?Ngue ti yɛ sran’m be buman nguan’n i like fi-ɔ?

?NGUE TI YƐ Ɔ FATA KƐ E BU NGUAN’N I LIKE CINNJIN-ƆN?

• Siklɛti nɔnlɛ’n kwla man e kansɛli. Asa’n sɛ e le kansɛli laa’n, sɛ e nɔn siklɛti’n e su kwlá yoman juejue ndɛndɛ. Sɛ e fa sran nga be afɔkɔ nun kansɛli kunnin be’n be nun sran 100, siklɛti’n yɛ ɔ mannin be nun 90 be kansɛli’n niɔn. Wie liɛ’n be bɔbɔ yɛ be nɔnnin-ɔn, wie liɛ kusu’n sran wie m’ɔ o be wun lɛ’n yɛ ɔ nɔnnin-ɔn.

• Afuɛ kwlaa nun’n, sran wie’m be fa tui kpɛkun be ko kun sran mun. I sɔ’n sanngan sran sunman be akunndan. Fluwa sifuɛ dandan wie’m be waan kɛ sa sɔ’n ju’n, be nga be fin nun fite bɔbɔ’n, be akunndan sanngan afuɛ kpanngban.

• Be nga be nɔn nzan annzɛ drɔgi kwlaa naan b’a cisan loto annzɛ moto wie nun’n, be yo maan akpɔ’m be su sinlɛ’n kun srɛ. Be nga be kle kɛ be buman nguan’n i like cinnjin’n, be yo maan sa yaya kwla ɲan be wiengu.

LIKE NGA A KWLA YO’N

Nian ɔ wun su naan w’a tɔman tukpacɛ. Sɛ dɔ nga su’n a nɔn siklɛti annzɛ a nɔn nzan dan annzɛ kusu a nɔn drɔgi’n, mian ɔ ɲin wla ninnge sɔ’m be ase. Ninnge sɔ’m be kwla yo ɔ abɔlɛ. Yɛ be yolɛ’n kle kɛ a buman ɔ wiengu’m be nguan’n i like cinnjin.

Nian ɔ wun su naan sa w’a ɲanman wɔ annzɛ ɔ wiengu mun. Kɛ ɔ ko yo naan sa w’a ɲanman wɔ’n, siesie ɔ sua’n i nun ninnge’m be ye titi. Nian ɔ loto’n annzɛ ɔ moto’n be lika kpa. Yɛ kɛ á císan nun’n, nian ɔ wun su. Sɛ ɔ wiengu’m be mian ɔ kɛ a yo like wie mɔ i bo kwla gua tɛ man ɔ bɔbɔ annzɛ sran uflɛ’n, nán kplin su.

Bu sran kwlaa sran. Be nga be wunnɛn kplo’n annzɛ e finwlɛ’n timan kun’n, ɔ fata kɛ e bu be sran. I sɔ’n kusu kle kɛ e bu nguan’n i like cinnjin. Afin sran wun akunndan tɛ bulɛ nin sran kpɔlɛ’n i ti yɛ maan nzaje sa mun nin alɛ’m be wieman mɛn’n nun’n niɔn.

LIKE NGA ZOOVA I LALOFUƐ’M BE YO’N

Zoova i Lalofuɛ’m be uka sran mun naan be mɛn dilɛ’n w’a yo kpa. Biblu’n nun like nga e kle sran mun’n ɔ uka be naan b’a yaci ninnge wie mɔ be kwla yo be abɔlɛ’n be yolɛ.

Kɛ é kplán e Ɲanmiɛn sulɛ sua mun’n e nian e wun su kpa naan sa w’a ɲanman e. E junman sɔ’n i dilɛ’n nun’n, be nga be ba e ukalɛ’n e kle be like kpa naan like yaya w’a yoman be. Asa’n e sua nga e wieli be kplan’n, e niannian be tikatika naan be nin sua kplanlɛ i su mmla nga be kpɛli i lika sɔ’n nun’n, b’a wɔ likawlɛ.

Kɛ sa ɲan e wiengu mun’n e uka be. Afuɛ ng’ɔ sinnin lɔ’n nun’n, e ɔli lika ya nɲɔn mɔ sanvuɛsa tɔli lɔ’n be nunfuɛ’m be ukalɛ. Asa’n sika nga be wlɛli i sran’m be ukalɛ sɔ’n nun’n, ɔ ju i liɛ miliar nsiɛn.

Afuɛ 2014 nun’n, tukpacɛ nga be flɛ i Ebola’n, ɔ kunnin sran’m be dan Sran ble mɛn’n i wia atɔliɛ lɔ lika’n nun. Asa’n afuɛ 2018 nun tukpacɛ kunngba sɔ’n kunnin sran kpanngban Kɔnngo lɔ. Blɛ sɔ’n nun’n, e kleli sran’m be like naan tukpacɛ tɛ sɔ’n w’a truman. E sunmannin sran wie mun naan be yiyi nun kle sran’m be kɛ sɛ be di ndɛ nga be kan kle be naan b’a sasa be wun’n su’n, bé ɲán be ti. E fali be sa nun wunnzinlɛ ninnge wie mun e sieli i e Ɲanmiɛn sulɛ sua’m be kwlaa be ɲrun lɛ. Asa’n e yiyili nun e kleli sran’m be kɛ ɔ ti cinnjin kɛ be wunnzin be sa nun yɛ be yo ninnge uflɛ wie mun naan tukpacɛ’n w’a truman.

Siera Leɔnin lɔ’n aladio kun yoli Zoova i Lalofuɛ’m be mo, afin be ukali be wiengu Klisifuɛ mun ɔ nin sran uflɛ wie mun ekun naan Ebola’n w’a yoman be.