NDƐ NG’Ɔ KLƐ FLUWA’N SU’N | ?NGUE TI YƐ SRAN KPA’M BE WUN ɲRƐNNƐN ƆN?

?Ngue yɛ Ɲanmiɛn wá yó naan ɲrɛnnɛn sa’m b’a wie ɔ?

Like nga Zoova nin i Wa Zezi Klist bé wá yó naan ɲrɛnnɛn sa mɔ mmusu’m be si Satan fa yi i sran’m be su b’a wie’n, Biblu’n kɛn i ndɛ weiin. Ɔ se kɛ: “Nyanmiɛn Wa’n [Zezi] bali sa nga mmusu’m be si Satan yo’n i nuan nnya bulɛ.” (1 Zan 3:8) Ɔ maan, sran’m be su kpɔman be wiengu kun. Be ɲin su bloman be wiengu i like wun kun. Yɛ be su yoman klunwi kun. Mmusu’m be si Satan bɔbɔ m’ɔ “sie mɛn nga’n,” Zezi waan bé ‘kɛ́n i bo.’ (Zan 12:31) Kɛ ɔ yo sɔ’n, mɛn’n wá yó sran kpa’m be liɛ. Yɛ be wun jɔ́ be kpa fɔuun.​—2 Piɛr 3:13.

?Be nga be fa sa tɛ yolɛ’n cici be ti mɔ be kaciman’n, be liɛ yó sɛ? Ɲanmiɛn Ndɛ’n waan: “Sran kpafuɛ mun, be yɛ bé wá trán mɛn nga nun-ɔn, bé trán be nga be nanti sein’n be mɛn’n nun. Klunwifuɛ’m be liɛ’n, bé trá be mɛn nga nun bé kɔ́. Bé tú gblɛfuɛ’m be bo.” (Nyanndra Mun 2:21, 22) I sɔ’n kle kɛ klunwifuɛ fi su tranman lɛ kun. Kpɛkun be nga be ti sran kpa’n, blɛblɛblɛ fɔ’n su tranman be nun kun. Yɛ bé trán fɔuun.​—Rɔmfuɛ Mun 6:17, 18; 8:21.

?Kɛ asiɛ’n ko kaci mɛn klanman’n, ngue yɛ Ɲanmiɛn yó naan sran’m b’a yoman sa tɛ’n i ekun ɔn? Klɔ sran’m be su kaciman kɛ mannzin mɔ be yili be kɛ be yo like trele kun sa ɔ. Sanngɛ, Ɲanmiɛn wá klé be i klun sa’n i yolɛ. Kpɛkun, blɛblɛblɛ bé yáci akunndan tɛ bulɛ nin sa tɛ yolɛ’n.

?Ngue yɛ Ɲanmiɛn yó naan sa yaya w’a ɲanman sran mun ekun ɔn? Ɲanmiɛn sieli Zezi Klist Famiɛn ɲanmiɛn su lɔ. Ɔ ka kan’n, ɔ́ wá dí famiɛn asiɛ wunmuan’n su. Zezi kwla yo sran’m be juejue. (Matie 14:14) Ɔ kwla yo naan ninnge kɛ nzue m’ɔ tɔ di lika sa’n, annzɛ aunmuan m’ɔ tu saci lika’n, i sɔ sa’m b’a juman kun. (Mark 4:35-41) Ɔ maan, kɛ “blɛ’n fa ti bɔ sa’m be fa ju’n,” i su like kpakpa ngunmin yɛ sran’m bé ɲɛ́n i ɔ. (Akunndanfuɛ’n 9:11) Nanwlɛ, kɛ Klist wá síe mɛn’n, ɲrɛnnɛn sa fi su ɲanman sran mun kun.​—Nyanndra Mun 1:33.

?Sran kpanngban nga be wuli’n, be liɛ yó sɛ? Kwlaa naan Zezi w’a cɛn i janvuɛ Lazali’n, ɔ seli kɛ: “Min yɛ n cɛn sran mun-ɔn, m bɔbɔ min yɛ be flɛ min nguan nin-ɔn.” (Zan 11:25) I sɔ’n kle kɛ, Zezi le tinmin naan ɔ kwla cɛn be nga b’a wu’n.

?Mɛn sɔ mɔ ɲrɛnnɛn sa su ɲanman sran mun i nun kun’n, a kunndɛ kɛ á trán nun wie? Sɛ ɔ ti sɔ’n, suan Biblu’n nun like naan si Ɲanmiɛn i su ndɛ nin i klun sa’n. Zoova i Lalofuɛ nga be tran ɔ akpasua liɛ’n su lɔ’n, be kwla fɛ i sɔ ninnge mun kle wɔ. I sɔ’n ti’n, flɛ be nun kun. Annzɛ kusu klɛ be nga be yili fluwa nga’n, be fluwa.