Kapahayagan—An Mamuraway na Kulminasyon Kaiyan Harani Na

Kapitulo 19: Pagtatak sa Israel nin Dios

Bisyon 4—Kapahayagan 7:1-17

Tema: Tinatakan an 144,000, asin an dakulang kadaklan naheling na nagtitindog sa atubang kan trono ni Jehova asin kan Kordero

Panahon nin Kaotoban: Magpoon kan pagtukaw ni Cristo Jesus sa trono kan 1914 sagkod sa saiyang Milenyal na Pamamahala

1. “Siisay an makatatagal” durante kan dakulang aldaw nin banal na kaanggotan?

“Siisay an makatatagal?” (Kapahayagan 6:17) Iyo, siisay man nanggad? Kun an dakulang aldaw kan banal na kaanggotan laglagon na an sistema ni Satanas, an mga namamahala asin mga banwaan kan kinaban puwede nanggad na maghapot kan hapot na iyan. Para sainda an nagdadangadang na dakulang kalaglagan na iyan an mapoho kan gabos na buhay nin tawo. Alagad siring daw? Makaoogma, sinisierto kita kan propeta nin Dios: “An gabos na mag-arang sa ngaran ni Jehova makaliligtas.” (Joel 2:32) Pinatunayan ni apostol Pedro asin Pablo an katotoohan na iyan. (Gibo 2:19-21; Roma 10:13) Iyo, idtong mga nag-aarang sa ngaran ni Jehova an mga makaliligtas. Sairisay an mga ini? Mantang nagpapadagos an masunod na bisyon, maheheling niato.

2. Taano ta pambihira na magkakaigwa nin mga makaliligtas sa aldaw nin paghokom ni Jehova?

² Tunay nanggad na pambihira na an siisay man makaligtas na buhay sa aldaw nin paghokom ni Jehova, huli ta saro pa sa mga propeta ni Jehova an nagladawan kaini sa mga tataramon na ini: “Uya! An bagyo ni Jehova, an kaanggotan mismo nagluwas, an biyong nakararaot na unos. Sa payo kan mga maraot mahoyop ini. An maringis na kaanggotan ni Jehova dai masibog sagkod na magadan nia asin sagkod na ikasagibo nia an mga ideya kan saiyang puso.” (Jeremias 30:23, 24 ) Apurahan na gumibo kita nin mga paagi tanganing makaligtas sa bagyong iyan!—Talinhaga 2:22; Isaias 55:6, 7; Sofonias 2:2, 3.

An Apat na Doros

3. (a) Anong espesyal na paglilingkod na ginigibo kan mga anghel an naheling ni Juan? (b) Ano an isinisimbolo kan “apat na doros“?

³ Bago butasan ni Jehova an saiyang kabangisan, an langitnon na mga anghel naggigibo nin espesyal na paglilingkod. Naheheling ini ngonyan ni Juan sa bisyon: “Pakalihis kaini ako nakaheling nin apat na anghel na nagtitindog sa apat na kanto kan daga, na nagpopogol sa apat na doros kan daga, tanganing dai nin doros na maghoyop sa daga o sa dagat o sa arin man na kahoy.” (Kapahayagan 7:1) Ano an boot sabihon kaini para sa sato ngonyan? An “apat na doros” na ini malinaw na mga simbolo nin nakalalaglag na paghokom na bubutasan na sa maraot na daganon na sosyedad, sa mabalodon na “dagat” nin tampalasan na katawohan, asin sa mapalangkaw na arog kahoy na mga namamahala na nagkukua nin suporta asin tabang sa mga tawo sa kinaban.—Isaias 57:20; Salmo 37:35, 36.

4. (a) Ano an irenerepresentar kan apat na anghel? (b) Ano an magigin epekto sa daganon na organisasyon ni Satanas kun butasan na an apat na doros?

⁴ Mayong duwa-duwa, an apat na anghel na ini nagrerepresentar sa apat na anghelikong grupo, na ginagamit ni Jehova tanganing pogolan an pagsagibo nin paghatol sagkod sa itinalaan na panahon. Kun butasan na kan apat na anghel an mga doros nin banal na kaanggotan tanganing sarabay na maghoyop hale sa norte, sur, sirangan, asin solnopan, an kalaglagan magigin dakulaon. Makaaagid ini, alagad sa dakulaon na sokol sa paggamit ni Jehova kan apat na doros tanganing iwarak an mga Elamita, na rinaraot asin pinopoho sinda. (Jeremias 49:36-38) Iyan magigin grabe nanggad na doros nin bagyo na orog na gayong mapanlaglag kisa sa “ariporos” na ipinanlaglag sa nasyon nin Amon. (Amos 1:13-15) Mayong kabtang kan organisasyon ni Satanas an makatatagal sa aldaw nin kabangisan ni Jehova, kun ibindikar na nia an saiyang soberaniya sagkod sa bilog na panahon na daing katapusan na madatong.—Salmo 83:15, 18; Isaias 29:5, 6.

5. Paano nakatatabang sato an hula ni Jeremias na masabotan na apektado an bilog na daga kan mga paghokom nin Dios?

⁵ Makasisierto daw kita na an mga paghokom nin Dios magdadara nin kalaglagan sa bilog na daga? Magdangog liwat sa saiyang propetang si Jeremias: “Uya! Sarong kalamidad an maabot hale sa sarong nasyon pasiring sa sarong nasyon, asin malataw an sarong dakulang bagyo hale sa kaporoporohi kan daga. Asin an pangagaradanon ni Jehova sa aldaw na iyan paghale sa sarong poro kan daga sagkod sa ibong na poro kan daga.” (Jeremias 25:32, 33) Durante kan maunos na bagyong ini an dagang ini mapapano nin kadikloman. An namamahalang mga ahensia kaini matatanyog sagkod sa malingawan na. (Kapahayagan 6:12-14) Alagad an ngapit dai magigin madiklom para sa gabos. Kun siring, sa kapakanan niisay kaya pinopogolan an apat na doros?

An Pagtatak sa mga Oripon nin Dios

6. Siisay an nagsasabi sa mga anghel na pogolon an apat na doros, asin para sa ano ini nagtao nin panahon?

⁶ Padagos na ilinadawan ni Juan kun paano an iba tinatakan para sa kaligtasan, na nagsasabi: “Asin ako nakaheling nin saro pang anghel na nag-iitaas hale sa sirangan, na igwa nin tatak kan buhay na Dios; asin sia nagkurahaw sa halangkaw na tingog sa apat na anghel na tinogotan na magratak kan daga asin kan dagat, na an sabi: nindo pagratakan an daga o an dagat o an mga kahoy, sagkod na dai pa niamo natatatakan an mga oripon kan satong Dios sa saindang angog.’”—Kapahayagan 7:2, 3.

7. Siisay nanggad an ikalimang anghel, asin anong ebidensia an makatatabang sato na establisaron an midbidan saiya?

⁷ Minsan siring na dai nginaranan an ikalimang anghel na ini, an gabos na ebidensia nagpapaheling na sia an pinamuraway na Kagurangnan na si Jesus. Huli sa pagigin Arkanghel ni Jesus, ipinaheling sia digdi na igwa nin autoridad sa iba pang anghel. (1 Tesalonica 4:16; Judas 9) Nag-iitaas sia hale sa sirangan, siring “kan mga hade na hale sa pagsirang kan aldaw”—si Jehova asin an saiyang Cristo—na nagdatong tanganing isagibo an paghokom, siring kan ginibo kan mga hadeng si Dario asin Ciro kan pinakumbaba ninda an suanoy na Babilonya. (Kapahayagan 16:12; Isaias 45:1; Jeremias 51:11; Daniel 5:31) An anghel na ini nakaaagid man ki Jesus huli ta sia pinaniwalaan na tatakan an linahidan na mga Kristiano. (Efeso 1: 13, 14) Dugang pa, kun butasan na an mga doros, si Jesus an mangengenot sa langitnon na armada sa pagsagibo nin paghokom sa mga nasyon. (Kapahayagan 19:11-16) Makatanosan kun siring, si Jesus an saro na nagboot na pogolon nguna an paglaglag sa daganon na organisasyon ni Satanas sagkod na matatakan an mga oripon nin Dios.

8. Ano an pagtatatak, asin kasuarin ini nagpoon?

⁸ Ano an pagtatak na ini, asin sairisay an mga oripon na ini nin Dios? An pagtatak nagpoon kan Pentecostes 33 C.E. kan linahidan nin banal na espiritu an enot na Judiong mga Kristiano. Dangan, nagpadagos na apodon asin linahidan nin Dios “an mga tawo nin mga nasyon.” (Roma 3: 29; Gibo 2:1-4, 14, 32, 33; 15:14) Nagsurat si apostol Pablo dapit sa linahidan na mga Kristiano na igwa nin garantiya na sinda “sadiri ni Cristo” asin idinugang na an Dios “nagbugtak man kan saiyang tatak sa sato asin nagtao sa sato kan garantiya para sa maabot, arin na baga, an espiritu, sa satong puso.” (2 Corinto 1:21, 22; ikomparar an Kapahayagan 14:1.) Kaya, kun an mga oripon na ini pinaniaki bilang espirituwal na mga aki nin Dios, patienot sindang nag-aako nin garantiya kan saindang langitnon na mana—sarong tatak, o panuga. (2 Corinto 5:1, 5; Efeso 1:10, 11) Dangan puwede nindang masabi: “An espiritu man sana nagpapatotoo kaiba kan satong espiritu na kita mga aki nin Dios. Kun siring, kun kita mga aki, kita man mga paramana: mga paramana nin Dios, alagad kapwa mga paramana ni Cristo, basta kita iribang magtios tangani man kitang iribang mapamuraway.”—Roma 8:15-17.

9. (a) Pakatagal sa ano an hinahagad sa kabtang kan mga natatada kan pinaniaki sa espiritung mga aki nin Dios? (b) Gurano kahaloy magpapadagos an pagbalo sa mga linahidan?

⁹ “Basta kita iribang magtios”—ano an boot sabihon kaiyan? Tanganing akoon an korona nin buhay, an linahidan na mga Kristiano maninigong makatagal, maimbod minsan sagkod sa kagadanan. (Kapahayagan 2:10) Bako ini idtong ’sarong beses na naligtas, permi nang ligtas.’ (Mateo 10:22; Lucas 13:24) Imbes, pinagirumdoman sinda: “Gibohon an saindong bilog na makakaya tanganing masierto an pag-apod asin pagpili sa saindo.” Siring ki apostol Pablo, sa katapustapusi maninigong masabi ninda: “Nakipaglaban ako kan marahay na pakilaban, natapos ko an paorumbasan, naingatan ko an pagtubod.” (2 Pedro 1:10, 11; 2 Timoteo 4:7, 8) Kaya kaipuhan na magpadagos digdi sa daga an pagbalo asin pagsaligsig sa natatada kan pinaniaki sa espiritung mga aki nin Dios sagkod na marigon na ikatanom ni Jesus asin kan saiyang kairibang mga anghel an tatak ‵sa angog’ kan gabos na ini, na nagpapamidbid saindang kapanipaniwala, dai maliliwat, bilang nabalo asin maimbod na “mga oripon nin satong Dios.” Kaya an tatak na iyan nagigin permanenteng tanda. Malinaw, na kun butasan na an apat na doros kan kahorasaan, an gabos sa espirituwal na Israel natatakan na sa katapustapusi, minsan siring na an nagkapira nabubuhay pa sa laman. (Mateo 24:13; Kapahayagan 19:7) An bilog na kabilangan nin miembro magigin kompleto!—Roma 11: 25, 26.

Pira an Tinatakan?

10. (a) Anong mga kasuratan an nagpapaheling na limitado an bilang kan mga tinatakan? (b) Ano an total na bilang kan mga tinatakan, asin paano sinda ilinista?

¹⁰ Sinabi ni Jesus sa mga nakalinya sa pagtatak na ini: “Dai kamo matakot, sadangoton na aripompon, hull ta an saindong Ama nag-oyon na itao sa saindo an kahadean.” (Lucas 12:32) An ibang kasuratan, siring kan Kapahayagan 6:11 asin Roma 11:25, nagpapaheling na an bilang kan sadangoton na aripompon na ini limitado nanggad asin, sa katunayan, patienot nang dineterminar. An masunod na mga tataramon ni Juan nagpapatunay kaini: “Asin nadangog ko an kabilangan kan mga tinatakan, sanggatos may apat na polo may apat na ribo, na tinatakan hale sa lambang tribo kan mga aki ni Israel: Hale sa tribo ni Juda kagduwang ribo an tinatakan; hale sa tribo ni Ruben kagduwang ribo; hale sa tribo ni Gad kagduwang ribo; hale sa tribo ni Aser kagduwang ribo; hale sa tribo ni Neftali kagduwang ribo; hale sa tribo ni Manases kagduwang ribo; hale sa tribo ni Simeon kagduwang ribo; hale sa tribo ni Levi kagduwang ribo; hale sa tribo ni Isacar kagduwang ribo; hale sa tribo ni Zabulon kagduwang ribo; hale sa tribo ni Jose kagduwang ribo; hale sa tribo ni Benjamin kagduwang ribo an tinatakan.”—Kapahayagan 7:4-8.

11. (a) Taano an pagtokdo sa 12 tribo ta bakong aplikado sa literal, makalaman na Israel? (b) Taano ta ilinista kan Kapahayagan an 12 tribo? (c) Taano ta mayo nin esklusibong makahade o makasaserdoteng tribo sa Israel nin Dios?

¹¹ Dai daw ini nagtotokdo sa literal, makalaman na Israel? Dai, huli ta an Kapahayagan 7:4-8 dai na sinunod an dating paglista nin tribo. (Bilang 1:17, 47) Malinaw nanggad, na an paglista digdi bakong sa katuyohan nin pagmidbid sa makalaman na Judio paagi kan saindang mga tribo kundi tanganing ipaheling an kaagid na organisasyonal na istruktura kan espirituwal na Israel. Timbang ini. Magkakaigwa sana nin eksaktong 144,000 miembro an bagong nasyon na ini—12,000 hale sa lambang saro kan 12 tribo. Mayong tribo sa Israel nin Dios na ini an esklusibong makahade o makasaserdote. An bilog na nasyon mamamahala bilang mga hade, asin an bilog na nasyon maglilingkod bilang mga saserdote.—Galacia 6:16; Kapahayagan 20:4, 6.

12. Taano ta angay na an 24 magurang umawit sa atubangan kan Kordero kan mga tataramon sa Kapahayagan 5:9, 10?

¹² Minsan siring na an natural na mga Judio asin Judiong mga proselita tinawan nin enot na oportunidad na pilion para sa espirituwal na Israel, minoriya kan nasyon na iyan an naghimate. Kaya ipinaabot ni Jehova an imbitasyon sa mga Hentil. (Juan 1:10-13; Gibo 2:4, 7-11; Roma 11:7) Siring sa kamugtakan kan mga taga-Efeso, na kaidto “isiniblag sa estado nin Israel,” ngonyan an mga bakong Judio puwede nang tatakan kan espiritu nin Dios asin magin kabtang kan kongregasyon kan linahidan na mga Kristiano. (Efeso 2:11-13; 3:5, 6; Gibo 15:14) Angay kun siring, na an 24 magurang umawit sa atubangan kan Kordero: “Paagi kan saimong dugo binakal mo an mga tawo manongod sa Dios hale sa lambang tribo asin tataramon asin banwaan patin nasyon, asin ginibo mo sinda na mani kahadean asin mga saserdote kan satuyang Dios, asin sinda magsasakop bilang hade sa daga.”—Kapahayagan 5:9, 10.

13. Taano ta angay sana na isurat kan tugang sa ina ni Jesus na si Santiago an saiyang surat “sa kagduwang tribo na wararak“?

¹³ An Kristianong kongregasyon “rasang pinili, makahadeng pagkasaserdote, banal na nasyon.” (1 Pedro 2:9) Sa pagribay sa natural na Israel bilang nasyon nin Dios, ini nagigin bagong Israel na iyo an “tunay na ’Israel.’” (Roma 9:6-8; Mateo 21:43)a Huli sa rason na ini, angay sana para sa tugang sa ina ni Jesus na si Santiago na isurat an saiyang pastoral na surat “sa kagduwang tribo na wararak,” an boot sabihon, sa panbilog na kinaban na kongregasyon nin linahidan na mga Kristiano na sa tamang panahon magigin 144,000.— Santiago 1:1.

An Israel nin Dios Ngonyan

14. Ano an nagpapaheling na an mga Saksi ni Jehova dai nababagong nagtubod na an 144,000 iyo an literal na bilang kan mga minabilog sa espirituwal na Israel?

¹⁴ Nakaiinteres, an enot na presidente kan Watch Tower Society, si Charles T. Russell, narealisar na an 144,000 literal na bilang nin mga indibiduwal na minabilog sa espirituwal na Israel. Sa The New Creation, Tomo VI kan saiyang Studies in the Scriptures, na ipinublikar kan 1904, isinurat nia: “Igwa kita nin lambang rason tanganing magtubod na an sierto, establisadong bilang kan pili [piniling mga linahidan] iyo an nagkapirang beses na sinambit sa (Kapahayagan 7:4; 14:1); na iyo an, 144,000 ‵binalukat hale sa tahaw nin mga tawo.’” Sa Light, Book One, na ipinublikar kan 1930 kan ikaduwang presidente kan Watch Tower Society, si J. F. Rutherford, siring man an sinambit: “An 144,000 miembro kan hawak ni Cristo sa siring nasa katiriponan na ipinaheling bilang pinili asin linahidan, o tinatakan.” An mga Saksi ni Jehova dai nababagong nagdanay sa punto-de-vista na an literal na 144,000 na linahidan ng mga Kristiano an minabilog kan espirituwal na Israel.

15. Bago an aldaw nin Kagurangnan, ano an hinona kan sinserong mga estudyante nin Biblia na makakamit kan natural na mga Judio pakatapos kan katapusan kan Panahon nin mga Hentil?

¹⁵ Minsan siring, bako daw an natural na Israel ngonyan maninigo sa nagkapirang espesyal na pabor? Sa panahon bago an aldaw nin Kagurangnan, kan an sinserong mga estudyante kan Biblia nakadiskobre liwat kan kadakol na pangenot na katotoohan kan Tataramon nin Dios, hinohona na sa pagtatapos kan Panahon nin mga Hentil an mga Judio magkakaigwa liwat nin pribilehiyo na tumindog sa atubangan nin Dios. Kaya, sa libro ni C. T. Russell na The Time Is at Hand (Tomo II kan Studies in the Scriptures), na ipinublikar kan 1889, inaplikar an Jeremias 31:29-34 sa natural na mga Judio, asin nagkomento: “An kinaban saksi sa katotoohan na an padusa sa Israel sa irarom nin pagsakop kan mga Hentil magpadagos magpoon kan B.C. [607], na ini nagpapadagos pa, asin na mayong rason tanganing laoman an saindang nasyonal na reorganisasyon nin mas amay kisa kan A.D. 1914, an sagkodan kan saindang ‵pitong panahon’—2520 taon.” Kaidto an mga Judio garo makaeeksperyensia nin nasyonal na pagbaba-asin an paglaom na ini maheheling na nagliwanag kan 1917, kan an Balfour Declaration nanuga nin Britanong suporta tanganing gibohon an Palestina na nasyonal na erokan kan mga Judio.

16. Anong mga pagmamaigot an ginibo kan mga Saksi ni Jehova tanganing maabot an natural na mga Judio kan Kristianong mensahe, asin ano an resulta?

¹⁶ Pakatapos kan enot na guerra mundial, an Palestina nagin inasignar na teritoryo sa irarom kan Gran Britania, asin an dalan nabuksan para sa dakol na Judio na makabalik sa dagang iyan. Kan 1948 naglataw an politikal na Estado nin Israel. Dai daw ini nagpaheling na an mga Judio nakalinya para sa banal na mga bendisyon? Sa dakol na taon, an mga Saksi ni Jehova nagtubod nin siring kaiyan. Kaya, kan 1925 ipinublikar ninda an 128 pahinang librong, Comfort for the Jews. Kan 1929 ilinuwas ninda an nakaaakit na 360 pahinang tomo, an Life, na dinesinyo tanganing maakit an mga Judio asin manongod man sa libro nin Biblia na Job. Dakulang pagmamaigot an ginibo, nangongorogna sa Siudad nin Nueva York, tanganing mapaabotan an mga Judio kaining Mesianikong mensahe. Nakaoogma, an nagkapirang indibiduwal naghimate, alagad an kadakian, siring kan saindang mga apoon kan enot na siglo, isinikwal an ebidensia kan presensia kan Mesias.

17, 18. Ano an nasabotan kan mga oripon nin Dios sa daga manongod sa bagong tipan asin sa mga hula kan Biblia sa pagbabalik?

¹⁷ Malinaw na an mga Judio, bilang sarong banwaan asin bilang sarong nasyon, bakong an Israel na ilinadawan sa Kapahayagan 7:4-8 o kan iba pang hula kan Biblia na may koneksion sa aldaw kan Kagurangnan. Sa pagsunod sa mga tradisyon, an mga Judio padagos na naglikay sa paggamit kan banal na ngaran. (Mateo 15:1-3; 7-9) Sa pagkonsiderar kan Jeremias 31:31-34, an librong Jehovah, na ipinublikar kan Watch Tower Society kan 1934, nagsabi na may kasiertohan: “An bagong tipan mayong relasyon sa natural na mga gikan ni Israel asin sa katawohan sa kagabsan, kundi . . . limitado sa espirituwal na Israel.” An mga hula kan Biblia sa pagbabalik mayong koneksion sa natural na mga Judio ni sa politikal na Israel, na miembro kan Naciones Unidas asin kabtang kan kinaban na sinabi ni Jesus sa Juan 14:19, 30 asin 18:36.

¹⁸ Kan 1931 an mga oripon nin Dios sa daga inako, na may dakulang kagayagayahan, an ngaran na mga Saksi ni Jehova. Makakaoyon sinda nin bilog na puso sa mga tataramon sa Salmo 97:11: “An liwanag mismo suminirang para sa matanos, asin kagayagayahan para sa mga tanos an puso.” Malinaw nindang nasasabotan na an espirituwal na Israel sana an dinara sa bagong tipan. (Hebreo 9:15; 12: 22, 24) An dai naghimateng natural na Israel mayong kabtang dian, ni an katawohan sa kagabsan. An pakasabot na ini an nagliwanag kan dalan para sa maliwanag na sinag nin banal na liwanag, na nangongorog sa mga rekord kan teokratikong kasaysayan. Ipinahahayag kaini kun gurano kaabunda na ipinaabot ni Jehova an saiyang pagkaherak, mamomoton na kabootan, asin katotoohan sa gabos na tawo na nagrarani sa saiya. (Exodo 34:6; Santiago 4:8) Iyo, an iba pa apuwera sa Israel nin Dios makikinabang sa pagpogol kan mga anghel sa apat na doros nin kalaglagan. Sairisay daw an mga ini? Puwede daw kamong magin saro sa sainda? Helingon niato ngonyan.

[Nota sa Ibaba]