Kapahayagan—An Mamuraway na Kulminasyon Kaiyan Harani Na

Kapitulo 20: An Dai Mabilang na Dakulang Kadaklan

1. Pakatapos iladawan an pagtatatak sa 144,000, anong ibang grupo an naheling ni Juan?

Pakatapos na iladawan an pagtatatak kan 144,000, padagos na ibinareta ni Juan an saro kan pinakanakaoogmang kapahayagan sa bilog na Kasuratan. An saiyang puso siertong naglukso sa kagayagayahan mantang ibinareta nia ini, na nagsasabi: “Pakalihis kan mga bagay na ini ako nagheling, asin, uyal an sarong dakulang kadakian, na dai nin siisay man na makabibilang, hale sa gabos na nasyon asin tribo asin banwaan patin tataramon, na nagtitindog sa atubang kan trono asin sa atubang kan Kordero, na nagugubingan nin maputing mga gubing; asin igwa nin mga palma sa saindang mga kamot.” (Kapahayagan 7:9) Iyo, an pagpogol sa apat na doros nagtaong oportunidad para sa kaligtasan kan saro pang grupo apuwera sa 144,000 miembro kan espirituwal na Israel: sarong manlaenlaen an lenguahe, internasyonal na dakulang kadaklan.a—Kapahayagan 7:1.

2. Paano ipinaliwanag kan kinabanon na mga komentarista an dakulang kadaklan, asin paano minansay maski ngani kan mga Estudyante kan Biblia an grupong ini kan nakaagi?

² Ininterpretar kan kinabanon na mga komentarista na an dakulang kadaklan na ini bilang makalaman na bakong Judiong nakombertir sa Kristianismo o pasiring sa langit na Kristianong mga martir. Maski an mga Estudyante sa Biblia kan nakaagi ibinilang sinda bilang sekondaryong langitnon na grupo, siring kan narisa kan 1886 sa Tomo I kan Studies in the Scriptures, The Divine Plan of the Ages: “Nawara ninda an premyo nin trono asin an banal na kamugtakan, alagad sa katapustapusi aaboton an pagkamundag bilang espiritung mga linalang sa ranggong mas hababa kisa sa banal na kamugtakan. Minsan siring na sinda tunay na konsegrado, napapangganahan sinda kan kinabanon na espiritu sa siring na kamugtakan na dai ninda ikinatao an saindang buhay bilang atang.” Asin sagkod kan 1930, an kaisipan ipinahayag sa Light, Book One: “An mga minabilog sa dakulang kadaklan na ini dai naghimate sa imbitasyon na magin maigot na mga saksi kan Kagurangnan.” Ilinadawan sinda bilang grupo nin nagpapakangmatanos sa sadiri na igwa nin kaaraman kan katotoohan alagad dikit sana an ginibo sa paghuhulit kaini. Masakat sinda sa langit bilang sekondaryong grupo na dai makikikabtang sa pamamahala kairiba ni Cristo.

3. (a) Anong paglaom an nabuksan sa ibang matanos an puso na pakatapos nagin maigot sa gibohon na paghuhulit? (b) Paano ipinaliwanag kan The Watch Tower kan 1923 an parabola kan mga karnero asin mga kanding?

³ Alagad, nagkaigwa nin ibang kairiba an linahidan na mga Kristiano na pakatapos nagin mga pinakamaigot sa gibohon na paghuhulit. Mayo sindang paglaom na magsakat sa langit. Iyo nanggad, an saindang paglaom kaoyon kan titulo kan pahayag publiko na itinampok kan banwaan ni Jehova magpoon kan 1918 sagkod 1922. Sa orihinal, ini iyo an “Natapos Na an Kinaban—Minilyon na Nabubuhay Ngonyan an Nungka Magadan.”b Dai nahaloy pakatapos, an magasin na Watch Tower kan Oktubre 15, 1923, nagpaliwanag kan parabola ni Jesus kan mga karnero asin mga kanding (Mateo 25:31-46), na nagsasabi: “An mga karnero nagrerepresentar sa gabos na tawo kan mga nasyon, bakong an pinaniaki sa espiritu kundi idtong an kaisipan nasa katanosan, na sa kaisipan minimidbid si Jesus Cristo bilang an Kagurangnan asin naghahalat para sa asin naglalaom para sa mas marahay na panahon sa irarom kan saiyang pamamahala.”

4. Paano an liwanag dapit sa daganon na grupo orog pang nagliwanag kan 1931? kan 1932? kan 1934?

⁴ Nagkapirang taon pakatapos, kan 1931, an Vindication, Book One, kinonsiderar an Ezequiel kapitulo 9, na ipinamidmidbid an mga tawong tinandaan para sa kaligtasan sa katapusan kan kinaban bilang an mga karnero sa parabola sa itaas. An Vindication, Book Three, na ilinuwas kan 1932, nagladawan kan matanos an pusong kaisipan kan lalaking bakong Israelita na si Jonadab, na uminiba sa linahidan na Hadeng Jehu kan Israel sa saiyang karuwahe asin uminiba tanganing maheling an kaigotan ni Jehu sa paggadan sa falsong mga relihiyonista. (2 Hade 10:15-17) An libro nagkomento: “Irenepresentar ni Jonadab o ilinadawan an grupong iyan nin mga tawo sa daga ngonyan durante kan panahon na an gibohon ni Jehu [nin pagpahayag kan mga paghokom ni Jehova] nagpapadagos na may marahay na boot, na dai kaoyon kan organisasyon ni Satanas, na naninindogan sa lado nin katanosan, asin iyo an mga ililigtas nin Kagurangnan sa panahon nin Armagedon, kuanon sinda hale sa karibokan, asin tawan sinda nin buhay na daing katapusan sa daga. Binibilog kan mga ini an grupong larnero.’” Kan 1934 liniwanag kan The Watchtower na an mga Kristianong ini na may daganon na mga paglaom maninigong gumibo nin pagdusay ki Jehova asin maninigong mabautismohan. An liwanag dapit sa daganon na grupong ini nagliliwanag na mas maliwanag pa.—Talinhaga 4:18.

5. (a) Anong midbidan sa dakulang kadaklan an ginibo kan 1935? (b) Kan hinagad ni J. F. Rutherford kan 1935 sa mga kombensionista na an siisay man na igwa nin paglaom na mabuhay sagkod lamang sa daga tumindog, ano an nangyari?

⁵ An pakasabot sa Kapahayagan 7:9-17 haros masirang na ngonyan sa bilog na nagkikinang na kaliwanagan kaini! (Salmo 97:11) An magasin na Watchtower paorootrong nagpahayag nin paglaom na an kombension na iniskedyul para sa Mayo 30 sagkod Hunyo 3, 1935, sa Washington, D.C., E.U.A., magigin “tunay na pagranga asin pakinabang” duman sa mga ilinadawan ni Jonadab. Iyan napatunayan na siring! Sa nakakapahirong pahayag na “An Dakulang Kadaklan,” na ipinahayag sa mga 20,000 kombensionista, si J. F. Rutherford, presidente kan Watch Tower Society, nagtao nin Makakasuratan na patotoo na an modernong panahon na ibang karnero kapareho kan dakulang kadaklan sa Kapahayagan 7:9. Sa kulminasyon kan pahayag na ini, naghapot an ispeker: “An gabos na igwa nin paglaom na mabuhay sagkod lamang sa daga tabi magtirindog?” Mantang an dakulang kabtang kan mga nagdadangog nagtirindog, an presidente nagpahayag: “Uya! An dakulang kadaklan!” Nagkaigwa nin katoninongan, na sinundan nin nakabobongog na kaogmahan. Naggayagaya nanggad an grupong Juan—siring man an grupong Jonadab! Kan suminunod na aldaw, 840 bagong Saksi an nabautismohan, na an kadaklan kan mga ini naghihingakong kabilang sa dakulang kadaklan.

Pagpatotoo kan Midbidan kan Dakulang Kadaklan

6. (a) Taano ta malinaw niatong masasabotan na an dakulang kadaklan iyo an modernong panahon na grupo nin nagdusay na mga Kristiano na may paglaom na mabuhay sagkod lamang sa daga? (b) Ano an isinisimbolisar kan maputing mga gubing kan dakulang kadaklan?

⁶ Paano niato masasabi nin positibo na an dakulang kadaklan iyo ining modernong panahon na grupo nin nagdusay na mga Kristiano na naglalaom na mabuhay sagkod lamang sa daga nin Dios? Naenot na, naheling ni Juan sa bisyon an langitnon na grupo na “binakal .. . manongod sa Dios hale sa lambang tribo asin tataramon asin banwaan patin nasyon.” (Kapahayagan 5:9, 10) An dakulang kadaklan igwa man nin siring na pinaghalean alagad laen na sagkodan. Bakong siring sa Israel nin Dios, an saindang bilang dai dineterminar nin patienot. Mayong tawo an puwedeng makasabi nin patienot kun magigin gurano kadakol sinda. An saindang mga gubing pinaputi sa dugo kan Kordero, na isinisimbolisar na igwa sinda nin matanos na kamugtakan sa atubang ni Jehova hull kan saindang pagtubod sa atang ni Jesus. (Kapahayagan 7:14) Asin sinda nagwawasiwas nin mga sanga nin palma, na ikinukurahaw an Mesias bilang saindang Hade.

7, 8. (a) An pagwasiwas kan mga sanga nin palma mayong duwa-duwa na nagpagirumdom ki apostol Juan kan anong mga pangyayari? (b) Ano an kahalagahan kan katotoohan na an mga kabilang sa dakulang kadaklan nagwawasiwas nin mga sanga nin palma?

⁷ Mantang nagheheling sia sa bisyon na ini, an mga kaisipan ni Juan nagbabalik saiya labi nang 60 taon an nakaagi sa huring semana ni Jesus sa daga. Kan Nisan 9, 33 C.E., kan an kadaklan nagtiripon tanganing sabaton si Jesus sa Jerusalem, sinda “nagkua kan mga sanga nin palma asin nagluwas sa pagsabat sa saiya. Asin nagpoon sindang magkurahaw: ‵Ligtasan man kami, nakikimaherak kami sa saimo! Omawon an minadatong sa ngaran ni Jehova, an hade nin Israel!’” (Juan 12:12, 13) Sa siring na paagi an pagwasiwas nin mga sanga nin palma asin pagkurahaw sa kabtang kan dakulang kadaklan nagpapaheling kan saindang dai mapogolan na kagayagayahan sa pag-ako ki Jesus bilang an nombradong Hade ni Jehova.

⁸ Mayong duwa-duwa an mga sanga nin palma asin magayagayang pagkurahaw nagpagirumdom man ki Juan kan suanoy na Israelitang Kapiyestahan nin mga Payag-payag. Hull ta sa kapiyestahan na ini nagboot si Jehova: “Asin kumua kamo sa enot na aldaw kan bunga nin magagayon na kahoy, kan mga dahon nin mga palma asin kan mga sanga nin marambong na mga kahoy patin nin mga sauce sa kasapaan, asin magorogma kamo sa atubangan ni Jehova na saindong Dios sa laog nin pitong aldaw.” An mga sanga nin palma ginamit bilang tanda nin paggayagaya. An temporaryong mga payag-payag mga pagirumdom na ilinigtas ni Jehova an saiyang banwaan paluwas sa Ehipto, tanganing mag-erok sa mga payag-payag sa kapatagan. “An taga ibang banwaan asin an ilo patin an balo” nakikabtang sa kapiyestahan na ini. An bilog na Israel kaipuhan na “magin daing iba kundi maogma.”—Levitico 23:40; Deuteronomio 16:13-15.

9. Sa anong maogmang pagkurahaw nakiiba an dakulang kadaklan?

⁹ Angay kun siring, na an dakulang kadaklan, minsan bakong kabtang kan espirituwal na Israel, maninigong magwasiwas kan mga sanga nin palma, mantang magayagaya asin may pagpapahalaga nindang inaatribuwir an kapangganahan asin kaligtasan sa Dios asin sa Kordero, siring kan naheheling digdi ni Juan: “Asin sinda padagos na. nagkukurahaw sa makosog na tingog, na nagsasabi: Utang niato an kaligtasan sa sarong Dios, na nagtutukaw sa trono, asin sa Kordero.’” (Kapahayagan 7:10) Minsan siring na suruwaysuway sinda sa gabos na grupong etniko, an dakulang kadaklan nagkukurahaw sa saro sanang “makosog na tingog.” Paano ninda nagigibo ini, sa ibong kan saindang pagkakalaen sa mga nasyon asin lenguahe?

10. Paano an dakulang kadaklan sararong makakukurahaw nin sarong “makosog na tingog” sa ibong nin pagkakalaen nin mga nasyon asin lenguahe?

¹⁰ An dakulang kadaklan na ini kabtang nin saro sanang tunay na nagkakasararong organisasyon na hale sa laen-laen na nasyon sa daga ngonyan. Mayo sinda nin nalalaen na mga pamantayan sa manlaenlaen na nasyon kundi dai nagliliwat na inaaplikar an tamang mga prinsipyo kan Biblia saen man sinda nag-eerok. Dai sinda nakikilabot sa nasyonalistiko, rebolusyonaryong mga mobimiento kundi tunay nanggad na ‵dinaragopdop an mga minasbad na magin tarom nin arado.’ (Isaias 2:4) Dai sinda nagkakabaranga sa mga sekta o mga denominasyon, tanganing magkurahaw sinda nin nakariribong o magkakakontrang mga mensahe siring kan ginigibo kan mga relihiyon kan Kakristianohan; ni ipinaniwala ninda sa propesyonal na klero an paggibo kan saindang pag-omaw para sainda. Dai sinda nagkukurahaw na utang ninda an kaligtasan sa banal na espiritu, hull ta sinda bakong mga oripon nin trinitaryong dios. Sa mga 200 na geograpikal na teritoryo sa bilog na daga, sararo sinda sa pag-arang sa ngaran ni Jehova mantang itinataram ninda an sarong dalisay na lenguahe nin katotoohan. (Sofonias 3:9) Angay nanggad, minimidbid ninda sa publiko na an saindang kaligtasan hale ki Jehova, an Dios nin kaligtasan, paagi ki Jesu-Cristo, an Saiyang Pangenot na Ahente nin kaligtasan.—Salmo 3:8; Hebreo 2:10.

11. Paano an modernong teknolohiya nakatabang sa mga kabilang sa dakulang kadaklan tanganing gibohon an saindang makosog na tingog na mas makosog pa?

¹¹ An modernong teknolohiya nakatabang tanganing an makosog na tingog kan nagkakasararong dakulang kadaklan madangog nin mas makosog pa. Mayong ibang relihiyosong grupo sa daga an may pangangaipo sa pagpublikar kan mga pantabang sa pag-adal sa Biblia sa labing 200 na lenguahe, mantang mayong ibang grupo an interesadong maabot an gabos na tawo sa daga kan sarong nagkakasararong mensahe. Bilang dugang pang tabang digdi, sa irarom kan pamamahala kan linahidan na Namamahalang Grupo kan mga Saksi ni Jehova, ginibo an Multilanguage Electronic Phototypesetting System (MEPS). Sa panahon na isinusurat ini, an manlaenlaen na porma nin MEPS ginagamit sa labing 60 kan mga sangang opisina kan Watch Tower Society sa bilog na daga, asin nakatabang ini tanganing magin posible an sabay-sabay na pagpublikar kan saindang pangenot na duwa kada bulan na magasin, an The Watchtower, sa 39 lenguahe. An banwaan ni Jehova sabay-sabay man na nagpupublikar nin mga libro, siring kan sarong ini, sa nagkapirang lenguahe. Kaya, an mga Saksi ni Jehova, na an dakulang mayoriya binibilog kan dakulang kadaklan, nakakadistribuwir taon-taon nin ginatos na milyon na publikasyon sa gabos na mas midbid na lenguahe, na nagpapagin posible sa dugang na kadaklan hale sa gabos na tribo asin tataramon na mag-adal kan Tataramon nin Dios asin iiba an saindang mga tingog sa makosog na tingog kan dakulang kadaklan.—Isaias 42:10, 12.

(Ipagpapadagos sa masunod na luwas.)

[Mga Nota sa Ibaba]