?Zezi ti sran kpa ngbɛn wie sa?

Ndɛ nga Biblu’n kan’n

Zezi timan sran kpa ngbɛn wie sa. Ɔ ti be kwlaa nga be trannin asiɛ’n su’n, be nun cinnjin kpafuɛ’n. Nian Zezi i su ndɛ nga fluwa sifuɛ dandan wie mɔ sran’m be si be kpa’n be kannin’n:

Angle lɔ laa sa’m be su like suanfuɛ kun suan Wɛlsi. Ɔ seli kɛ: “Kɛ ɔ fɛ i mɛn’n i bo bolɛ nun lele’n, Zezi m’ɔ fin Nazarɛti’n […] yɛ ɔ ti sran’m be nun cinnjin kpafuɛ’n niɔn.”

Amlɛnkɛn’m be mɛn’n nun lɔ fluwa sifuɛ dan kun suan Kenɛti Sikɔti Laturɛti. Ɔ seli kɛ: “[Zezi] yɛ ɔ ti be kwlaa nga be trannin asiɛ nga su’n be nun ng’ɔ ɲannin ta sran’m be su kpa’n niɔn. Lele nin andɛ’n, i su ndɛ’n te uka sran mun.”

Sa nga ti yɛ Zezi ɲan ta sran’m be su tra be kwlaa nga be trannin asiɛ’n su wa’n, Biblu’n kɛn i ndɛ. Cɛn kun’n, Zezi bɔbɔ usɛli i sɔnnzɔnfuɛ nga be mɛntɛn i koko kpa’n be kɛ be bu i kɛ wan yɛle i. Be nun kun tɛli su klanman kpa seli kɛ: “Klisi’n yɛle wɔ, a ti Ɲanmiɛn m’ɔ lafiman’n i Wa.”—Matie 16:16.