Puwede Kamong Mabuhay Sagkod Lamang sa Paraiso Digdi sa Daga
Kapitulo 28: Pakipagkasundo sa Lambang Saro sa Pagkamoot
1. (a) Paano kamo magigin kabtang kan organisasyon nin Dios? (b) Anong pagboot an dapat nindong sunodon ngonyan?
MANTANG nagtatalubo kamo sa kaaraman asin pag-apresyar ki Jehova Dios asin sa saiyang mga katuyohan, mamawoton nindo na makiasosyar nin regular sa mga tawo na igwa kan kaparehong pagtubod asin paglaom. Sa paggibo kaini, magigin kamo kabtang kan naheheling na organisasyon nin Dios, an sarong tunay na Kristianong pagkamagturugang. “Mamoot kamo sa pagturugang” magigin sarong pagboot na dapat nindong otobon.—1 Pedro 2:17; 5:8, 9.
2. (a) Anong bagong pagboot an itinao ni Jesus sa mga parasunod nia? (b) Ano an malinaw na ipinapaheling kan mga tataramon na “sa lambang saro” asin “magkaminorootmootan”? (c) Gurano kahalaga an pagkaigwa nin pagkamoot?
2 Idinoon ni Cristo-Jesus kun gurano kahalaga para sa saiyang mga parasunod na magkaminorootmootan. Sinabi nia sa sainda: “Sarong bagong togon an itinatao ko sa saindo, na kamo magkaminorootmootan . . . Na huli kaini kamo mamimidbid na kamo gabos sakong mga disipulo, kun kamo magkaminorootmootan” (Juan 13:34, 35) An mga tataramon na “lambang saro” asin “magkaminorootmootan” malinaw na nagpapaheling na an gabos na tunay na mga Kristiano magkakairiba sa sarong grupo o organisasyon. (Roma 12:5; Efeso 4:25) Asin an organisasyon na ini mamimidbid paagi sa pagkamoot na ipinapaheling kan lambang miembro sa lambang saro. Kun an sarong tawo mayo nin pagkamoot, an gabos na bagay daing kamanungdanan.—1 Corinto 13:1-3.
3. Paano idinodoon kan Biblia an halaga nin pagkamoot asin pagmalasakit sa kapuwa mga Kristiano?
3 Kaya, an enot na mga Kristiano parateng tawan nin siring na pagirumdom: “Magkaigwa kamo nin maboot na pagpadangat sa lambang saro.” “Akoon nindo an lambang saro.” “Maglingkod kamo sa lambang saro.” “Magin maboot sa lambang saro, na may maboot na pagkaherak.” “Padagos kamong magpatiriostios asin magpatarawadtawadan kun an siisay man igwa nin sombong tumang sa saro.” “Padagos kamong magparangaranga asin magpakinorosogkosogan.” “Magin matoninong sa lambang saro.” “Magkaigwa nin makosog na pagkamoot sa lambang saro.”—Roma 12:10; 15:7; Galacia 5:13; Efeso 4:32; Colosas 3:13, 14; 1 Tesalonica 5:11, 13; 1 Pedro 4:8; 1 Juan 3:23; 4:7, 11.
4. (a) Ano an nagpapaheling na an mga Kristiano dapat na mamoot sa iba apuwera “sa lambang saro”? (b) Siisay an orog na kamotan nin mga Kristiano?
4 Minsan siring, dai boot sabihon kaini na an tunay na mga Kristiano dapat na mamoot sana sa kapuwa miembro sa organisasyon nin Dios. Dapat mamotan man ninda an iba. Katunayan, dinadagka sinda kan Biblia, na mag-oswag “sa pagkamoot sa lambang saro asin sa gabos.” (1 Tesalonica 3:12; 5:15) Sa pagtao kan tamang punto-de-vista, si apostol Pablo nagsurat: “Gumibo kita nin karahayan sa gabos na tawo, asin orog na sa mga nasa kapagarakian sa pagtubod.” (Galacia 6:10) Kaya mantang an mga Kristiano kaipuhan momoot sa gabos, kaiba an saindang mga kaiwal, lalo nang mamotan ninda an saindang kapuwa mga miembro sa organisasyon nin Dios, an saindang espirituwal na mga tugang na lalaki asin babae.—Mateo 5:44.
5. Ano an nagpapaheling na an tunay na mga Kristiano, kan enot asin maski ngonyan midbid huli kan saindang pagkamoot?
5 An suanoy na mga Kristiano midbid na gayo sa pagkamoot na ini na igwa sinda sa lambang saro. Oyon sa sarong parasurat na si Tertullian kan ikaduwang siglo, arog kaini an sinasabi nin mga tawo dapit sainda: ‘Helingon kun paano sinda nagkakaminorootmootan sa lambang saro asin kun paano sinda handa na magadan para sa lambang saro!’ An siring kaining pagkamoot naheheling man sa tahaw kan tunay na mga Kristiano ngonyan. Alagad nangangahulogan daw ini na mayo nang problema o dai pagkasinabotan sa tahaw nin tunay na mga Kristiano?
An mga Bunga nin Dai Pagkasangkap
6. Taano ta kun minsan magin an tunay na mga Kristiano nagkakasala sa lambang saro?
6 Basado sa saindong pag-aadal sa Biblia naaraman nindo na kita gabos nagmana nin dai pagkasangkap hale sa satong enot na mga magurang na si Adan asin Eva. (Roma 5:12) Kaya tendensia niatong gumibo nin sala. “Gabos kita parateng masingkog,” an sabi kan Biblia. (Santiago 3:2; Roma 3:23) Asin dai nindo kalingawan na an mga miembro kan organisasyon nin Dios mga bako man sangkap asin kun beses nakakaginibo nin mga bagay na bako tama. Ini puwedeng magresulta sa mga problema asin mga kadepisilan sa tahaw nin tunay na mga Kristiano.
7. (a) Taano ta kaipuhan sabihon ki Euodias asin ki Sintique na “magkasaro sa pag-isip”? (b) Ano an nagpapaheling na sinda sa katotoohan, mga mahuhusay na Kristiana?
7 Horophoropa an kamugtakan nin duwang babae na nginaranan Euodias asin Sintique sa suanoy na kongregasyon nin Filipos. Si apostol Pablo nagsurat: “Ako nakikimaherak ki Euodias asin ki Sintique na magkasaro sinda sa pag-isip dian sa Kagurangnan.” Taano daw ta dinadagka ni Pablo an duwang babaeng ini na “magkasaro sa parehong pag-isip”? Malinaw na igwa nin problema na naglataw sa tahaw ninda! Dai sinasabi kan Biblia kun ano iyan. Pero tibaad igwang kadikit na pangimon sa lambang saro. Pero sa katotoohan sinda mahuhusay na mga babae. Haloy na man sindang mga Kristiano, asin sa nagkapirang taon dating nagin sindang mga katabang ni apostol Pablo sa trabahong paghuhulit. Kaya nagsurat sia sa kongregasyon: “Tabangan mo an mga babaeng ini huli ta sinda nagpagal sa kaibahan ko dian sa evangelio.”—Filipos 4:1-3
8. (a) Anong problema an naglataw sa tahaw ni Pablo asin Bernabe? (b) Kun yaon kamo duman asin naheling an problemang ini ano daw an magigin desisyon nindo?
8 Sarong beses kaidto nangyari man an dai pagkasinabotan sa tahaw ni apostol Pablo asin kan saiyang kaibang nagbibiyahe na si Bernabe. Kan sinda madale nang maghale pasiring sa saindang ikaduwang biyahe sa pagmisyonero, si Bernabe boot na iiba an saiyang primohon na si Marcos. Minsan siring, habo ni Pablo na iiba si Marcos, huli ta binayaan sinda ni Marcos asin nagpuli kan enot na biyahe nin pagmisyonero. (Gibo 13:13) An Biblia nagsasabi: “Huli kaini nagkaigwa nin pagpotok nin grabeng kaanggotan mala ta sinda nagbulag.” (Gibo 15:37-40) Imahinaron na sana! Kun yaon kamo duman asin naheling nindo ining “pagpotok nin grabeng kaanggotan,” sasabihon daw nindong si Pablo asin Bernabe bako nang kabtang kan organisasyon nin Dios huli sa iginawe nindang ini?
9. (a) Anong pagkakasala an nagibo ni Pedro, asin ano an nagpahiro sa saiya na gumawe nin siring? (b) Ano an ginibo ni Pablo kan maheling nia an nangyayari?
9 Sa saro pang okasyon si apostol Pedro nasala. Uminontok sia sa dayupot na pakipag-ibahan sa mga Kristianong Hentil huli sa takot na sia dai oyonan nin nagkapirang Kristianong mga Judio na igwa nin pagmenos sa saindang mga tugang na Hentil. (Galacia 2:11-14) Kan maheling ni apostol Pablo an ginibo ni Pedro, kinondenar nia an salang gawe ni Pedro sa atubangan kan gabos na naghihinanyog. Ano daw an saindong mamamatean kun kamo si Pedro?—Hebreo 12:11.
Pagresolber nin Dai Pagkasinabotan sa Pagkamoot
10. (a) Ano an reaksyon ni Pedro kan sia itanos? (b) Ano an manonodan niato sa halimbawa ni Pedro?
10 Puwedeng maanggot si Pedro ki Pablo. Puwede siang makolgan sa paagi nin pagtanos ni Pablo saiya sa atubangan nin iba. Alagad dai nia ginibo ini. (Parahulit 7:9) Mapakumbaba si Pedro. Inako nia an pagtanos, asin dai nia tinogotan na manlipot an saiyang pagkamoot ki Pablo. (1 Pedro 3:8, 9) Risahon kun paanong kan maghaloy binanggit ni Pedro si Pablo sa saiyang surat na pampakosog sa kapwa mga Kristiano: “Girumdomon nindo na an pakatios nin satong Kagurangnan iyo an kaligtasan, siring na an satong namomotan na tugang na si Pablo an nagsurat sa saindo siring sa kadonongan na itinao sa saiya.” (2 Pedro 3:15) Iyo, tinogotan ni Pedro an pagkamoot na tahoban an gabos na dai pagkasinabotan, na sa kaso nia, naggikan sa saiyang salang gawe.—Talinhaga 10:12.
11. (a) Sa ibong kan pagpotok nin grabeng kaanggotan ninda, paano ipinaheling ni Pablo asin Bernabe na sinda tunay na mga Kristiano? (b) Paano daw kita makikinabang sa saindang halimbawa?
11 Ano naman an problema sa tahaw ni Pablo asin Bernabe? Ini man naresolberan nin pagkamoot. Sa huri kan si Pablo magsurat sa kongregasyon nin Corinto, sia nagtaram dapit ki Bernabe bilang dayupot na kapuwa trabahador. (1 Corinto 9:5, 6) Asin minsan ngani si Pablo igwa nin marahay na rason na mag-alangan sa kakayahan ni Marcos bilang sarong kaibang nagbibiyahe, an solterong ini nag-oswag sa saiyang pagkamaygurang kaya si Pablo nakapagsurat nin siring ki Timoteo: “Kuaa si Marcos asin ipag-iba mo, huli ta sia magagamit ko sa paglilingkod.” (2 Timoteo 4:11) Makakanood kita sa halimbawang ini nin pagresolber sa dai pagkasarabotan.
12. (a) Taano ta masasabi niato na naresolberan ni Euodias asin Sintique an saindang dai pagkasinabotan? (b) Oyon sa Galacia 5:13-15, taano ta mahalaga na resolberan nin mga Kristiano an mga problema ninda sa paagi nin pagkamoot?
12 Bueno, kumusta naman si Euodias asin Sintique? Naresolberan daw ninda an saindang dai pagkasinabotan, asin natahoban nin pagkamoot an ano man na pagkakasala na nagibo sa lambang saro? Dai sinasabi sato kan Biblia kun ano an huring nangyari sa sainda. Alagad an saindang pagigin mahuhusay na babae na nakidamay ki Pablo sa saiyang Kristianong ministeryo, igwang katanosan na isipon niato na may kapakumbabaan sindang nag-ako kan itinaong sadol sa sainda. Kan maako an surat ni Pablo, maiimahinar na sana niato na an lambang saro nagdolok sa sainda man sana asin pinag-olayan an saindang problema sa espiritu nin pagkamoot.—Galacia 5:13-15
13. Anong halimbawa an itinatao ni Jehova sa pagpaheling nin pagkamoot bilang arogan?
13 Siguro, nadidipisilan man kamo na makipagkasundo sa sarong tawo o sa nagkapira sa kongregasyon. Minsan ngani dakula pa an saindang kaipuhan paoswagon tanganing maabot an tunay na Kristianong mga kuwalidad, isipa nindo ini: Hahalaton daw ni Jehova Dios na isikwal nin mga tawo an saindang mararaot na gawe bago mamotan nia sinda? Dai; sinasabi kan Biblia: “Ipinapamidbid nin Dios an saiyang sadiring pagkamoot sa sato huli ta kan kita mga parakasala pa si Cristo nagadan dahel sato.” (Roma 5:8) Dapat niatong arogon an halimbawang ini nin Dios asin magpaheling nin pagkamoot sa mga nakakagibo nin kasalan asin kamangmangan.—Efeso 5:1, 2; 1 Juan 4:9-11; Salmo 103:10.
14. Anong sadol an itinao ni Jesus dapit sa dai pagigin kritiko sa iba?
14 Mantang kita gabos bakong sangkap, tinokdoan kita ni Jesus na dai magin kritiko sa iba. Totoo, an iba igwa nin mga pagkukulang, alagad kita igwa man. “Taano, kun siring, ta naheheling mo an puling sa mata kan saimong tugang, pero dai hinohorophorop an pasagi na nasa sadiri mong mata”? hapot ni Jesus. (Mateo 7:1-5) Paagi sa pagrumdom kan siring kadonong na sadol, matatabangan kita na makasundo an satong mga tugang.
15. (a) Taano ta mahalaga na patawadon niato an iba minsan igwa kita nin dahelan na magreklamo tumang sainda? (b) Sa saiyang ilustrasyon sa Mateo kapitulo 18, paano itinotokdo ni Jesus an pangangaipo na magin mapagpatawad?
15 Tunay na kaipuhan na kita magin maheherakon asin mapagpatawad. Totoo, tibaad talagang igwa nin dahelan na kamo magreklamo tumang sa sarong tugang. Alagad tandaan an sadol kan Biblia: “Padagos kamong magpatiriostios asin magpatarawadtawadan kun siisay man igwa nin sumbong tumang sa saro.” Pero taano ta patatawadon an iba kun talagang igwa kamo nin dahelan na magreklamo tumang sa sainda? Huli ta “pinatawad kita ni Jehova,” an simbag kan Biblia. (Colosas 3:13) Asin kamtan niato an saiyang kapatawadan, sinabi ni Jesus na kita kaipuhan man magpatawad sa iba. (Mateo 6:9-12, 14, 15) Si Jehova, siring kan hade sa saro kan mga ilustrasyon ni Jesus, pinatawad kita nin rinibong beses, kaya taano ta dai niato mapatawad an satong mga tugang nin nagkapirang beses?—Mateo 18:21-35; Talinhaga 19:11.
16. (a) Oyon sa 1 Juan 4:20, 21, paano an pagkamoot sa Dios konektado sa pagkamoot sa kapuwa mga Kristiano? (b) Anong hiro an kinakaipuhan kun an saindong tugang igwa nin bagay na tumang saimo?
16 Talagang dai kita puwedeng makapagdanay na nagsasagibo kan katotoohan asin kasabay pakiibanan an satong mga tugang sa daing pagkamoot asin daing pagpapatawad na paagi. (1 Juan 4:20, 21; 3:14-16) Kaya, kun magkakaigwa man kamo nin problema sa sarong kapuwa Kristiano, dai nindo putolon an pakipag-olay sa saiya. Dai kamo magtanom nin kolog boot, kundi resolberan an problema sa espiritu nin pagkamoot. Kun nakolgan nindo an saindong tugang, magin andam na humagad nin dispensasyon asin nin kapatawadan.—Mateo 5:23, 24.
17. Ano an tamang paghiro kun igwa nin nagkasala tumang saindo?
17 Alagad paano kun igwa nin man-insulto saindo, o pagkasalaan kamo sa ibang paagi? An Biblia nagsasadol: “Dai ka magsabi na: ‘Kun ano an ginibo nia sakuya, siring man an gigibohon ko sa saiya.’” (Talinhaga 24:29; Roma 12:17, 18) Nagsadol si Cristo Jesus: “An siisay man na tumampal sa saimo sa too mong pisngi, itao mo pa sa saiya an sa ibong.” (Mateo 5:39) An sarong tampal bakong tinuyong kologan sa pisikal, kundi tanganing supogon o paanggoton. Kaya tinokdoan ni Jesus an saiyang mga parasunod tanganing makalikay na dai maguyod sa iriwal o diriskutiran. Imbes na “balosan nin maraot an maraot o nin muda an pagmuda,” kaipuhan nindo na “hanapon an katoninongan asin ipagpadagos iyan.”—1 Pedro 3:9, 11; Roma 12:14.
18. Ano an dapat niatong manodan gikan sa halimbawa nin Dios sa pagkamoot sa gabos na tawo?
18 Girumdomon na kaipuhan niatong “mamotan an bilog na pagturugang.” (1 Pedro 2:17) Si Jehova Dios nagtao kan halimbawa. Bako siang mapagpalaenlaen. An gabos na rasa parareho an saiyang pagheling. (Gibo 10:34, 35; 17:26) An mga ililigtas sa nagdadangadang na “dakulang kahorasaan” mga kinua sa “gabos na mga nasyon asin mga tribo asin mga banwaan patin mga tataramon.” (Kapahayagan 7:9, 14-17) Kaya, bilang pag-arog sa Dios, dai niato babawasan an pagkamoot sa iba huli ta sinda iba an rasa, nasyonalidad o sosyal na kamugtakan, o igwa nin nalalaen na kolor.
19. (a) Paano niato kaipuhan mansayon asin pakiibahan an kapuwa Kristiano? (b) Anong dakulang pribilehiyo an puwedeng mapasato?
19 Makipagmidbidan sa gabos na miembro kan Kristianong kongregasyon, asin manonodan nindo sindang mamotan asin apresyaron. Ibilang an mga gurang sa mga ama asin mga ina, mga ngohod bilang mga tugang na mga lalaki asin mga tugang na babae. (1 Timoteo 5:1, 2) Tunay na sarong pribilehiyo na magin sarong kabtang kan arog-pamilyang naheheling na organisasyon nin Dios, na an mga miembro kaiyan nakikiiba sa lambang saro sa pagkamoot. Kanigoan karahay na mabuhay na daing sagkod sa paraiso sa daga kaiba kan siring na mamomoton na pamilya!—1 Corinto 13:4-8.