Mayo

An inot na siglong mga Kristiyano dai nakalibre kan nagkaigwa nin grabeng tiggutom “sa bilog na daga.” Siguradong nahadit an mga payo nin pamilya kun paano ninda masusustentuhan an saindang mga pamilya. Asin kumusta man an mga hoben na nagpaplanong pahiwason an saindang ministeryo? Naisip daw ninda na dai nguna idagos an saindang plano? Ano man an saindang nagin kamugtakan, nag-adjust an mga Kristiyanong idto. Padagos sindang naghulit sa ano man na paaging makakaya ninda, asin maugma nindang ihiniras an ano man na materyal na bagay na igwa sinda sa saindang mga kapagtubod sa Judea. (Gibo 11:​29, 30) Nahiling mismo kan mga nakaresibi nin ayuda an pagtabang sainda ni Jehova. (Mat. 6:​31-33) Siguradong nagin mas dayupot sinda sa saindang mga kapagtubod na nagtabang sa sainda. Asin namatian man kaidtong mga nagdonar o nagtabang sa pag-ayuda sa ibang paagi an kaugmahan huli sa pagtao.​—Gibo 20:35. w23.04 16 ¶12-13

Kun minsan, sinisimbag ni Jehova an mga pamibi kan mga lingkod niya paagi sa pagpahiro sa mga bakong kapagtubod para magtao nin tabang. Halimbawa, pinahiro niya si Hading Artajerjes na tugutan si Nehemias na bumalik sa Jerusalem para makatabang siya sa pagtugdok liwat kan siyudad. (Neh. 2:​3-6) Sa ngunyan, puwede man na pahiruon ni Jehova an mga dai nagsasamba sa saiya para magtao nin tabang na kaipuhan ta. Sa parati, an satong mga pamibi dai sinisimbag sa makangangalas na paagi. Pero an mga simbag na naaako ta iyo mismo an kaipuhan ta para magdanay na maimbod sa satong Ama sa langit. Kaya magin alerto sa kun paano ni Jehova sinisimbag an saimong mga pamibi. Sa pana-panahon, magpundo nguna asin pag-isipan kun paano ni Jehova sinisimbag an saimong mga pamibi. (Sal. 66:​19, 20) Kaipuhan tang magpahiling nin pagtubod, bako lang paagi sa pagpamibi ki Jehova kundi paagi man sa pag-ako kan saiyang simbag sa satong mga pamibi sa ano man na paagi na sinimbag iyan.​—Heb. 11:6. w23.05 11 ¶13; 12 ¶15-16

Kan idusay ta an satong sadiri ki Jehova, nagpromesa kitang sasambahon ta siya asin gigibuhon an kabutan niya. Dapat tang utubon an promesang iyan. An pag-utob sa satong pagdusay bakong pagabat. An totoo, linalang kita ni Jehova para gibuhon an kabutan niya. (Kap. 4:11) Ginibo niya kitang igwa nin espirituwal na pangangaipo asin linalang kita uyon sa saiyang ladawan. Bilang resulta, nagigibo tang rumani sa saiya asin nakakamati kita nin dakulang kaugmahan sa paggibo kan kabutan niya. Siring man, pag ginigibo ta an kabutan nin Diyos asin sinusunod an saiyang Aki, ‘nagiginhawahan’ kita. (Mat. 11:​28-30) Kaya pakusugon an pagkamuot mo ki Jehova paagi sa paghurop-hurop sa gabos na marahay na bagay na ginibo niya saimo asin sa mga bendisyon na itinatagama niya saimo. Mantang mas nagkukusog an pagkamuot mo sa Diyos, mas magigin pasil man sa saimo na sunudon siya. (1 Juan 5:3) Nagin mapanggana si Jesus sa paggibo kan kabutan nin Diyos huling namibi siya ki Jehova para sa tabang asin padagos na nagpokus sa saiyang balos. (Heb. 5:7; 12:2) Arog ni Jesus, mamibi ki Jehova para sa kusog asin papagdanayon na malinaw sa isip an paglaom na buhay na daing katapusan. w23.08 27-28 ¶4-5

Naaapresyar ta gabos an mga tawong mapasensiya. Taano man? Hanga kita sa mga tawong nakakapaghalat na dai nauuyam. Naaapresyar niyato na mapasensiya sa sato an iba pag nakakagibo kita nin sala. Asin nagpapasalamat kita ta nagin mapasensiya sa sato an nagtukdo sa sato nin Bibliya kan nasasakitan kitang manudan, akuon, o iaplikar an sarong katukduan sa Bibliya. Urog sa gabos, nagpapasalamat nanggad kita huling mapasensiya sa sato an Diyos na Jehova! Dawa ngani naaapresyar ta an pagigin mapasensiya kan iba, tibaad kita mismo nasasakitan kun minsan na magin mapasensiya. Halimbawa, tibaad masakitan kitang magin kalmado pag natatrapik kita, lalo na kun huri na kita sa dudumanan ta. Tibaad mag-init an payo ta pag napaanggot kita kan iba. Asin, kun minsan, puwedeng magin dipisil sa sato an padagos na paghalat sa ipinanuga ni Jehova na bagong kinaban. Minsan siring, sa gabos na pagkakataon na ini, kaipuhan tang magin mas mapasensiya. w23.08 20¶1-2

Sa pagbuot ni Jehova, binawasan ni Gideon an saiyang hukbo nin labi sa 99 porsiyento. Tibaad naisip niya: ‘Kaipuhan daw talaga an pagliliwat na ini? Maaser daw ini?’ Minsan siring, nagsunod pa man giraray si Gideon. An mga elder ngunyan inaarog si Gideon paagi sa pag-implementar kan irinerekomendar na mga pagliliwat sa teokratikong mga instruksiyon. (Heb. 13:17) Sinunod ni Gideon si Jehova dawa natatakot siya asin delikado an saiyang asignasyon. (Huk. 9:17) Pagkatapos na asiguraron ni Jehova, kumbinsidong marhay si Gideon na tatabangan siya nin Diyos mantang pinoprotektaran niya an banwaan nin Diyos. Inaarog si Gideon kan mga elder na nakaistar sa mga lugar na ipinagbabawal an satong gibuhon. Kusog-buot sindang nanginginot sa mga pagtiripon asin sa ministeryo sa ibong kan huma na arestaron, interogaron, mawaran nin trabaho, o na magkaigwa nin kadahasan. Sa panahon nin dakulang kasakitan, kakaipuhanon kan mga elder nin kusog nin buot para sumunod sa mga instruksiyon na mareresibi ninda—dawa may peligro man iyan na kaiba. w23.06 5-6 ¶12-13

Ipinasurat ni Jehova an marahay na mga ginibo kan Halangkaw na Saserdoteng si Jehoiada para sa pagtukdo sa sato. (Roma 15:4) Asin kan magadan si Jehoiada, tinawan siya nin espesyal na onra na ilubong “sa Siyudad ni David sa kaibanan kan mga hadi, huling guminibo siya nin marahay sa Israel para sa tunay na Diyos asin para sa Saiyang harong.” (2 Cron. 24:​15, 16) An pagkasaysay manungod ki Jehoiada makakatabang sa sato gabos na patalubuon an pagkatakot sa Diyos. An Kristiyanong mga paraataman puwedeng maarog si Jehoiada paagi sa pagdadanay na alerto asin paagi sa maimbod na pagprotektar sa aripumpon nin Diyos. (Gibo 20:28) An mga may edad na makakanuod ki Jehoiada na pag may takot sinda ki Jehova asin magdadanay na maimbod, puwede Niya sindang gamiton para utubon an Saiyang katuyuhan. An mga hoben puwedeng pag-isipan kun paano ni Jehova trinatar si Jehoiada asin arugon Siya paagi sa pagtratar nin may dignidad asin respeto sa mga may edad na, lalo na duman sa mga may halawig nang rekord nin maimbod na paglilingkod. (Tal. 16:31) Lugod na maimbod tang suportaran an “mga nanginginot” paagi sa pagsunod sa sainda.​—Heb. 13:17. w23.06 17 ¶14-15

Sa mga pagtiripon, gamiton an marahay na paghusgar pag nagdedesisyon kun gurano ka kaparating makomento. Kun parati kitang nagtataas nin kamot, tibaad mapiritan an nagkokondukta na pauruutro kitang apudon dawa ngani dai pa natatawan nin oportunidad an iba na makapagkomento. Puwede iyan na makapadisganar sa iba na magtaas kan saindang kamot. (Ecl. 3:7) Pag dakul na parahayag an nagtataas nin kamot durante kan pag-adal, tibaad dai kita makapagkomento nin arog kaparati kan gusto ta. Kun minsan, tibaad dai pa ngani talaga kita maapod kan nagkokondukta. Puwedeng nakakadisganar iyan, pero dapat tang hinguwahon na dai iyan pagpersonalon. (Ecl. 7:9) Kun dai ka makapagkomento nin arog kaparati kan gusto mo, taano ta dai magdangog na marhay mantang nagkokomento an iba dangan pagkatapos kan pagtiripon komendaran mo sinda sa saindang komento? An komendasyon mo sa saimong mga tugang puwedeng magin nakakapakusog sa sainda arog kan itatao mo kutang mga komento. w23.04 23-24 ¶14-16

Pag-adalan an Tataramon nin Diyos asin hurop-hurupon iyan. Kun paanong an sarong kahoy puwedeng magdanay na masarig na nakatindog kun hararom an pagkakagamot kaiyan, puwede man kitang magdanay na marigon kun an satong pagtubod hararom na nakagamot sa Tataramon nin Diyos. Mantang nagtatalubo an sarong kahoy, an mga gamot kaiyan lalong minararom asin minalakop. Pag kita nag-aadal asin naghuhurop-hurop, pinapakusog ta an satong pagtubod asin pinapararom an satong pagigin kumbinsido na an mga pamamaagi nin Diyos iyo an pinakamarahay. (Col. 2:​6, 7) Hurop-hurupon kun paano an instruksiyon, paggiya, asin pagprotektar ni Jehova nakatabang sa saiyang mga lingkod kaidto. Halimbawa, nagtao si Ezekiel nin urog na atensiyon mantang detalyadong sinusukol kan anghel an templo sa bisyon ni Ezekiel. An bisyon na ini nagpakusog ki Ezekiel, asin nagtatao ini sa sato nin praktikal na mga leksiyon kun paano ta masusunod an mga pamantayan ni Jehova para sa dalisay na pagsamba. (Ezek. 40:​1-4; 43:​10-12) Makikinabang man kita kun matao kita nin panahon para pag-adalan asin hurop-hurupon an manungod sa hararom na mga bagay kan Tataramon nin Diyos. Magkakaigwa kita nin marigon na puso, na lubos na nagtitiwala ki Jehova.​—Sal. 112:7. w23.07 18 ¶15-16

Kadakul sa Bibliya nin marahay na halimbawa na puwedeng arugon kan mga hoben na lalaki. An suanoy na mga lalaking idto namutan an Diyos asin nagkapot nin mga responsabilidad sa pangangataman sa saiyang banwaan. Makakahanap man kamo sa saindo mismong pamilya asin sa saindong kongregasyon nin maygurang na mga Kristiyano na marahay na mga halimbawa. (Heb. 13:7) Asin igwa kamo nin perpektong halimbawa—si Jesu-Cristo. (1 Ped. 2:21) Mantang pinag-aadalan nindong marhay an mga halimbawang iyan, isip-isipon an marahayon nindang mga kuwalidad. (Heb. 12:​1, 2) Dangan pag-isipan kun paano nindo maaarog an mga lalaking iyan. An saro na may kakayahan na mag-isip pinag-iisipan ngunang marhay an saiyang mga mapagpipilian bago gumibo nin aksiyon. Kaya maghinguwang marhay para magkaigwa ka kan kakayahan na iyan asin padagos iyan na ipahiling. Magpuon paagi sa pag-aram kan mga prinsipyo sa Bibliya asin pag-isipan kun taano ta kapaki-pakinabang iyan. Dangan magpagiya sa mga prinsipyong iyan para makagibo ka nin mga desisyon na makakapaugma ki Jehova. (Sal. 119:9) Makakatabang na marhay iyan sa saimo na magin sarong maygurang na Kristiyano.​—Tal. 2:​11, 12; Heb. 5:14. w23.12 24-25 ¶4-5

Epektibong matutukduan kan mga magurang an saindang mga aki kun paano masimbag nin may kahuyuan pag kinuwestiyon an mga tinutubod ninda. (Sant. 3:13) May mga magurang na nagkakaigwa nin mga pagpraktis durante kan pampamilyang pagsamba. Kinokonsiderar ninda an mga tema na tibaad magbangon sa eskuwelahan, pinag-uulayan asin ipinapahiling kun paano masimbag, asin tinutukduan an saindang mga aki kun paano mataram sa mahuyong paagi asin magayon pagdangugon. An mga pagpraktis makakatabang sa mga Kristiyano na maipahiling ninda an nakakakumbinsir na mga argumento asin na sinda mismo makumbinsir na igwa sinda nin masarig na basehan kan saindang mga tinutubod. An serye sa jw.org na “Tanong ng mga Kabataan” may kaibang mga worksheet para sa mga tin-edyer. Dinisenyo an mga iyan para tabangan an mga hoben na magin kumbinsido sa saindang mga tinutubod asin mag-andam nin mga simbag sa sadiri nindang mga tataramon. Paagi sa pag-adal sa seryeng ini bilang pamilya, gabos kita makakanuod kun paano idedepensa an satong pagtubod sa mahuyong paagi asin magayon pagdangugon. w23.09 17 ¶10; 18 ¶15-16

Nagkaigwa ka na daw nin sarong espirituwal na pasuhan pero nasakitan kang abuton iyan? Kun iyo, dai ka nagsosolo. Halimbawa, gusto ni Philip na mapauswag an kalidad kan saiyang mga pamibi asin gusto niya na mas parating gibuhon iyan, pero nasasakitan siyang maghanap nin panahon para mamibi. Pasuhan ni Erika na mag-abot nin amay sa mga pagtiripon bago maglingkod sa langtad; pero, nahuhuri man giraray siyang mag-abot sa haros kada pagtiripon. Kun may pasuhan ka ngunyan na dai mo pa man giraray naaabot, dai tabi madisganar. An pag-abot dawa nin sarong simpleng pasuhan sa parati nangangaipo nin panahon asin paghihinguwa. An katunayan na gusto mo pa man giraray na abuton an saimong pasuhan nagpapahiling na pinapahalagahan mong marhay an relasyon mo ki Jehova asin na gusto mong itao sa saiya an saimong pinakamakakaya. Pinapahalagahan na marhay ni Jehova an saimong mga paghihinguwa. Siyempre, dai siya nag-aasa saimo nin labi sa makakaya mo. (Sal. 103:14; Mik. 6:8) Kaya dapat rasonable an mga pasuhan mo, kauyon sa itinutugot kan saimong kamugtakan. w23.05 26 ¶1-2

An mga tawong makusog an buot tibaad makamati nin takot, pero dai ninda tinutugutan iyan na papunduhon sinda sa paggibo nin tama. Makusog na marhay an buot kan hoben na si Daniel. Pinag-adalan niya an mga isinurat kan mga propeta nin Diyos, kaiba na an mga propesiya ni Jeremias. Sa pag-adal na iyan, nasabutan ni Daniel kan huri na madali nang matapos an halawig na pagkabihag kan mga Judio sa Babilonya. (Dan. 9:2) Siguradong napakusog an pagtitiwala ni Daniel ki Jehova kan mahiling niyang nauutob an propesiya sa Bibliya, asin an mga igwa nin makusog na pagtitiwala sa Diyos puwedeng magin makusog na marhay an buot. (Ikumparar an Roma 8:​32, 37-39.) An pinakaimportante, parating namimibi si Daniel sa saiyang Ama sa langit. (Dan. 6:10) Itinuga niya ki Jehova an mga kasalan niya asin sinabi Saiya an mga namamatian niya. Asin naghagad nin tabang si Daniel. (Dan. 9:​4, 5, 19) Tawo man siya arog niyato, kaya dai siya namundag na may kusog nin buot. Imbes, napatalubo niya an kuwalidad na iyan paagi sa pag-adal asin pagpamibi saka pagtitiwala ki Jehova. w23.08 2 ¶4; 4 ¶7

Pag sinusunod ta an haralangkaw na awtoridad, makikinabang kita saka an iba. Paano man? An sarong bagay, malilikayan niyato an padusa na itinatao sa mga nagbabalga sa ley. (Roma 13:​1, 4) An satuya mismong pagsunod igwa nin epekto sa kun paano minamansay kan mga awtoridad an Mga Saksi ni Jehova sa kabilugan. Halimbawa, nagkapirang dekada na an nakaagi sa Nigeria, may mga suldados na nagralaog sa sarong Kingdom Hall mantang igwang pagtiripon an kongregasyon. Hinahanap ninda an mga nagrarayot na nagpoprotesta manungod sa pagbayad nin mga buhis. Alagad sinabihan kan namamahalang opisyal an mga suldados na magharali na, na sinasabi: “An Mga Saksi ni Jehova bakong mga parareklamo sa pagbayad nin buhis.” Sa kada sinusunod mo an ley, napapagayon mo an reputasyon kan banwaan ni Jehova—sarong reputasyon na tibaad pag-abot nin panahon makatabang na maprotektaran an saimong mga kapagtubod. w23.10 9 ¶13

An pira sa mga lingkod ni Jehova haloy nang naghahalat sa katapusan kan sistemang ini nin mga bagay. Sa pagmansay nin tawo, an kautuban kan panuga nin Diyos garo baga naaatraso. Huling nasasabutan ni Jehova an pagmating iyan, inasigurar niya an propetang si Habakuk: “An bisyon para pa sa itinalaan na panahon kaiyan, asin naghihidali iyan pasiring sa katapusan kaiyan, asin dai iyan maputik. Dawa pa kun maatraso iyan, padagos mong halaton iyan! Huli ta siguradong mauutob iyan. Dai iyan mahuhuri!” (Hab. 2:3) An asigurasyon daw na iyan nin Diyos para lang ki Habakuk? O an Saiyang mga tataramon igwa nin kahulugan para sa sato ngunyan? Pinasabngan si apostol Pablo na ipanungod an mga tataramon na iyan sa mga Kristiyano na naghahalat sa bagong kinaban. (Heb. 10:37) Iyo, dawa ngani garo baga naaatraso an panuga sa sato na ililigtas kita, “siguradong mauutob iyan. Dai iyan mahuhuri!” w23.04 30 ¶16

Nakakamundo, binaliwala kan kadaklan sa mga Israelita an malinaw na patunay na ginagamit ni Jehova si Moises bilang Saiyang representante. (Bil. 14:​10, 11) Pauruutro nindang dai minidbid an papel ni Moises. Bilang resulta, dai tinugutan an henerasyon na iyan kan mga Israelita na makalaog sa Dagang Panuga. (Bil. 14:30) Minsan siring, may mga Israelita man na nagsunod sa paggiya ni Jehova. Halimbawa, sinabi ni Jehova: “Si Caleb . . . padagos siyang nagsunod sa sako nin bilog na puso.” (Bil. 14:24) Binalusan nin Diyos si Caleb, asin tinugutan pa ngani siya na pumili kan gusto niyang daga sa Canaan. (Jos. 14:​12-14) An sunod na henerasyon kan mga Israelita nagpahiling man nin marahay na halimbawa nin pagsunod sa paggiya ni Jehova. Kan salidahan ni Josue si Moises bilang ninombrahan na lider kan mga Israelita, “iginalang ninda siyang marhay sa bilog niyang buhay.” (Jos. 4:14) Bilang resulta, binendisyunan sinda ni Jehova paagi sa pagdara sainda sa daga na ipinanuga niya.​—Jos. 21:​43, 44. w24.02 21 ¶6-7

Kun paano an sarong doktor nakakakua nin nagkapirang impormasyon manungod sa kondisyon kan satong puso pag pigkukuanan kita nin pulso, makakakua man kita nin ideya kun gurano kakusog kan satong pagkamuot sa Diyos paagi sa pag-ebalwar kan pagkamuot niyato sa iba. Kun marisa niyato na medyo nagluya na an satong pagkamuot sa mga kapagtubod, puwedeng ipinapahiling kaini na an satong pagkamuot sa Diyos nagluluya na man. Pero pag pirmi kitang nagpapahiling nin pagkamuot sa satong mga kapagtubod, indikasyon iyan na makusog an satong pagkamuot sa Diyos. Pag nagluluya na an satong pagkamuot sa satong mga tugang, sarong seryosong problema iyan. Taano? Huling nangangahulugan iyan na namemeligro an satong espirituwalidad. Lininaw iyan ni apostol Juan kan ipinagirumdom niya sa sato: “Kun an saro dai namumuot sa saiyang tugang, na nahihiling niya, dai man niya magigibong mamuot sa Diyos, na dai niya nahihiling.” (1 Juan 4:20) Ano an itinutukdo kaini sa sato? Mauugma sana sa sato si Jehova kun ‘namumutan ta an lambang saro.’—1 Juan 4:​7-9, 11. w23.11 8 ¶3; 9 ¶5-6

Kan hoben pa si Hading Jehoas, naggibo siya nin madunong na desisyon. Mantang mayo siya nin ama, sinunod niya an instruksiyon kan maimbod na Halangkaw na Saserdoteng si Jehoiada. Tinukduan kan saserdote si Jehoas sa paaging garo sadiri niya ining aki. Bilang reaksiyon sa pagtutukdong iyan, madunong na nagdesisyon si Jehoas na panginutan an dalisay na pagsamba asin paglingkudan si Jehova. Naggibo pa ngani nin areglo si Jehoas na hirahayon an templo ni Jehova. (2 Cron. 24:​1, 2, 4, 13, 14) Kun tinutukduan ka na kamutan si Jehova asin mamuhay kauyon kan saiyang mga pamantayan, sarong mahalagang regalo an itinatao sa saimo. (Tal. 2:​1, 10-12) Puwede kang sanayon kan mga magurang mo sa dakul na paagi. Pag sinusunod mo an maka-Kasuratan na mga sadol na itinatao sa saimo, mapapaugma mo an saimong mga magurang. Asin an mas mahalaga, mapapaugma mo an Diyos asin magkakaigwa ka nin nagdadanay na pakikiamigo sa saiya. (Tal. 22:6; 23:​15, 24) Bako daw na nagtatao iyan sa saimo nin marahay na dahilan na arugon an halimbawa ni Jehoas kan siya hoben pa? w23.09 8-9 ¶3-5

Nanunuga si Jehova na dadangugon niya an satong mga pamibi. Namumutan kan Diyos ta an saiyang maimbod na mga parasamba, kaya dai niya nuarin man binabaliwala an saindang mga pamibi. (Sal. 10:17; 37:28) Minsan siring, dai iyan nangangahulugan na itatao niya an gabos na hagadon ta. Tibaad kaipuhan tang maghalat sagkod sa bagong kinaban para makamtan an pira sa satong mga hinahagad. Kinokonsiderar ni Jehova kun baga an satuyang ipinapamibi kauyon kan saiyang katuyuhan. (Isa. 55:​8, 9) Parte kan katuyuhan na iyan an mapano an daga nin mga tawo na maugmang nagkakasararo asin nagpapasakop sa saiyang pamamahala. Pero hinihingako ni Satanas na mas mapaparahay an mga tawo kun sinda an mamamahala sa saindang sadiri. (Gen. 3:​1-5) Para patunayan na saro iyan na kaputikan, pinabayaan ni Jehova an mga tawo na pamahalaan an saindang sadiri. Alagad, an pamamahala kan tawo nagdara nin dakul na problema na naeeksperyensiyahan ta ngunyan. (Ecl. 8:9) Aram ta na dai pa hahalion ni Jehova ngunyan an gabos na problemang iyan. w23.11 21 ¶4-5

Nanuga si Jehova na paagi ki Abraham bebendisyunan an dakul na nasyon. Alagad, kan 100 anyos na si Abraham asin 90 anyos man si Sara, dai pa man giraray sinda nagkakaaki arog kan ipinanuga sa sainda. Sa pagmansay nin tawo garo baga imposible na magkaaki pa si Abraham asin Sara. Dakulang pagbalo iyan para ki Abraham. “Pero base sa paglaom, nagtubod siya na siya an magigin ama nin dakul na nasyon.” (Roma 4:​18, 19) Asin iyo man nanggad, nagkatotoo an paglaom na iyan. Namundag si Isaac, an haloy nang hinahalat-halat ni Abraham na aking lalaki. (Roma 4:​20-22) Puwede tang makamtan an pag-uyon nin Diyos asin ibilang na matanos bilang mga amigo nin Diyos, arog ni Abraham. Sa katunayan, idinuon iyan ni Pablo kan isurat niya: “An mga tataramon na ‘ibinilang siya na matanos’ dai isinurat para sana [ki Abraham], kundi para man sa sato, na ibibilang na matanos, huli ta nagtutubod kita sa Saiya na nagbangon ki Jesus.” (Roma 4:​23, 24) Arog ni Abraham, kaipuhan tang magkaigwa nin pagtubod asin mga gibo pati na nin paglaom. w23.12 7 ¶16-17

Pag napaatubang ka sa sarong pagbalo asin dahil diyan makamati ka nin takot, tandaan na nahihiling ni Jehova an inaagihan mo asin kun ano an namamatian mo huli kaiyan. Halimbawa, nahiling ni Jehova bako lang an pagmaltrato sa mga Israelita sa Ehipto kundi pati man “kun gurano kakulog kan pig-aagihan ninda.” (Exo. 3:7) Pero tibaad maisip mo kun paano ka tinatabangan ni Jehova mantang nag-aagi ka nin grabeng pagbalo. Kaya hagadon saiya na tabangan kang mahiling kun paano ka niya sinusuportaran. (2 Ha. 6:​15-17) Dangan pag-isipan: An sarong pahayag daw o komento sa pagtiripon kan kongregasyon nakapakusog sa saimo? Nadagka ka daw kan sarong publikasyon, video, o sarong orihinal na kanta? May naghiras daw saimo nin sarong nakakapakusog sa buot na mga tataramon o teksto? Tibaad madali ta sanang mabaliwala an satong mamumuton na kasararuan nin magturugang asin an espirituwal na kakanon na nareresibi ta. Alagad ekstraordinaryong mga regalo iyan hali ki Jehova. (Isa. 65:13; Mar. 10:​29, 30) Patunay an mga iyan na namumutan ka niya. (Isa. 49:​14-16) Patunay man iyan na maninigo siya sa saimong pagtitiwala. w24.01 4-5 ¶9-10

Bago magbalik sa langit, ipinagirumdom ni Jesus sa saiyang mga disipulo an saindang asignasyon na magpatotoo manungod sa saiya “sa Jerusalem, sa bilog na Judea saka Samaria, asin sagkod sa pinakaharayong parte kan daga.” (Gibo 1:8; Luc. 24:​46-48) Dai nahaloy, dinakop kan mga Judiong lider an mga apostol na si Pedro asin Juan asin dinara sinda sa Sanhedrin. Pinagbutan ninda an maimbod na mga lalaking ini na pumundo na sa paghuhulit asin pinatanidan pa ngani sinda. (Gibo 4:​18, 21) Sinabi ni Pedro asin Juan: “Kun baga tama sa paghiling nin Diyos na magdangog sa saindo imbes na sa Diyos, kamo mismo an maghusgar. Pero para sa samo, dai mi magigibong magpundo sa pagtaram manungod sa mga bagay na samuyang nahiling asin nadangog.” (Gibo 4:​19, 20) Kan palibrehon na si Pedro asin Juan, makusog na ipinamibi ki Jehova kan mga disipulo an manungod sa paggibo kan saiyang kabutan. Sinimbag ni Jehova an sinserong pamibi na iyan.​—Gibo 4:31. w23.05 5 ¶11-12

Sa laog nin dai mabilang na mga taon, padagos na pinakusog ni Jehova asin kan namumutan niyang Aki na si Jesus an saindang relasyon bilang mag-ama. Sinda an may pinakahalawig na pag-ibanan sa bilog na uniberso. Espesipikong ipinahayag ni Jehova an saiyang pagkamuot ki Jesus, arog kan mababasa ta sa teksto ngunyan na aldaw. Puwede kutang sabihon lang ni Jehova, ‘Ini an saro na sakong inuuyunan.’ Pero, gusto niyang maaraman ta kun gurano niya kanamumutan si Jesus, kaya inapod niya ining “an sakuyang Aki, an namumutan.” Ipinag-orgulyo ni Jehova si Jesus asin an madali na kaining gibuhon. (Efe. 1:7) Asin dai nagdududa si Jesus sa namamatian kan saiyang Ama para sa saiya. Siguradong-sigurado siya na namumutan siya ni Jehova. Pauruutro niyang ipinahayag nin may kumpiyansa na namumutan siya kan Ama.​—Juan 3:35; 10:17; 17:24. w24.01 28 ¶8

Imahinara ini: Saro sa namumutan mo an nagsabi nin marauton na bagay manungod saimo. Aram mong bako iyan totoo; pero, may mga nagtubod diyan. An mas maraot pa, ta pigparapangistorya ninda iyan sa iba, asin dakul pang iba an nagturubod. Ano an mamamatian mo? Siguradong marhay na makukulgan ka sa pagpakaraot na iyan, bako? An senaryong ini puwedeng makatabang sa sato na masabutan kun ano an namatian ni Jehova kan pinakaraot an saiyang reputasyon. An saro sa saiyang espiritung mga aki nagsabi nin kaputikan manungod sa saiya sa inot na babayi, si Eva. Nagtubod si Eva sa kaputikan na iyan. Huli sa kaputikan na iyan, an inot tang magurang nagrebelde ki Jehova. Bilang resulta, an kasalan asin kagadanan naglaog sa katawuhan. (Gen. 3:​1-6; Roma 5:12) An gabos na problema na nahihiling ta sa kinaban—an kagadanan, giyera, grabeng pagsakit—bunga kan mga kaputikan na ipinalakop ni Satanas. Nakukulgan daw si Jehova sa mga pagpakaraot na iyan asin sa mga resulta kaiyan? Siguradong iyo. Alagad, dai si Jehova naghihinanakit o nagtatanom nin kulog nin buot. Sa katunayan, nagdadanay siya na sarong “maugmang Diyos.”​—1 Tim. 1:11. w24.02 8 ¶1-2

Paano mo maaarog an determinasyon ni Jose? Puwede kang magdesisyon na ngunyan kun ano an gigibuhon mo pag napaatubang ka sa pagtentar. Makanuod na magsabi tulos nin dai sa mga bagay na ikinakaungis ni Jehova, asin dai lamang ngani iyan pagparaisipon. (Sal. 97:10; 119:165) Paagi kaiyan, dai ka magduduwa-duwa pag napaatubang ka sa pagtentar. Sa sitwasyon mo, posibleng kumbinsido kang nanumpungan mo na an katotoohan asin na gusto mong paglingkudan si Jehova nin bilog na puso pero may nakakapugol pa man giraray saimo na magdusay asin magpabawtismo. Puwede mong pag-isipan an halimbawa ni Hading David. Puwede kang makimahirak ki Jehova: “Siyasaton mo ako, O Diyos, asin aramon mo an sakong puso. Siyasaton mo ako, asin aramon mo an mga ikinakahadit kan isip ko. Hilinga tabi kun baga igwa sa sako nin ano man na nakakaraot na tendensiya, asin giyahan mo ako sa dalan nin daing kasagkudan.” (Sal. 139:​23, 24) Binebendisyunan ni Jehova an mga “udok na naghahanap sa saiya.” Maipapahiling mo saiya na iyan an gusto mong gibuhon paagi sa paghihinguwang maabot an saimong pasuhan na magdusay asin magpabawtismo.​—Heb. 11:6. w24.03 6 ¶13-15

An halangkaw na saserdote inawtorisaran na irepresentar an banwaan sa atubangan nin Diyos. An inot na halangkaw na saserdote kan Israel, si Aaron, ninombrahan ni Jehova kan idedikar an tabernakulo. Alagad, arog kan ipinaliwanag ni apostol Pablo, “dakul an kinakaipuhan na magin saserdote para iyo an magsalida huling inuulang sinda kan kagadanan na magpadagos sa paglilingkod.” (Heb. 7:​23-26) Asin huling bakong perpekto an mga halangkaw na saserdoteng idto, kaipuhan nindang magdulot nin mga atang para sa saindang mga kasalan. Mahihiling niyato digdi an dakulang pagkakalain kan mga halangkaw na saserdote sa Israel asin kan nangungurog na Halangkaw na Saserdote, si Jesu-Cristo. Bilang satong Halangkaw na Saserdote, si Jesu-Cristo “sarong lingkod . . . sa tunay na tolda, na pinatindog ni Jehova, asin bako nin tawo.” (Heb. 8:​1, 2) Ipinaliwanag ni Pablo na “huling nagdadanay [si Jesus na] buhay sagkod lamang, an saiyang pagkasaserdote dai nangangaipo nin mga kasalida.” Sinabi pa ni Pablo na si Jesus “daing digta, suway sa mga parakasala” saka bakong arog kan mga halangkaw na saserdote kan Israel, “dai niya kaipuhan na aroaldaw na magdulot nin mga atang” para sa saiyang mga kasalan. w23.10 26 ¶8-9

“An dating langit” nanunungod sa pulitikal na mga gobyerno na impluwensiyado ni Satanas asin kan saiyang mga demonyo. (Mat. 4:​8, 9; 1 Juan 5:19) Arog kan pagkagamit sa Bibliya, an “daga” puwedeng ipanungod sa mga nakaistar sa daga. (Gen. 11:1; Sal. 96:1) Kun siring, “an dating daga” nanunungod sa maraot na sosyedad nin tawo sa ngunyan. Dai sana basta papakarhayon ni Jehova an presenteng “langit” asin “daga”; imbes, biyo niyang lilinigon iyan paagi sa pagsalida diyan. Sasalidahan niya an presenteng langit asin an presenteng daga nin “sarong bagong langit asin . . . sarong bagong daga”—buot sabihon, nin sarong bagong gobyerno asin sarong bagong sosyedad nin tawo. Gigibuhon ni Jehova an daga saka an mga tawo na garo man sana bago paagi sa pagdara sa sainda pasiring sa perpektong kamugtakan. Arog kan ihinula ni Isaias, an bilog na daga gigibuhon na magin sarong arog hardin na parke—siring sa hardin nin Eden. Gigibuhon man kitang bago, paagi sa lubos na pagpapaumay sa lambang saro. An pilay, buta, asin púla mararahay, asin dawa an mga gadan bubuhayon.​—Isa. 25:8; 35:​1-7. w23.11 4 ¶9-10

An “dakulang kasakitan” mapuon nin biglaan. (Mat. 24:21) Pero, bakong arog kan dakul na iba pang kalamidad, bako gabos mabibigla sa pag-abot kan dakulang kasakitan. Mga 2,000 na taon na an nakaagi, pinatanidan ni Jesus an saiyang mga parasunod na magin andam para sa aldaw na iyan. Kun andam kita, magigin mas madali para sa sato na tagalan an masakit na panahon na iyan asin tabangan an iba na magtagal man. (Luc. 21:36) Kakaipuhanon ta an pakatagal para sunudon si Jehova, na nagtitiwala na poprotektaran niya kita. Ano an gigibuhon ta kun mawara an nagkapira o an gabos na materyal na bagay kan satong mga tugang? (Hab. 3:​17, 18) Papahiruon kita kan pagmalasakit na magtao sa sainda nin ayuda. Ano an gigibuhon ta kun, huli sa pag-atake kan koalisyon nin mga nasyon, kaipuhan tang temporaryong mag-istar sa sarong sadit na lugar kaibanan kan satong mga tugang? (Ezek. 38:​10-12) Kakaipuhanon ta an makusog na pagkamuot para sa sainda na makakatabang sa sato na makatagal sa masakit na panahon na iyan. w23.07 2 ¶2-3

Makakanuod an mga mag-agom sa halimbawa ni Aquila asin Priscila, sarong mag-agom na namumutan kan dakul sa inot na mga Kristiyano. (Roma 16:​3, 4) Nagtrabaho sinda, naghulit, asin nagtabang sa iba na magkaibanan. (Gibo 18:​2, 3, 24-26) Sa katunayan, pag sinasambit kan Bibliya si Aquila asin Priscila, pirmi sindang sinasambit na magkaibanan. Paano sinda maaarog kan mga mag-agom? Pag-isipan an dakul na bagay na kaipuhan mong gibuhon asin kan saimong agom. Puwede daw nindong gibuhon an pira sa mga iyan bilang mag-agom imbes na gibuhon iyan nin solo? Halimbawa, si Aquila asin Priscila magkaibanan na naghulit. Regular daw nindong pinaplano na maghulit man na magkaibanan? Magkaibanan man na nagtrabaho si Aquila asin Priscila. An trabaho mo puwedeng iba man sa trabaho kan agom mo, pero puwede daw nindong magkaibanan na gibuhon an mga gibuhon sa harong? (Ecl. 4:9) Pag nagtitinabangan kamo sa paggibo nin sarong gibuhon, mas namamati nindo na magka-team kamo asin may pagkakataon kamo na makapag-ulay. w23.05 22-23 ¶10-12

Gabos kita nakakamati nin takot kun minsan. Sarong beses kan pighahanting ni Hading Saul si David para gadanon, nagdesisyon si David na magdulag sa Gat na siyudad kan mga Filisteo. Dai nahaloy, naaraman kan hadi kan Gat na si Akis na si David iyo su matibay na parapakilaban na pig-uumaw sa sarong kanta na nagpatumba nin “manampulong ribo” na mga Filisteo. ‘Natakot na marhay’ si David. (1 Sam. 21:​10-12) Nahadit siya sa puwedeng gibuhon saiya ni Hading Akis. Paano nadaog ni David an saiyang takot? Sa Salmo 56, ipinahayag ni David an namamatian niya mantang nasa Gat. Ihinayag kan salmong iyan an mga ikinakatakot ni David, pati man kun paano niya iyan napaglabanan. Kan makamati siya nin takot, nagtiwala siya ki Jehova. (Sal. 56:​1-3, 11) May masarig na basehan an pagtitiwala niya ki Jehova. Sa tabang ni Jehova, nakaisip si David nin kakaiba pero epektibong estratehiya: Nagsagin-sagin siyang bua! Kaya imbes na sarong huma, an hiling na saiya ni Hading Akis sarong tawong nakakairitar, kaya nakadulag si David.​—1 Sam. 21:13–22:1. w24.01 2 ¶1-3

Sairisay an sinambit sa teksto ngunyan na aldaw? An binuhay liwat na mga linahidan! Kaya pag an natatada sa mga linahidan sa daga darahon na sa langit pag madali nang matapos an dakulang kasakitan, an saro sa inot nindang gigibuhon iyo an makipaglaban. Pag binuhay liwat na sinda sa langit, maglilingkod sinda kaiba ni Cristo asin kan saiyang banal na mga anghel, tanganing makipaglaban sa pangultimong giyera laban sa mga kaiwal nin Diyos. Isipa na sana! Sa daga, an nagkapirang linahidan na mga Kristiyano mga gurang na, an iba ngani maluluya na an hawak. Pero pag binuhay na sinda sa langit, magigin sindang makapangyarihan asin imortal na mga espiritung linalang, na aasignaran na makipaglaban kaiba kan saindang Parapakilaban na Hadi, si Jesu-Cristo. Pagkatapos kan ralaban sa giyera nin Armagedon, makikipagtabangan sinda sa paggiya sa katawuhan pasiring sa pagkaperpekto. Sigurado nanggad, dakulaon an magigibo ninda para sa saindang namumutan na mga tugang sa daga pag yaon na sinda sa langit kumpara kan sinda mga tawo pa na bakong perpekto! w24.02 6-7 ¶15-16

May nagkapira na handa nang magdusay saka magpabawtismo pero nag-aalangan pa man giraray. Tibaad naiisip ninda, ‘Paano kun makagibo ako nin magabat na kasalan tapos matiwalag ako?’ Kun iyan an ikinakatakot mo, makakasigurado ka na itatao saimo ni Jehova an gabos na bagay na kaipuhan mo “para makalakaw [ka] nin maninigo para [sa saiya] tanganing lubos siyang mapaugma.” (Col. 1:10) Tatawan ka man niya nin kusog na gibuhon kun ano an tama. Napatunayan na niya iyan ta dakul na siyang natabangan. (1 Cor. 10:13) Iyan an sarong rason kun taano ta medyo dikit lang an natitiwalag sa Kristiyanong kongregasyon. Tinatabangan ni Jehova an saiyang mga lingkod na magdanay na maimbod. An lambang bakong perpektong tawo natetentaran na gumibo nin sala. (Sant. 1:14) Minsan siring, nasa saimo man kun mapadara ka sa pagtentar. An totoo, ika talaga an may kontrol kun paano ka mamumuhay. May mga nagsasabi na dai ta makokontrol an satong mga pagmati saka ginigibo. Pero bako iyan totoo. Puwede mong manudan na kontrulon an saimong salang mga pagmawot. w24.03 5 ¶11-12