Kosan’m be su tɛlɛ
◼ ?Kɛ é tíe nzra nun ijɔlɛ’n aɲia’m be bo lɔ’n, ndɛ nga e klɛklɛ’n annzɛ aniaan’n i nɛn nga e fa’n, ɔ ti mɔ e fa tru?
Ɲanmiɛn Ndɛ’n nga aniaan’m be kan kle e’n aɲia’m be bo lɔ’n, be ti e afɔtuɛ manlɛ nin e fanngan wlalɛ ndɛ. (Yol. 15:32) Ɔ maan, i sin sɛ e kunndɛ kɛ é bó ndɛ fɛfɛ sɔ’n su klé sran uflɛ mɔ b’a tieman wie blɛ sɔ nun’n, i su ɔ. Andɛ, mannzin nga be fa fa sran nɛn’n be sie’n, be diman be yalɛ. I sɔ’n ti’n, ɔ timan kekle manman sran kun kɛ kɛ aniaan kun kán Ɲanmiɛn ndɛ’n cenje’n su lɔ’n, ɔ tra ndɛ ng’ɔ su kan’n sie naan ɔ fa cɛcɛ sran uflɛ. I sɔ ndɛ mɔ be sie’n, aniaan wie’m be le i kpanngban. Wie’m be osu w’a cɛ. Wie liɛ’n, be fa man sran uflɛ kɛ ɔ tie wie annzɛ be yi i kpanngban fa cɛcɛ be janvuɛ mun. Kɛ bé yó sɔ’n, be bumɛn i sin akunndan tɛ. Wie’m be kusu be fa sie i ɛntɛnɛti su naan sran kwlaa nga ɔ klo’n, ɔ ko fa.
I yo, sɛ ndɛ nga be kɛn i cenje’n su lɔ’n e tra e sie naan e bɔbɔ annzɛ e awlofuɛ’m b’a tie’n, ngasi nunman nun. I li bɔbɔ asɔnun kpɛnngbɛn’m be kwla siesie be wun naan b’a tra ndɛ sɔ’m b’a sie naan aniaan nga tukpaciɛ annzɛ kpɛnngbɛn’n ti’n, be kwlá baman aɲia’m be bo’n, b’a tie. Sanngɛ, sa wie’m be ti’n, ɔ nin i fataman kɛ ndɛ nga e fa sieli i mannzin su annzɛ ndɛ nga e klɛklɛli’n, e fa tru.
Blɛ sunman nun’n, aniaan nga ijɔfuɛ’n wá kán Ɲanmiɛn ndɛ’n klé be’n, sa ng’ɔ o be su’n, ɔ dun mmua bu i akunndan naan w’a wun wafa ng’ɔ́ yíyí i ndɛ’n nun kɔ́’n. Kɛ mɔ e siman nun’n, sɛ ndɛ sɔ’n tɔ e sa nun’n, e kwla kan e liɛ kɔ wa. Sran uflɛ kusu kwla kɛn i liɛ kɔ wa. Asa, i sran ng’ɔ kannin ndɛ nin o, i cɛn ng’ɔ kannin ndɛ’n nin o, ɔ kwla yo kekle man e kɛ e si i. Ɔ maan, e kwla siman, sɛ ndɛ ng’ɔ kannin i kwlaa ti nanwlɛ o, naan kusu e te di su o. (Lik 1:1-4) Kpɛkun, kɛ aniaan kun kán Ɲanmiɛn ndɛ’n cenje’n su’n, i ndɛ ng’ɔ kan mɔ be klɛklɛ annzɛ i nɛn nga be fa’n, mɔ kasiɛn su be fa tru’n, ɔ kwla yo naan be blɔ i ɔ nin sran ng’ɔ fa ndɛ’n truli’n. —1 Kor. 3:5-7.
Sran kpa nanwlɛfuɛ m’ɔ si ngwlɛlɛ’n miɛn i ɲin kpa naan w’a man e “aliɛ cɛn bɔ be sieli’n su”. (Lik 12:42) I wie yɛle nzra nun ijɔlɛ nga e kwla tie e asɔnun’m be nun’n, ɔ nin ndɛ uflɛ mɔ e kwla e tie m’ɔ sieli be ɛntɛnɛti su. E kwlaa, e kwla fa ɛntɛnɛti adrɛsi jw.org e ko fa e liɛ. E kwla lafi su kɛ sran kpa nanwlɛfuɛ m’ɔ si ngwlɛlɛ’n i akpasua’n, ɔ nin i nun sran nga be ti e Ɲrun dinfuɛ’m, bé mán e like kwlaa ng’ɔ kwla uka e naan y’a lafi Ɲanmiɛn su kpa’n.—Yol. 16:4, 5.