Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 18: Mga Linog sa Aldaw kan Kagurangnan
“An Langit Nawara”
24. (a) Noarin, sa hula kan Biblia, sinasabing an mga bukid asin mga isla magkokonogkonog o madidistabilisar? (b) Paano ‵nagkonogkonog an mga bukid’ kan bumagsak an Nineve?
24 Sa hula kan Biblia, sinasabing an mga bukid asin isla magkokonogkonog o kun dai madidistabilisar sa mga panahon nin darakulang politikal na kariribokan. Bilang halimbawa, sa paghuhula kan mga paghokom ni Jehova tumang sa Nineve, nagsurat si propeta Nahum: “Nagkonogkonog an mga bukid huh sa saiya, asin an mismong mga bulod nagkaturunaw. Asin an daga mariribok huli kan saiyang lalauogon.“ (Nahum 1:5) Mayong rekord nin ano man na pagkaraot nin literal na mga bukid kan aktuwal na bumagsak an Nineve kan 632 B.C.E. Alagad an kapangyarihan pankinaban na kan dati garo siring sa bukid an kapangyarihan kaini biglang natumpag.—Ikomparar an Jeremias 4:24.
25. Sa madatong na katapusan kan sistemang ini nin mga bagay, Paano magkakaharale sa saindang mga lugar an “gabos na bukid asin gabos na isla“?
25 Kaya, an “gabos na bukid asin gabos na isla“ na sinambit sa pagbubukas kan ikaanom na tatak rasonable sanang an politikal na mga gobyerno asin nagdedependeng mga organisasyon kan kinaban na ini na garo marigon na gayo sa kadaklan nin katawohan. Mahahale an mga ini sa saindang mga puwesto, na ikangangalas asin ikatatakot kaidtong kan dati mga nananarig sa sainda. Siring kan padagos na isinaysay kan hula, mayong pagduwaduwa na an dakulang aldaw kan kaanggotan ni Jehova asin kan saiyang Aki—an pangultimong paglinog na maghahale kan bilog na organisasyon ni Satanas—nagdatong na may pagbalos!
“Rumpagi Kami Nindo Asin Tagoa Kami Nindo“
26. Paano mahiro an mga tawong tumang sa soberaniya nin Dios huli sa saindang grabeng takot, asin anong kapahayagan nin grabeng takot an masasambit ninda?
26 An mga tataramon ni Juan nagpadagos: “Asin an mga hade kan daga asin an mga pinakanamomoon saka an mga komandante militar asin an mayayaman asin makokosog asin an gabos na oripon asin gabos na hiwas nagtarago sa mga lungib asin sa mga gapo kan mga bukid. Asin sinda nagsarabi sa mga bukid asin sa mga gapo: Rumpagi kami nindo asin tagoa kami nindo sa lalauogon kan Saro na nagtutukaw sa trono asin sa kaanggotan kan Kordero, huli ta an dakulang aldaw kan saindang kaanggotan nagdatong na, asin siisay an makatatagal?’”—Kapahayagan 6:15-17.
27. Anong mga agrangay an nasambit kan bakong maimbod na mga Israelitas sa Samaria, asin paano naotob an mga tataramon na idto?
27 Kan ipinapahayag ni Oseas an paghokom ni Jehova sa Samaria, an kabisera kan norteng kahadean nin Israel, sinabi nia: “An haralangkaw na lugar kan Bet-aven, an kasalan kan Israel, aktuwal na lalaglagon. Mga tonok saka binit mismo an matalubo sa saindang mga altar. Asin sa katotoohan an mga tawo masarabi sa mga bukid, ‵Tagoa kami nindo!’ asin sa mga bulod, ‵Rumpagi kami nindo!’” (Oseas 10:8) Paano naotob an mga tataramon na ini? Bueno, kan nasakop an Samaria kan maringis na mga taga-Asiria kan 740 B.C.E., mayong madulagan an mga Israelitas. An mga tataramon ni Oseas nagpahayag kan pakamate nin daing magigibo, kaherakherak na grabeng takot, asin an pakamateng pinabayaan an nasakop na banwaan. Minsan an literal na mga bulod ni an arog bukid na mga institusyon kan Samaria dai nakaprotehir sainda, maski ngani garo permanente nanggad an mga ini kan nakaagi.
28. (a) Anong patanid an itinao ni Jesus sa mga babae kan Jerusalem? (b) Paano naotob an patanid ni Jesus?
28 Sa kaagid na paagi, kan si Jesus giniyahan pasiring sa saiyang kagadanan kan Romanong mga soldados, nagpahayag sia sa mga babae sa Jerusalem asin nagsabi: “Madatong an mga aldaw na an mga tawo magsasarabi, ‵Maogma an mga babaeng baog, asin an mga tulak na dai nangaki asin an mga soso na dai nagpasoso!’ Dangan mapoon sindang magsabi sa mga bukid, ‵Rumpagi kami nindo!’ asin sa mga bulod, “Tagoa kami nindo!’” (Lucas 23:29, 30) An paglaglag sa Jerusalem paagi kan mga Romano kan 70 C.E. dokumentadong gayo, asin malinaw na an mga tataramon ni Jesus igwa nin kahulogan na kaagid kan ki Oseas. Mayo nin madudulagan na lugar kaidto para sa mga Judio na nagdanay sa Judea. Saen man ninda probaran na magtago sa Jerusalem, o maski pa kun nagdulag sinda sa kuta kan toktok kan bukid nin Masada, dai ninda madudulagan an madahas na kapahayagan kan paghokom ni Jehova.
29. (a) Kun dumatong na an aldaw nin kaanggotan ni Jehova, ano an magigin kamugtakan kaidtong mga nakapanugang magsuportar sa sistemang ini nin mga bagay? (b) Anong hula ni Jesus an maootob kun ipahayag na ni Jehova an Saiyang kaanggotan?
29 Ngonyan, an pagbubukas kan ikaanom na tatak nagpaheling na may kaagid na mangyayari durante kan maabot na aldaw kan kaanggotan ni Jehova. Sa pangultimong paglinog sa daganon na sistemang ini nin mga bagay, an mga nakapanugang magsuportar digdi may pagkadesesperar na maghahanap nin matataguan, alagad dai sinda makanonompong nin saro. An falsong relihiyon, an Dakulang Babilonya, biyo na sindang sinudya. Minsan an literal na mga bukid ni an simbolikong arog bukid na politikal asin komersial na mga organisasyon dai magtatao nin pinansial na seguridad o nin ano pang ibang klase nin tabang. Mayo nin magtatago sainda sa kaanggotan ni Jehova. An grabeng takot ninda ilinadawan nin marhay ni Jesus: “Dangan an tanda kan Aki nin tawo malataw sa langit, asin an gabos na tribo kan daga mananangis, asin maheheling ninda an Aki nin tawo na nagdadangadang sa mga panganoron nin langit na may kapangyarihan asin dakulang kamurawayan.”—Mateo 24:30.
30. (a) Ano an ipinaririsa kan hapot na: “Siisay an makatatagal?” (b) Igwa daw nin makatatagal sa panahon nin paghokom ni Jehova?
30 Iyo, idtong mga nagsayumang midbidon an autoridad kan mapangganang nakasakay sa maputing kabayo mapipiritan na akoon an saindang sala. An mga tawong gikan sa boot na nagin kabtang kan banhi kan Halas mapaaatubang sa kalaglagan kun lumihis na an kinaban ni Satanas. (Genesis 3:15; 1 Juan 2:17) An kamugtakan sa kinaban sa panahon na iyan magigin siring kaya an kadaklan, mapipiritan na maghapot: “Siisay an makatatagal?” Malinaw na hohonaon ninda na mayo nin siisay man na makatatagal na inoyonan sa atubangan ni Jehova sa aldaw na iyan nin saiyang paghokom. Alagad magigin sala sinda, siring kan padagos na ipinaheheling kan libro nin Kapahayagan.