Gurano Kapraktikal an Relihiyon sa Modernong Aldaw?

“IINAPON ko an Biblia sa kuwartong aadalan sa pagpasiring ko sa sakong kuwartong torogan. Paghona ko dai ko na iyan noarin man pupuroton giraray o dai na ako noarin man maatender sa saro pang simbahan. Mga anom na taon na akong naghahanap. Pero mayo pa man giraray akong nanonompongan na tabang.”

Si Ronald, sarong 26 anyos na computer operator, nag-agi nin pirang kasakitan asin natatakot na malalaglag an saiyang buhay. An relihiyon garo baga mayo nin praktikal na halaga sa saiya. “Habo na ako kaiyan,” an sabi nia.

An dakol na tawo, kapareho ni Ronald, nadidisganar sa relihiyon. Kumusta man kamo? Sa paghona daw nindo an relihiyon nakatao sa mga tawo nin praktikal na tabang asin paggiya na magin mas marahay na mga katrabaho, pagtaraed, agom na lalaki, agom na babae, magurang, o aki? An relihiyon daw nagin puwersa para sa katoninongan asin pagkasararo sa tahaw nin mga tawo? Iyan daw nakatabang sainda na masabotan an katuyohan nin buhay? Iyan daw nakatanom sa saindang isip asin puso nin seguradong paglaom sa ngapit?

Kulang nin Praktikal na Paggiya

Sa komplikadong kinaban na ini, an mga tawo nagkakaipo nin madonong, malinaw na paggiya. Malalaoman daw ninda ini sa espirituwal na mga namomoon? Sa sarong surat sa kolumnista nin magasin, an sarong babae nagpaliwanag:

“An nadadangog mi na sana ngonyan sa samong iglesya . . . sa medyo haloy-haloy nang panahon iyo an pagkamoot, pagkamoot, pagkamoot. . . . Ano na an nangyari sa mga ‘Dai ka’—‘Dai ka gumadan. Dai ka maghabon,’ asin an iba pa? Kaipuhan na parateng ipagirumdom samo na may mga bagay na dai puwede. . . . Pero dai mi na nadadangog an terminong ‘Kasalan.’ Garo iyan isinisikwal ninda na garo terminong rapsak.”

Maliwanag na an pagmate nin iba an saindang relihiyosong mga parahatol nagin nang sobra kamapagkonsinte, sobra kamapagpabaya. Maluya an siring na espirituwal na mga paragiya. Garo sinda doktor na dinidisamular an problema kan saiyang pasyente asin nagrereseta nin bolong na may salak. Ano an nagkapirang dahelan sa siring na pagkukulang?

Propesyon na Nasa Krisis

An tawo na nagagabatan sa sadiri niang mga problema dai makatatao nin dakol na panahon asin kosog sa pagtabang sa iba. An mga bareta nagpapaheling na an nagdadakol na klerigo nagagabatan na gayo kan sadiri nindang propesyonal asin personal na mga problema. Uya an nagkapirang halimbawa:

“Minsan ngani an tension asin labi-labing kapagalan uso sa dakol na propesyon ngonyan, iyan mas kritikal nanggad sa Judiong klero,” sabi kan klinikal na sikologong si Dr. Leslie R. Freedman pakalihis nin apat na taon na pag-adal sa unibersidad manongod sa Judiong klero.

“Kun ako may aki, bobooton ko daw na sia magpadi? Makamomondo, an magigin simbag ko dai,” sabi nin sarong padi, si William Wells, sa sarong report manongod sa mga problema nin mga klerigo. Taano ta dai? Sia nagsabi na dai nia masasadol an sarong barobata na horophoropon an sarong propesyon na dinadamat na gayo nin “pagkakatumang, kariribokan, asin mga kadaihan nin kasiertohan na kapareho kan kapadian kan Katolika Romana ngonyan.”

An mga padi sa Suecong Iglesya Luterano na suportado kan Estado nagkakaproblema man. An sarong diaryong Sueco nagsasabi: “An mga padi may mga problemang sikolohiko, na sa grabeng mga kaso minasagkod sa paghuhugot. . . . An propesyon na klerigo nasa krisis.”

Nakadidistorbong Pagkabaranga

Sa mga nasyon na an mga namomoon sa relihiyon napapalabot sa nakapapagal asin nakababangang mga guerra, sinda dai na nakatatao nin tamang atension sa espirituwal na mga pangangaipo nin mga tawo. Kaipuhan man na makihiras sinda sa paninimbagan sa pagkawara nin tawohan asin nin kuwarta na nagamit kutana para sa materyal na ikararahay nin mga tawo.

May mga tawo sa gabos na kabtang kan kinaban na nawaran na nin pagsarig sa relihiyon asin indiperente na sa relihiyon. An pagkawara nin mga miembro asin pagkadikit kan mga nagsisimba ibinabareta sa mga lugar na arog kan Sweden, Finlandia, Alemania, Britania, Italia, Canada, asin Estados Unidos.

Kabilang daw kamo sa mga, kapareho ni Ronald, naghohona na habo na ninda sa relihiyon? Pero, posible daw na may relihiyon na napatunayan nanggad na may praktikal na halaga sa dakol? Ini ipaliliwanag kan minasunod na artikulo.