Puwede daw Nindong Manompongan an Tamang Relihiyon?

SI Ronald—na nasambitan sa sinusundan na artikulo—naghona na maninigo na ipondo na nia an saiyang paghanap sa relihiyon na makatatao saiya nin praktikal na tabang asin paggiya. Pero nagdesisyon sia na tawan nin ultimong oportunidad an saiyang sadiri. “Kun talagang may Dios, boot kong maaraman nia na ako sadiosan na naghahanap sa saiya,” sabi nia. Kaya sarong banggi si Ronald namibi: “Kun ika talagang mamomoton na Dios, hanapon mo ako ta sa dakol na taon hinanap taka asin mayo ako nin nakua.”

Pakalihis nin pirang aldaw sa pinagtatrabawohan nia, si Ronald naasignaran na magtrabaho sa sarong rilyebo kaiba an saro sa mga Saksi ni Jehova. Pinonan niang hapoton ini manongod sa Biblia. An mga simbag nakapukaw sa saiyang pag-usyoso. Dai nahaloy pinonan niang adalan nin regular an Biblia. Nag-atender man sia sa mga pagtiripon kan lokal na kongregasyon nin mga Saksi ni Jehova.

Pakalihis nin anom na bulan nakombensir si Ronald na nanompongan nia an relihiyon na nagtao saiya kan motibasyon na liwaton an saiyang buhay sa pinakapraktikal na paagi. Pakalihis nin tolong taon na pakikiasosyar sa mga Saksi ni Jehova, ipinaliwanag nia sa sarong surat sa magasin na Torrengbantayan an nagkapirang pakinabang na nakua nia sa pakikiasosyar na ini.

Nahale an “Tendensiang Gumadan”

Si Ronald nagsurat: “An enot na pakinabang sa pakanood kan katotoohan [an katokdoan kan Biblia] iyo an mas marahay na pakapogol sa init kan sakong payo. Sa halawig na panahon napalabot ako sa martial arts. . . . Dati ako nag-aadal magpoon sa anom sagkod sa walong oras aroaldaw, asin perming itinatanom sako na pataluboon an tendensiang gumadan.”

An pakikiiwal asin paggadan bakong epektibong mga paagi nin pagresolber sa dai pagkakaoyon. Kun siring, an kapakipakinabang na relihiyon sarong puwersa para sa ikatotoninong. An Biblia nagsasabi sa Roma 12:18: “Makipagkatoninongan sa gabos na tawo.” An mga Saksi ni Jehova dai sinasanay an saindang hawak para sa pakikilaban, ni naghihingoa man sindang protehiran an sadiri paagi sa pag-adal na kumapot nin badil. Midbid sinda sa bilog na kinaban huli sa saindang matoninong, neutral na paninindogan sa panahon nin guerra.

Sa pakaheling sa praktikal na puwersa o potensial nin siring na relihiyon, an sarong madreng Katolika Romana nagsurat sa sarong magasin kan iglesya sa Italia: “Magigin laen nanggad an kinaban kun kita gabos magmata sarong aga na may marigon na desisyon na dai na liwat gumamit nin armas, . . . kapareho kan mga Saksi ni Jehova!”

An pagigin matoninong na ini nin mga Saksi nakakontribuwir sa pagkabilog nin lakop sa kinaban na asosasyon nin magturugang nin labing tolong milyon katawo sa 208 kadagaan. Tinatrato ninda an lambang saro bilang tunay na katood, ano man an saindang nasyonalidad, rasa, o sosyal na ranggo. Ini praktikal nanggad sa sarong nag-iiriwal na kinaban, nangorogna kun kaipuhan an tabang. Si Eva, sarong hoben na babaeng Sueco na saro sa mga Saksi ni Jehova, nakaeksperyensia kaini.

Kan nagbibisita sa Grecia, si Eva naghelang nin mininghitis. Daing pag-aram, asin naiilo na an dugo saka nagdudugo sa laog, dinara sia sa sarong ospital sa Atenas, na duman mayo siang kamidbid. An ama nia sa Sweden pinaaram paagi sa telepono. Inapodan nia an saro sa kamagurangan sa lokal na kongregasyon nin mga Saksi ni Jehova. An magurang na ini inapodan an mga Saksi na midbid nia sa Atenas. Si Eva listong dinumanan nin Griegong mga kapagtubod na dai pa nia namidbid bago kaini.

Ipinagigirumdom kaini an sarong ilustrasyon na ginamit ni apostol Pablo, na nagpapaheling kun paanong an pagkasararo asin pagkaherak magkaibanan. Sia nagsabi sa 1 Corinto 12:25, 26: “Dai magkaigwa nin pagkabaranga dian sa hawak, kundi magkaigwa nin pararehong pangataman sa lambang saro an mga kabtang kaiyan. Asin kun an sarong kabtang nagtitios, an gabos na ibang kabtang nagtitios na kadamay kaiyan.”

Ini an naeksperyensiahan ni Eva sa Grecia. Sa laog nin haros tolong semana an bago niang mga katood dai sia pinabayaan na daing kaiba. Naomayan sia asin nagpuli. Sabi nia: “Talagang naeksperyensiahan ko an mga pakinabang sa sarong mamomoton na asosasyon nin magturugang.”

Dai Na Nagmamawot kan “Dagdag na Dolyar”

Balikan niato an surat ni Ronald. Pakasaysayan kun paano na an saiyang bagong pagtubod nakatabang saiya na pogolan an init kan payo nia, haleon an “tendensiang gumadan,” asin magin mas matoninong, sia nagsabi na an katokdoan kan Biblia nagtao saiya nin timbang na punto-de-vista sa trabaho asin kuwarta. “Ako an numero unong computer operator kan sakong among,” sabi ni Ronald, “asin dati binabayaan ko an pakikiiba sa sakong pamilya asin mga katood tangani sanang mag-overtime. Nagtrabaho ako pati banggi sa laog nin labing pitong taon. Gusto ko perming makakua nin dagdag na dolyar.”

An pagmawot na iyan sa “dagdag na dolyar” puwede, sa kahaloyan, na makadanyar, magtao nin danyos na nakagagadan. “Para sa nagkapira, an kuwarta nangangahulogan nin katiwasayan. Para sa nagkapira iyan nangangahulogan nin kapangyarihan. Para sa iba iyan nangangahulogan na mababakal ninda an pagkamoot, asin para sa ikaapat na grupo iyan nangangahulogan nin pakikipagdaogan asin panggagana,” sabi kan sikayatristang si Jay Rohrlich, na an mga kliyente kadaklan mga pinansial na administrador sa distrito nin Wall Street sa Nueva York.

Sa pagkomento sa kapahayagan na ini, an sarong bareta sa magasin na Science Digest nagsasabi: “An paniniwala na an kuwarta puwedeng magtao kan mga bagay na ini . . . parateng nagdadara sa impotensia, insomnia, atake sa puso asin mga problema sa agom o mga aki.” An hatol kan Biblia iyo ini: “An saindo logod na pamumuhay ligtas sa pagkamoot sa pirak.” Iyan nanodan ni Ronald asin iinaplikar nia iyan. Napatunayan nia na iyan kapakipakinabang nanggad.—Hebreo 13:5.

Tamang Punto-de-Vista sa Trabaho

An paghanap nin kuwarta parateng nagtutulod sa mga tawo na piriton na lumangkaw an saindang puwesto. Ini puwedeng magtao sa pinakamabagsik an salud na mga tawo nin grabeng tension asin emosyonal na karibokan—sagkod pa ngani sa paghuhugot. “An sarong lalaki, na naglaog sa trabaho sarong aga asin naheling na ibinalyo an saiyang lamesa, nagsakat sa alitoktok kan edipisyo asin tuminalon.” Isinaysay iyan ni Dr. Douglas LaBier sa sarong interbio sa U.S.News & World Report manongod sa koneksion nin karera asin emosyonal na mga problema.

“An kaipuhan,” sabi ni Dr. LaBier, “mas mahiwas na buhay, saro na dai nasisentrong gayo sa sarong karera. Apuwera sa mga bagay na arog kan bastanteng pagkakan, pahingalo asin ehersisyo, an mga tawo na gusto nin mas timbang na buhay kaipuhan na isip-isipon an paggibo nin mas dakol kaiba kan saindang pamilya asin pagkultibar nin mga abilidad na daing labot sa karera na nagtatao sainda nin kaogmahan.”

An mga Saksi ni Jehova nakakanood sa Biblia na magin timbang kun dapit sa trabaho asin kuwarta. An Eclesiastes 4:4, 6 nagtataram manongod sa kahigosan na may kalabot na “pagriribal nin saro tumang sa saro” asin nagsasabi: “Mas marahay an sarong hakbot nin pagpahingalo kisa duwang hakbot nin pagpapagal asin paglapag sa doros.” Napatunayan ni Ronald na ini praktikal na kadonongan. Ininaan nia an saiyang sekular na trabaho tanganing madugangan an panahon para sa saiyang espirituwal na mga interes asin para sa saiyang pamilya saka mga katood.

Mas Maogmang Buhay Pampamilya

Dangan sinabi ni Ronald sa saiyang surat na an hatol kan Biblia manongod sa pag-agom asin buhay pampamilya nakatabang saiya na maatubang nin mas madonong an mga situwasyon sa pamilya. Ini kaipuhan ngonyan na an buhay pampamilya garo baga nawawara na sa dakol na lugar. An industriyalisadong mga nasyon nagbabareta nin mas kadikit na kasal, mas dakol na diborsio, asin nagdidikit na bilang nin mga pangangaki.

An dalagan na ini nin mga pangyayari makatatakot ta sa laog nin pamilya napaninigoan an nagkapira sa pinakapundamental na mga pangangaipo nin tawo. Sa sarong surbey, an Sydney Morning Herald sa Australia hinapot an 2,000 katawo kun arin sa minasunod an nagtatao sainda kan pinakadakulang satispaksion: trabaho, pamilya, mga katood, dibersion, mga rogaring, o relihiyon. An mayoriya tinawan nin enot na lugar an “pamilya.”

An mga Saksi ni Jehova gustong papagdanayon na makosog an saindang pamilya. Halimbawa, sa nakaagi sanang limang taon, an duwa nindang magasin na The Watchtower asin Awake! (na may pinag-ibang sirkulasyon na mga 22 milyones na kopya sa labing 100 na tataramon) nagkaigwa nin mga 60 praktikal na artikulo manongod sa pag-atubang sa laen-laen na situwasyon sa buhay pampamilya. Daing duwa-duwa, an basado-sa-Bibliang relihiyon na nagtatabang sa mga tawo na atamanon an saindang pamilya sa madonong asin mamomoton na paagi praktikal.

An Dakulang “Taano?” Nasimbag

Tinapos ni Ronald an surat nia sa pagsabi: “May sarong bagay na parateng minasabong sa isip kun ako nagbabasa kan peryodiko, nagheheling kan bareta, nakikipag-olay sa mga katrabaho, o nagsasaysay sa iba manongod sa sakong pagtubod. Iyan an bagay na an pagigin saro sa mga Saksi ni Jehova nagtatao sako kan simbag sa saro sa pinakaparateng ihapot nin kadaklan sa kinaban—‘Taano?’ Taano ta nangyayari an gabos na krimen, kadahasan, guerra, inmoralidad, helang, kariribokan, apuwera sa gabos na problema sa aroaldaw? An pakaaram na an palakaw na ini asin an mga problema kaiyan temporaryo sana nakahale sa magabat na pasanon sa sakong abaga.”

Ipinaheheling kan Biblia kun ano an nasa likod kan nakariribong na situwasyon sa kinaban ngonyan. Ipinaliliwanag kaiyan kun taano ta dai pa naootob an orihinal na katuyohan kan Kaglalang na gibohon an dagang ini na paraisong erokan para sa katawohan. Ipinaliliwanag kaiyan kun paano hahaleon nin Dios an gabos na nakariribok na impluwensia sa daga asin mapatindog nin permanenteng paraiso tanganing kamtan nin mga tawo sagkod lamang.—2 Pedro 3:9-13.

Tanganing magkaigwa nin praktikal na halaga an sarong relihiyon, iyan kaipuhan na magbunga nin marahay. Iyan kaipuhan na magbunga nin mas marahay na mga tawo. Kaipuhan na ikapaliwanag kaiyan kun taano ta arog kaini an mga bagay digdi sa daga ngonyan. Asin iyan maninigong magtanom nin seguradong paglaom sa ngapit sa isip asin puso nin mga tawo. Hinanap ni Ronald an siring na relihiyon, asin nanompongan nia iyan. An kaparehong oportunidad bukas sa saindo.—Mateo 7:17-20.

[Ritrato sa pahina 5]

Tinatrato nin tunay na mga Kristiano an lambang saro na tunay na mga katood