AIDS—Nagmamaan an mga Paraataman sa Salud!
“AN MGA paraataman sa salud namemeligrong makakua nin HIV sa mga pasyenteng igwa kaiyan.” An patanid na ini, hale sa College of Medicine sa Aprika del Sur, kinotar sa South African Medical Journal. Iyan resulta kan nagkapirang pagkagadan nin mga medikal na propesyonal na nagadan huli sa aksidenteng pagkaolakit nin AIDS.
An mga pagboot na an katuyohan protehiran an mga paraataman sa salud ngonyan isinasaboot nang marhay. Uya an nagkapirang punto hale sa kapahayagan bilang palakaw kan kolehiyo sa mga medikal na mga trabahador na, sa saindang trabaho, tibaad magkapot nin mga may HIV:
Sa situwasyon na bakong emerhensia, kun an pasyente magsayumang paeksamen sa dugo para sa AIDS virus, an paraataman sa salud may diretso na “ipondo an propesyonal na pag-ataman . . . pakatapos nin lubos na pakikipag-olay sa pasyente.” Itinao an patanid na sa emerhensia, an gabos na pasyente maninigong “tratohon na garo may HIV.”
Bilang dagdag sa dokumento, yaon an halawig na lista nin mga paagi nin pagmamaan. Halimbawa, an pagguwantes nin goma “kun nagkakapot nin dugo asin mga fluido nin hawak, mucous membrane, o ano man na kabaleng parte nin kublit . . . , kun nagkakapot nin mga bagay o lugar na namantsahan nin dugo o mga fluido nin hawak . . . , kun naggigibo nin mga prosedimiento na dian an kamot posibleng madugoan.” An mga paraataman sa salud hinahatolan man na “magmaskara asin gumamit nin mga pantahob sa mata o lalauogon sa panahon nin mga prosedimiento na posibleng magpaluwas nin dugo o mga fluido nin hawak.”
An sarong bilog na subseksion idinusay sa pagpatanid sa mga paraataman sa salud tumang sa pagdaradara nin daing takop na mga iniksion o pagbugtak minsan saen nin nagamit nang matarom na mga bagay. Minsan an “direktang pagpasapasa nin matatarom na instrumento sa pag-oltanan nin mga nasa sala de operasyon” kun oras nin operasyon maninigong likayan. Saro pa, ihinahatol na “an gabos na sampol nin dugo o fluido nin hawak maninigong ibugtak sa masarig, dai matorong mga lalagan” asin na an mga ini maninigong iapon sana sa “dai malalaog nin tubig na plastik na supot o lalagan.”
Kun an paraataman sa salud maolakitan kan virus magsalang paagi sa may darang helang na matarom na nakalugad o sa dugo na nakalaog sa lugad, ihinahatol an tolos-tolos na aksion. Sabi kan dokumento: “An paraataman sa salud maninigong eksaminon para sa HIV sa panahon na sia nameligrong maolakitan, asin pakalihis na naman nin 6 na semana, 12 semana asin 6 na bulan. Sa laog kan panahon na ini maninigong gibohon an espesyal na pagmamaan tanganing maolang an seksuwal na pagkaolakit sa saro o labi pang mga kadorog kan paraataman sa salud.”
An mga paaging ini nagpaparisa nin nagtatalubong tendensia kan may pakaaram na mga medikal na trabahador pasiring sa orog na pagmamaan sa paggamit asin pagkapot nin dugo.