Puwede Kamong Mabuhay Sagkod Lamang sa Paraiso Digdi sa Daga
Kapitulo 27: Kun Paano Makakamtan an Tabang Paagi sa Pamibi
1. Anong tabang an kinakaipuhan niato hale sa Dios, asin paano niato iyan naaako?
TANGANING makalikay sa maraot na impluwensia kaining kinaban, an mga Kristiano orog na nagangaipo nin tabang na makukua sa pagpamibi. Si Jesus nagsabi: “An Ama na nasa langit matao kan banal na espiritu sa mga naghahagad saiya.” (Lucas 11:13) Kaipuhan niato an banal na espiritu nin Dios, o aktibo puwersa, kun paanong kaipuhan niato na mag-adal kan saiyang Tataramon asin maki-asosyar sa saiyang organisasyon. Alagad tanganing kamtan an banal na espiritu, ipamibi niato iyan.
2. (a) Ano an pamibi? (b) Ano an manlaenlaen na porma nin pamibi? (c) Taano ta mahalaga an pagpamibi?
2 An pamibi saro sa magalang na pakipag-olay sa Dios. Puwede iyan sa paagi nin kahagadan, siring baga sa paghagad sa Dios nin materyal na pangangaipo. Alagad an pamibi puwede man na magin kapahayagan nin pagpasalamat o pag-omaw sa Dios. (1 Cronica 29:10-13) Tanganing magkaigwa nin marahay na relasyon sa satong langitnon na Ama, kaipuhan kitang regular na maki-olay sa saiya sa pamibi. (Roma 12:12; Efeso 6:18) An saiyang aktibo puwersa, na maaako niato paagi sa paghagad kaiyan makakapakosog sato na gibohon an saiyang kabotan sa atubang nin ano man na kasakitan o pagsugot na dinadara ni Satanas o kan saiyang kinaban.—1 Corinto 10:13; Efeso 3:20.
3. (a) Ano an kapangyarihan na puwede niatong akoon hale sa Dios? (b) Paano sana niato maiingatan an marahay na pakipagrelasyon sa Dios?
3 Tibaad maigot kamong nakikipaglaban tanganing mahale an nagkapirang mga gawe na dai nakakaoyon sa Dios. Kun iyo, hagadon an tabang ni Jehova. Dumulok saiya sa pamibi. Ginibo ni apostol Pablo, asin sia nagsurat: “Ako makakagibo kan gabos na bagay dian sa saiya na nagpapakosog sako.” (Filipos 4:13; Salmo 55:22; 121:1, 2) Sarong babae na nakabulag sa gawe nin inmoralidad nagsabi: “Sia sana an igwa nin kapangyarihan na tumabang saimo na makaluwas sa siring na kamugtakan. Dapat na magkaigwa kamo nin personal na relasyon ki Jehova, asin an iyo-iyong paagi na papagdanayon an siring na personal na relasyon iyo an pamibi.”
4. Paano nag-ako nin kosog an sarong lalaki tanganing malikayan an bisyo nin pagsigarilyo?
4 Alagad tibaad sabihon nin saro ‘Pirang beses na ako namibi tanganing hagadon an tabang nin Dios, alagad dai ko pa giraray nadudulagan an paggibo nin maraot.’ Arog kaini an mga sinasabi nin mga parasigarilyo. Kan an siring na tawo hapoton: “Noarin ka namimibi?” sia nagsimbag: “Sa banggi bago magkaturog, sa pagkaaga pagbangon ko, asin kun ako maluya asin nagsigarilyo, sinasabi ko ki Jehova na ikinamomondo ko an sakong nagibo.” Sinabi kan saiyang kaamigo: “An panahon na talagang kaipuhan mo an tabang nin Dios iyo an panahon na namamatean mo an pagmawot na manigarilyo, bako daw? Iyan an panahon na kaipuhan na mamibi ki Jehova tanganing pakosogon ka.” Kan gibohon ini kan tawong idto, nakaako sia nin tabang tanganing umontok sa pagsigarilyo.
5. (a) Ano an kaipuhan tanganing paglingkodan an Dios nin tama? (b) Ano an nagpapaheling na an pagsakit parateng imbuwelto sa paghale nin makasalan na mga gibo?
5 Dai ini nangangahulogan na an pagpamibi sa Dios, pati an pag-aadal kan saiyang Tataramon asin pakikiiba sa saiyang naheheling na organisasyon, nagpaparikas na saindo sa paggibo nin matanos. Nangangahulogan pa giraray ini nin paghihingoa; iyo, pakikipaglaban, na puwedeng maimbuwelto an pagsakit. (1 Corinto 9:27) An maraot na bisyo nakakapagtao nin grabeng pagmawot tanganing gumibo nin maraot. Kaya an pagsakit parateng resulta kun an sarong tawo minasibog hale sa maraot na mga gibo. Kamo daw andam na magsakit tanganing gibohon an bagay na tama?—1 Pedro 2:20, 21.
Mga Pamibi na Dinadangog nin Dios
6. (a) Taano ta nadedepisilan an kadaklan na mamibi? (b) Ano an kaipuhan niato tanganing dangogon an satong mga pamibi?
6 Kadakol kan tawong nadedepisilan na mamibi. “Dai ko magigibong mamibi sa sarong dai ko naheheling,” pahayag nin sarong daraga. Mantang mayo nin tawong nakaheling sa Dios, kaipuhan niato an pagtubod tanganing mamibi asin dangogon nin Dios. Kaipuhan kitang tumubod na si Jehova tunay na nabubuhay asin sia makakagibo kan ano man na hinahagad niato. (Hebreo 11:6) Kun igwa kita kan klaseng iyan nin pagtubod, asin dumulok sa Dios na igwa nin sinserong puso, masisiguro niato an saiyang tabang. (Marcos 9:23) Kaya, minsan ngani an Romanong opisyal nin armada na si Cornelio kaidto bako pang kabtang kan organisasyon nin Dios, kan sinsero siang mamibi para sa giya, sinimbag nin Dios an saiyang pamibi.—Gibo 10:30-33.
7. (a) Anong klaseng mga pamibi an nakakaoyon sa Dios? (b) Anong klaseng pamibi an dai dinadangog nin Dios?
7 An iba nadedepisilan na ipahayag an saindang mga saboot. Minsan siring, dai ini dapat makaolang sa saindong pakipag-olay sa Dios sa pamibi. Makakasiguro kita na aram nin Dios an satong mga pangangaipo asin nasasabotan nia an gusto niatong sabihon. (Mateo 6:8) Isipa ini: Arin sa tataramon nin sarong aki an orog nindong pinapahalagahan—an saiyang simple, sinserong pagpasalamat o an panbihirang mga tataramon na itinokdo saiya kan iba? Siring man pinapahalagahan kan satong Ama sa langit an simple, sa pusong mga kapahayagan na naghahale sato. (Santiago 4:6; Lucas 18:9-14) Dai kaipuhan an espesyal na mga tataramon o relihiyosong mga kapahayagan. An totoo dai ngani nia dinadangog an mga namimibi na ginagamit an panbihira o haralangkaw na termino tanganing magngalas an iba, o kaya idtong nagagamit nin paoro-otrong tataramon sa bako sinserong paagi.—Mateo 6:5, 7.
8. (a) Ano an nagpapaheling na nadadangog nin Dios maski ipinapahayag sa hilom? (b) Ipinapaheling daw kan Biblia na dapat kitang mamibi sa sarong partikular na posisyon o lugar?
8 Maski pa mamibi kamo nin daing girong nadadangog kamo nin Dios. Kan gibohon ini ni Nehemias, an Dios naghiro basado sa saiyang sa-pusong paghagad, asin siring man ki Ana. (Nehemias 4:2-8; 1 Samuel 1:11-13, 19, 20) Ni na mahalaga an posisyon nin saro na namimibi. Makakapagpamibi kamo sa ano man na posisyon, asin sa ano man na oras asin sa ano man na lugar. Minsan siring, an Biblia nagpapaheling na an posisyon nin kapakumbabaan, siring baga kan pagdoko kan payo o an paglohod, angay man. (1 Hade 8:54; Nehemias 8:6; Daniel 6:10; Marcos 11:25; Juan 11:41) Asin ipinaheling ni Jesus na ini marahay kun an personal na mga pamibi masasabi sa sarong lugar na hilom, dai naheheling nin tawo.—Mateo 6:6.
9. (a) Kiisay dapat ipaabot an gabos niatong mga pamibi, asin taano? (b) Tanganing akoon nin Dios an satong mga pamibi, kiisay na ngaran dapat iyan idolot?
9 An pagpamibi sarong kabtang kan satong pagsamba. Huli sa rason na ini an satong mga pamibi dapat ipaabot solamente sa satong Kaglalang si Jehova Dios, bakong kiisay pa man. (Mateo 4:10) Asin ipinapaheling kan Biblia na an mga Kristiano dapat dumulok sa Dios paagi ki Jesus, an nagtao kan saiyang buhay tanganing haleon an satong mga kasalan. Ini nangangahulogan na ipahayag niato an satong mga pamibi sa ngaran ni Jesus.—Juan 14:6, 14; 16:23; Efeso 5:20; 1 Juan 2:1, 2.
10. (a) Kiisay na mga pamibi an dai naooyonan nin Dios? (b) Anong pangenot na kahagadan an dapat niatong aboton kun boot na an satong mga pamibi dangogon nin Dios?
10 Minsan siring, gabos daw na pamibi nakakaoyon ki Jehova? An Biblia nagsasabi: “An minasuhay kan saiyang talinga tanganing dai makadangog kan pagboot—an saiya man na pamibi ikakaongis.” (Talinhaga 28:9; 15:29; Isaias 1:15) Kaya kun boot niato na an satong mga pamibi dangogon nin Dios, an pangenot na kahagadan iyo na gibohon an saiyang kabotan, na otobon an saiyang mga pagboot. O kun dai, dai kita hihinanyogon nin Dios. Kun paanong an sarong tawong matanos dai nagdadangog nin sarong inmoral na programa sa radio. An Biblia nagsasabi: “An ano man na satong hinahagad inaako ta sa saiya, huli ta kita nag-ootob kan saiyang mga togon asin naggigibo kan mga bagay na nakakaoyon sa saiyang mga pagheling.”—1 Juan 3:22.
11. Ano an boot sabihon kan gumibo nin oyon sa satong ipinapamibi?
11 Nangangahulogan ini na dapat kitang gumibo kaoyon sa satong mga ipinapamibi. Halimbawa, magigin sala para sa saro na humagad nin tabang sa Dios tanganing pundohon an paggamit nin sigarilyo o marijuana asin dangan magbakal kan mga bagay na ini. Ni na makahagad pa sia ki Jehova nin tabang saiya na likayan an inmoralidad asin dangan magbasa nin mga babasahon asin magheling nin mga pelikula asin mga programa sa telebisyon na nagpapalataw nin inmoralidad. O kun an pagsugal iyo an kaluyahan nin saro, dai sia makakapamibi sa Dios para sa tabang saiya na pumondo asin dangan magduman sa mga karerahan o iba pang mga lugar nin pasugalan. Tanganing dangogon nin Dios an satong mga pamibi, dapat niatong ipaheling sa saiya sa paagi nin satong paghiro na talagang isinasagibo niato an satong sinasabi.
12. (a) Ano an mga bagay na puwedeng iiba niato sa satong mga pamibi? (b) Tanganing an satong mga pamibi magin nakakaoyon sa Dios, ano an dapat niatong manodan?
12 Ano kun siring, an personal na mga bagay na puwede niatong iiba sa satong mga pamibi ki Jehova? An totoo, arin man na bagay na makaka-apektar sa satong relasyon sa Dios ini puwedeng magin tema para sa pamibi, kaiba an satong mga pisikal na mga salud, siring man an pagpadakula nin mga aki. (2 Hade 20:1-3; Hokom 13:8) Si apostol Juan nagsurat: “Kun kita maghagad nin ano man sono sa saiyang boot, kita dinadangog nia.” (1 Juan 5:14) Kaya an bagay na importante iyo na an satong mga kahagadan kaipuhan magin kaoyon sa katuyohan nin Dios. Ini nangangahulogan na enot na maaraman niato kun ano an saiyang kabotan. (Talinhaga 3:5, 6) Dangan konsideraron niato an katuyohan nin Dios asin an saiyang kabotan kun kita namimibi, imbes na basta na sana maghadit kan satong personal na mga interes, an satong mga pamibi maooyonan ni Jehova. Tama na pasalamatan niato si Jehova sa aroaldaw para sa marahay na mga bagay na itinatao nia.—Juan 6:11, 23; Gibo 14:16, 17.
13. (a) Paano ipinaheling ni Jesus kun ano an dapat magin pangenot sa satong mga pamibi? (b) Anong mga bagay an may ikaduwang halaga na dapat niatong ipamibi?
13 Tinawan ni Jesus an saiyang mga parasunod nin pamibi na magiya sainda sa klase nin pamibi na inaako nin Dios. (Mateo 6:9-13) An pamibing ini nagpapaheling na an ngaran nin Dios, an saiyang kahadean asin an paggibo kan saiyang kabotan sa daga mangengenot. Dangan, puwede na kitang makahagad para sa satong personal na mga pangangaipo, siring kan satong pan-aroaldaw na kakanon, an kapatawadan nin mga kasalan, asin an pagligtas sa mga sugot asin sa maraot, si Satanas na Diablo.
Mga Pamibi Tanganing Tabangan an Iba
14. Paano ipinapaheling kan Biblia na mahalaga na ipamibi an iba?
14 Ipinaheling ni Jesus paagi sa saiyang halimbawa an halaga nin pamibi para sa kapakanan nin iba. (Lucas 22:32; 23:34; Juan 17:20) Aram ni apostol Pablo an halaga kan siring na mga pamibi asin parateng hinahagad nia sa iba na ipamibi sia. (1 Tesalonica 5:25; 2 Tesalonica 3:1; Roma 15:30) Mantang nasa bilanggoan sia nagsurat: “Ako naglalaom na huli kan saindong mga pamibi tatawan ako nin libertad.” (Filemon 22; Efeso 6:18-20) An pagpaluwas tolos ki Pablo sa bilanggoan sarong patotoo na pinakinabangan an mga pamibi dapit saiya.
15. Anong klaseng mga kahagadan an magigibo niato para sa mga tawong namomotan niato?
15 Si Pablo man namibi para sa kapakanan nin iba. “Danay kaming namimibi para sa saindo, tanganing ibilang kamo kan satong Dios na angay sa saindong pagkaapod,” sia nagsurat. (2 Tesalonica 1:11) Asin sa saro pang kongregasyon sia nagpaliwanag: “Kami namimibi sa Dios na dai kamo maggibo nin maraot . . . kundi tanganing kamo gumibo kaidtong marahay.” (2 Corinto 13:7) Siertong marahay na sunodon an halimbawa ni Pablo na gumibo nin espisipikong mga kahagadan sa kapakanan kan mga tawong namomotan niato. Tunay, “an pagngayongayo nin banal [sinserong pakiolay], nakakahimo nin dakol, igwa nin orog na kosog.”—Santiago 5:13-16.
16. (a) Tanganing kamtan an kinakaipuhan na tabang, noarin kita dapat mamibi? (b) Taano ta dakulaon na pribilehiyo an pamibi?
16 Kun nagkokondukta nin pag-aadal sa Biblia, parateng ihapot nin sarong ministro: “Namimibi daw kamo sa ibang okasyon apuwera sa panahon kan saindong semanal na pag-aadal sa Biblia?” Tanganing kamtan an tabang na kaipuhan niato, kaipuhan maki-olay kita sa Dios nin parate sa pamibi. (1 Tesalonica 5:17; Lucas 18:1-8) Pag-adalan na maki-olay na may kapakumbabaan saiya siring sa sarong namomotan asin pinagkakatiwalaan na amigo. Iyo, sarong makangangalas na pribilehiyo na makipag-olay sa mamuraway na Hade kan bilog na uniberso, an Paradangog nin Pamibi, asin maaraman na ika hinihinanyog!—Salmo 65:2.