Kɛ amún yó kpɛnngbɛn kɔ́’n

1, 2. (a) ?Kɛ kpɛnngbɛn yolɛ’n ko ba’n, ninnge benin yɛ be kaci ɔ? (b) ?Wafa sɛ yɛ lalafuɛ nun Ɲanmiɛn i sufuɛ’m be dili aklunjuɛ be kpɛnngbɛn blɛ nun ɔn?

KƐ É yó kpɛnngbɛn é kɔ́’n, nn ninnge wie’m bé káci. E wunmiɛn’n kpɛ su. Kɛ e nian niannun’n nun’n, e wun kɛ e ɲrun’n su wɔnsɔn, e ti’n su bo je annzɛ ɔ su kpa. Awlafiɛ’n kusu kle e yalɛ wie. Sɛ e mma’m be ja bian nin bla naan be wu e anunman mun’n, ɔ nin i fata kɛ e fa ajalɛ uflɛ naan e nin be y’a nanti. Kɛ wie’m be ko fa antrɛti’n, be kaci be mɛn dilɛ wafa’n.

² Nanwlɛ, afɛ o kpɛnngbɛn yolɛ’n nun. (Akunndanfuɛ’n 12:1-8) Sanngɛ maan e fa e ɲin e sie lalafuɛ nun Ɲanmiɛn i sufuɛ’m be su e nian. Kannzɛ bɔbɔ be wa wuli’n, sanngɛ ngwlɛlɛ nin sa silɛ nga be ɲɛnnin i’n ti’n be dili aklunjuɛ be kpɛnngbɛn blɛ nun. (Bo Bolɛ 25:7, 8; 35:28, 29; Zɔb 12:12; 42:17) ?Wafa sɛ yɛ kɛ bé yó kpɛnngbɛn bé kɔ́’n, be kwla dili aklunjuɛ ɔ? Nanwlɛ, kɛ mɔ be mɛn dilɛ nun’n be nantili afɔtuɛ nga andɛ be o Biblu’n nun’n be su’n i ti ɔ.—Jue Mun 119:105; 2 Timote 3:16, 17.

3. ?Afɔtuɛ benin yɛ Pɔlu mannin sran kpɛnngbɛn mun ɔn?

³ Fluwa nga akoto Pɔlu klɛli ko mannin Tit’n i nun’n, ɔ mannin be nga be su yo kpɛnngbɛn’n be su afɔtuɛ. Ɔ klɛli kɛ: “Se yasua kpɛnngbɛn’m be kɛ be bu akunndan, yɛ be di nanwlɛ, be yo sa i nuan su, be jran kekle be lafi Nyanmiɛn su, be klo Nyanmiɛn nin sran, be tra be anwlɛn. Kan kle bla kpɛnngbɛn’m be kɛ be kusu be yo sa nga Nyanmiɛn sran yo-ɔ ɔ ti su’n. Nán maan be di abla, yɛ nán maan be yo nzan nɔnfuɛ. Maan be yo sa ng’ɔ ti kpa’n.” (Tit 2:2, 3) Sɛ amun fa ndɛ ngalɛ’n su’n, ɔ́ kwlá úka amun naan amun a jran kpɛnngbɛn yolɛ’n i sin afɛ’n i ɲrun kekle.

KƐ BA’M BE KO ƝIN’N, MAAN E NIN BE SI TRAN

4, 5. ?Kɛ ba’m be ko jaso awlo’n nun’n, ɔ yo siɛ nin niɛn sunman be sɛ? ?Yɛ ajalɛ benin yɛ wie’m be fa ɔ?

⁴ Kɛ ninnge’m be yolɛ’n káci’n, ɔ kpɛ ajalɛ uflɛ falɛ ba. Kɛ ba’m be ko jaso awlo’n nun be ko ja bian nin bla’n, yɛ be wun kɛ ndɛ sɔ’n ti nanwlɛ ɔ! Like klikli ng’ɔ kle siɛ nin niɛn kpanngban be kɛ be su yo kpɛnngbɛn’n yɛ ɔ o lɛ ɔ. Kɛ siɛ nin niɛn mun be mma’m bé ɲín bé kɔ́’n, ɔ yo be fɛ. Sanngɛ siɛn mɔ ba’m be ngunmin bé fá be atin liɛ’n, be usa be wun sɛ be tali be kpa o. Asa ekun kɛ ba’m be ko wɔ’n, awlaloe’n kwla yo dan.

⁵ Nanwlɛ, kannzɛ bɔbɔ ba’m be jasoli awlo’n nun o sanngɛ siɛ nin niɛn’m be te bu be akunndan. Niɛn kun seli kɛ: “Sɛ be lɔ nganniɛn’n kwla gua min su wa kɛ be wun ti be kpa’n ɔ́ yó min fɛ.” Siɛ kun se kɛ: “Kɛ e wa bla’n jasoli awlo lɛ’n, ɔ yoli kekle kpa mannin min. Lika’n yoli srolo afin like kwlaa nga e yo’n e yo i likawlɛ.” ?Wafa sɛ yɛ siɛ nin niɛn sɔ’m be kwla jrannin sa sɔ’n i ɲrun kekle ɔ? Blɛ sunman nun’n, be wiengu’m be ndɛ lo be yɛ be uka be.

6. ?Ngue yɛ ɔ kwla uka awlobofuɛ mun naan be nuan w’a sɛ kpa ɔ?

⁶ Kɛ ba’m be ko ja bla nin bian’n, siɛ nin niɛn’m be junman’n kaci. Bo Bolɛ 2:24 se kɛ: “I sɔ’n ti yɛ ɔ fata kɛ yasua kpaci i si nin i nin, yɛ ɔ fɛ i wun mɛntɛn i yi nan be nnyɔn’n be kaci sran wunmuan nin-ɔn.” Sɛ siɛ nin niɛn’m be wun sran sielɛ’n i su mmla nga Ɲanmiɛn mannin’n i wlɛ kpa’n, ɔ́ kwlá úka be naan b’a yo sa i nuan su sɛsɛsɛ.—1 Korɛntfuɛ Mun 11:3; 14:33-34, 40.

7. ?Kɛ siɛ kun i mma bla’m be jali bian mɔ be ɔli’n, ajalɛ kpa benin yɛ ɔ yili i nglo ɔ?

⁷ Kɛ bian kun nin i yi’n be mma bla nɲɔn’n be jali bian mɔ be ɔli’n, be wun wa yoli be flɔlɔ. I bo bolɛ nun’n bian’n fali i sia’m be wun ya. Sanngɛ kasiɛn su’n, kɛ ɔ wa buli sran sielɛ i su mmla’n i akunndan’n, ɔ wunnin i wlɛ kɛ i mma’m be siefuɛ’n yɛle be wun mun. Ɔ maan kɛ i mma’m be usɛ i ngwlɛlɛ afɛ’n, ɔ dun mmua usa be akunndan nga be wun’m be bu’n. Kpɛkun ng’ɔ kwla kan fa nannan i sia’m be liɛ’n su’n, nn w’a kan. Siɛn’n i sia’m be fɛ i yo be janvuɛ, kpɛkun afɔtuɛ ng’ɔ man be’n, be sɔ nun klanman.

8, 9. ?Kɛ siɛ nin niɛn wie’m be mma’m be ɔli’n, wafa sɛ yɛ ɔ sɔnnin be nun ɔn?

⁸ ?Yɛ sɛ be nga b’a ja uflɛuflɛ be ninnge nga be yo’n ɔ fɔnman Ɲanmiɛn mmla’n mɔ sanngɛ be si nin be nin’m be bu i kɛ i sɔ yolɛ’n nin i fataman’n nin? Siɛ nin niɛn mɔ be mma’m be jali bian nin bla’n be seli kɛ: “E uka be titi naan b’a wun ninnge mun kɛ Zoova fa wun i sa. Sanngɛ sɛ be fa ajalɛ wie naan ɔ timan e liɛ’n su’n, e uka be e suan be bo, yɛ e wla be fanngan.”

⁹ Azi mɛn’n i lika wie nun’n, ɔ ti kekle kpa man niɛn wie mun kɛ be kplin su kɛ be wa yasua’n ko taka i bɔbɔ i awlobo liɛ’n. Sanngɛ kɛ be nanti Ɲanmiɛn i ninnge siesielɛ’n su’n, ndɛnngan ng’ɔ o be nin be sewi’m be afiɛn’n ɔ kan ase. Klistfuɛ bla kun waan kɛ i mma yasua’m be ɔli’n, “ɔ dili aklunjuɛ dan.” Kɛ ɔ wun wafa nga be sie be awlobo’n kpa’n, ɔ yo i fɛ dan. Kpɛkun i sɔ’n yo maan ɔ nin i wun mɔ be su yo kpɛnngbɛn’n, be wun fa be feke kan.

MAAN AMUN AJA’N YO KƐ I BO BOLƐ NUN’N SA

10, 11. ?Ɲanmiɛn Ndɛ’n nun afɔtuɛ benin yɛ ɔ kwla uka sran mun naan b’a tɔman kpɛnngbɛn yolɛ aya’m be nun ɔn?

¹⁰ Kɛ sran’m bé yó kpɛnngbɛn bé kɔ́’n, ɔ le sran kun nin i aeliɛ liɛ. Yasua wie’m be wlawla be wun kɛ gbanflɛn mun sa. Bla sunman be liɛ’n, kɛ be si kɛ mannza su wa tannin be’n, i sin sa’n kun be srɛ. Ng’ɔ timan kpa’n yɛle kɛ sran kpɛnngbɛn wie’m be nin gbanflɛn nin talua wie’m be tra ndalie, ɔ maan ɔ be be wun’n annzɛ be yi’n i awlɛn. Sanngɛ yasua kpɛnngbɛn nga be ti Ɲanmiɛn i sufuɛ’n be “bu akunndan,” be faman be konvi siemɛn i sa tɛtɛ yolɛ’n su. (1 Piɛr 4:7) I kunngba’n, bla nga be si ngwlɛlɛ’n, kɛ mɔ be klo be wun mun mɔ be kunndɛ kɛ Zoova klun jɔ be wun’n ti’n, be mian be ɲin naan be aja’n taka kpa.

¹¹ Ɲanmiɛn maan Famiɛn Lɛmuɛli yili “bla kpa’n” i ayɛ. Ɔ seli kɛ “sa kpa yɛ ɔ yo bian’n cɛn kwlaa-a. Ɔ lɛ-man kɛ ndɛ ɔ’a yo i tɛ.” Kpɛnngbɛn blɛ sɔ nun mɔ bla’n miɛn i ɲin jran kekle’n, ɔ nin i fata kɛ Klistfuɛ yasua’n yo i mo nin i ɲin mianlɛ’n. Klolɛ m’ɔ klo i yi’n ti “ɔ yi i ayɛ.”—Nyanndra Mun 31:10, 12, 28.

12. ?Kɛ afuɛ’m bé sín bé kɔ́’n, wafa sɛ yɛ be nga be o aja nun’n be afiɛn’n kwla mantan ɔn?

¹² Afuɛ kwlaa nga amun tali amun mma mun’n, ninnge ng’ɔ miannin be sa’n yɛ amun yoli mannin be ɔ, amun bɔbɔ amun a buman amun wun akunndan. Siɛn mɔ be nunman lɛ kun’n, ɔ nin i fata kɛ amun fa amun ɲin sie amun aja’n su. Bian kun se kɛ: “Kɛ min mma bla’m be ɔli’n, wafa nga e nin min yi’n e trannin’n, ɔ ti kɛ blɛ yɛ n su wa jɛ i ekun sa.” Bian kun ekun se kɛ: “E nian e wiengu su, yɛ e kpɛn e wiengu wla kɛ ɔ nin i fata kɛ ɔ kpinndinkpinndin i wun kan.” Kɛ ɔ ko yo naan b’a kaman be ngunmin’n, be yia aniaan mun be awlo lɔ. Nanwlɛ, sɛ e wiengu’m be ndɛ lo e’n, e ɲan su mmlusuɛ. Asa ekun i sɔ’n jɔ Zoova klun.—Filipfuɛ Mun 2:4; Ebre Mun 13:2, 16.

13. ?Kɛ sran kun nin i yi’n bé yó kpɛnngbɛn’n, wafa sɛ yɛ be afiɛn yalɛ mɔ be tu be klun be koko’n, ɔ ti cinnjin ɔn?

¹³ Nán amun yo maan amun afiɛn yalɛ kokolɛ’n yo kekle amun sa nun. Amun tu amun klun koko amun afiɛn yalɛ. (Nyanndra Mun 17:27) Bian kun se kɛ: “Kɛ e wiengu i ndɛ lo i wiengu’n, mɔ e bu i sran’n, ɔ yo maan e si e wiengu kpa tra laa.” I yi’n kan gua su kɛ: “Kɛ é yó kpɛnngbɛn é kɔ́’n, e ɲannin blɛ e yoli ninnge wie mun likawlɛ. E nɔn dute, e koko yalɛ yɛ e uka e wiengu.” Sɛ amun di amun wiengu nanwlɛ’n, ɔ kwla yo maan amun aja’n i bo’n wla ase kpa naan amun a kwla jran kekle Satan m’ɔ ti awlobo sacifuɛ’n i ɲrun.

MAAN AMUN KLO AMUN ANUNMAN MUN

14. ?Wafa sɛ yɛ Timote i nannan’n ukɛli i wie naan w’a kaci Klistfuɛ ɔ?

¹⁴ Sran oke’m “be famiɛn kle” yɛle be anunman mun. (Nyanndra Mun 17:6) Sran kpɛnngbɛn’m be anunman’m be wun yo be fɛ. Kɛ be nin be wo’n, be wla gua ase. Biblu’n kan Timote i nin Enisi ɔ nin i nannan Loisi be wun ndɛ kpa. Be kannin Ɲanmiɛn Ndɛ’n be kleli Timote. Kɛ gbanflɛn kan sɔ’n ɲín kɔ́’n, ɔ wunnin kɛ i nin’n nin i nannan’n be klo Biblu’n nun nanwlɛ ndɛ’n kpa.—2 Timote 1:5; 3:14, 15.

15. ?Ngue like cinnjin yɛ sran oke’m be kwla yo man be anunman mun ɔn? ?Yɛ ngue yɛ ɔ nin i fataman kɛ be yo ɔ?

¹⁵ I lɛ ngalɛ nun yɛ sran oke’m be kwla uka be anunman mun ɔn. Amun mɔ amun a kaci nannan’n, amun dun mmua kannin Zoova klun sa yolɛ’n i ndɛ’n kleli amun mma mun. Siɛn’n amun anunman mun yɛ w’a to be like klelɛ ɔ! Ba kanngan sunman be klo kɛ be nannan’m be kan Biblu’n nun ndɛ’m be kle be. I yo nán kɛ amun su sin be si’n i osu bé klé be Ɲanmiɛn Ndɛ’n niɔn. Afin i junman ɔn. (Mmla’n 6:7) Sanngɛ amun suɛn i bo. Maan amun srɛ kɛ jue tofuɛ’n fa srɛli’n sa. I waan: “Ee Nyanmiɛn, siɛn’n bɔ m’an yo oke bɔ min ti’n w’a bo je yɛ’n, nán yi min ase. Maan n kan ɔ kwlalɛ bɔ a kwla’n i nun ndɛ n kle min blɛ sufuɛ mun. Maan n kan ɔ safunyrɛn sa bɔ a yo be’n n kle be kwlaa nga bé bá be sin lɔ’n.”—Jue Mun 71:18; 78:5, 6.

16. ?Wafa sɛ yɛ sran kpɛnngbɛn’m be kwla yo naan b’a kpɛman ndɛnngan ba awlobo’n nun ɔn?

¹⁶ Ng’ɔ ti tɛ’n yɛle kɛ wie liɛ’n, sran kpɛnngbɛn wie’m be saci be anunman mun ɔ maan i sɔ’n fa ndɛnngan ba be nin be mma kaklaakla’m be afiɛn. Wie liɛ’n amun klun ufue’n yo maan amun anunman’m be klun ndɛ nga be kwlá kan kleman be si nin be nin mun’n, be kan kle amun. Ɔ ju wie’n, amun anunman’m be lafi su kɛ amún jrán be sin. ?Amún yó i sɛ? Maan ngwlɛlɛ su amun se be kɛ be kan be klun ndɛ be kle be si nin be nin. Amun kwla yiyi nun kle be kɛ i sɔ’n yo Zoova fɛ. (Efɛzfuɛ Mun 6:1-3) Sɛ ɔ nin i fata’n, amun bɔbɔ amun kwla bo ndɛ’n su kle be si’n nin be nin’n ka. Mɛn’n nun sa nga amun wunnin be’n, amun di su nanwlɛ kle amun anunman mun. Wafa nga amun kan ndɛ’n i weinwein kle be’n, ɔ́ kwlá úka be.

AMUN YO AMUN WUNSU LIKE

17. ?Jue tofuɛ’n i ajalɛ benin yɛ ɔ fata kɛ Klistfuɛ oke’m be fa su ɔ?

¹⁷ Kɛ afuɛ’m bé sín bé kɔ́’n, amun wun kɛ like nga amun yo i laa’n, annzɛ like kwlaa nga amun kunndɛ kɛ amún yó’n, amun kwlá yomɛn i kun. ?Wafa sɛ yɛ amun kwla ɲɛn i sɔ liɛ’n i trawlɛ ɔ? Amun akunndan’n nun’n, ɔ kwla yo amun kɛ amun le afuɛ 30 sa, sanngɛ like nga niannun’n fa kle amun’n, ɔ ti i liɛ ngunmin. Nán amun wla’n bo amun wun. Jue tofuɛ’n srɛli Zoova tankaan kɛ: “Min yɛ m’an yo oke ndɛ yɛ, nán niɛn i sɔ’n ti yi min blo. Sɛ min fanngan’n wie min nun bɔbɔ’n, nán niɛn i sɔ’n ti yi min ase.” Maan amun ta nda kɛ amún fá jue tofuɛ’n i ajalɛ’n su. Ɔ seli kɛ: “Ń fá min wla’n ń gúa ɔ su, ḿ mánmán wɔ lelele.”—Jue Mun 71:9, 14.

18. ?Wafa sɛ yɛ Klistfuɛ ngwlɛlɛfuɛ kun kwla fa i antrɛti blɛ’n yo ninnge kpa ɔ?

¹⁸ Sran sunman be siesie be wun naan kɛ be ko fa be antrɛti’n, b’a kwla uka be Zoova manmanlɛ’n su. Siɛ kun m’ɔ o antrɛti nun’n se kɛ: “Sɛ e wa bla’n wie i suklu’n di’n, like nga n ko yo’n, n dun mmua siesieli. N siesieli min klun lɔ kɛ ń yó blɛ kwlaa nun jasin bofuɛ, yɛ ń yó min aata’n i atɛ naan m’an kwla su Zoova kpa tankaan. N srɛli Ɲanmiɛn naan ɔ bo min ɲrun atin.” Sɛ amun antrɛti kɔlɛ’n su mantan koko’n, maan e Yifuɛ Dan’n i ndɛ nga wla amun fanngan. I waan: “Kɛ amún yó oke’n, wuun n tɛ o n osu nun. Kɛ amun ti bó je’n, wuun n tɛ suan amun bo. N fali amun n sa su, yɛ ń fá amun sɔ ekun.”—Ezai 46:4.

19. ?Afɔtuɛ benin yɛ be man be nga be su yo kpɛnngbɛn’n mun ɔn?

¹⁹ Kɛ antrɛti blɛ’n ko ju’n, ɔ timan pɔpɔ. Akoto Pɔlu seli yasua kpɛnngbɛn’m be kɛ “be bu akunndan.” I bo’n yɛle kɛ ɔ nin i fata kɛ be tra be awlɛn, nán maan be kunndɛ pɔɔ nun tranlɛ. Kɛ amun o antrɛti nun’n, ɔ nin i fata kɛ amun nian amun wun su tra laa’n. Nán amun tran lɛ ngbɛn, “an di e Min’n i junman’n kpa wɔ amun nyrun tititi. [Maan] an si kpa kɛ like nga e yo man e Min’n, ɔ su ka-man ngbɛn.” (1 Korɛntfuɛ Mun 15:58) Maan amun wiengu’m be ndɛ lo amun. (2 Korɛntfuɛ Mun 6:13) I sɔ yɛ Klistfuɛ sunman be yo ɔ. Kɛ nga be wunmiɛn’n fa ju lɛ’n, be bo jasin fɛ’n juejue su. Kɛ amún yó kpɛnngbɛn kɔ́’n, ‘maan amun lafi Nyanmiɛn su, amun klo Nyanmiɛn nin sran, amun tra amun anwlɛn.’—Tit 2:2.

SƐ AMUN A KACI ANGBETI’N AMUN JRAN KEKLE

20, 21. (a) ?Mɛn nga nun’n, ngue yɛ wie liɛ’n, ɔ kwla titi sran kun nin i yi’m be nun ɔn? (b) ?Wafa sɛ yɛ Ani mannin angbeti’m be ajalɛ kpa ɔ?

²⁰ Ng’ɔ yo ɲrɛnnɛn’n yɛle kɛ mɛn nga nun’n, wie’n titi be nga be o aja nun’n be nun. Klistfuɛ nga b’a kaci angbeti’n be si kɛ be wun annzɛ be yi ng’ɔ wuli’n su lafi. Yɛ be lafi su kɛ bé wá wún i ekun. (Zan 11:11, 25) Sanngɛ i wie’n te yo be ya. ?Wafa sɛ yɛ be kwla yo ɔ?a

²¹ Sɛ amun bu like nga Biblu’n nun sran wie’m be yoli’n i akunndan’n ɔ kwla uka amun. Ani nin i wun be aja’n dili afuɛ nso cɛ yɛ bian’n wuli ɔ. Kɛ Biblu’n kán angbeti bla sɔ’n i ndɛ’n, nn ɔ le afuɛ 84. Atrɛkpa kɛ i wun wuli’n i awlaboe’n yoli dan. ?Wafa sɛ yɛ ɔ yoli ɔ? Ɔ suli Ɲanmiɛn Zoova kɔnguɛ nin wia nun Ɲanmiɛn i sua’n nun. (Lik 2:36-38) Kɛ Ani tuli i klun suli Ɲanmiɛn’n, i sɔ’n ukɛli i naan w’a jran kekle awlaboe dan’n nin i wun m’ɔ yo i flɔlɔ’n be ɲrun.

22. ?Wafa sɛ yɛ angbeti wie’m be yoli naan be wun w’a yoman be flɔlɔ ɔ?

²² Bla kun le afuɛ 72. Kɛ i wun wuli’n w’a di afuɛ blu. Bla sɔ’n seli kɛ: “Ng’ɔ ti kekle man min’n, yɛle kɛ n leman sran naan e nin i y’a ijɔ. Min wun ti sran mɔ kɛ á kán ndɛ’n ɔ sie i su kpa ɔ. E kan e asɔnun’n nin e jasin fɛ’n bolɛ’n i ndɛ.” Angbeti bla kun ekun se kɛ: “Sɛ ɔ ti su kɛ, kɛ blɛ’n sín kɔ́’n yɛ e awlaboe’n kan ase’n, sanngɛ nga n wunnin i’n, yɛle kɛ like nga a fa ɔ blɛ’n fa yo’n yɛ ɔ uka wɔ ɔ. Afin a le blɛ kwla fa uka sran uflɛ.” Kɛ angbeti bla kun m’ɔ le afuɛ 67 bu i sɔ wie ɔ. I waan: “Ajalɛ kpafuɛ’n nga e kwla fa naan awlaboe’n w’a sɔn e nun’n yɛle kɛ e tu e klun e fɔnvɔ e wiengu mun.”

OKE BLƐ NUN BƆBƆ’N ƝANMIƐN BU AMUN SRAN

23, 24. ?Wafa sɛ yɛ Biblu’n fɔnvɔ sran kpɛnngbɛn mun nin be nga be ti angbeti’n niɔn?

²³ Kannzɛ bɔbɔ sɛ wie’n ti e kaci angbeti’n, sanngɛ Zoova su yiman e ase le. Famiɛn Davidi i kpɛnngbɛn blɛ nun’n, ɔ seli kɛ: “Like nga n srɛ i Anannganman sa nun’n, ɔ ti kunngba cɛ. Yɛ kusu ɔ lo min kpa. Like sɔ’n yɛlɛ kɛ n klo kɛ ń trɛ́n i sua’n nun cɛn kwlaa lele min nguan’n i awieliɛ, naan ń kánnvun i bɔbɔ Anannganman, afin ɔ yo nyɛnmɛn, yɛ ń fá min wun ḿ mɛ́ntɛn i.”—Jue Mun 27:4.

²⁴ Akoto Pɔlu se kɛ: “Bu bla nga be wun wuli bɔ be lɛ-man sran’m be sran, nian be lika.” (1 Timote 5:3) Afɔtuɛ ng’ɔ mannin fa nannan mmla nga su’n kle kɛ ɔ nin i fata kɛ asɔnun’n nian angbeti mmla nga be leman wie’n, mɔ be leman osufuɛ’n be lika. Sanngɛ kɛ be se kɛ be ‘bu be sran’n’ yɛle kɛ be klo be wie. Nanwlɛ, kɛ angbeti yasua nin bla nga be su Ɲanmiɛn’n be si kɛ Zoova klo be naan ɔ́ súan be bo’n, i sɔ’n fɔnvɔ be!—Zak 1:27.

25. ?Ngue like yɛ ɔ minndɛ sran kpɛnngbɛn mun ɔn?

²⁵ Ɲanmiɛn Ndɛ’n se kɛ: “Kpɛnngbɛn’m [...] be ti je’n, ɔ ti be anyrunnyan like.” Ɔ “ti kɛ famiɛn kle sa, afin nguan tɛnndɛn’n ti sran kpa’m be nvasuɛ.” (Nyanndra Mun 16:31; 20:29) I sɔ’n ti’n, sɛ amun o aja nun o, sɛ amun ti angbeti o, maan amun fa Zoova i sulɛ’n be sie like kwlaa ɲrun tititi. I liɛ’n, dɔ nga su amún ɲán dunman kpa Ɲanmiɛn ɲrun yɛ e ɲrun lɔ’n, kɛ kpɛnngbɛn yolɛ’n nin i sin ɲrɛnnɛn sa’m be su tranman lɛ kun’n, amún ɲán anannganman nguan.—Jue Mun 37:3-5; Ezai 65:20.