‘An nian, min nin amun e o cɛn kwlaa’

“An nian, min nin amun e o cɛn kwlaa lele mɛn’n fá wíe.”​—MAT. 28:20.

AMUN KUNNDƐ KOSAN NGA’M BE SU TƐLƐ’N:

?Kɛ ɔ fɛ i be mɔ Zezi sunmannin be’n be blɛ su lele m’ɔ́ fá jú andɛ’n, ngue ti yɛ e kwla se kɛ Klistfuɛ nga Ɲanmiɛn kpali be sieli be ngunmin’n b’a wieman nunnun ɔn?

?Ngue yɛ Zezi boli i yolɛ bo afuɛ 1914 nun ɔn?

?Awie nin awie ijre’n i wun ɲanndra nga Zezi buli nun’n, sa benin yɛ ɔ nin a juman m’ɔ tɛ o e ɲrun ɔn?

1. (a) An bo awie nin awie ijre’n i wun ɲanndra’n i kpɔlɛ. (b) ?Ɲanndra’n i bo nga Zezi tuli’n yɛle benin?

CƐN kun’n, Zezi fali Ɲanmiɛn Sielɛ’n sunnzunnin sran kun m’ɔ guali awie’n. Kpɛkun i sin’n, i kpɔfuɛ’n ko guali fie’n nun awie ijre. Kɛ be nɲɔn’n be fifili’n, fie difuɛ’n seli i junman difuɛ mun kɛ: “An yaci be nnyɔn’n be lɛ maan ɔ fa ju awie kpɛlɛ blɛ’n.” Kɛ awie’n i kpɛlɛ juli’n, be kpɛli awie ijre’n guɛli i sin nun. Kpɛkun be kpɛli awie’n guɛli i tanngannin’n nun. Zezi bɔbɔ tuli ɲanndra’n i bo. (An kanngan Matie 13:24-30, 37-43 nun.) ?Ngue yɛ ɲanndra sɔ’n kle e ɔ? (An nian foto nga be klɛli su kɛ “Awie’n nin awie ijre’n.”)

2. (a) ?Ngue yɛ ɔ ti awie’n i gualɛ’n, ɔ nin i fifilɛ nin i wlɔlɛ’n, ɔ nin i kpɛlɛ’n be nzɔliɛ ɔ? (b) ?Like suanlɛ nga nun’n, ngue su yɛ é fá e ɲin síe ɔ?

² Ɲanndra nga Zezi buli’n kle kɛ, blɛ kun nun be gua awie’n. Blɛ kun ekun nun’n, awie’n fifi ɔ wlɔ. Kpɛkun i sin’n, be kpɛ. Ɲanndra sɔ’n kle blɛ nga Zezi wá kpá sran wie mun kɛ be nin i ko di famiɛn’n. Sran sɔ mun yɛ ɔ fa be sunnzun awie’n niɔn. Asa ekun’n, ɲanndra’n kle wafa nga Zezi wá kpá sran sɔ mun’n. Afuɛ nga be flɛ i 33 nun Pantekɔtu nun yɛ be boli awie gualɛ’n i bo ɔ. Kɛ mɛn’n wá wíe’n, nn be nga Ɲanmiɛn kpali be sieli be ngunmin’n be nun wie’m be ɲin tɛ o su. Cɛn nga be kwlaa be ti wá yía ɲanmiɛn su lɔ’n, yɛ Zezi fa sunnzun awie mɔ be kpɛ be guɛ i tanngannin’n nun’n niɔn. (Mat. 24:31; Ngl. 7:1-4) Ɲanndra nga Zezi buli’n tike e ɲin. Ɔ kle e sa ng’ɔ fata kɛ be ju afuɛ kɔe 2.000 be nun’n. ?Sɛ ɔ ti sɔ’n niɔn, Ɲanmiɛn i famiɛn dilɛ’n i su like benin yɛ ɲanndra’n kle e ɔ? Ɲanndra nga Zezi buli’n kle kɛ blɛ kun nun be gua awie’n. Blɛ kun ekun nun awie’n fifi ɔ wlɔ. Kpɛkun i sin’n, be kpɛ. Sanngɛ like suanlɛ nga nun’n, é wá kán awie’n i kpɛlɛ blɛ’n i ndɛ.a

ZEZI NIN BE O NUN

3. (a) ?Kɛ afuɛ nga be flɛ i 100 sinnin’n, ngue sa yɛ ɔ juli ɔ? (b) ?Kɛ e nian Matie 13:28 nun’n, kosan benin yɛ junman difuɛ’m be usali ɔ? ?Wan yɛle junman difuɛ mun? (An nian lika nga be klɛli i kɛ “ndɛ wie mun ekun” i nun wie.)

³ Kɛ afuɛ nga be flɛ i 100 sinnin’n, yɛ be “wunnin kɛ awie ijre” o awie fie’n nun ɔn. Yɛle kɛ sran wie mɔ be tɔn be wun suɛn kɛ be ti Klistfuɛ’n, be wa yili be wun nglo. (Mat. 13:26) Afuɛ nga be flɛ i 300 nun’n, sran sɔ’m be w’a truli Klistfuɛ mɔ Ɲanmiɛn kpali be sieli be ngunmin’n be afiɛn dan kpa. Kɛ nga Zezi fa kɛnnin i ɲanndra’n nun sa’n, junman difuɛ’m be seli kɛ bé yó like kun. Be seli be min’n kɛ ɔ man be atin naan bé tútú fie’n nun awie ijre’n i bo.b (Mat. 13:28) ?Yɛ be min’n seli be sɛ?

4. (a) ?Ngue yɛ Zezi mɔ fie’n ti i liɛ’n i ndɛ ng’ɔ kannin’n kle e ɔ? (b) ?Blɛ benin nun yɛ be wunnin Klistfuɛ kpa’m be wlɛ ɔ?

⁴ Zezi m’ɔ ti fie’n i difuɛ’n seli kɛ: “An yaci be nnyɔn’n be lɛ maan ɔ fa ju awie kpɛlɛ blɛ’n.” Ndɛ sɔ’n kle kɛ, kɛ ɔ fɛ i be mɔ Zezi sunmannin be’n be blɛ su lele m’ɔ́ fá jú andɛ’n, Klistfuɛ nga Ɲanmiɛn kpali be sieli be ngunmin’n, be su wieman asiɛ’n su. Ndɛ kun mɔ Zezi kan kleli i sɔnnzɔnfuɛ mun’n, ɔ kle sɔ weiin. Ɔ seli be kɛ: ‘Min nin amun e o cɛn kwlaa lele mɛn’n fá wie.’ (Mat. 28:20) Ɔ maan lele nin i kɛ mɛn fá wíe’n, Zezi nían Klistfuɛ nga Ɲanmiɛn kpali be sieli be ngunmin’n be lika titi. Sanngɛ awie ijre’n ti’n, blɛ kpanngban kpa nun e su wunman Klistfuɛ kpa sɔ mɔ be ti kɛ awie sa’n, be wlɛ. Ɔ kali sɔ lele afuɛ 30 naan awie’n i kpɛlɛ’n wa ju. Blɛ sɔ’n nun yɛ be wunnin Klistfuɛ kpa’m be wlɛ ɔ. ?Ngue yɛ maan be wunnin be wlɛ ɔ?

NDOLO BOFUƐ KUN WÁ BÓ “ATIN”

5. ?Wafa sɛ yɛ ndɛ nga Malasi kannin’n, ɔ kpɛnnin su Zezi su ɔ?

⁵ Afuɛ kpanngban lele naan b’a wu Zezi’n, Zoova maan i nuan ijɔfuɛ Malasi kannin sa wie mɔ bé wá jú’n be ndɛ. Sa sɔ’m be nin nga Zezi kannin be ndɛ ɲanndra nun’n, be fa be wun. (An kanngan Malasi 3:1-4 nun.) Sran ng’ɔ yoli ‘ndolo bofuɛ m’ɔ boli atin’n,’ yɛle Zan batɛm yofuɛ’n. (Mat. 11:10, 11) Afuɛ nga be flɛ i 29 i nun yɛ ɔ yili i wun nglo ɔ. Kɛ ɔ́ yó sɔ’n, nn Izraɛli nvle’n i jɔlɛ dilɛ’n w’a mantan koko. Zezi kusu yoli ndolo bofuɛ wie. Kpɛkun, ɔ wluli Ɲanmiɛn i sua’n nun ko yoli lɔ saun kpɛ nɲɔn. I klikli nun ng’ɔ́ yó sɔ’n, yɛle i nun ng’ɔ boli Ɲanmiɛn junman dilɛ bo’n. Kpɛkun i nɲɔn su’n, yɛle i nun mɔ ɔ́ wá wie i junman’n i dí’n. (Mat. 21:12, 13; Zan 2:14-17) Ɔ maan Ɲanmiɛn sua’n i saun yolɛ mɔ Zezi yoli’n fali blɛ.

6. (a) ?Blɛ benin nun yɛ ndɛ nga Ɲanmiɛn nuan ijɔfuɛ Malasi kannin’n, ɔ wa kpɛnnin su wie kpa ɔ? (b) ?Blɛ benin nun yɛ Zezi wa niannin be kwlaa nga be se be wun kɛ be ti Klistfuɛ mun ɔn? (An nian lika nga be klɛli i kɛ “ndɛ wie mun ekun” i nun wie.)

⁶ Ndɛ nga Ɲanmiɛn nuan ijɔfuɛ Malasi kannin’n, ɔ wa kpɛnnin su e blɛ liɛ’n nun wie kpa. Yɛle kɛ lele naan afuɛ 1914 w’a ju’n, Charles Russell nin i janvuɛ wie’m be dili junman kunngba nga Zan batɛmu yofuɛ’n dili’n wie. I wie yɛle kɛ, be tuli Ɲanmiɛn Ndɛ’n i ɲin weinwein kleli sran mun. Be yiyili e ti kpɔlɛ tɛ mɔ Zezi fɛ i wun yili’n, i nun kpa kleli sran mun. Be kleli sran mun ekun kɛ Ɲanmiɛn yraman sran fi sin fɛtɛ wie nun. Asa ekun’n, be kleli kɛ be nga be timan Zuifu’n be blɛ liɛ’n su wa wie. Sanngɛ blɛ sɔ nun’n, be nga be se be wun kɛ be ti Klistfuɛ’n, be kpali kɛ nje mun sa be diman be yalɛ. ?Sɛ ɔ ti sɔ’n niɔn, be nun onin yɛ ɔ kwla se kɛ ɔ ti kɛ awie sa naan ɔ ti kpa ɔ? Afuɛ 1914 nun’n, Zezi bali kɛ ɔ́ kpɛ́ ndɛ sɔ’n nun. Yɛle kɛ, ɔ wa niannin be kwlaa nga be se be wun kɛ be ti Klistfuɛ’n. Kpɛkun, ɔ yoli wie’m be saun. Be nianlɛ nin be saun yolɛ sɔ’n, ɔ boli i bo afuɛ 1914 nun lele fa juli 1919 nun.c

ZEZI WA NIANNIN BE YƐ Ɔ YOLI BE SAUN

7. ?Kɛ afuɛ 1914 nun Zezi wa niannin be nga be se be wun kɛ be ti Klistfuɛ’n, ngue yɛ ɔ wunnin i ɔ?

⁷ ?Kɛ Zezi wa niannin be nga be se be wun kɛ be ti Klistfuɛ’n, ngue yɛ ɔ wunnin i ɔ? Ɔ wunnin kɛ Klistfuɛ akpasua kaan kun o lɛ’n, be bo be ɲin ase be suan Ɲanmiɛn ndɛ’n i kpa. Kpɛkun, be fa be sa nun ninnge kpakpa mun suan jasin fɛ’n bolɛ junman’n i bo be di i kpa. Be yo sɔ w’a di afuɛ 30 tra su.d I sɔfuɛ mɔ be ti kɛ awie sa’n, Satan i mɛn m’ɔ ti awie ijre’n w’a tinman be su. Kɛ Zezi nin i anzi mun be wunnin be’n, be klun jɔli be wun dan! Sanngɛ, ɔ fata kɛ Zezi yo be saun kɛ nga laa’n be yoli “Levi i osu’n nun Nyanmiɛn nyrun jranfuɛ’m be saun” sa. (Mal. 3:2, 3; 1 Piɛ. 4:17) ?Ngue ti yɛ be sɔ yolɛ’n ti cinnjin ɔn?

8. ?Kɛ ɔ fɛ i afuɛ 1914 nun’n, sa benin mun yɛ be juli ɔ?

⁸ Kɛ afuɛ 1914 wá wíe’n, Biblu’n nun like suanfuɛ sɔ’m be nun wie’m be sa sin wa bubuli be. Afin b’a ɔman ɲanmiɛn su. Asa ekun’n, kɛ ɔ fɛ i afuɛ 1915 nun lele afuɛ 1916 nun’n, be kpɔfuɛ’m be ti’n, be sa wa glɔli jasin fɛ’n bolɛ nun kan. Sanngɛ like ng’ɔ yoli kekle kpa be su’n yɛle kɛ, afuɛ 1916 nun Ɔktɔblu nun’n, aniaan bian Russel wa sacili. Kɛ ɔ yoli sɔ’n, ɲin keklefuɛ wie’m be wa yili be wun nglo anuannzɛ’n nun. Yɛle kɛ, sran nso nga be nian anuannzɛ’n su’n, be nun nnan b’a kplinman su kɛ aniaan bian Rutɛrfɔrd yo anuannzɛ’n i su kpɛn. Ɔ maan be kunndɛli kɛ bé sáci aniaan’m be afiɛn. I sɔ’n ti’n, afuɛ 1917 nun Utu nun’n, b’a tranman Betɛli lɔ kun. I sɔ’n ti anuannzɛ’n i saun yolɛ. Aniaan wie’m be kusu’n, srongble’n ti’n, be yacili Ɲanmiɛn sulɛ. Sanngɛ, aniaan’m be dan lika be loli be wun be mannin Zezi. Be kacili be nzuɛn’n yɛ Zezi kusu yoli be saun ɔn. Kɛ ɔ fɛ i lɛ’n, Zezi buli be sran kpa yɛ ɔ fali be yoli i sɔnnzɔnfuɛ mun. Sanngɛ be nga be o anuannzɛ’n nun mɔ be yoli be wun kɛ be ti i sɔnnzɔnfuɛ sa’n, ɔ nin be nga be o Ɲanmiɛn sulɛ wafa onga’m be nun’n, Zezi yili be kwlaa be blo. (Mal. 3:5; 2 Tim. 2:19) ?Siɛn’n, ngue sa yɛ ɔ́ wá jú ɔ? Sɛ e waan é wún i wlɛ’n, maan e fa e ɲin e sie i awie nin awie ijre’n be wun ɲanndra’n su ekun.

SA NGA BÉ WÁ JÚ AWIE KPƐLƐ BLƐ NUN’N

9, 10. (a) ?Sa wafa nnun benin yɛ be yo i awie kpɛlɛ blɛ’n nun mɔ é wá fa e ɲin síe be su? (b) ?Sa klikli benin yɛ ɔ juli awie kpɛlɛ blɛ’n nun ɔn?

⁹ Zezi seli kɛ: “Awie i kpɛlɛ blɛ’n yɛlɛ mɛn’n i awieliɛ [Glɛki nun’n, “awieliɛ blɛ”].” (Mat. 13:39) Afuɛ 1914 nun yɛ awie i kpɛlɛ’n boli i bo ɔ. Zezi kannin kɛ blɛ sɔ nun’n, bé wá yó sa wafa nnun. Maan e kan be ndɛ.

¹⁰ I klikli nun’n, bé kpɛ́ awie ijre’n be cící fiɛnfiɛn. Zezi seli kɛ: “Sɛ awie kpɛlɛ’n ju’n, ń sé awie i kpɛfuɛ’m be kɛ be dun mmua kpɛ awie ijre’n be cici fiɛnfiɛn.” Afuɛ 1914 juli ka naan Klistfuɛ nga be ti kɛ awie ijre sa’n, anzi’m b’a bo be ‘cicilɛ’ bo. Ɔ maan be nin “Nyanmiɛn mma mun” b’a sannganman nun kun.​—Mat. 13:30, 38, 41.

11. ?Kɛ ɔ fɛ i afuɛ 1919 nun lele andɛ’n, ngue yɛ be fa sie Klistfuɛ kpa’m be nzɔliɛ ɔ?

¹¹ Kɛ bé cící awie ijre’n, nn bé wún awie’n i wlɛ kpa. (Ngl. 18:1, 4) Kɛ ɔ fɛ i afuɛ 1919 nun’n, sran kwlaa wunnin kɛ Babilɔni klɔ dan’n w’a bo. ?Ngue yɛ be fa sieli Klistfuɛ onga’m be nzɔliɛ kɛ be ti kpa ɔ? Jasin fɛ bolɛ’n yɛ be fa sieli be nzɔliɛ ɔ. Be nga be nian anuannzɛ’n su blɛ sɔ nun’n, be wlali aniaan’m be fanngan kɛ be tu be klun be bo jasin fɛ’n. Afuɛ 1919 nun’n, fluwa kun mɔ anuannzɛ’n yili’n, ɔ wlali Klistfuɛ kwlaa be fanngan kɛ be bo jasin fɛ’n awloawlo’m be nun. (To Whom the Work Is Entrusted) Be klɛli i fluwa sɔ’n nun kɛ: “Junman’n timan kaan. Sanngɛ e Min’n i junman ɔn. Ɔ maan e lafi su kɛ i fanngan nun’n, é kwlɛ́ i dí. Ɔ ti junman nanndoliɛ. Amun yɛ ɔ fata kɛ amun di ɔ.” ?Kɛ ɔ yoli sɔ’n, ngue yɛ aniaan’m be yoli ɔ? Sasafuɛ Tranwlɛ’n kun mɔ be yili i afuɛ 1922 nun’n seli kɛ, kɛ ɔ fɛ i afuɛ 1919 nun’n, Biblu’n nun like suanfuɛ’m be boli jasin fɛ’n i kpa awloawlo’m be nun. Junman sɔ’n yɛ be fa sieli be nzɔliɛ kɛ be ti Klistfuɛ kpa ɔ. Andɛ nin andɛ’n, be te fa te sie be nzɔliɛ.

12. ?Afuɛ benin nun yɛ Ɲanmiɛn boli be nga be ti kɛ awie sa’n be nuan yialɛ bo ɔ?

¹² Sa’n i nɲɔn su nga bé yó i awie kpɛlɛ blɛ nun’n yɛle kɛ, bé fá awie’n gúa tanngannin’n nun. Zezi waan ɔ́ sé i anzi mun kɛ: “[An] fa awie’n gua n tanngannin’n nun.” (Mat. 13:30) Kɛ ɔ fɛ i afuɛ 1919 nun’n, Ɲanmiɛn boli be ng’ɔ kpali be sieli be ngunmin’n be nuan yialɛ bo kɛ be yɛ be ti i sufuɛ kpa’n niɔn. I sɔ m’ɔ yoli’n, ɔ ti kɛ awie mɔ b’a fa guɛ i tanngannin’n nun sa. Sa kunngba’n yɛ ɔ́ wá jú mɛn’n i awieliɛ’n nun ɔn. Yɛle kɛ be nga Ɲanmiɛn kpali be sieli be ngunmin mɔ mɛn’n i awielɛ’n yó be ɲrun’n, be ti wá yía ɲanmiɛn su lɔ.​—Dan. 7:18, 22, 27.

13. ?Be nga be tɔn be wun suɛn kɛ be ti Klistfuɛ’n be akpasua’n, ɔ nin Babilɔni klɔ dan’n i nunfuɛ onga’m be su ndɛ benin yɛ Sa Nglo Yilɛ 18:7 kan ɔn?

¹³ Sa’n i nsan su ng’ɔ́ jú awie kpɛlɛ blɛ nun’n yɛle kɛ, sran wie’m bé sún bé dí be je. ?Kɛ anzi’m be ko cici be mɔ be ti kɛ awie ijre sa’n i fiɛnfiɛn ko wie’n, ngue sa yɛ ɔ́ wá jú ɔ? Zezi kannin sa ng’ɔ́ wá jú’n i ndɛ. Ɔ seli kɛ: “Bé sún bé dí be je.” (Mat. 13:42) Nán kɛ é sé yɛ’n yɛ sa sɔ’n kpɛ́n su ɔ. Afin kɛ é sé yɛ’n, be nga be tɔn be wun suɛn kɛ be ti Klistfuɛ’n be akpasua’n m’ɔ o Babilɔni klɔ dan’n nun wie’n, ɔ di i nuan. Ɔ se kɛ: “N su di famiɛn, n ti-man angboti, n su yo-man sɛnvuɛ le.” (Ngl. 18:7) Kɛ ɔ o lɛ’n, ɔ se i klun lɔ kɛ i liɛ su ti ye kpa dan. Ɔ se kɛ ɔ su di famiɛn, naan i kpa bɔbɔ’n, i yɛ ɔ sie mɛn siefuɛ mun ɔn. Ɔ maan, kɛ é sé yɛ’n, ɔ sunman. Sanngɛ ɔ ka kaan sa’n, kekle’n wá tɔ́ i su.

14. (a) ?Blɛ benin nun yɛ be nga be tɔn be wun suɛn kɛ be ti Klistfuɛ’n, “bé dí be je” ɔ? ?Ngue yɛ ti yɛ bé dí be je ɔ? (b) ?Wafa sɛ yɛ ndɛ nga Matie 13:42 kan mɔ e wun i wlɛ kpa siɛn’n, ɔ nin ng’ɔ o Jue Mun 112:10 nun’n be kɔ likawlɛ? (An nian lika nga be klɛli i kɛ “ndɛ wie mun ekun” i nun wie.)

¹⁴ Ɲrɛnnɛn dan nun’n, Ɲanmiɛn sulɛ wafa nga be timan su mɔ be ti anuannzɛanuannzɛ’n, be kwlaa bé wíe bó. Kɛ ɔ ko yo sɔ’n, be nunfuɛ’m bé kúnndɛ fiawlɛ. Sanngɛ ɔ su yoman ye. (Lik 23:30; Ngl. 6:15-17) Kɛ bé wá wún kɛ be liɛ su wa wie’n, “bé dí be je.” Kɛ nga Zezi fa kannin sa’n, lika’n wá yó kekle kpa be su. Ɔ maan bé “bó awuyomo.”e​—Mat. 24:30; Ngl. 1:7.

15. ?Ngue yɛ bé wá yó awie ijre’n niɔn? ?Blɛ benin nun yɛ bé yó i sɔ ɔ?

¹⁵ Sa’n i nnan su nga bé yó i awie kpɛlɛ blɛ nun’n yɛle kɛ, bé gúa be sin dan kpa’n nun. Kɛ anzi’m be ko wie awie ijre’n i fiɛnfiɛn cici’n, bé “gúa be sin dan kpa’n nun.” (Mat. 13:42) Yɛle kɛ bé núnnún be mlɔnmlɔn. I sɔ’n kle kɛ Armagedɔn alɛ’n nun’n, be kwlaa nga be kɔ Ɲanmiɛn sulɛ wafa nga ɔ timan su’n be nun’n, bé wíe núnnún.​—Mal. 3:19.

16, 17. (a) ?Sa’n i kasiɛn su ng’ɔ́ jú awie kpɛlɛ blɛ nun’n yɛle benin? (b) ?Ngue ti yɛ e se kɛ sa sɔ’n nin a juman naan ɔ tɛ o e ɲrun lɔ ɔ?

¹⁶ Sa’n i kasiɛn ng’ɔ́ jú awie kpɛlɛ blɛ nun’n yɛle kɛ, sran wie’m bé wá yó kɛ wia’n sa, bé kpája. Zezi guali i ndɛ’n bo seli kɛ: “Sanngɛ [“Blɛ sɔ nun’n,” NW] sran nanwlɛfuɛ’m bé wá yó kɛ wia’n sa, bé kpája be Si i mɛn’n nun.” (Mat. 13:43) ?Blɛ benin nun yɛ bé kpája ɔ? ?Yɛ nin yɛ bé kpája ɔ? Ndɛ nga Zezi kannin’n kle kɛ nán asiɛ’n su wa yɛ sa sɔ’m bé jú ɔ. Sanngɛ bé jú ɲanmiɛn su lɔ. Ɔ maan i blɛ nin a juman. Ɔ tɛ o e ɲrun lɔ.f Like nɲɔn ti yɛ e se sɔ ɔ. Amun e nian.

¹⁷ Like klikli nga ti yɛ e se kɛ blɛ nga bé kpája’n nin a juman’n, ɔ fin ndɛ nga Zezi kannin’n. Ɔ seli kɛ: “Sanngɛ [“Blɛ sɔ nun’n,” NW] sran nanwlɛfuɛ’m bé wá yó kɛ wia’n sa, bé kpája.” Kwlaa naan Zezi wa se kɛ ‘blɛ sɔ nun’n,’ ɔ kannin kɛ ‘bé gúa awie ijre’n i sin dan kpa’n nun.’ Ɲrɛnnɛn dan’n i awieliɛ’n nun yɛ bé yó i sɔ liɛ’n kusu ɔ. Ɔ maan blɛ kunngba sɔ’n nun yɛ be nga be kpali be sieli be ngunmin’n, “bé yó kɛ wia’n sa, bé kpája” ɔ. Like’n i nɲɔn su nga ti yɛ e se kɛ blɛ nga bé kpája’n nin a juman’n, ɔ fin ndɛ kun ekun mɔ Zezi kannin’n. Ɔ seli kɛ sran nanwlɛfuɛ mun ‘bé kpája be Si i mɛn’n nun.’ Yɛle kɛ, kɛ Armagedɔn wá bó i bo’n, nn be nga Ɲanmiɛn kpali be sieli be ngunmin’n mɔ be te o asiɛ’n su wa’n, be nuan w’a yia. I sin kɛ nga Zezi kannin’n sa’n, be kwlaa be ti wá yía ɲanmiɛn su lɔ. (Mat. 24:31) Lɔ yɛ ‘bé yó kɛ wia’n sa, bé kpája be Si i mɛn’n nun’ ɔn. Kpɛkun kɛ Armagedɔn alɛ’n wie cɛ’n, Zezi m’ɔ ti ‘Bua Gbanflɛn’n fá be atɔnvlɛ.’​—Ngl. 19:6-9.

I SU MMLUSUƐ NGA E ƝƐN I’N

18, 19. ?Awie’n nin awie ijre’n i wun ɲanndra nga Zezi buli’n i su mmlusuɛ benin yɛ e ɲɛn i ɔ?

¹⁸ ?Awie’n nin awie ijre’n i wun ɲanndra nga y’a yiyi nun yɛ’n i su mmlusuɛ benin yɛ e ɲɛn i ɔ? Mmlusuɛ’n ti nsan. I klikli’n yɛle kɛ e ɲin w’a tike kpa. E si like nga ti yɛ Zoova nin a nunnunman klunwi’n. Yɛle kɛ ‘be nga be kun i ya bɔ be nin kunlɛ fata’n ɔ blu su,’ yɛ ‘be nga be ti kɛ sɛ klanman sa’n, ɔ wun be aunnvuɛ.’ Ɔ yo sɔ naan be nga be ti kɛ awie sa’n, be ti yia. (Rɔm. 9:22-24) Mmlusuɛ’n i nɲɔn su yɛle kɛ, e lafi Ɲanmiɛn su kpa ekun. Kɛ é wá mántan mɛn’n i awieliɛ’n i wun koko kpa’n, e kpɔfuɛ’m be nin e wá kún kpa. Sanngɛ “be su kwla-man” e. (An kanngan Zeremi 1:19 nun.) Zoova sasali i sran ng’ɔ kpali be sieli be ngunmin’n mɔ be ti kɛ awie sa’n. I sɔ kunngba’n, i fanngan nun’n, Zezi nin anzi’m be su yiman e ase. Afin Zezi seli kɛ: “Min nin amun e o cɛn kwlaa.”​—Mat. 28:20.

¹⁹ Mmlusuɛ’n i nsan su nga e ɲɛn i’n yɛle kɛ, e si be nga be ti kɛ awie sa’n be akpasua’n. ?Ngue ti yɛ be wlɛ wunlɛ’n ti cinnjin ɔn? Afin sɛ y’a wunman be wlɛ’n, e su kwlá tɛman kosan kun mɔ Zezi usali’n su. Ɔ usali kɛ: “?Sran kpa nanwlɛfuɛ b’ɔ si ngwlɛlɛ’n [...] yɛlɛ wan?” (Mat. 24:45) Like suanlɛ nɲɔn nga bé bá lɛ’n, bé wá tɛ́ su klanman kpa.

NDƐ WIE MUN EKUN: (Kɛ amun wun nzraama kun’n, an kɛnngɛn i su ndɛ’n wie.)

[Ja ngua lɛ ndɛ mun]

[Foto, bue 15]

[Be klɛ lɔngɔ su, bue 16, 17]

AWIE NIN AWIE IJRE’N

AFUƐ 33 NUN’N, BE BOLI I GUALƐ’N BO

AWIE GUAFUƐ’N: Zezi

AWIE’N I GUALƐ’N: Ɲanmiɛn wawɛ’n wluli be nun

FIE’N: Mɛn’n

‘Sran kun fa awie guɛli i fie’n su.’ (Mat. 13:24)

KKPƆFUƐ’N: Mmusu’m be si Satan

SRAN’M BE LAFILƐ’N: Be mɔ Zezi sunmannin be’n be wulɛ

“Kɛ sran’m bé láfi’n, i kpɔfuɛ’n bali, ɔ wa guali awie’n nun awie ijre mma.” (Mat. 13:25)

AWIE’N: Be nga Ɲanmiɛn kpali be sieli be ngunmin’n

AWIE IJRE’N: Be nga be tɔn be wun suɛn kɛ be ti Klistfuɛ’n

“An yaci be nnyɔn’n be lɛ maan ɔ fa ju awie kpɛlɛ blɛ’n.” (Mat. 13:30)

AFUƐ 1914 NUN’N, AWIE KPƐLƐ’N BOLI I BO

JUNMAN DIFUƐ MUN / AWIE I KPƐFUƐ MUN: Anzi mun

Be yili Klistfuɛ nga be ti kɛ awie ijre sa’n, “Nyanmiɛn mma” mɔ be kpali be sieli be ngunmin’n be afiɛn

Be kpɛli awie ijre’n be cicili fiɛnfiɛn. (Mat. 13:30)

(An nian ndɛ kpɔlɛ 10 nin 11 nun.)

AFUƐ 1919 NUN’N, AWIE’N I TANNGANNIN NUN GUALƐ: Ɲanmiɛn fali be ng’ɔ kpali be sieli be ngunmin mun kɛ be yɛ be ti i sufuɛ kpa’n niɔn.

AWIE KPƐLƐ BLƐ’N

‘Be fa awie’n be guɛ i tanngannin nun.’ (Mat. 13:30)

(An nian ndɛ kpɔlɛ 12 nun.)

ARMAGEDƆN

Armagedɔn nun’n, bé gúa awie ijre’n i sin nun

BÉ KPÁJA KƐ WIA’N SA

Kwlaa naan Armagedɔn w’a bo i bo’n, be nga be kpali be sieli be ngunmin be onga mɔ be te o asiɛ’n su wa’n, bé tí yía ɲanmiɛn su lɔ

Sran nanwlɛfuɛ’m bé kpája be Si i mɛn’n nun. (Mat. 13:43) (An nian ndɛ kpɔlɛ 16 nin 17 nun.)

Be kpɛ awie ijre’n, be guɛ i sin dan kpa’n nun. (Mat. 13:42) (An nian ndɛ kpɔlɛ 15 nun.)

[Foto]

[Foto]

[Foto]

[Foto]

[Foto]

[Foto]

[Foto]

[Foto]

[Foto]

[Foto]

[Foto, bue 19]

Ɔ cɛ kaan sa’n, mɛn siefuɛ’m be nin be nga be tɔn be wun suɛn kɛ be ti Klistfuɛ’n, be afiɛn wá sáci. (An nian ndɛ kpɔlɛ 13 nun.)