Kapahayagan—An Mamuraway na Kulminasyon Kaiyan Harani Na!

Kapitulo 27: Namundag an Kahadean nin Dios!

Bisyon 7—Kapahayagan 12:​1-17

Tema: Nangaki an langitnon na babae, nakipaglaban si Miguel ki Satanas asin ihinolog sia sa daga

Panahon nin kaotoban: Magpoon kan pagtukaw sa trono ni Cristo Jesus kan 1914 sagkod sa dakulang kahorasaan

1. Paano an pakasabot sa mga tanda na ilinadawan sa Kapahayagan kapitulo 12 sagkod 14 makatatabang sa sato?

¹ An banal na hilom nin Dios nabukasan. (Kapahayagan 10:7) An Kahadean nin Dios paagi sa saiyang Mesiyas ngonyan saro nang dinamikong katunayan. Namamahala na ini! An presensia kaini nangangahulogan nin kapahamakan para ki Satanas asin sa saiyang banhi asin mamuraway na kapangganahan para sa Banhi kan langitnon na organisasyon nin Dios. Alagad, an ikapitong anghel nin Dios dai pa tapos sa pagpatanog kan saiyang trumpeta, huli ta kadakol pa an ihahayag nia sa sato manongod sa ikatolong herak man. (Kapahayagan 11:14) An mga tandang ilinadawan sa kapitulo 12 sagkod 14 kan Kapahayagan matabang sato na padakulaon an satong apresasyon sa gabos na kalabot sa herak man na iyan asin sa pagtapos kan banal na hilom nin Dios.

2. (a) Ano an dakulang tanda na naheling ni Juan? (b) Kasuarin ipinahayag an kahulogan kan dakulang tanda?

² Nakaheling si Juan ngonyan nin dakulang tanda​—saro na may pangenot na interes para sa banwaan nin Dios. Iniintrodusir kaini an nakaoogmang makahulang bisyon, na an kahulogan kaiyan enot na ipinublikar sa Marso 1, 1925, isyu kan The Watch Tower sa artikulong may titulong “Birth of the Nation” asin liwat kan 1926 sa librong Deliverance. An maliwanag na sinag na ini nin pakasabot sa Biblia nagin makasaysayan na tanda sa pag-oswag kan gibohon ni Jehova. Kaya bayae si Juan na iladawan an drama mantang ini nagpopoon nang mangyari: “Asin naheling an dakulang tanda sa langit, sarong babae an nasasamnohan kan aldaw, asin an bulan nasa irarom kan saiyang mga bitis, asin nasa saiyang payo an korona na kagduwang bitoon, asin bados sia. Asin sia nagkukurahaw huli sa saiyang kakologan asin sa saiyang kasakitan sa pangangaki.”​—Kapahayagan 12:​1, 2.

3. Ano an midbidan sa babae na naheling sa langit?

³ Sa kaenot-enote, nakaheling si Juan nin babae sa langit. Siyempre, bako siang literal na babae. Imbes, sia sarong tanda, o simbolo. (Kapahayagan 1:1) Ano an isinisimbolo nia? Sa ipinasabong na mga hula, an mga babae kun minsan nagrerepresentar nin mga organisasyon na “agom” nin nangongorog na mga persona. Sa Hebreong Kasuratan, an Israel sinasambit na agom na babae ni Jehova Dios. (Jeremias 3:14) Sa Griegong Kasuratan, an kongregasyon kan linahidan na mga Kristiano sinasambit bilang nobya ni Cristo. (Kapahayagan 21:​9-14) An babae na naheling digdi ni Juan agom man nin sarong persona, asin sia mangangaki na. Siisay an saiyang agom na lalaki? Bueno, pakatapos an saiyang aki “inagaw pasiring sa Dios asin sa saiyang trono.” (Kapahayagan 12:5) Sa siring inaako ni Jehova na saiya an aki. Kun siring, an babae na naheling ni Juan iyo an simbolikong agom ni Jehova.

4. Sairisay an mga aki kan simbolikong agom nin Dios, asin ano an iinapod ni Pablo sa babaeng naheling ni Juan?

⁴ Mas amay nin mga walong siglo, sinabihan ni Jehova an simbolikong agom na ini, na nagsabing: “An saimo gabos na aki magigin mga tawo na tinokdoan ni Jehova.” (Isaias 54:​5, 13) Kinotar ni Jesus an hulang ini asin ipinaheling na an mga aking ini iyo an saiyang maimbod na mga parasunod, na pakatapos iyo an nagbilog kan kongregasyon nin linahidan na mga Kristiano. (Juan 6:​44, 45) Kaya an mga miembro kan kongregasyon na ini, na inaapod bilang mga aki nin Dios, mga aki man kan simbolikong agom nin Dios. (Roma 8:14) Idinugang ni apostol Pablo an pinal na impormasyon kan sinabi nia: “An Jerusalem na nasa itaas hiwas, asin sia an satong ina.” (Galacia 4:26) Kaya, an “babae” na naheling ni Juan, iyo an “Jerusalem sa itaas.”

5. Mantang an simbolikong agom ni Jehova nakokoronahan nin 12 bitoon, ano sa katunayan an Jerusalem sa itaas?

⁵ Alagad, ano nanggad an Jerusalem sa itaas? Mantang inaapod sia ni Pablo bilang “nasa itaas,” asin naheling sia ni Juan sa langit, malinaw na bako siang daganon na siudad; ni kaagid sia kan “Bagong Jerusalem,” mantang an organisasyon na iyan iyo an nobya ni Cristo, bakong agom ni Jehova. (Kapahayagan 21:2) Mangnohon na nakokoronahan sia nin 12 bitoon. An bilang na 12 asosyado sa pagigin kompleto sa organisasyonal na areglo.a Kaya, an 12 bitoon na ini garo nagpapaheling na sia sarong organisasyonal na areglo sa langit, siring kan suanoy na Jerusalem digdi sa daga. An Jerusalem sa itaas iyo an unibersal na organisasyon ni Jehova nin espiritung mga linalang na nag-aakto bilang saiyang agom, kapwa sa paglilingkod saiya asin sa pangangaki.

6. (a) Ano an ipinaheheling kan katunayan na an babaeng naheling ni Juan nasasamnohan kan aldaw, nasa irarom kan saiyang mga bitis an bulan, asin may koronang mga bitoon? (b) Ano an isinisimbolo kan mga kolog nin pangangaki kan bados na babae?

⁶ Naheling ni Juan an babaeng ini na nasasamnohan kan aldaw asin nasa irarom kan mga bitis nia an bulan. Kun idudugang niato an saiyang korona nin mga bitoon, lubos siang napalilibotan nin langitnon na mga liwanag. An pag-oyon ni Jehova nagsisirang saiya aldaw asin banggi. Angay nanggad na simbolo kan mamuraway na langitnon na organisasyon ni Jehova! Bados man sia, na nagtitios kan kolog nin pangangaki. An paghagad nia nin banal na tabang nagpapaheling na nagdatong na an panahon kan saiyang pangangaki. Sa Biblia, an kolog sa pangangaki parateng nagsisimbolisar sa masakit na gibohon na kaipuhan sa pagprodusir nin mahalagang resulta. (Ikomparar an Salmo 90:​2; Talinhaga 25:​23; Isaias 66:​7, 8.) Mayong duwa-duwa an mga kolog sa pangangaki na siring kaini naeksperyensiahan kan an langitnon na organisasyon ni Jehova nag-andam para sa makasaysayan na pagkamundag na ini.

Sarong Dakulang Mapulang Dragon

7. Ano pang tanda an naheling ni Juan?

⁷ Ano an masunod na naheling ni Juan? “Asin saro pang tanda an naheling sa langit, asin, uya! sarong dakulang mapulang dragon, na igwa nin pitong payo asin sampulong sungay asin sa saiyang payo igwa nin pitong diadema; asin an ikog kaiyan nagguguyod kan ikatolong kabtang kan mga bitoon sa langit, asin iinapon kaiyan sa daga an mga iyan. Asin an dragon padagos na nagtitindog sa atubang kan babae na mangangaki na, tanganing kun sia mangaki na, halonon kaiyan an saiyang aki.”​—Kapahayagan 12:​3, 4.

8. (a) Ano an midbidan sa dakulang mapulang dragon? (b) Ano an ilinaladawan kan pagkakaigwa kan dragon nin pitong payo, sampulong sungay, asin diadema sa lambang payo?

⁸ An dragon na ini iyo si Satanas, “an enot na halas.” (Kapahayagan 12:​9; Genesis 3:15) Sia an maisog na paralaglag​—an pito an payong dragon, o parahalon, na lubos na makahahalon kan saiyang biktima. Pambihira nanggad an saiyang hitsura! An pitong payo asin sampulong sungay na idto nagpapaheling na sia an arkitekto kan politikal na mabangis na hayop na dai mahahaloy ilaladawan sa Kapahayagan kapitulo 13. An hayop man na ini may pitong payo asin sampulong sungay. Mantang si Satanas may diadema sa lambang payo​—pito gabos—​masisierto niato na an mga kapangyarihan sa kinaban na irenepresentar sa mabangis na hayop na iyan nasa irarom kan saiyang pamamahala. (Juan 16:11) An sampulong sungay angay na simbolo kan pagigin lubos kan kapangyarihan na saiyang isinasagibo sa kinaban na ini.

9. Ano an ipinaheheling kan katunayan na an ikog kan dragon “nagguguyod kan ikatolong kabtang kan mga bitoon sa langit” paibaba sa daga?

⁹ An dragon may autoridad man sa espiritung rona. Paagi sa saiyang ikog, saiyang “nagguguyod kan ikatolong kabtang kan mga bitoon sa langit.” An mga bitoon puwedeng magrepresentar sa mga anghel. (Job 38:7) An pagsambit nin “ikatolong kabtang” magdodoon na an dakulang bilang nin mga anghel nadaya ni Satanas. Basta ini mapasairarom kan saiyang kontrol, mayong madudulagan para sainda. Dai na sinda makababalik sa banal na organisasyon nin Dios. Sinda nagin mga demonyo, na garo ginuguyod ni Satanas bilang saindang hade o tagapamahala. (Mateo 12:24) Ihinulog man sinda ni Satanas sa daga. Mayong duwa-duwa na nagtotokdo ini sa panahon ni Noe bago an Baha, kan tintaran ni Satanas an masumbikal na mga aki nin Dios na maghilig sa daga asin mag-agom sa mga aking babae nin mga tawo. Bilang padusa, ining “mga anghel na nagkasala” iinapon nin Dios pasiring sa arog bilanggoan na kamugtakan na inaapod na Tartaro.​—Genesis 6:​4; 2 Pedro 2:​4; Judas 6.

10. Anong magkakontrang organisasyon an naheling, asin taano an dragon ta nagmamawot na halonon an aki kun mangaki na an babae?

¹⁰ Kaya, duwang magkakontrang organisasyon an malinaw na naheling​—an langitnon na organisasyon ni Jehova na ilinadawan kan babae asin an demonikong organisasyon ni Satanas na nag-aangat sa soberaniya ni Jehova. An dakulang isyu nin soberaniya maninigong mahusay. Alagad paano? Si Satanas, padagos pang nagguguyod sa mga demonyo na kairiba nia, siring sa bisyosong hayop na naghahanap nin potensial na biktima. Naghahalat siang mangaki an babae. Mawot niang halonon an linalaoman na omboy na ini huli ta naaaraman niang ini magigin nagsasapeligrong huma sa saiyang padagos na pag-eksister asin sa kinaban na dian nagsasagibo sia nin pamamahala.​—Juan 14:30.

Sarong Aking Lalaki, Sarong Lalaki

11. Paano ilinadawan ni Juan an pagkamundag kan aki kan babae, asin taano ta an aki inaapod na “sarong aki, sarong lalaki”?

¹¹ An itinalaan na panahon para sa mga nasyon tanganing mamahala na mayong pag-olang nin Dios natapos kan 1914. (Lucas 21:24) Dangan, sa tamang panahon, an babae nangaki: “Asin sia nangaki nin sarong aking lalaki, sarong lalaki, na magpapastor sa gabos na nasyon paagi sa sogkod na batbat. Asin an saiyang aki inagaw pasiring sa Dios asin sa saiyang trono. Asin an babae nagdulag pasiring sa kapatagan, kun saen may lugar siang inandam nin Dios, na duman maninigo nindang pakakanon sia sa laog nin sangribo duwang gatos asin anom na polong aldaw.” (Kapahayagan 12:​5, 6) An ipinangaki “sarong aking lalaki, sarong lalaki.” Taano ta ginamit ni Juan an dobleng ekspresyon na ini? Ginibo nia ini tanganing ipaheling an pagigin angay kan aki, an saiyang kakayahan na mamahala sa mga nasyon na may igong kapangyarihan. Nagdodoon man ini kun gurano kahalaga, gurano kagayagaya an okasyon kan pagkamundag na ini! Ini may pangenot na kabtang sa pagtapos kan banal na hilom nin Dios. Tara, an aking lalaking ini ngani “magpapastor sa gabos na nasyon paagi sa sogkod na batbat”!

12. (a) Sa Salmo, ano an makahulang ipinanuga ni Jehova manongod ki Jesus? (b) Ano an isinisimbolo kan pangangaki kan babae nin aki na “magpapastor sa gabos na nasyon paagi sa sogkod na batbat”?

¹² Ngonyan, an ekspresyon na iyan daw garo pamilyar? Iyo, si Jehova makahulang nanuga manongod ki Jesus: “Sinda saimong papasaon nin setrong batbat, siring sa lalagan kan paragibo nin koron roronoton mo sinda.” (Salmo 2:9) Ihinula man manongod sa saiya: “An sogkod kan saimong kakosogan ipapadara ni Jehova gikan sa Sion, na nagsasabi: ‘Mandaog ka sa tahaw kan saimong mga kaiwal.’” (Salmo 110:2) Kaya, kalabot nanggad si Jesu-Cristo sa pagkamundag na naheling ni Juan. Bako, bakong an pagkamundag ni Jesus paagi sa sarong birhen bago an enot na siglo kan satong Komon na Kapanahonan; ni nagtotokdo ini sa pagkabuhay liwat ni Jesus pasiring sa espiritung buhay kan 33 C.E. Dugang pa, bako ining transmigrasyon. Imbes, ini an pagkamundag kan Kahadean nin Dios kan 1914 bilang katunayan, na si Jesus​—na nasa langit na sa haros 19 siglo na—​an nagtutukaw ngonyan bilang Hade.​—Kapahayagan 12:10.

13. Ano an boot sabihon na an aking lalaki “inagaw pasiring sa Dios asin sa saiyang trono”?

¹³ Nungka na togotan ni Jehova na halonon ni Satanas an Saiyang agom o an Saiyang bagong namundag na aki! Sa pagkamundag, an aking lalaki “inagaw pasiring sa Dios asin sa saiyang trono.” Sa siring lubos siang napairarom sa proteksion ni Jehova, na may pinakalubos na pangangataman sa saiyang bagong namundag na Kahadean, an Saiyang instrumento sa pagpakangbanal sa Saiyang banal na ngaran. Sa panahon man na iyan, an babae nagdulag pasiring sa lugar na inandam nin Dios para sa saiya sa kapatagan. An orog pang detalye manongod sa bagay na iyan masunod! Para ki Satanas, an entablado andam na ngonyan para sa importanteng pangyayari na magpapagin imposible nanggad para sa saiya na maghuma liwat sa Kahadean sa langit. Ano an pangyayaring iyan?

An Ralaban sa Langit!

14. (a) Siring kan sinasabi ni Juan, anong pangyayari an magpapagin imposible para ki Satanas na maghuma liwat sa Kahadean? (b) Sa anong lugar napopogolan si Satanas asin an saiyang mga demonyo?

¹⁴ Sinasabi sato ni Juan: “Asin puminotok an ralaban sa langit: Si Miguel asin an saiyang mga anghel nakipaglaban sa dragon, asin an dragon asin an mga anghel kaiyan nakipaglaban alagad ta iyan dai nanggana, ni may nanompongan pa man na lugar sa sainda sa langit. Kaya ihinolog an dakulang dragon, an enot na halas, an inaapod Diablo asin Satanas, na nandadaya sa bilog na ineerokan na daga; ihinolog sia sa daga, asin an saiyang mga anghel ihinolog sa kaibanan nia.” (Kapahayagan 12:​7-9) Kaya siring sa dramatikong pangyayari sa pagtapos kan banal na hilom nin Dios, pinalayas si Satanas, ihinolog hale sa langit, asin an saiyang mga demonyo ihinolog sa daga kaibanan nia. An saro na nandaya sa bilog na ineerokan na daga sagkod sa pagigin dios kaini sa katapustapusi pinogolan na sa palibot kan planetang ini, kun saen enot na nagpoon an saiyang pagrebelde.​—2 Corinto 4:​3, 4.

15, 16. (a) Siisay si Miguel, asin paano niato naaraman? (b) Taano ta angay na si Miguel an saro na magholog ki Satanas hale sa langit?

¹⁵ Siisay an nagpangyari kan dakulang kapangganahan na ini sa ngaran ni Jehova? An Biblia nagsasabing si Miguel asin an saiyang mga anghel. Alagad siisay si Miguel? An ngaran na “Miguel” nangangahulogan na “Siisay an Siring sa Dios?” Kaya si Miguel maninigong interesado sa pagbindikar kan soberaniya ni Jehova paagi sa pagpatunay na mayong siisay man an ikakokomparar sa Saiya. Sa Judas bersikulo 9, inaapod siang “Miguel na arkanghel.” Nakaiinteres, an titulong “arkanghel” ginagamit sa ibang kabtang kan Biblia manongod sa saro sanang persona: si Jesu-Cristo.b Sinabi ni Pablo manongod saiya: “An Kagurangnan man sana mahilig sa langit na may tingog na nagboboot, na may tingog kan arkanghel asin trumpeta nin Dios.” (1 Tesalonica 4:16) An titulong “arkanghel” nangangahulogan na “poon kan mga anghel.” Kaya bakong makangangalas na an Kapahayagan nagsasabing si “Miguel asin an saiyang mga anghel.” An ibang lugar na dian sinambit kan Biblia an mga anghel na nagpapasakop sa matanos na lingkod nin Dios napapanongod ki Jesus. Kaya, sinasabi ni Pablo na “sa kapahayagan kan Kagurangnan na si Jesus hale sa langit kaiba kan saiyang makapangyarihan na mga anghel.​—2 Tesalonica 1:​7; helingon man an Mateo 24:​30, 31; 25:31.

¹⁶ Ini asin an iba pang kasuratan minagiya sa sato sa dai madudulagan na konklusyon na si Miguel daing iba kundi an Kagurangnan na si Jesu-Cristo sa saiyang langitnon na posisyon. Ngonyan, sa aldaw nin Kagurangnan, bako sanang sinasabi nia ki Satanas: “Sagweon ka logod ni Jehova.” Mantang ini panahon nin paghatol, si Jesus, bilang si Miguel, ihinolog hale sa langit an maraot na si Satanas asin an saiyang demonikong mga anghel. (Judas 9; Kapahayagan 1:10) Angay nanggad na Sia an Saro na gumibo kaini, huli ta Sia an bagong nombradong Hade. Si Jesus iyo man an Banhi, na ipinanuga kaidto pa sa Eden, na sa katapustapusi maronot sa payo kan enot na halas na iyan, sa siring pinapara sia sa pag-eksister sa bilog na panahon. (Genesis 3:15) Sa pagpalayas ki Satanas hale sa langit, si Jesus nag-abante pasiring sa pinal na pagronot na iyan.

(Ipagpapadagos sa masunod na luwas.)

[Mga Nota sa Ibaba]