Hunyo

Binendisyunan ni Jehova an inot na siglong mga Kristiyano huling nag-adjust sinda sa nagbabagong mga kamugtakan. Parati sindang nakakaeksperyensiya nin persekusyon, na kun minsan sa mga panahon na dai ninda inaasahan. Pag-isipan an nangyari ki Bernabe asin ki apostol Pablo mantang naghuhulit sinda sa lugar nin Listra. Kan primero, maugma sindang inako kan mga nagdangog sa sainda. Pero dai nahaloy, “sinutsutan kan mga [parakontra] an mga tawo,” kaya an nagkapira sa mga tawo man sanang idto na nagdangog sa sainda ginarapo si Pablo asin binayaan sa paghuna na gadan na siya. (Gibo 14:19) Pero padagos na naghulit si Bernabe asin Pablo sa ibang lugar. An resulta? Natabangan nindang magin “disipulo an medyo dakul na tawo,” asin an saindang mga sinabi saka halimbawa nakapakusog sa saindang mga kapagtubod. (Gibo 14:​21, 22) Dakul an nakinabang huling dai nagpundo si Bernabe asin Pablo sa ibong kan biglaan na persekusyon. Sagkod na dai kita minasuko sa gibuhon na ipinapagibo sato ni Jehova, bebendisyunan niya kita. w23.04 16-17 ¶13-14

Napaatubang si Hading David sa dakul na peligrosong mga kaiwal sa bilog niyang buhay, asin parati siyang naghahagad nin tabang ki Jehova sa pamibi. Sigurado si David na dinangog asin sinimbag ni Jehova an saiyang mga pamibi. Puwede ka man na magkaigwa nin arog kaiyan na pagtitiwala. Sinisigurado sa sato kan Bibliya na puwede kitang tawan ni Jehova nin kadunungan asin nin kusog na kaipuhan ta para makatagal. Puwede niyang gamiton an satong espirituwal na pamilya o dawa ngani an mga dai nagsasamba sa saiya sa presente para tabangan kita sa nagkapirang paagi. Dawa ngani puwedeng bako pirming sa paaging inaasahan ta an simbag ni Jehova sa satong mga pamibi, aram ta na sisimbagon niya iyan. Itatao niya kun ano mismo an kaipuhan ta asin kun nuarin ta mismo iyan kaipuhan. Kaya padagos na mamibi na may pagtubod, na nagtitiwala na aatamanon ka ni Jehova ngunyan asin na ‘papaniguan niya an mawot kan lambang bagay na may buhay’ sa maabot na bagong kinaban.​—Sal. 145:16. w23.05 8 ¶4; 13 ¶17-18

Marahay kun mapokus ka sa mga bendisyon na makakamtan mo pag naabot mo an saimong pasuhan. Anong mga bendisyon an puwede mo man na isip-isipon? Kun pasuhan mo na mapauswag an saimong pagbasa nin Bibliya o pagpamibi, pag-isipan kun paano iyan makakapakusog kan saimong pakikiamigo ki Jehova. (Sal. 145:​18, 19) Kun pasuhan mo na pauswagon an sarong Kristiyanong kuwalidad, magpokus sa kun paano iyan makakatabang para magkaigwa ka nin mas marahay na relasyon sa iba. (Col. 3:14) Puwede ka daw gumibo nin sarong lista kan gabos na dahilan kun taano ta gusto mong maabot an saimong pasuhan? Pirming balikan an listang iyan. Makiiba-iba man sa mga makakamotibar sa saimo. (Tal. 13:20) Minsan siring, may mga panahon talaga na kulang an satong motibasyon. Buot sabihon daw kaiyan mayo na kitang magigibo sa pag-abot kan satong pasuhan? Dai. Puwede man giraray kitang maghinguwa para maabot an satong pasuhan dawa kun pagmati ta bako kitang motibado. Dawa nangangaipo iyan nin disiplina sa sadiri, kapaki-pakinabang nanggad an resulta. w23.05 27-28 ¶5-8

Huling aram niyatong paninimbagan ta an ginigibo tang mga desisyon, mapapahiro kita kaiyan na ituga an satong mga kasalan, itanos an satong mga sála, asin likayan na mautro an mga iyan. An paggibo kan mga iyan makakatabang sa sato na magdanay sa paurumbasan para sa buhay. Kun dai mo na mareremedyuhan an salang desisyon na ginibo mo, akuon an saimong presenteng kamugtakan. Dai mo pagsayangon an panahon saka kusog mo para patunayan na tama ka o para pagparabasulon an sadiri mo o an iba. Imbes, akuon an mga sála mo asin gibuhon an pinakamarahay na magigibo mo sa saimong presenteng kamugtakan. Kun nakokonsiyensiya ka sa salang nagibo mo, mapakumbabang dumulok ki Jehova sa pamibi, admitiron an saimong sála, asin hagadon saiya na patawadon ka. (Sal. 25:11; 51:​3, 4) Maghagad nin tawad sa mga nagibuhan mo nin salá, asin kun kinakaipuhan, maghagad nin tabang sa mga elder. (Sant. 5:​14, 15) Makanuod sa mga salang ginibo mo, asin hinguwahon na dai na mautro iyan. Pag ginibo mo iyan, makakasigurado ka na papahilingan ka ni Jehova nin pagkahirak asin itatao niya sa saimo an tabang na kaipuhan mo.​—Sal. 103:​8-13. w23.08 28-29 ¶8-9

Si Hading Jehoas nakinabang sa marahay na impluwensiya ni Jehoiada. Bilang resulta, minawot kan hoben na hading ini na paugmahon si Jehova. Pero pagkagadan ni Jehoiada, nagdangog si Jehoas sa mga apostatang pamayo. (2 Cron. 24:​4, 17, 18) Dawa nakulgan na marhay si Jehova, “padagos siyang nagsugo para sa sainda nin mga propeta tanganing pabalikon sinda . . . , pero habo nindang magdangog.” Dai man lamang sinda nagdangog dawa sa aki ni Jehoiada na si Zacarias, na bako lang sarong propeta asin saserdote ni Jehova kundi pinsan man ni Jehoas. Sa katunayan, ipinagadan pa ngani ni Hading Jehoas si Zacarias. (2 Cron. 22:11; 24:​19-22) Dai ni Jehoas pinagdanay an tamang pagkatakot ki Jehova. Sinabi ni Jehova: “An mga naghahamak sa sako hahamakon ko.” (1 Sam. 2:30) Pag-abot nin panahon, sarong sadit na hukbong Siriano an duminaog sa “dakulaon na hukbo” ni Jehoas asin nagkaigwa siya nin “grabeng tama.” (2 Cron. 24:​24, 25) Inasasinar si Jehoas kan saiya mismong mga lingkod huling ginadan niya si Zacarias. w23.06 18-19 ¶16-17

Nag-istar si apostol Pablo nin dikit na panahon sa Efeso, na naghuhulit asin nagtutukdo kan maugmang bareta. (Gibo 19:​1, 8-10; 20:​20, 21) Namumutan niyang marhay an mga tugang asin gusto niya sindang tabangan na magdanay na maimbod ki Jehova. An mga taga Efeso na sinuratan ni Pablo uripon kaidto nin palsong mga katukduan sa relihiyon asin nin superstisyon. Bantog an Efeso sa grabeng imoralidad asin sa daing pakundangan na paggawi. Sa parati, an mga pasali sa mga teatro asin dawa sa mga relihiyosong kapiyestahan nagtatampok nin kalaswaan. (Efe. 5:3) An dakul sa mga nakaistar diyan “nawaran na kan gabos na pakamati sa moral,” sarong ekspresyon na literal na nangangahulugan na “dai na nakakamati nin kulog.” (Efe. 4:​17-19) Bago nakanuod kun ano talaga an tama asin sala, an mga taga Efeso dai nakakamati nin pagkakonsiyensiya. Huli kaiyan, ilinadawan sinda ni Pablo na “nasa kadikluman . . . nin isip asin suway sa buhay na naghahali sa Diyos.” Pero, an nagkapira sa mga taga Efeso dai nagdanay sa kadikluman. w24.03 20 ¶2, 4; 21 ¶5-6

An asignasyon ni Gideon bilang hukom nangangaipo nin grabeng pisikal na kusog. Kan magdulag an mga Midianita sa ralaban sa kamatangaan nin banggi, linapag sinda ni Gideon puon sa Kababan nin Jezreel sagkod sa Salog nin Jordan. (Huk. 7:22) Puminundo na daw si Gideon sa Jordan? Dai! Dawa pagal, siya saka an 300 na lalaking kaibanan niya nagbalyo sa salog asin nagpadagos sa paglapag. Sa katapos-tapusi, inabutan ninda an mga Midianita asin dinaog an mga ini. (Huk. 8:​4-12) Nagtiwala si Gideon na tatawan siya ni Jehova nin kusog, asin ginibo nanggad iyan ni Jehova. (Huk. 6:​14, 34) Sarong beses, linapag ni Gideon asin kan kaibanan niyang mga lalaki an duwang Midianitang hadi; nagdadalagan lang sinda mantang an mga hadi minalataw na nakasakay sa mga kamelyo. (Huk. 8:​12, 21) Alagad, sa tabang nin Diyos, nanggana an determinadong mga Israelita. Makakapagtiwala man an mga elder ki Jehova, an saro na “dai . . . nuarin man napapagal o nangluluya.” Tatawan niya sinda nin kusog pag kaipuhan ninda iyan.​—Isa. 40:​28, 29. w23.06 6 ¶14, 16

Puwede kitang magkaigwa nin marigon na puso ano man na mga pagbalo an mapaatubang sa sato. Kaya magtiwala ki Jehova. Pag-isipan kun paano nagin mapanggana si Barak huli sa pagtitiwala sa mga instruksiyon ni Jehova. Dawa ngani mayo nin nahiling na kalasag o garod sa bilog na kadagaan, ininstruksiyunan siya ni Jehova na makipaglaban sa armadong marhay na hukbong militar kan pamayo kan hukbo nin Canaan na si Sisera. (Huk. 5:8) Sinabihan ni propetisa Debora si Barak na bumaba ini sa patag na lugar para makipaglaban ki Sisera saka sa 900 na karwahe kaini. Aram ni Barak na dehado sinda sa pakikipaglaban sa mga karwahe kan mga kalaban sa patag na lugar, pero nagsunod pa man giraray siya. Kan buminaba an mga suldados hali sa Bukid nin Tabor, nagpadara si Jehova nin makusugon na uran hali sa langit. Naguot sa laboy an mga karwahe ni Sisera, asin itinao ni Jehova an kapangganahan ki Barak. (Huk. 4:​1-7, 10, 13-16) Sa kaagid na paagi, itatao man ni Jehova sa sato an kapangganahan kun magtitiwala kita sa saiya asin sa mga instruksiyon na itinatao niya paagi sa saiyang mga representante. w23.07 19 ¶17-18

Mahalagang marhay sa satong kaligtasan an pagkamapasensiya. Arog kan maimbod na mga lingkod kaidto, kaipuhan tang mapasensiyang maghalat na utubon nin Diyos an mga panuga niya. (Heb. 6:​11, 12) Iinaagid kan Bibliya an sitwasyon ta sa sarong parauma. (Sant. 5:​7, 8) An sarong parauma mahigos na nagtatanom asin nagbabaribi kan saiyang mga itinanom, pero dai niya man aram nin eksakto kun nuarin iyan maturubo. Kaya mapasensiyang naghahalat an parauma, na nagtitiwala na may aanihon siya. Sa kaagid na paagi, nagdadanay man kitang sibot sa espirituwal na mga aktibidad dawa ngani “dai [ta] aram kun anong aldaw maabot an [satong] Kagurangnan.” (Mat. 24:42) Mapasensiya kitang naghahalat, na may kumpiyansa na sa itinalaan na panahon ni Jehova, uutubon niya an gabos na ipinanuga niya. Kun dai kita magigin mapasensiya, puwedeng mapagal kita sa paghalat asin luway-luway na maparayo sa katotoohan. Tibaad magpuon na man kitang magpokus sa mga bagay na iniisip tang makakapaugma sa sato ngunyan. Pero kun mapasensiya kita, makakatagal kita sagkod sa katapusan asin makakaligtas.​—Mik. 7:7. w23.08 22 ¶7

Paagi sa pagkumparar kan propesiya sa Daniel 2:​41-43 sa iba pang mga propesiya sa libro nin Daniel asin Kapahayagan, masasabi ta na an mga bitis nagrerepresentar sa alyansang Anglo-Amerikano, an nangingibabaw na pambilog na kinaban na kapangyarihan ngunyan. Manungod sa pambilog na kinaban na kapangyarihan na ini, sinabi ni Daniel na “an kahadian . . . magkakaigwa nin parteng makusog asin nin parteng maluya.” Taano ta igwa iyan nin parteng maluya? Huling an mga ordinaryong tawo, na ilinaladawan kan malumoy na dalipay, pinapaluya an arog-lansang na kusog kaiyan. Sa paglaladawan ni Daniel kan imahen sa pangaturugan, nagkapirang mahalagang katotoohan an manunudan ta. Inot, ipinahiling kan Pambilog na Kinaban na Kapangyarihan na Anglo-Amerikano an kusog kaiyan sa nagkapirang paagi. Halimbawa, dakula an nagin papel kaiyan para manggana sa Giyera Mundiyal I asin Giyera Mundiyal II. Alagad, an pambilog na kinaban na kapangyarihan na ini pinaluya asin padagos na papaluyahon kan mga iriwal kan mismong mga siyudadano kaiyan. Ikaduwa, an alyansang ini magigin an ultimong pambilog na kinaban na kapangyarihan na mamamahala bago tapuson kan Kahadian nin Diyos an gabos na gobyerno nin tawo. w23.08 10-11 ¶12-13

May mga pagkakataon na nahadit na marhay si David huli sa gabos na problema asin pagbalo na inaagihan niya. (Sal. 18:​4, 5) Minsan siring, an pagpadangat asin pag-ataman ni Jehova nagpaginhawa sa saiya. Giniyahan ni Jehova an saiyang pinangluluyahan na amigo pasiring sa “maduot na mga pasabsaban” asin sa “mga pahingaluan na bastante sa tubig.” Huli kaiyan, kuminusog giraray si David asin nakapagpadagos. (Sal. 18:​28-32; 23:2) Arog man kaiyan sa ngunyan. “Huli sa maimbod na pagkamuot ni Jehova kun kaya dai kita nagkagaradan” kan mapaatubang kita sa mga pagbalo asin kadipisilan sa buhay. (Lam. 3:22; Col. 1:11) Si David parating napaatubang sa peligro, asin kadakul siyang makusog na mga kalaban. Pero huli sa pagkamuot ni Jehova, namati niyang ligtas siya saka protektado. Namatian ni David na si Jehova nasa kampi niya sa ano man na sitwasyon, asin nagtao iyan sa saiya nin kumpiyansa. Kaya masasabi niya sa sarong kanta: “Ilinigtas [ako ni Jehova] sa gabos na kinakatakutan ko.” (Sal. 34:4) Talagang natakot si David, pero an pagkamuot niya ki Jehova mas makusog kisa sa takot na namamatian niya. w24.01 30 ¶15-17

Makanuod sa salang mga desisyon ni Jehoas. Pagkagadan kan halangkaw na saserdoteng si Jehoiada, pinili ni Jehoas an maraot na mga kairiba. (2 Cron. 24:​17, 18) Nagdesisyon siya na magdangog sa mga pamayo kan Juda na dai namumuot ki Jehova. Posibleng marhay na mauyon ka na dapat kutanang linikayan ni Jehoas an mga paraparibok na idto. Imbes, nagdangog siya sa mga amigo niya daa. Sa katunayan, kan purbaran kan pinsan ni Jehoas na si Zacarias na itanos siya, ipinagadan ini ni Jehoas. (2 Cron. 24:​20, 21; Mat. 23:35) Marauton nanggad asin grabeng kamangmangan iyan! Magayon an kapinunan kan buhay ni Jehoas, pero makamumundo ta nagin siyang apostata saka paragadan. Sa bandang huri, ginadan siya kan saiya mismong mga lingkod. (2 Cron. 24:​22-25) Bako kutang arog kaiyan an kinaabtan kan buhay niya kun padagos siyang nagdangog ki Jehova asin sa mga namumuot sa Saiya! w23.09 9 ¶6

Aram ni Jesus na makakapagdanay na maimbod si Pedro. Kaya mabuot na sinabihan ni Jesus si Pedro na “dai . . . na matakot.” An pagtitiwala ni Jesus ki Pedro nagkaigwa nin nagdadanay na epekto sa buhay kaini. Kan huri, binayaan ni Pedro asin kan tugang niyang si Andres an negosyo nindang paninira asin nagin bilog na panahon na mga parasunod kan Mesiyas, sarong desisyon na nagresulta sa pambihirang mga bendisyon. (Mar. 1:​16-18) Nagkaigwa si Pedro nin dakul na magagayon na eksperyensiya bilang parasunod ni Cristo. Nahiling niya si Jesus na nagpaumay nin mga may hilang, nagpalayas nin mga demonyo, asin nagbuhay pa ngani nin gadan. (Mat. 8:​14-17; Mar. 5:​37, 41, 42) Nahiling man ni Pedro an sarong bisyon kan kamurawayan ni Jesus sa maabot na Kahadian, sarong pangyayari na dakulaon an nagin epekto sa saiya. (Mar. 9:​1-8; 2 Ped. 1:​16-18) Iyo, nahiling ni Pedro an mga bagay na dai niya kutana mahihiling kun dai siya nagsunod ki Jesus. Siguradong maugmahon nanggad siya ta dai niya tinugutan an ano man na negatibong sabuot manungod sa saiyang sadiri na magin dahilan para dai niya makamit an mga bendisyon na ini! w23.09 21 ¶4-5

Sa inot na surat ni apostol Pedro, ginamit niya an ekspresyon na “makusog na pagkamuot.” An siring na pagkamuot nagtatahob, bako sana sa pirang kasalan, kundi sa “dakul na kasalan.” (1 Ped. 4:8) Posibleng nagirumduman ni Pedro an leksiyon manungod sa pagpapatawad na itinukdo sa saiya ni Jesus mga pirang taon na an nakaagi. Kaidto, posibleng marhay na nagtutubod si Pedro na saro siyang marahayon na tawo kan sabihon niya na papatawadon niya an saiyang tugang nin sagkod sa “pitong beses.” Pero tinukduan siya ni Jesus—pati kita—na magpatawad “sagkod sa 77 beses,” an buot sabihon daing limitasyon. (Mat. 18:21) Kun nasasakitan kang iaplikar an sadol na ini, dai ka madisganar! An gabos na bakong perpektong lingkod ni Jehova nasasakitan kun minsan na magpatawad. An mahalaga ngunyan iyo na gumibo ka nin ano man na kinakaipuhan na mga lakdang para patawadon an saimong tugang asin makipagkatuninungan sa saiya. w23.09 29 ¶12

Kan yaon si Jonas sa tulak kan sira, tiwala siya na dadangugon ni Jehova an mapakumbaba asin may pagsulsol na pamibi niya asin na tatabangan siya ni Jehova. Dai nahaloy, ibinalik si Jonas sa baybayon, asin andam na niyang akuon saka utubon an sunod niyang asignasyon. (Jon. 2:10–3:4) Durante nin pagbalo, nahadit ka na daw na marhay kaya haros dai mo na masabi sa pamibi an nasa buot mo? O nangruruluya ka nang biyo kaya dai ka na makapag-adal? Girumdumon na lubos na nasasabutan ni Jehova an saimong sitwasyon. Kaya dawa halipot lang an saimong pamibi, makakasigurado ka na itatao niya sa saimo an talagang kaipuhan mo. (Efe. 3:20) Kun magin masakit para saimo na magbasa o mag-adal dahil sa kulog na namamatian mo sa pisikal o emosyonal, tibaad puwede mong purbaran na magdangog nin mga audio recording kan Bibliya o kan basado sa Bibliyang mga publikasyon. Tibaad makatabang man saimo an pagdangog sa saro sa satong mga kanta o paghiling nin video sa jw.org. Paagi sa pagpamibi ki Jehova asin sa paghanap kan simbag sa espirituwal na mga probisyon na itinatao niya sato, hinahagad mo sa saiya na pakusugon ka. w23.10 13 ¶6; 14 ¶9

An tabernakulo asin an mga templo na itinugdok kan huri sa Jerusalem magkaagid na marhay an pagkadisenyo. An laog kaiyan igwa nin duwang kuwarto—an “Banal na Lugar” asin an “Kabanal-banali”—na naseseparar nin binurdahan na kurtina. (Heb. 9:​2-5; Exo. 26:​31-33) Sa laog kan Banal yaon an bulawan na kandelero, an altar na pigtututungan nin insenso, asin an lamesa nin tinapay na pandulot. An “linahidan na mga saserdote” sana an puwedeng maglaog sa Banal para gibuhon an saindang sagradong mga paninimbagan. (Bil. 3:​3, 7, 10) Yaon sa Kabanal-banali an bulawan na kaban kan tipan na nagrerepresentar sa presensiya ni Jehova. (Exo. 25:​21, 22) An halangkaw na saserdote sana an puwedeng magbalyo sa partisyon na kurtina pasiring sa Kabanal-banali kada taon sa Aldaw nin Pagbayad sa Kasalan. (Lev. 16:​2, 17) Naglalaog siya na may darang dugo nin mga hayop para ipambayad sa mga kasalan niya saka kan bilog na nasyon. Pag-abot nin panahon, lininaw ni Jehova an tunay na kahalagahan kan mga parteng ini kan tabernakulo.​—Heb. 9:​6, 7. w23.10 27 ¶12

Dakul na beses na mababasa ta sa Tataramon nin Diyos an pagbuot na “kamutan . . . an lambang saro.” (Juan 15:12; Roma 13:8; 1 Tes. 4:9; 1 Ped. 1:22; 1 Juan 4:11) Minsan siring, an pagkamuot sarong kuwalidad kan puso, o kan panglaog na pagkatawo, asin mayo nin tawong makakahiling kan laog kan satong puso. Kun siring, paano ta maipapahiling an satong pagkamuot sa lambang saro? Paagi sa satong mga tataramon asin mga ginigibo. Dakul nin paagi na maipapahiling tang namumutan ta an satong mga tugang. Uni an nagkapirang halimbawa: “Magtaram kamo nin katotoohan sa lambang saro.” (Zac. 8:16) “Papagdanayon nindo an katuninungan sa lambang saro.” (Mar. 9:50) Manginot “sa pagtao nin onra sa lambang saro.” (Roma 12:10) “Maugmang akuon an lambang saro.” (Roma 15:7) “Padagos na . . . patawadon an lambang saro.” (Col. 3:13) “Padagos na darahon an mga pasanon kan lambang saro.” (Gal. 6:2) “Padagos nindong rangahon . . . an lambang saro.” (1 Tes. 4:18) “Padagos na . . . parigunon an lambang saro.” (1 Tes. 5:11) “Ipamibi an lambang saro.”​—Sant. 5:16. w23.11 9 ¶7-8

Aroaldaw, naggigibo kita nin mga desisyon kun sain kaipuhan an makusog na pagtubod. Halimbawa, naggigibo kita nin mga desisyon kun manungod sa satong mga kaiba-iba, libangan, edukasyon, pag-agom, pagkaigwa nin mga aki, asin sekular na trabaho. Marahay na haputon ta an satong sadiri: ‘An sako daw na mga pagpili nagpapahiling na sigurado ako na an sistemang ini temporaryo sana asin madali nang salidahan kan bagong kinaban nin Diyos? O an sako daw na mga pagpili impluwensiyado kan mga tawo na namumuhay na garo baga an kagadanan iyo an katapusan kan gabos?’ (Mat. 6:​19, 20; Luc. 12:​16-21) Makakagibo kita nin pinakamarahay na mga desisyon kun papakusugon ta an satong pagtubod na an bagong kinaban haranihon na. Napapaatubang man kita sa mga pagbalo kun sain kaipuhan an makusog na pagtubod. Tibaad mapaatubang kita sa persekusyon, grabeng hilang, o iba pang mga bagay na puwedeng makapadisganar sa sato. Sa inot, tibaad pagmati ta kayang-kaya tang tagalan an pagbalo. Pero mantang naghahaloy iyan—arog kan parating nangyayari sa mga pagbalo—kakaipuhanon ta an makusog na pagtubod para makatagal asin makapagpadagos kita sa paglilingkod ki Jehova na may kaugmahan.​—1 Ped. 1:​6, 7. w23.04 27 ¶4-5

Inaasahan ni Jehova na mahiro kita kauyon kan satong mga pamibi. Halimbawa, tibaad namimibi an sarong brother na tabangan siyang maka-leave sa saiyang trabaho para makaatender sa pangrehiyon na kumbensiyon. Paano iyan puwedeng simbagon ni Jehova? Puwede niyang tawan an brother nin kinakaipuhan na kusog nin buot para makapaaram sa saiyang amo. Pero kaipuhan pa man giraray kan brother na magdulok sa saiyang amo tanganing magpaaram. Tibaad kaipuhan niyang pauruutrong makiulay. Tibaad makiribay pa ngani siya nin iskedyul nin trabaho sa katrabaho niya o makiulay siyang tugutan na mag-leave dawa mayong suweldo. Inaasahan ni Jehova na pauruutro tang ipapamibi an mga bagay na mahalaga sa sato. Ipinarisa ni Jesus na may mga hinahagad kita na dai tulos itatao sa sato. (Luc. 11:9) Kaya dai magsuko! Mamibi nin udok asin pauruutro. (Luc. 18:​1-7) Pag ginigibo ta iyan, ipinapahiling ta ki Jehova na talagang mahalaga sa sato an hinahagad ta. Ipinapahiling ta man na nagtutubod kita na kaya niyang tabangan kita. w23.11 22 ¶10-11

Nanuga si Jehova sa amigo niyang si Abraham na an gabos na nasyon sa daga bebendisyunan paagi sa saiyang gikan. (Gen. 15:5; 22:18) Huling si Abraham igwa nin makusog na pagtubod sa Diyos, kumbinsido siya na magkakatotoo an panuga nin Diyos. Minsan siring, kan si Abraham 100 anyos na asin 90 anyos man an saiyang agom, an maimbod na mag-agom na iyan mayo pa man giraray nin aki. (Gen. 21:​1-7) Alagad, sinasabi kan Bibliya: “Base sa paglaom, nagtubod [si Abraham] na siya an magigin ama nin dakul na nasyon, kauyon kan sinabi.” (Roma 4:18) Aram ta na nagkatotoo an linalauman ni Abraham. Nagin ama siya kan aking lalaki na haloy niya nang hinahalat-halat, si Isaac. Ano an basehan kan kumpiyansa ni Abraham? Huli sa dayupot na relasyon ni Abraham ki Jehova, “lubos siyang kumbinsido na kun ano an . . . ipinanuga” nin Diyos magkakatotoo. (Roma 4:21) Si Abraham may pag-uyon ni Jehova asin ibinilang na matanos huli sa saiyang pagtubod.​—Sant. 2:23. w23.12 8 ¶1-2

An sarong maaasahan na hoben na lalaki maigot na ginigibo an gabos niyang responsabilidad. Pag-isipan an perpektong halimbawa ni Jesus. Dai siya nuarin man nagin iresponsable o daing pakiaram. Imbes, inutob niya an mga asignasyon na itinao saiya ni Jehova, dawa kan nagin masakit iyan para saiya na gibuhon. Namumutan niya an mga tawo—lalo na an mga disipulo niya—asin gikan sa buot na itinao niya an saiyang buhay para sa sainda. (Juan 13:1) Arugon si Jesus—magmaigot na utubon an ano man na asignasyon na itinatao sa saimo. Kun dai ka sigurado kun paano iyan gigibuhon, magin mapakumbaba asin magpatabang sa maygurang na mga brother. Dai makontento na basta lang magibo an iinasignar saimo. (Roma 12:11) Imbes, tapuson an saimong asignasyon, na ginigibo iyan “para ki Jehova, asin bakong para sa mga tawo.” (Col. 3:23) Siyempre, bako kang perpekto, kaya magin mapakumbaba asin akuon an ano man na nagibo mong sala.​—Tal. 11:2. w23.12 26 ¶8

Nakakaugma nanggad na mabawtismuhan asin magin parte kan pamilya ni Jehova. An mga igwa kan pribilehiyong iyan mauyon sa salmistang si David, na nagsabi: “Maugma an saro na pinipili asin irinarani mo [Jehova] tanganing mag-istar sa saimong mga patyo.” (Sal. 65:4) Dai ni Jehova dinadara sa saiyang patyo an kun siisay na sana. Pinipili niya idtong mga naghihinguwang patunayan na gusto nindang magkaigwa nin haraning relasyon sa saiya. (Sant. 4:8) Pag idinusay mo an sadiri mo ki Jehova asin nagpabawtismo, makakasigurado ka na pagkatapos kaiyan, ‘iuula sa saimo ni Jehova an bendisyon sagkod sa mayo na nin kulang.’ (Mal. 3:10; Jer. 17:8) An bawtismo kapinunan pa sana. Gugustuhon mong gibuhon an saimong pinakamakakaya para utubon an saimong promesa kan ika magdusay, dawa pa kun mapaatubang ka sa pagtentar o sa pagbalo. (Ecl. 5:​4, 5) Bilang mga disipulo ni Jesus, pagmamaigutan mong sunudon na marhay an halimbawa asin pagbuot ni Jesus.​—Mat. 28:​19, 20; 1 Ped. 2:21. w24.03 8 ¶1-3

Paano kun kamong mag-agom pareho na dai nag-e-enjoy na magkaibanan? Ano an puwede mong gibuhon? Pag-isipan an gatong. Dai man tulos iyan maarab-adab. Kaipuhan iyan na luway-luway asin padagos na lagan nin mas darakulang kahoy na panggatong. Sa kaagid na paagi, puwede daw nindong punan na magtagama nin dikit ngunang panahon na magkaibanan kamo kada aldaw? Siguraduhon na an gigibuhon nindo iyo idtong pareho nindong nagugustuhan. (Sant. 3:18) Paagi sa pagpuon sa saradit na bagay, puwede nindong mapakusog giraray an saindong pagkamuot. An respeto mahalagang marhay sa sarong mag-agom. Garo iyan oksiheno na nagpapangyaring maglaad na marhay an sarong gatong. Kun mayo nin oksiheno, mapapalsok tulos an kalayo. Sa kaagid na paagi, kun mayo nin respeto, maririsa na sana kan mag-agom na naglilipot na an saindang pagkamuot. Sa ibong na lado, an mag-agom na naghihinguwang magpahiling nin respeto sa kada saro hinihinguwa man na magdanay na makusog an saindang pagkamuot. Alagad tandaan na an importante bako kun baga sa pagmati mo nakakapahiling ka nin respeto, kundi kun baga namamatian iyan kan agom mo. w23.05 22 ¶9; 24 ¶14-15

Sa Bibliya, may maimbod na mga lingkod nin Diyos na nagsabi na may mga panahon na grabe an saindang kahaditan asin takot huli sa saindang mga kalaban o iba pang mga panggigipit. (Sal. 18:4; 55:​1, 5) Posible man na mapaatubang kita sa pagkontra sa eskuwelahan o sa trabaho, o pagkontra kan satong mga kapamilya o kan gobyerno. Tibaad mapaatubang pa ngani kita sa kagadanan huli sa sarong hilang. Sa mga panahon na iyan, tibaad mamati ta na garo kita sadit na aki na mayong maginibo. Paano kita tinatabangan ni Jehova sa arog kaiyan na mga panahon? Rinaranga asin pinapaginhawa niya kita. Kaya pirming magtao nin panahon para makaibanan si Jehova paagi sa pagpamibi sa saiya asin pagbasa kan saiyang Tataramon. (Sal. 77:​1, 12-14) Dangan pag nahahadit ka, posibleng marhay na an inot mong maisip iyo na magdulok sa saimong Ama sa langit. Sabihon ki Jehova an mga ikinakatakot asin ikinakahadit mo. Tugutan siyang kaulayon ka asin rangahon paagi sa Kasuratan.​—Sal. 119:28. w24.01 24-25 ¶14-16

Mahalagang marhay an motibasyon sa pag-abot nin espirituwal na mga pasuhan. An sarong tawo na igwa nin makusog na motibasyon naghihinguwang marhay para maabot an saiyang pasuhan. Asin pag mas motibado kita, mas posibleng marhay na maabot ta an satong mga pasuhan. Kaya, ano an puwede mong gibuhon para mas magin motibado? Mamibi na mas magin motibado ka. Paagi sa saiyang espiritu, puwede kang tawan ni Jehova nin motibasyon na abuton an saimong pasuhan. Naggigibo kita kun minsan nin mga pasuhan huling aram ta na iyan an dapat gibuhon, asin marahay iyan. Pero tibaad mayo talaga kita nin pagmawot na abuton iyan. Hurop-hurupon kun ano na an ginibo ni Jehova para sa saimo. (Sal. 143:5) Hinurop-hurop ni apostol Pablo an daing kapantay na kabuutan ni Jehova sa saiya, asin nakamotibar iyan saiya na magmaigot na marhay para ki Jehova. (1 Cor. 15:​9, 10; 1 Tim. 1:​12-14) Kun mas huhurop-hurupon mo man an mga ginibo ni Jehova para sa saimo, mas magigin motibado ka man na abuton an saimong pasuhan.​—Sal. 116:12. w23.05 27 ¶3-5

Napapaugma ta an satong Ama sa langit pag inuumaw ta an saiyang pangaran. (Sal. 119:108) Pero buot sabihon daw kaini na an makakamhan na Diyos arog nin bakong perpektong mga tawo na gustong inuumaw huling kaipuhan ninda nin asigurasyon? Dai. Pag inuumaw ta an satong Ama sa langit, nakakatabang kita na mapatunayan na bakong totoo an sarong kaputikan na imbuwelto kita. Hinihingako ni Satanas na mayong tawo na maimbod na dedepensahan an pangaran nin Diyos. Mayo daa sa sato nin may integridad. Sinasabi niya na mapundo kita sa paglilingkod sa Diyos pag naisip ta na makikinabang kita kun gigibuhon ta iyan. (Job 1:​9-11; 2:4) Pero pinatunayan kan maimbod na si Job na si Satanas sarong putikon. Ika, magdadanay ka man daw na maimbod? An lambang saro sa sato may pribilehiyo na idepensa an pangaran kan satong Ama asin paugmahon siya paagi sa paglilingkod sa saiya nin may integridad. (Tal. 27:11) Dakulang onra nanggad na gibuhon iyan. w24.02 8-9 ¶3-5

Pagkatapos kan panahon ni Moises asin Josue, nagnombra si Jehova nin mga hukom para giyahan an saiyang banwaan. Dangan, kan panahon kan mga hadi, nagnombra si Jehova nin mga propeta para giyahan an saiyang banwaan. An maimbod na mga hadi nagdangog sa sadol kan mga propeta. Halimbawa, mapakumbabang inako ni Hading David an pagtatanos kan propetang si Natan. (2 Sam. 12:​7, 13; 1 Cron. 17:​3, 4) Sinunod ni Hading Jehosafat an paggiya ni propeta Jahaziel asin dinagka an banwaan kan Juda na ‘magtubod sa mga propeta’ nin Diyos. (2 Cron. 20:​14, 15) Kan nasa masakit na kamugtakan, nagdulok si Hading Hezekias ki propeta Isaias. (Isa. 37:​1-6) Pag sinusunod kan mga hadi an paggiya ni Jehova, binebendisyunan sinda asin protektado an banwaan. (2 Cron. 20:​29, 30; 32:22) Malinaw na ginagamit ni Jehova an saiyang mga propeta para giyahan an saiyang banwaan. w24.02 22 ¶8

Gusto ni Satanas na makiiba-iba kita sa mga tawong magpapadipisil sa sato na manindugan sa mga pamantayan ni Jehova. Dapat tang girumdumon na puwede ta nang makaiba-iba sa ngunyan an mga tawo bako lang sa personal kundi pati man sa social media. Dapat tang labanan an kaisipan kan kinaban na an imoral na paggawi bako man maraot. Aram ta kun ano an tama. (Efe. 4:​19, 20) Marahay na haputon ta an satong sadiri: ‘Pinagmamaigutan ko daw na likayan an gabos na dai kinakaipuhan na pakikiiba-iba sa mga katrabaho, kaklase, o sa iba pa na dai irinerespeto an matanos na mga pamantayan ni Jehova? Kusog-buot daw akong naninindugan sa mga pamantayan ni Jehova dawa sabihan ako kan iba na panatiko ako?’ Arog kan ipinaparisa kan 2 Timoteo 2:​20-22, dapat man na magin maingat kita pag nagpipili nin dayupot na mga kaiba-iba sa laog kan Kristiyanong kongregasyon. Dai ta linilingawan na may nagkapira na puwedeng dai sato makatabang na magdanay na maimbod sa satong paglilingkod ki Jehova. w24.03 22-23 ¶11-12

Napurbaran mo na daw na iladawan sa isip mo si Jehova? Dawa ngani dai nahihiling si Jehova, ilinaladawan siya kan Bibliya sa manlain-lain na paagi. Inapod si Jehova na “aldaw asin kalasag” asin “sarong kalayo na minatumtom.” (Sal. 84:11; Heb. 12:29) An presensiya niya ilinadawan na siring sa sarong gapong sapiro, sarong nagliliwanag na metal, asin sarong maliwanagon na bulalangaw. (Ezek. 1:​26-28) Huling dai ta nahihiling si Jehova, tibaad masakitan kitang maniwala na namumutan niya kita. Iniisip kan iba na dai lamang sinda mamumutan ni Jehova huli sa maraot na mga inagihan ninda sa buhay. Nasasabutan ni Jehova an arog kaiyan na mga pagmati asin kun ano an epekto kaiyan sa sato. Para tabangan kita, ihinahayag niya sa sato paagi sa saiyang Tataramon an magayunon niyang personalidad. An sarong tataramon na pinakamagayon na deskripsiyon ki Jehova iyo an pagkamuot. (1 Juan 4:8) An Diyos pagkamuot. Pagkamuot an nagpapahiro saiya sa gabos niyang ginigibo. An pagkamuot nin Diyos bulaos asin mapuwersa nanggad, mala ngani ta ipinapahiling niya iyan dawa sa mga dai namumuot sa saiya.​—Mat. 5:​44, 45. w24.01 26 ¶1-3

Ninombrahan ni Jehova si Moises na panginutan an mga Israelita paluwas sa Ehipto, asin bilang nahihiling na patunay nagtao Siya nin hariging panganuron pag aldaw asin nin hariging kalayo pag banggi. (Exo. 13:21) Sinundan ni Moises an harigi, na naggiya saiya saka sa mga Israelita pasiring sa Dagat na Pula. Nataranta an mga tawo ta paghuna ninda nalaum na sinda sa pag-ultanan kan dagat asin kan nagdadangadang na hukbo nin Ehipto. Pero dai sinda napasala. Tuyong giniyahan ni Jehova an saiyang banwaan pasiring duman paagi ki Moises. (Exo. 14:2) Dangan ilinigtas sinda nin Diyos sa makangangalas na marhay na paagi. (Exo. 14:​26-28) Sa laog nin 40 taon pagkatapos kaiyan, padagos na sinundan ni Moises an hariging panganuron para giyahan an banwaan nin Diyos sa kaawagan. (Exo. 33:​7, 9, 10) Hali sa hariging panganuron, nakikipag-ulay si Jehova ki Moises, tapos sinasabi man ni Moises sa banwaan an instruksiyon ni Jehova. Hiling-hiling kan mga Israelita an mga patunay na ginagamit ni Jehova si Moises para giyahan sinda. w24.02 21 ¶4-5