Maan e yo sa ng’ɔ yo ɲɛnmɛn’n naan Zoova ɲan ɲrun

‘Sa ng’ɔ yo be’n be yo ɲɛnmɛn, be tu be nian.’—JUE. 111:3.

1, 2. ?Kosan benin mun yɛ é tɛ́ su like suanlɛ nga nun ɔn?

KƐ BIBLU’N kán Ɲanmiɛn i ndɛ’n ɔ se kɛ: ‘Anannganman min Ɲanmiɛn ɔ dan mɔ a ti’n leman sin. A le ɲrun o! A yo ɲɛnmɛn o!’ (Jue. 104:1) Akoto Pɔlu kleli kɛ klɔ sran’m be kusu be kwla yo naan sran’m be ɲin yi be wie. Kɛ ɔ́ kán mmla’m be wun wlawlalɛ ndɛ’n, ɔ seli kɛ: ‘N klo kɛ tannin nga mmla’m be kla’n be klɛ i kpa, nán maan be fa be wun kle, sanngɛ maan be sie be wun kpa. Kɛ bé síesíe be wun’n, nán maan be fa be wla guɛ i be ti mɔ be yo’n, nin sika ɔkwlɛ, nin afle, nin tralɛ m’ɔ le gua’m be su.’ (1 Tim. 2:9) Sanngɛ nán be wun wlawlalɛ ngunmin nun yɛ é sé kɛ é yó naan sran’m be wun kɛ Ɲanmiɛn ‘le ɲrun naan ɔ yo ɲɛnmɛn’ ɔn.—Jue. 111:3.

² Ɔ leman sran m’ɔ le ɲrun yɛ ɔ yo ɲɛnmɛn tra Zoova ɔ. Ɔ maan ɔ fata kɛ Zoova i sufuɛ’m be ijɔlɛ nin be aeliɛ’n nun’n, be yo maan Zoova ɲan ɲrun. ?Sanngɛ, ngue ti yɛ e klɔ sran mun e le ɲrun ɔn? ?Wafa sɛ yɛ ninnge nga Zoova yili be’n, be kle kɛ ɔ le ɲrun, naan ɔ yo ɲɛnmɛn ɔn? ?Ngue yɛ ɔ fata kɛ Ɲanmiɛn i ɲrun m’ɔ le i’n, ɔ nin i ɲɛnmɛn m’ɔ yo’n, ɔ yo e ɔ? ?Wafa sɛ yɛ Zezi i ɲin yili sran mun ɔn? ?Yɛ wafa sɛ yɛ e Ɲanmiɛn sulɛ nun’n, e kwla yo naan e nzuɛn’n w’a yo kpa ɔ?

Sa nga ti yɛ e le ɲrun’n

3, 4. (a) ?Kɛ mɔ Zoova yo maan e ɲrun ba ɲan ti’n, ngue yɛ ɔ fata kɛ e yo ɔ? (b) ?Wan yɛ Jue Mun 8:6-10 fa e ɲin sie i su ɔ? (An nian ndɛ ng’ɔ o ja ngua lɛ’n.) (c) ?Laa’n, wan mun yɛ Zoova yoli maan be ɲannin ɲrun ɔn?

³ Sran’m be kwlaa be le ɲrun, afin Ɲanmiɛn yili be kɛ i bɔbɔ sa. Zoova yoli maan Adam ɲannin ɲrun. Yɛle kɛ ninnge ng’ɔ yili be’n, ɔ fa mɛnnin i kɛ ɔ nian be su. (Bob. 1:26, 27) Kɛ sran’m be fɔnnin bɔbɔ’n, junman ng’ɔ mannin be asiɛ’n su’n, ɔ boli su ekun. Ɔ maan, andɛ nin andɛ, Ɲanmiɛn maan sran’m be ‘ɲrun ba ɲan.’ (An kanngan Jue Mun 8:6-10 nun.)a Kɛ mɔ Zoova maan e ɲrun ba ɲan’n, ɔ fata kɛ e kusu e mɛnmɛn i. Ɔ fata kɛ e yo naan i dunman’n fu.

⁴ I li bɔbɔ Zoova i sufuɛ mun yɛ Zoova yo maan be ɲan ɲrun kpa’n niɔn. Ɔ yoli maan Abɛli ɲrun bali ɲan. Yɛle kɛ Ɲanmiɛn sɔli like mɔ Abɛli mɛnnin i’n nun. Sanngɛ w’a sɔman Abɛli i niaan bian Kaɛn liɛ’n nun. (Bob. 4:4, 5) Zoova seli Moizi kɛ ɔ yo naan Zozie mɔ i yɛ ɔ́ wá sín i ja nun’n, ɔ ɲan ‘ɲrun nga m’ɔ le i’n’ wie. (Kal. 27:20) Davidi i wa Salomɔn kusu i su ndɛ nga Biblu’n kan’n yɛ: ‘Anannganman mannin Salomɔn su dan kpa. I dunman’n fuli Izraɛlifuɛ’m be kwlaa be afiɛn. Yɛ Anannganman yoli maan i sielɛ’n takali trali Izraɛli famiɛn nga be dunnin mmua i ɲrun’n.’ (1 Nyo. 29:25) Be nga Ɲanmiɛn fɛli i wawɛ’n mannin be’n, mɔ be kannin kɛ Ɲanmiɛn ‘sielɛ’n ɔ yo ɲɛnmɛn naan ɔ le ɲrun’n,’ kɛ Ɲanmiɛn cɛ́n be’n, ɔ́ yó naan be ɲan ɲrun dan kpa. (Jue. 145:11-13) “Bua’m be wie” mun mɔ be te sɔn te uka su’n, be kusu be manman Zoova wie kpa.—Zan 10:16.

Ninnge nga Zoova yili be’n, be kle kɛ ɔ le ɲrun naan ɔ yo ɲɛnmɛn

5. ?Ɲanmiɛn i ɲrun m’ɔ le i’n i dan’n ti sɛ?

⁵ Davidi toli jue kun fa kleli kɛ Ɲanmiɛn i dan’n leman wunsu, naan klɔ sran’n kusu juman lika fi. Ɔ seli kɛ: ‘Anannganman e Min, ɔ dunman’n ɔ yo ɲɛnmɛn asiɛ wunmuan’n su! Ɔ ɲrun mɔ a le i’n i dan’n ɔ fu tra ɲanmiɛn m’ɔ la nglo lɔ plaii’n su.’ (Jue. 8:2) Yɛle kɛ ka naan Ɲanmiɛn w’a yi “nglo nin asiɛ’n,” lele m’ɔ́ fá jú blɛ mɔ ɔ́ yó naan asiɛ’n w’a kaci mɛn klanman’n, naan fɔ’n w’a tu klɔ sran’m be nun’n, sran fi leman ɲrun traman Zoova nglo lɔ nin asiɛ’n su wa. Yɛ ɔ́ yó sɔ tititi, sran fi su ɲanman ɲrun traman Zoova le.—Bob. 1:1; 1 Kor. 15:24-28; Ngl. 21:1-5.

6. ?Ngue ti yɛ e se kɛ Ɲanmiɛn le ɲrun ɔn?

⁶ Kɛ kɔnguɛ lika’n tɔ srolo mɔ jue tofuɛ’n nian nzraama mɔ be yo mianmianmian’n, ɔ siman wie se. Wafa nga Ɲanmiɛn ‘trɛ ɲanmiɛn’n m’ɔ la nglo lɔ plaii nun kɛ tannin sua sa’n,’ ɔ bo i nuan. I waan Ɲanmiɛn le ɲrun ninnge ng’ɔ yili be’n be ti. (An kanngan Jue Mun 104:1, 2 nun.) E kwlá wunman e Yifuɛ’n mɔ like fi nunmɛn i sin’n. Sanngɛ kɛ e nian ninnge ng’ɔ yili be’n, e wun i ɲɛnmɛn m’ɔ yo’n, ɔ nin i ɲrun m’ɔ le i’n.

7, 8. ?Wafa sɛ yɛ nglo lɔ ninnge’m be kle kɛ Zoova ti dan, naan ɔ yo ɲɛnmɛn ɔn?

⁷ Maan e fa nzraama kwle mɔ blɔfuɛ’n flɛ i Voie lactée e nian. Kɛ e bu nzraama kpanngban kpa nga be o nzraama kwle sɔ’n nun’n, ɔ nin ninnge wie mɔ be ti kɛ asiɛ’n sa’n mɔ be flɛ be planète, ɔ nin be nun ninnge uflɛ ekun be akunndan’n, asiɛ’n ti i liɛ kaan kɛ wla m’ɔ tɔ be ɲin su’n sa. Sanngɛ nn nzraama kwle kunngba sɔ’n i nun nzraama’m be ju be liɛ akpi ngbinngbin 100! Sɛ ɔ ti kɛ segɔndu kun nun e kwla ka nzraama kun’n, naan e kɛ i sɔ trilili aliɛ ba kun fá cɛ́n ɔ́ sán’n, ɔ́ dí afuɛ lele 3.000 trá su naan y’a kwla ka nzraama akpi ngbinngbin 100 sɔ mun.

⁸ ?Sɛ nzraama kwle kunngba i nun nzraama’m be ju akpi ngbinngbin 100, yɛ nn nzraama kwle onga’m be li? ?Nzraama nga Ɲanmiɛn yili be’n be ti nɲɛ? I lifuɛ’n e kwlá boman su e diman jɔlɛ, afin sɛ e waan é bú i sin’n, ɔ́ bó e fia. Sanngɛ Zoova liɛ’n, ɔ “ka nzraama mun. Ɔ tɔn be kwlaa be dunman kunngunkunngun.” (Jue. 147:4) ?Kɛ e wun ninnge sɔ mɔ be yi Zoova i ɲrun m’ɔ le i’n, ɔ nin i ɲɛnmɛn m’ɔ yo’n i nglo’n, nán manmanlɛ kunngba cɛ yɛ ɔ fata kɛ e mɛnmɛn i ɔ?

9, 10. ?Wafa sɛ yɛ kpaun mɔ Ɲanmiɛn man e’n, ɔ kle kɛ e Yifuɛ’n si ngwlɛlɛ ɔ?

⁹ Maan siɛn’n, e yaci nglo lɔ ninnge’m be lɛ naan e kpɛ e ɲin aliɛ mɔ e di’n su e nian. Zoova m’ɔ ‘boli ɲanmiɛn’n m’ɔ la nglo lɔ plaii’n,’ i kunngba’n, “be nga awe kun be’n, ɔ man be like be di.” (Jue. 146:6, 7) E wun kɛ sa nga Ɲanmiɛn yo be’n be yo ‘ɲɛnmɛn.’ Ninnge sɔ’m be nun wie yɛle ninnge nga Ɲanmiɛn maan e ta be mɔ be man e aliɛ’n. (An kanngan Jue Mun 111:1-5 nun.) Zezi seli i sɔnnzɔnfuɛ’m be kɛ sɛ bé kókó yalɛ klé Ɲanmiɛn’n, maan be se kɛ: ‘Man e aliɛ ng’ɔ ju e andɛ’n.’ (Mat. 6:11) Laa’n, nvle wie’m be aliɛ’n yɛle kpaun. I sɔfuɛ’m be wie yɛle Izraɛlifuɛ mun. Kɛ e wun kpaun’n, e kwla se kɛ nán like nanndoliɛ ɔ. Afin kɛ bé tɔ́n kpaun’n, be faman ninnge kpanngban. Sanngɛ wafa ng’ɔ fa yo lele m’ɔ kaci kpaun’n, ɔ ti abonuan.

¹⁰ I nun mɔ bé klɛ́ Biblu’n, Izraɛlifuɛ’m be fa ble annzɛ ɔrzu sanmlɛn, ɔ nin nzue yɛ be tɔn kpaun’n niɔn. Wie liɛ’n be gua nun kpaun are. Kɛ be kan ninnge ba nɲɔn cɛ sɔ’m be bo nun’n, wafa ng’ɔ yo lele m’ɔ kaci kpaun’n, ɔ ti abonuan. Sran’m be nin a wunmɛn i sɔ liɛ’n i wlɛ kpa. Asa ekun’n, kɛ be di kpaun’n, wafa ng’ɔ kaci be ku nun lɔ’n, ɔ ti i liɛ abonuan ekun. Ɔ maan jue tofuɛ’n i ndɛ ng’ɔ kannin’n, ɔ boman e nuan. I waan: “Ee Anannganman, junman nga a di be’n, be sɔnnin o! Ngwlɛlɛ nga a fa yoli i kwlakwla sɔ’n ɔ cɛnnin o!” (Jue. 104:24) ?Ɔ yoman e kɛ e manman Zoova sɔ wie?

?Ɲanmiɛn i ɲrun m’ɔ le i’n, ɔ nin i ɲɛnmɛn m’ɔ yo’n, ɔ yo amun sɛ?

11, 12. ?Kɛ e bu ninnge nga Zoova yoli be’n be su akunndan’n, ɔ yo e sɛ?

¹¹ Ɔ timan cinnjin kɛ e yo kɛ fluwa sifuɛ dandan’m be sa naan y’a wun kɛ nzraama’m be yo ɲɛnmɛn, annzɛ naan y’a si kɛ kpaun’n yo fɛ. Sanngɛ kɛ ɔ ko yo naan y’a si kɛ Zoova le ɲrun’n, ɔ fata kɛ e tran e bu ninnge ng’ɔ yili’n be su akunndan. ?Ngue yɛ ninnge sɔ’m be su akunndan bulɛ’n kwla man e ɔ? Wafa nga kɛ e bu sa wie mɔ Zoova yoli be’n be sin’n mɔ e wun yo e’n, i kunngba’n yɛ sɛ e yo sɔ’n e wun yó e ɔ.

¹² Sa dandan nga Zoova yoli mɛnnin i nvle nunfuɛ mun’n ti’n, Davidi to jue seli kɛ: ‘A ti famiɛn, a le ɲrun, a yo ɲɛnmɛn, min waan ń kán wafa sɔ mɔ a ti’n i ndɛ [min waan ń bú wafa sɔ mɔ a ti’n i akunndan, NW]. Ń kán abonuan sa mɔ a yo be’n be ndɛ wie [ń fá min ɲin síe i abonuan sa mɔ a yo be’n be su. NW]’ (Jue. 145:5) Kɛ e suan Biblu’n i nun ndɛ’n, mɔ e bu su akunndan’n, yɛ e kle kɛ e fa e ɲin sie abonuan sa sɔ’m be su ɔ. ?Sɛ e yo sɔ’n i bo’n gúa sɛ? Klolɛ mɔ e klo Zoova’n, m’ɔ le ɲrun, m’ɔ yo ɲɛnmɛn’n, ɔ́ yó dan. Ɔ maan, é yó kɛ Davidi m’ɔ manmannin Zoova’n sa. Ɔ seli kɛ: ‘N liɛ’n, ɔ sa dandan mɔ a yo be’n, ḿ bóbó be kunngunngun.’ (Jue. 145:6) Sɛ e bu ninnge kpakpa nga Zoova yoli be’n be su akunndan’n, e nin Zoova e afiɛn’n ɔ́ mántan kpa. Kpɛkun é tú e klun é kɛ́n i ndɛ é klé sran mun. ?E bo jasin fɛ’n juejue su? ?E kan e kle sran mun kɛ Zoova le ɲrun, ɔ yo ɲɛnmɛn naan ɔ ti famiɛn?

Zezi yo ɲɛnmɛn kɛ Zoova sa

13. (a) ?Ngue like yɛ Ɲanmiɛn fa mannin Zezi mɔ Daniɛl 7:13, 14 kɛn i ndɛ ɔ? (b) ?Wafa sɛ yɛ Zezi m’ɔ ti Famiɛn’n bu sran mun ɔn?

¹³ Ɲanmiɛn i Wa Zezi Klist boli jasin fɛ’n juejue su ɔ mɛnmɛnnin i Si Ɲanmiɛn m’ɔ le ɲrun’n. Zoova yoli maan Zezi Klist i ɲrun m’ɔ ɲɛnnin i’n ti i liɛ ngunmin. Ɔ fali ‘kwlalɛ’n yɛ famiɛn diwlɛ’n wlɛli i sa nun.’ (An kanngan Daniɛl 7:13, 14 nun.) Sanngɛ, Zezi timan sran m’ɔ tu i wun ɔn. Ɔ si sran ng’ɔ sie be’n be aunnvuɛ. Ɔ bu be sran. I mɔ Ɲanmiɛn kpɛli i kɛ ɔ yo Famiɛn’n, ɔ yoli like kun mannin sran kun mɔ sran’m be bumɛn i sran’n. Maan e fa e ɲin e sie like sɔ’n su e nian.

14. ?Laa’n, wafa sɛ yɛ Izraɛlifuɛ’m be bu kokowefuɛ mun ɔn?

¹⁴ Laa sran nga kokowe yo be’n, blɛ sunman be wu ɲrɛnnɛn wie. Blɛblɛblɛ be wunnɛn’n wunmuan’n kaci kannin. Kokowefuɛ’n ti i liɛ kɛ sran mɔ w’a wu’n sa. Ɔ maan kɛ ɔ ko yo naan kokowefuɛ kun i kokowe’n w’a wie’n, ɔ ti kekle. I sɔ’n ti’n, be fɛ i juejue yolɛ’n sunnzun sran cɛnlɛ. (Kal. 12:12; 2 Fam. 5:7, 14) Fiɛn o kokowefuɛ’m be wun, ɔ maan sran’m be kpɔ be. Yɛ be tran be liɛ lika uflɛ. Sɛ sran’m be su ba be wun lɛ’n, be kpan se kɛ: ‘Fiɛn w’a kan min o! Fiɛn w’a kan min o!’ (Sau. 13:43-46) Fluwa nga Zuifu’m be mmla klefuɛ’m be klɛli nun’n, be waan sran nga kokowe o i wun’n, sɛ ɔ́ bá Zuifu’m be wun’n, ɔ fata kɛ be afiɛn’n ti nun mɛtri kɔe kun nin sin. Be kannin kɛ Zuifu’m be kpɛnngbɛn kun o lɛ’n, kɛ ɔ wun kokowefuɛ kun mmua lɔ’n, ɔ toto i yɛbuɛ naan ɔ wɔ mmua.

15. ?Wafa sɛ yɛ Zezi buli kokowefuɛ kun ɔn?

¹⁵ Ɔ maan, kɛ kokowefuɛ kun wa toli Zezi m’ɔ srɛli i kɛ ɔ yo maan i kokowe’n wie’n, wafa nga Zezi yoli’n, ɔ ti abonuan. (An kanngan Mark 1:40-42 nun.) W’a fuanman bian’n. Sran mɔ be yili i blo’n, ɔ sili i aunnvuɛ. Zezi liɛ’n, ɔ wunnin kɛ bian’n yo annvɔ, naan ɔ fata kɛ be de i. I awlɛn’n kpɛli i klun. Ɔ tinngɛli i sa’n, naan w’a yo bian’n i juejue.

16. ?Wafa nga Zezi nin sran’m be trannin’n, ngue like yɛ ɔ kle e ɔ?

¹⁶ ?E mɔ e ti Zezi i sɔnnzɔnfuɛ’n, wafa ng’ɔ yoli ɲɛnmɛn kɛ i Si sa’n, wafa sɛ yɛ e kwla nian su ɔ? Ɔ fata kɛ e bu sran’m be kwlaa be sran. Sɛ be ti sran dan o, sɛ be ti juejue o, sɛ be ti kpɛnngbɛn o, sɛ be ti bakan o, ɔ fata kɛ e bu be kwlaa be sran. (1 Piɛ. 2:17) Be nga be sie be wiengu’n, maan ɔ yo yasua mun o, annzɛ siɛ nin niɛn mun o, annzɛ asɔnun kpɛnngbɛn mun o, be sɔfuɛ mun yɛ ɔ fata kɛ be bu sran nga be nian be su’n be sran ɔn. Ɔ fata kɛ be yo naan sran nga be sie be’n b’a bumɛn i kɛ be nunman sran’m be nun wie. Biblu’n tinnin su kpa kɛ i sɔ yɛ ɔ fata kɛ Klistfuɛ kwlakwla yo ɔ. I waan: “An klo amun wun kpa kɛ sran nin i niaan sa, an bu amun wiengu sran.”—Rɔm. 12:10.

Ɲanmiɛn sulɛ nun’n, maan e yo aɲinyiɛfuɛ

17. ?Ɲanmiɛn sulɛ nun’n, wafa sɛ yɛ Biblu’n kle e kɛ e ɲin yi Ɲanmiɛn ɔn?

¹⁷ Biblu’n kle kɛ Zoova sulɛ nun’n, ɔ ti cinnjin kpa kɛ i sufuɛ’m be yo aɲinyiɛfuɛ. Akunndanfuɛ’n 4:17 se kɛ: ‘Kɛ á wlú Ɲanmiɛn i sua’n nun lɔ’n, bu i akunndan.’ Kɛ Moizi nin Zozie be juli lika kun m’ɔ ti Ɲanmiɛn liɛ’n nun’n, ɔ seli be kɛ be yi be ngbabua’n. (Tul. 3:5; Zoz. 5:15) I sɔ yolɛ’n kle kɛ be ɲin yi Ɲanmiɛn. Asa kusu’n, kɛ ɔ ko yo naan “sran’m b’a wunman be bo’n ti’n,” ɔ fata kɛ Izraɛlifuɛ nga be jran Ɲanmiɛn ɲrun’n be wla lɛn cɛkoto. (Tul. 28:42, 43) Mmla sɔ’n yoli maan blɛ mɔ bé dí be junman mun Ɲanmiɛn suwlɛ’n nun’n, be wun wlawlalɛ nun’n, b’a yoman be wun finfin. Ɔ fata kɛ Ɲanmiɛn ɲrun jranfuɛ’m be awlobofuɛ’m be yi aɲrunɲan ng’ɔ nin Ɲanmiɛn ɲrun jranlɛ junman’n fata’n i nglo.

18. ?Wafa sɛ yɛ e Ɲanmiɛn sulɛ nun’n, e kle kɛ e nzuɛn’n ti kpa ɔ?

¹⁸ Ɔ maan, ɔ fata kɛ e mɔ e su Zoova’n, e aeliɛ’n kwlaa nun’n, e kle kɛ e ɲin yi Ɲanmiɛn nin sran. Sɛ e kunndɛ kɛ sran’m be ɲin yi e’n, ɔ fata kɛ e yo aɲinyiɛfuɛ. Nán kɛ e kunndɛ kɛ é fá e wun klé ti yɛ e ɲin yi sran ɔn. Sanngɛ ɔ nin i fata kɛ ɔ fin e awlɛn’n nun. (1 Sam. 16:7; Nya. 21:2) Ɔ fata kɛ aɲinyiɛ’n kaci e nzuɛn. Maan e ɲin yi sran, yɛ e bɔbɔ ba’n, maan e ɲin yi e wun wie. Blɛ kwlaa nun’n, ɔ nin ninnge kwlaa nga é yó be’n be nun’n, yɛ ndɛ kwlaa nga é kán’n, maan e yi nzuɛn sɔ’n i nglo. E aeliɛ nin e wun wlawlalɛ, yɛ e wun siesielɛ nun’n, e nanti akoto Pɔlu i ndɛ nga su. I waan: ‘E kloman kɛ sran fi kan e junman’n i wun ndɛ, i sɔ’n ti’n, e yoman sa fi m’ɔ saci sran ti nun ɔn. Sanngɛ sa kwlaa nun e fa e wun kle kɛ e ti Ɲanmiɛn junman difuɛ.’ (2 Kor. 6:3, 4) E ‘bu e Defuɛ Ɲanmiɛn’n i ndɛ nga e kle’n i ndɛ kpa sa’n kwlaa nun.’—Tit 2:10.

Kɛ é sú Ɲanmiɛn’n, maan e nzuɛn’n yo kpa titi

19, 20. (a) ?Sran’m be sran bulɛ’n i wafa’n kun yɛle benin? (b) ?Aɲinyiɛ’n i su like benin yɛ ɔ fata kɛ e mian e ɲin e yo ɔ?

¹⁹ Be nga be kpali be sieli be ngunmin’n mɔ be ti ‘Klist i ja nun jranfuɛ’n,’ be nzuɛn’n ti kpa. (2 Kor. 5:20) “Bua’m be wie mun” mɔ be suan be bo’n, be kusu be nin Mɛsi’n i famiɛn dilɛ junman’n i dilɛ fata. Sran ng’ɔ ti famiɛn kun i ja nun jranfuɛ’n, ɔ kan famiɛn’n i ndɛ yasua su, kpɛkun ɔ yo maan be ɲin yi i. Ɔ maan, ɔ fata kɛ e kan Ɲanmiɛn Sielɛ’n i ndɛ yasua su. (Efɛ. 6:19, 20) ?Yɛ kɛ e ko to sran mun mɔ ‘e kan be delɛ’n i ndɛ’ e kle be’n, nán be sran bulɛ yɛle i sɔ’n?—Eza. 52:7.

²⁰ Maan e mian e ɲin naan Zoova i ɲrun m’ɔ le i’n, i ɲin fite e nzuɛn’n nun naan sran’m be mɛnmɛn i. (1 Piɛ. 2:12) Maan tititi e ɲin yi i, maan e su i aɲinyiɛ su, yɛ maan e bu e niaan’m be sran. Yɛ Zoova m’ɔ yo ɲɛnmɛn’n m’ɔ le ɲrun’n, maan wafa nga e su i aɲinyiɛ su’n, ɔ yo i fɛ.

[Ja ngua lɛ ndɛ’n]

?Wafa sɛ yɛ amún tɛ́ kosan’m be su ɔ?

• ?Sɛ e bu ninnge nga Zoova yoli’n be akunndan’n, i sɔ’n yó e sɛ?

• ?Wafa nga Zezi buli kokowefuɛ kun’n i sran’n, afɔtuɛ benin yɛ ɔ man e ɔ?

• ?Wafa sɛ yɛ e kwla manman Zoova kɛ ɔ nin i fata’n sa ɔ?

[Foto, bue 18]

?Wafa sɛ yɛ Zoova yoli maan Abɛli ɲannin ɲrun ɔn?

[Foto, bue 20]

?Wafa nga Zezi buli kokowefuɛ kun i sran’n, afɔtuɛ benin yɛ ɔ man e ɔ?