kɛ: “Sɛ n di-man nanwlɛ mlɔnmlɔn, naan ndrunmun cɛ yɛ ɔ yo min fɛ yɛ n di’n, maan Nyanmiɛn toe nga ɔ ti sɛsɛ’n, ɔ [Zoova] fa sunnzun min. I bɔbɔ ɔ́ wá sí kɛ n ti sein.” (Zɔb 31:5, 6) Zoova sunnzun mɛn wunmuan’n nunfuɛ mun i “toe nga ɔ ti sɛsɛ’n” su. Kɛ nga Ɲanmiɛn fa yoli Zɔbu sa’n, kɛ ɔ ko yo naan w’a wun kɛ e nanti seiin’n, ɔ fɛ i mmla sɛsɛ’n sunnzun e.
7 Sɛ e kaci gblɛfuɛ annzɛ e di ndrunmun’n, e su kwlá nantiman seiin Ɲanmiɛn ɲrun. Be nga be nanti seiin be “wla like nga be yo nyannzuɛn ti be fiafia su’m be ase,” yɛ be “yo-man like gblɛgblɛ nun.” (2 Kor. 4:1, 2) ?Yɛ sɛ e gblɛ ninnge mɔ e yoli’n ɔ loli e niaan kun ngasi ɔ maan ɔ srɛ Ɲanmiɛn kɛ ɔ ukɛ i’n nin? Nanwlɛ e mɔ e yoli e niaan sɔ’n i sa’n, e yako! Jue tofuɛ’n seli kɛ: “Kɛ n wo nyrɛnnɛn nun’n, n kpan flɛli Anannganman, i kusu tɛli min su. Anannganman, de min ato buafuɛ mun nin be nga be ta nda ngbɛn’n be sa nun!” (Jue. 120:1, 2) Nán e wla fi su kɛ Ɲanmiɛn wun e klun lɔ naan ɔ “si sran’m be akunndan’n nin sa ng’ɔ o be klun lɔ’n.” Ɔ maan sɛ e ti seiinfuɛ sakpa annzɛ e timɛn i sɔfuɛ’n, ɔ wun i wlɛ.—Jue. 7:9, 10.
Maan e nin e wiengu mun e tran kpa
8. ?Wafa sɛ yɛ Zɔbu nin i wiengu’m be trannin ɔn?
8 Sɛ e waan é nánti seiin, ɔ fata kɛ e yo kɛ Zɔbu sa. Afin i liɛ’n, w’a buman sran lufle, ɔ yoli wun ase kanfuɛ yɛ ɔ buli sran’m be sran. Ɔ seli kɛ: “?Sɛ n di min sufuɛ yasua wie annzɛ min sufuɛ wie i lufle’n, sɛ ɔ fɛ i sɔ sa’n ɔ sie min nyrun naan m’an yo-man ng’ɔ ti su’n m’an mɛnmɛn i’n, cɛn nga Nyanmiɛn jáso kɛ ɔ́ bú min fɔ’n, ń yó i sɛ? ?Sɛ ɔ usa-usa min nun’n, ń tɛ́ i su sɛ? ?Nyanmiɛn b’ɔ maan be wunnzɛli min mɔ be wuli min’n, nán i kunngba’n yɛ maan be wunnzɛli be yɛ be wuli be kɛ min sa-a? ?W’a siesie-man be bé nin klun kɛ min sa?”—Zɔb 31:13-15.
9. ?Zɔbu nin i afanniɛn’m be trannin sɛ? ?Yɛ wafa sɛ yɛ e kwla yo kɛ i sa wie ɔ?
9 Zɔbu blɛ su’n sran’m be jɔlɛ dilɛ’n timan kekle. Ndɛ kwlaa nga be tɔ’n, be di be su jɔlɛ sɛsɛsɛ. Afanniɛn’m be bɔbɔ be kwla kɔ jɔlɛ difuɛ’n be sin kɛ be di be ndɛ. Zɔbu w’a diman i afanniɛn’m be lufle, ɔ sili be aunnvuɛ. Sɛ e waan é nánti seiin’n, ɔ fata kɛ e yo i sɔfuɛ wie. I li sɛ e ti asɔnun kpɛnngbɛn annzɛ asɔnunfuɛ’m be lika nianfuɛ’n, yɛ ɔ fata kɛ e nanti su kpa’n niɔn.
Maan e yo aklunyefuɛ, nán e ɲin blo sran like su
10, 11. (a) ?Wafa sɛ yɛ e si kɛ Zɔbu yoli aklunye yɛ ɔ ukɛli i wiengu ɔ? (b) ?Kɛ e nian Zɔb 31:16-25 nun’n, Ɲanmiɛn Ndɛ’n nun afɔtuɛ uflɛ benin yɛ e wla kwla kpɛn su ɔ?
10 Zɔbu yoli aklunyefuɛ, ɔ ukɛli i wiengu. W’a bumɛn i bɔbɔ i ngunmin i wun akunndan yɛ i ɲin w’a bloman sran like su. Ɔ seli kɛ: “?Angboti bla wie w’a minndɛ min like wie ti lele w’a fɛ ngbɛn le? ?N kunngba m’an tran aliɛ su m’an di m’an kpɛ aika ba le? [...] Sɛ n wunnin sran nga i wun ti kplɛn annzɛ yalɛfuɛ wie, sɛ m’an man-man be kondro’n b’a kata-man be wun’n, [...] sɛ jɔlɛ diwlɛ lɔ’n, n jasoli aika wie wun kɛ ń nían bɔ jɔlɛ difuɛ’m bé jrán min sin ti’n, maan min sa’n ɔ kpa min wun tɔ. Maan min sa’n bu i afiɛn sɛsɛ tɔ.” Asa ekun’n, sɛ Zɔbu kannin sika ɔkwlɛ’n i ndɛ seli kɛ: ‘Min sasafuɛ’n yɛle wɔ’n,’ nn w’a kwlá nantiman seiin!—Zɔb 31:16-25.
11 Zɔbu i ndɛ fɛfɛ sɔ’n maan e wla kpɛn Zezi i sɔnnzɔnfuɛ Zaki i ndɛ nga su. I waan: “Nyanmiɛn sulɛ b’ɔ ti kpa bɔ fiɛn fi nun-mɛn i wun e Si Nyanmiɛn nyrun’n, yɛlɛ aika mun nin angboti mmla’m bɔ be wun nyrɛnnɛn’n be lika nianlɛ, ɔ nin be wun su nianlɛ mɛn nun sa tɛtɛ yolɛ’m be nun.” (Zak 1:27) E wla kwla kpɛn Zezi i ndɛ nga su wie. Ɔ seli kɛ: “An nian amun wun kpa konvi kpli yolɛ’n i lika, afin maan sran nyɛn i wun ɔ nyɛn i wun sɛ, nán ninnge sɔ mun yɛ be mɛn i nguan-an.” I sin’n, Zezi kannin bian aɲanbeunfuɛ’n mɔ i ɲin yiman like’n i ndɛ seli kɛ: ‘Ɔ lɛ-man Nyanmiɛn ninnge’m be wie fi.’ I sɔ’n ti’n ɔ wuli. (Lik 12:15-21) Sɛ e waan é nánti seiin titi’n, ɔ fataman kɛ e ɲin blo sran like su annzɛ e yo konvifuɛ. Be ɲin m’ɔ blo sran like su’n ɔ nin amuɛn sɔlɛ’n ti kun. Afin like nga sran’n i ɲin blo su’n, ɔ yo maan ɔ fɛmɛn i ɲin siemɛn i Zoova su kun. (Kol. 3:5) Seiin nantilɛ’n nin konvi kpli’n be faman sin gbo kunngba nun.
Maan e tra Ɲanmiɛn sulɛ kpa’n i nun kpa
12, 13. ?Ajalɛ benin yɛ Zɔbu kleli e amuɛn sɔlɛ’n i lika ɔ?
12 Be nga be nanti seiin be jasoman Ɲanmiɛn sulɛ kpafuɛ’n i atin’n su. Zɔbu yoli sɔ wie, i ti ɔ kwla seli kɛ: “Kɛ ń wún kɛ wia’n ɔ kpaja klanman’n, annzɛ kɛ ń wún kɛ anglo’n i nantilɛ’n ɔ yo nyɛnmɛn’n, sɛ i ti be sɔlɛ akunndan kpɛnnin min klun’n, sɛ n fali be n yoli min amuɛn n sɔli be’n, nán sa bɔ jɔlɛ difuɛ’m be yaci cɛ min’n yɛ ɔ o lɛ-ɔ. Afin ɔ kle kɛ m’an kaci min sin m’an si Nyanmiɛn b’ɔ o nglo lɔ’n.”—Zɔb 31:26-28.
13 Zɔbu w’a sɔman amuɛn. Sɛ ninnge kɛ wia nin anglo ba sa’n be sɔlɛ akunndan kpɛnnin i klun naan ‘ɔ fali be yoli i amuɛn ɔ sɔli be’n,’ nn ɔ kle kɛ Zɔbu w’a kaci i sin w’a si Ɲanmiɛn. (Mml. 4:15, 19) Kɛ ɔ ko yo naan y’a kpɔciman Ɲanmiɛn le’n, ɔ fata kɛ e kpalo amuɛn sɔlɛ’n i wafa’n kwlaa.—An kanngan 1 Zan 5:21 nun.
Nán e fa sran wun sa e sie e klun yɛ nán e yo gblɛfuɛ
14. ?Ngue yɛ ɔ kle kɛ Zɔbu w’a bumɛn i wiengu i wun akunndan tɛ le ɔ?
14 Zɔbu w’a bumɛn i wiengu i wun akunndan tɛ le yɛ w’a yoman klunwi aeliɛ. Ɔ si kɛ sran ng’ɔ yo i sɔ’n, ɔ nantiman seiin. Ɔ maan ɔ seli kɛ: “?Kɛ sa tɔ min kpɔfuɛ’n i su’n, kɛ nyrɛnnɛn sa ɔ nyɛn i’n, n klun jɔ? ?Min nuan nga nun, m boli i sannzan kɛ ɔ wu?”—Zɔb 31:29, 30.
15. ?Sɛ ɲrɛnnɛn tɔ e wiengu su’n, ngue ti yɛ ɔ fataman kɛ ɔ yo e fɛ ɔ?
15 Sɛ ɲrɛnnɛn’n tɔ Zɔbu m’ɔ ti sran kpa’n i kpɔfuɛ’n su’n, ɔ siman able. Ɲanndra kun waan: “Sɛ ɔ kpɔfuɛ’n tɔ’n, nán ɔ klun jɔ i sɔ’n ti. Yɛ sɛ sa nyɛn i’n, nán ɔ klun jɔ i sɔ’n ti. Sɛ a yo sɔ-ɔ, Anannganman klun su jɔ-man ɔ wun. Yɛ sɛ ɔ gugu kɛ ɔ́ tú i fɔ-ɔ, ɔ su tu-mɛn i kun.” (Nya. 24:17, 18) Zoova si e klun lɔ akunndan’n ti’n, sɛ ɲrɛnnɛn tɔ e wiengu su naan e si su able’n, ɔ si nun. Sɛ e yo i sɔ’n, ɔ yomɛn i fɛ mlɔnmlɔn. (Nya. 17:5) Ɲanmiɛn bɔbɔ nin be nga be kpɔ e’n be kwla kan, afin ɔ seli kɛ: “M bɔbɔ ń tú n klunngbɔ’n, yɛ ń túa be kalɛ.”—Mml. 32:35.
16. ?Kannzɛ bɔbɔ e timan aɲanbeunfuɛ’n, sanngɛ wafa sɛ yɛ e kwla yo aklunyefuɛ ɔ?
16 Zɔbu yoli aklunyefuɛ. (Zɔb 31:31, 32) I li bɔ sɛ e timan aɲanbeunfuɛ’n, sanngɛ e kwla “yo aklunyefuɛ.” (Rɔm. 12:13) Like kan nga e le i’n e nin e wiengu mun e kwla e cɛ nun. Afin Biblu’n se kɛ: “Kɛ n ko tran kan klolɛ nun-man lɛ bɔ sanngɛ nannin nnɛn kpakpa’n yɛ be di i lɛ’n, ɔ flunman kɛ n ko tran kan nnya ngbɛn yɛ be di i lɛ bɔ sanngɛ klolɛ o lɛ’n.” (Nya. 15:17) Kɛ e nin e wiengu Klistfuɛ mɔ be nanti seiin’n e yia klolɛ nun’n e di like kan likawlɛ’n, ɔ wla e wiengu fanngan.
17. ?Ngue ti yɛ ɔ fataman kɛ e kata e sa tɛ’n su ɔ?
17 Sɛ ɔ ti kɛ e o lɛ Zɔbu blɛ su naan ɔ yoli e ye wie’n, nn ɔ wlali e fanngan dan. Afin ɔ timan gblɛfuɛ. W’a yoman kɛ Klistfuɛ klikli’m be blɛ su sran mɔ be sroman Ɲanmiɛn’n mɔ be wluli asɔnun’n nun blɛblɛblɛ ‘be fali be nuan nun fɛ kunndɛli like sran’m be sa nun’n,’ sa. (Zid 3, 4, 16) Asa ekun’n, Zɔbu w’a ‘kataman i sa tɛ’m be su.’ W’a bumɛn i kɛ i sɔ’n ti’n, sran’m be su niɛnmɛn i lɔ kun. Ɔ yoli i fɛ kɛ Ɲanmiɛn nian i awlɛn nun lɔ. I liɛ sɛ ɔ yoli sa wie’n, ɔ́ kpɛ́tɛ i. (Zɔb 31:33-37) Nja, sɛ e yo sa tɛ’n, nán maan dunman fɛ kunndɛlɛ’n ti’n, e bu nɲa kata su. ?Ngue yɛ e kwla yo naan y’a nanti seiin titi ɔ? Yɛle kɛ maan e di e sa tɛ’n i nanwlɛ yɛ e kaci e nzuɛn’n. Kpɛkun maan e kunndɛ ukalɛ Ɲanmiɛn sa nun. Asa kusu’n, maan e kpata sran nga e yoli i sa’n.—Nya. 28:13; Zak 5:13-15.
Zɔbu waan be sɛnmɛn i naan ɔ kle kɛ i ndɛ’n yo fɛ
18, 19. (a) ?Ngue ti yɛ e kwla se kɛ Zɔbu w’a buman sran lufle le ɔ? (b) ?Zɔbu waan sɛ i ndɛ yoman fɛ’n, ngue yɛ ɔ́ kplín su kɛ be yo i ɔ?
18 Zɔbu w’a bumɛn i wiengu lufle yɛ w’a diman ndrunmun le. Ɔ maan ɔ kwla seli kɛ: “Maan e se kɛ min fie’n ɔ ti sran. Sɛ min fie sɔ’n i su lɔ asiɛ’n ɔ ijɔli min cɛn kun sa’n, sɛ i su kofie’m be sun guali min wun cɛn kun sa’n, sɛ n dili i su ninnge ngbɛn’n, sɛ m’an fa-man sika m’an wla-man nun’n, sɛ m’an bu-man asiɛ’n i fuɛ nga be fa mannin min’n be sran cɛ’n, maan ble nga n ngua’n, ɔ yaci fifi owie, yɛ maan ɔrz nga n ngua’n, ɔ yaci fifi awie ijre.” (Zɔb 31:38-40) Zɔbu w’a deman sran wie asiɛ wue kekle su. Yɛ sran nga be di junman i sa nun’n, w’a buman be lufle. Ninnge kanngan nin ninnge dandan’m be nun’n, ɔ fata kɛ e nanti seiin Zoova ɲrun kɛ Zɔbu sa.
19 Zɔbu kannin wafa nga ɔ fa nantili’n i ndɛ kleli i janvuɛ nsan’n ɔ nin Elii m’ɔ ti gbanflɛn kan’n. Zɔbu seli kɛ sɛ ‘ndɛ’n ng’ɔ kannin’n’ kle kɛ i mɛn dilɛ nun’n i nantilɛ w’a yoman kpa’n, maan be sɛnmɛn i jɔlɛ difuɛ’m be ja su. Sɛ be di ndɛ’n naan be waan Zɔbu i ndɛ yoman fɛ’n, ɔ́ kplín su kɛ be tu i fɔ. Ɔ maan, ɔ fɛli i ndɛ liɛ’n wlali Ɲanmiɛn sa nun yɛ ɔ su minndɛ ndɛ nga ɔ́ kɛ́n i kasiɛn su’n. “Zɔb i nuan tɔwlɛ’n yɛ ɔ o lɛ ɔ.”—Zɔb 31:35, 40.
A kwla nanti seiin titi
20, 21. (a) ?Ɔ yo sɛ yɛ maan Zɔbu kwla nantili seiin titi ɔ? (b) ?Ngue yɛ e kwla yo naan y’a klo Ɲanmiɛn kpa ɔ?
20 Zɔbu kwla nantili seiin afin ɔ kloli Ɲanmiɛn. Zoova kusu kloli i wie yɛ ɔ suɛnnin i bo. Zɔbu seli kɛ: “Kpɛkuun a yoli min ye: a mannin min nguan. Yɛ a [Zoova] yoli nga a ko yo naan nguan sɔ’n w’a fi-man min sa’n.” (Zɔb 10:12) Asa ekun’n, Zɔbu kloli i wiengu wie. Yɛ ɔ wunnin i wlɛ kɛ sran kwlaa nga ɔ klomɛn i wiengu klɔ sran’n, i ɲin su yiman Ɲanmiɛn mɔ like fi nunmɛn i sin’n kun. (Zɔb 6:14) Be nga be nanti seiin’n, be klo Ɲanmiɛn nin sran.—Mat. 22:37-40.
21 Kɛ ɔ ko yo naan y’a klo Ɲanmiɛn kpa’n, ɔ fata kɛ e kɛnngɛn i Ndɛ’n nun cɛn kwlakwla naan e bu like ng’ɔ kle e Ɲanmiɛn su’n i akunndan. Kɛ é tú e klun é srɛ́ Zoova’n, maan e yi i ayɛ naan e lɛ i ase, e ye m’ɔ yo e’n ti. (Fil. 4:6, 7) Maan e to jue e man Zoova yɛ e tran e aɲia’m be kwlakwla be bo naan ɔ uka e. (Ebr. 10:23-25) Asa ekun’n, kɛ é bó “jasin fɛ’n” mɔ maan Ɲanmiɛn ‘dé’ sran mun’n, ɔ́ yó maan é kló Zoova dan kpa. (Jue. 96:1-3) Sɛ e yo i sɔ’n, kɛ jue tofuɛ’n sa’n, e su kpɔciman Ɲanmiɛn. Ɔ toli jue kɛ: “Nyanmiɛn i tranlɛ bɔ e nin wɔ tran’n ɔ ti min anyanbeun like. Min min Anannganman, ń fá min wla’n ń gúa ɔ su.”—Jue. 73:28.
22, 23. ?Ngue ti yɛ junman nga andɛ e mɔ e jran Zoova sin’n, ɔ nin nga lalafuɛ nun sran nga b’a kpɔciman Ɲanmiɛn be dili’n ti kun ɔn?
22 Kɛ ɔ fɛ i laa lele fa ju andɛ’n, junman nga Zoova fa mɛn i sufuɛ mɔ be nanti seiin ti fanunfanun. Nowe liɛ’n, ɔ boboli mmeli yɛ ɔ ‘boli sa nga be yo-ɔ ɔ ti su’n i ndolo.’ (2 Piɛ. 2:5) Zozie fali Izraɛlifuɛ mun fa wluli i mɛn nga Ɲanmiɛn tali nda kɛ ɔ́ fá mán be’n i nun lɔ. Ɔ kwla yoli sɔ afin ‘wia su nin kɔnguɛ,’ ɔ kanngannin ‘mmla ng’ɔ ti klɛwa fluwa nun’n’ i nun yɛ ɔ nantili su. (Zoz. 1:7, 8) Klistfuɛ klikli’m be liɛ’n, be ukali sran mun naan b’a kaci Zezi i sɔnnzɔnfuɛ. Kpɛkun be yiali titi be suannin Ɲanmiɛn Ndɛ.—Mat. 28:19, 20.
23 Ninnge nga e kwla yo mɔ be kle kɛ e jran Zoova i atin ng’ɔ le i sie nglo’n nin asiɛ’n i sin’n naan e kpɔcimɛn i’n be yɛle kɛ e kan Ɲanmiɛn ndɛ, e uka sran mun naan b’a kaci Zezi sɔnnzɔnfuɛ, e nanti afɔtuɛ nga be o Ɲanmiɛn Ndɛ’n nun’n be su. Asa ekun’n, e nin e niaan mun e yia e aɲia kwlakwla be bo. Ninnge sɔ’m be yolɛ’n uka e naan y’a tra e awlɛn naan y’a kpɔnzɔman Ɲanmiɛn sulɛ nun naan e sa’n w’a tɔ Ɲanmiɛn klun sa’n i yolɛ nun. Kɛ mɔ e Si m’ɔ o ɲanmiɛn su lɔ’n nin i Wa’n be suan e bo’n ti’n, Ɲanmiɛn klun sa yolɛ’n nin seiin nantilɛ’n be traman e kpɛn. (Mml. 30:11-14; 1 Fam. 8:57) Asa ekun’n, e “niaan Kristfuɛ mun” mɔ be kpɔciman Ɲanmiɛn mɔ be bu Zoova kɛ i yɛ ɔ sie mɛn wunmuan’n, be suan e bo wie.—1 Piɛ. 2:17.
?Wafa sɛ yɛ amún tɛ́ kosan’m be su ɔ?
• ?Wafa sɛ yɛ ɔ fata kɛ e bu Zoova i mmla mun ɔn?
• ?Ngue yɛ amun klo i Zɔbu i nzuɛn’n nun ɔn?
• ?Kɛ nga Zɔb 31:29-37 fa kan’n sa’n, wafa sɛ yɛ Zɔbu nantili ɔ?
• ?Ngue ti yɛ e si kɛ e kwla nanti seiin Ɲanmiɛn ɲrun ɔn?