Ajalɛ nga e kwla fa’n

Sielɛ Blɛ’n i nganniɛn no 38

“Mɛn wunmuan’n nun’n e su fa fluwa nga e cɛcɛ sran mun. Ɔ liɛ yɛ.”

Ndɛ nanndoliɛ: Kɛ ɔ ko yo naan e sa w’a yia e jasin bowlɛ’n, maan e ijɔ kpe kan. Sanngɛ ɔ ju wie’n, ndɛ nga e kan’n kwla lo sran’n i kpa. Ɔ maan ɔ kwla kunndɛ kɛ e koko su yalɛ kpa. Sɛ ɔ ti sɔ’n, e kwla fa kosan ng’ɔ o fluwa’n su’n e usɛ i naan ɔ kɛn i klun ndɛ. I sin’n, maan e kanngan Biblu nun ndɛ mma ng’ɔ tɛ kosan sɔ’n su’n i nun. Yɛ sɛ blɛ o lɛ’n, maan e fɛ i ɲin sie i fluwa’n i nun ndɛ’n su kan. Kwlaa naan y’a srɛ atin’n, maan e fa kosan ng’ɔ o ndɛ ɲanman nga be flɛ i “An bu kosan yɛ’n i akunndan” i bo lɛ’n e kle i. Kpɛkun maan e se i kɛ e kunndɛ kɛ e nin i é kókó su yalɛ cɛn uflɛ.

Sasafuɛ Tranwlɛ’n Novamblu 1

“?Ɔ klun’n, Ɲanmiɛn i su ato ndɛ nga sran’m be kan’n, beninfuɛ’n yɛ ɔ ti be nun dan kpafuɛ’n niɔn? [Maan sran’n tɛ kosan’n su.] Biblu’n se kɛ Ɲanmiɛn kunndɛ kɛ sran’m be klo i, yɛ be lafi i su. [Kanngan Ezai 41:13 nun.] Fluwa nga kan ato ndɛ nsan mɔ sran’m be kɛn i Ɲanmiɛn su’n be ndɛ.”

Réveillez-vous ! Novembre

“Sran kpanngban be wla w’a bo be wun, afin ɔ yo be kɛ sa sukusuku yolɛ’n w’a tru dan. ?Kɛ a niɛn i sa’n, sa sukusuku yolɛ’n w’a tru mɛn’n nun sakpa? [Maan sran’n tɛ kosan’n su.] Biblu’n dun mmua boli i jɔ kɛ sran’m be ayeliɛ’n káci. [Kanngan 2 Timote 3:1-5 nun.] Sa ti m’ɔ fata kɛ e nanti Biblu’n nun mmla’m be su’n, fluwa nga kɛn i ndɛ.”