Like nga ti yɛ sran’m be kwlá tranman fɔun nun’n

Anuannzɛ kun seli kɛ: “Andɛ’n, ninnge nga sran’m b’a yi be’n, nin ninnge nga be si be’n, nin aɲanbeun ninnge’m b’a sɔn kpa. [...] Sanngɛ atrɛkpa’n ninnge sɔ’m be ti’n mɛn’n su wa saci.”​—The Global Risks Report 2018, Forum Économique Mondial.

BE NGA BE SI SA NGA BE O MƐN’N NUN’N, Ɔ NIN NINNGE NGA BE O ASIƐ’N SU’N, BE SU NDƐ’N BE KOKO. ?NGUE TI-Ɔ? MAAN E KAN SA NGA BE O E SU’N BE NUN WIE’M BE NDƐ.

• 

  SRAN WIE’M BE YO SRAN’M BE ABƆLƐ ƐNTƐNƐTI SU: Fluwa kun seli kɛ: “Ninnge tɛtɛ’m b’a sɔn ɛntɛnɛti su dan. Afin be nga be kɔ ɛntɛnɛti su’n, be nun wie’m be tra ba kanngan’m be janvuɛ naan be nin bé lá. Wie’m be bua be wiengu’m be su ato annzɛ be yo be finfin. Wie mun ekun be kan sran wie’m be su ndɛ tɛtɛ mun, annzɛ be klɔklɔ sran mun naan be kan ndɛnngan annzɛ be fa ya. Yɛ wie’m be liɛ’n, be yo sran’m be abɔlɛ.” Ɔ seli ekun kɛ: “Le nɲɔn nun’n, like nga w’a tru ɛntɛnɛti su kpa’n, yɛle kɛ sran tɛtɛ’m be fa sran wie’m be dunman be yo sa tɛ. Sran’m be yi be nzuɛn tɛtɛ’m be nglo ɛntɛnɛti su.”

• 

  KƐ SRAN WIE’M BÉ ƝÁN BE WUN’N, NN WIE’M BÉ DÍ YALƐ: Koko nun wa’n, fluwa kun seli kɛ sɛ be bu yalɛfuɛ nga be o mɛn’n nun’n be nun nɲɔn’n, akpasua kun i sika ng’ɔ le i’n ɔ nin sran mɔcuɛ nga be le sika kpa mɛn nun’n, be sika’n sɛ. Ɔ seli ekun kɛ: “Yalɛ’n su di sran mun kpa. Afin kɛ be nga be le sika’n, bé ɲán be wun’n, nn be nga be leman wie’n bé dí yalɛ trá laa’n. Yalɛfuɛ sɔ’m be nun sunman be ti bla.” Sran wie’m be waan sɛ b’a buman sa sɔ’n i ɲrun ndɛndɛ’n, ɔ su cɛman naan sran’m b’a sanngan lika’n nun.

• 

  ALƐ’N NIN SRAN’M BE YALƐ KLELƐ’N: Afuɛ 2018 nun’n, fluwa kun seli kɛ: “Andɛ’n, be nga alɛ’n nin sran’m be yalɛ klelɛ’n ti’n be tu be nvle nun be kɔ lika uflɛ’n, be diman be yalɛ. Sran sɔ’m be ti sran Miliɔn 68 tra su. Sɛ é kwlá sé’n, segɔndu nɲɔn nun’n sran kun tu i klɔ’n su ko tran lika uflɛ kekle nun.”

• 

  ASIƐ’N SU NINNGE’M BE SU SACI: Fluwa kun seli kɛ: “Ijre nin waka nin nnɛn wafawafa wie’m b’a nunnun mlɔnmlɔn. Lika’m be nun bɔn. Ɔ maan be kwlá loman wunmiɛn kpa kun. Jenvie’n w’a yo fiɛn dan. I kwlaa sɔ’n yo maan sran’m be tɔ tukpacɛ.” Kakaa nga be yo maan waka’m be su mma’n, be su w’a wie nunnun nvle sunman nun. Fluwa sifuɛ’m be waan sɛ y’a nianman e wun kpa’n, lika’n sáci mlɔnmlɔn. Jenvie’n i bo lɔ ninnge wie mɔ be flɛ be kɛ korai’n be su wie nunnun. Korai sɔ’m be ti yɛ jue kpanngban kpa be ɲan aliɛ nin fiawlɛ-ɔ. Fluwa sifuɛ’m be waan afuɛ 30 nga be sinnin lɛ nun’n, korai nga be o mɛn nun’n be bue kun nunnunnin sekeseke.

?Sran’m be bɔbɔ be kwla yo maan mɛn’n tɔ fɔuun? Sran wie’m be waan sɛ sran’m be si ninnge kpanngban’n, i sɔ’n kwla yo ye. ?Sanngɛ ninnge benin yɛ ɔ fata kɛ sran’m be si i naan i sɔ liɛ’n w’a yo ye-ɔ? É wá tɛ́ kosan sɔ’m be su ndɛ akpasua nga i sin liɛ’m be nun.