Ipinag-oogma kan Panama an Gibong Pagtotogdok Kaiyan
AN GIBONG pagtotogdok bakong bago sa Panama. Sa kapinonan kan siglong ini, nagpoon an trabaho sa dakulang kanal kaiyan na minabanga sa hayakpit na nasyon na ini na nasa pag-oltanan nin duwang darakulang nasyon, na pinagkokonektar an mga oseanong Atlantico asin Pasipiko. Huli sa pambihirang proyektong ini nin pagtotogdok an sadit na Panama nginaranan na “an krosing kan kinaban.”
Kan Enero 18, 1986, an ibang klaseng pagtotogdok nakaabot sa kulminasyon kaiyan. Kan aldaw na idto an mga Saksi ni Jehova nagkaigwa nin programa nin pagdedikar kan saindang bagong itogdok na sangang opisina. Minsan ngani 211 sana an personal na nakaatender sa programa nin pagdedikar, rinibo pa an nagdangog paagi sa koneksion sa telepono. An bagong edipisyo igwa nin istaran kan mga nagtatrabaho sa opisina, misyonero, asin nin imprentahan.
Alagad an pagtogdok kan mga edipisyong ini kabtang sana nin programa nin espirituwal na pagtogdok na nangyayari sa Panama poon kan matapos an ika-19 siglo. Kan panahon na idto isinabwag digdi an mga banhi kan katotoohan kan Kahadean. Pag-abot kan taon 1957, igwa na nin mga sangribong parahayag kan “maogmang bareta” sa Panama. (Mateo 24:14) An sadit na sangang opisina asin istaran nin misyonero na itinogdok kan taon na idto supisyente. Alagad sa laog nin 20 taon nagtriple an bilang nin mga Saksi! Kaya kan Setyembre 1982 inaprobaran kan Namamahalang Grupo nin mga Saksi ni Jehova an pagtogdok nin bagong sangang opisina.
An lugar? Mga 12 milya (19 km) sa luwas kan Siudad nin Panama sa sarong magayonon na lugar na may nadudungawan na danaw.
An Angat nin Pagtotogdok
Pero siisay an madisenyo sa edipisyo? Paano iyan itotogdok asin niisay? Nasa isip an mga tataramon kan Salmo 127:1, an mga tugang nag-abante, sa pakaaram na tatabangan sinda ni Jehova na mapangganahan an garo baga darakulaon na kaolangan na ini.
Ginibo an tentatibong mga plano, na ipinaheheling an hiwas na kaipuhan para sa opisina, librariya, bodega nin literatura, sadit na imprentahan, asin istaran kan mga trabahador sa opisina. May iinibang mahiwas na Kingdom Hall. An mga arkitekto sa opisina prinsipal kan Watch Tower Society sa Brooklyn, Nueva York, nagdisenyo nin sarong edipisyo na magpapanigo sa mga pangangaipong ini.
Sumunod an angat nin aktuwal na pagtotogdok. Ginatos na lokal na mga Saksi an nagboluntaryo. An mga tugang sa Estados Unidos nag-opresir man kan saindang mga abilidad asin serbisyo. Sa laog sana nin anom na semana, 230 na gabos an mga matabang na nag-abot, kaiba an nagkapira hale sa ibang nasyon sa Central America.
An lokal na mga tugang naogmang bukasan an saindang harong. May saro nganing pamilya na temporaryong nagbalyo sa sarong tolda tanganing mapadagos an 11 boluntaryo. An iba na may sadiring saradit na awto sa mga eskuwela nagtao nin transportasyon para sa mga trabahador na ini. An iba man nakikabtang sa pag-andam kan 30,000 na libreng pagkakan na ipinuwesto duman mismo sa pinagtotogdokan. An nakagiginhawang mga inomon na gibo sa pinya, aranghita, tapayas, asin mangga, saka sabaw nin tipong, parateng ipinupuwesto tanganing mawara an pagkapaha kan mga nagtatrabaho sa sirong nin mainit na aldaw.
Bakong Torre nin Babel
Marikas an trabaho. Sa laog nin duwang semana an gabos na lanob sagkod na sa ikaduwang eskalon, nasa lugar na an ibang barakilan na asero, asin nasemento na an salog kan Kingdom Hall sa ikaduwang eskalon. An pag-instalar kan mga tubo asin koneksion sa koryente kadungan kan pagsemento, pagpalitada, asin pag-instalar kan mga bintana asin pinto. Mayo pang sarong bulan ikinabugtak na an atop, na tamang-tama tanganing makatao nin proteksion sa makosog na oran—na pambihira para sa panahon na ini kan taon.
Nagkaigwa nin pirang problema. Kun beses, sagkod sa 800 na boluntaryo an yaon, asin dakulang pag-organisar an kaipuhan tanganing may matrabaho an gabos. Dugang pa, an kadaklan sa mga tugang na bisita dai tataong mag-Kastila. Imbes na ini magin dahelan na mapondo an pagtogdok, arog kan sa maraot an dangog na Torre nin Babel, an mga tugang nagpaheling kan mga bunga nin espiritu—asin tinabangan nin pirang interprete.—Galacia 5:22, 23.
Sa bilog na proyekto, idinoon an espirituwal na mga bagay. Ginibo an regular na pagtiripon kan kongregasyon sa pinagtotogdokan, asin may itinagamang oras para sa paglilingkod sa langtad. Igwa man nin mga panahon nin pag-aling-aling, pamamasyar, asin pagtiripontipon nin sosyal. Pero an mga tugang sa pangenot yaon tanganing magtrabaho, asin dai nahaloy tapos na an mga edipisyo!
Sa saiyang pahayag sa pagdedikar, magayonon an pagkasumaryo ni John Booth kan Namamahalang Grupo sa mga bagay, na an sabi: “Ano an ibubunga kan gabos na pagtotogdok na ini na ginigibo niato? Tara, kita nagtotogdok para sa daing sagkod na ngapit. Dai boot sabihon na an edipisyo magdadanay sagkod lamang, kundi an ibubunga kan edipisyong ini asin kan ginigibo kan mga tugang sa bilog na nasyon asin sa bilog na kinaban mga tawo na mabubuhay sagkod lamang.” Bakong makangangalas na ipinag-oogma kan mga Saksi sa Panama an saindang daing ontok sa paghiwas na gibong pagtotogdok!
[Mapa sa pahina 23]
(Para sa kabilogan, helingon an publikasyon)
Panama
Panama City