An Biblia—Tataramon nin Dios o nin Tawo?
Kapitulo 12: Mas Halangkaw na Burabod nin Kadonongan
“Kanigoan kadakol kan saimong mga gibo, O Jehova! Iyan gabos ginibo mo sa kadonongan. An daga pano kan saimong mga ginibo.” (Salmo 104:24) Iyo, poon sa kamurawayan kan mahiwas na uniberso sagkod sa pinong gayon nin sarong burak, an mga linalang nagpapatunay sa daing kapantay na kadonongan kan Kaglalang kaiyan. An teknolohiya kan ika-20 siglong ini nawawaran nin halaga kun ikokomparar sa mga gibo nin Dios. Kun an Biblia Tataramon nin Dios, lalaoman man niato na iyan tumao nin ebidensia nin kadonongan na labaw sa mga kakayahan nin tawo. Iyo daw?
1. (Iiba an introduksion.) (a) Saen niato maheheling an ebidensia kan daing kapantay na kadonongan nin Dios? (b) Anong hatol an itinatao kan Biblia manongod sa kadonongan?
Idinodoon kan Biblia an halaga nin kadonongan. Iyan nagsasabi: “An kadonongan enot sa gabos. Magkua ka nin kadonongan; asin sa kaibanan kan gabos mong nakua, magkua ka nin pakasabot.” (Talinhaga 4:7) Minimidbid man kaiyan na kitang mga tawo sa parate kulang nin kadonongan, asin sinasadol kita kaiyan: “Kun an siisay man saindo kulang nin kadonongan, padagos siang maghagad sa Dios, huli ta sia abundang nagtatao sa gabos.”—Santiago 1:5.
2. Paano madudugangan nin saro an saiyang kadonongan?
2 Paano an Dios ‘abundang nagtatao nin kadonongan’? An sarong paagi iyo an pagdagka sato na basahon an Biblia asin makanood dian. An libro kan Biblia na Talinhaga nagsasadol: “Aki ko, kun aakoon mo an sakong mga tataramon asin pahahalagahan mo an sakong mga pagboot, na magtao nin atension sa kadonongan . . . masasabotan mo an pagkatakot ki Jehova, asin makukua mo an mismong kaaraman dapit sa Dios. Huli ta si Jehova nagtatao nin kadonongan.” (Talinhaga 2:1, 2, 5, 6) Kun iinaaplikar niato an hatol sa Biblia asin naheheling niato kun gurano iyan kaepektibo, narerealisar niato na iyan tunay na nagrerepresentar sa banal na kadonongan.
Madonong na mga Tataramon
3, 4. (a) Ano an sinasabi kan Biblia manongod sa pagigin basang sana kan pagkamoot sa pirak? (b) Anong pagkatimbang an ipinaheheling kan Biblia sa paghatol sato manongod sa halaga nin kuwarta?
3 Tanganing orog ining masabotan, helingon niato an pirang bersikulo sa Biblia. Horophoropa an madonong na mga tataramon na ini: “Idtong mga nagmamaigot na yumaman nahoholog sa sugot asin sa siod asin sa dakol na rungaw asin nakararaot na horot . . . Huli ta an pagkamoot sa pirak gamot nin gabos na klase nin karatan.” (1 Timoteo 6:9, 10) Ikomparar ini sa modernong punto-de-vista—kisuerra sa sosyedad sa Solnopan—na nagsasadol sa mga tawo na hanapon an kuwarta bilang pangenot nindang pasohan. Makamomondo, an dakol nakakamtan an kayamanan na hinahanap ninda pero nakamamate pa man giraray nin kadaihan nin halaga asin kadaihan nin pagkakontento. An sarong sikologo klinikal nagsabi: “An pagigin Num. 1 asin mayaman dai nagtatao saimo kan pagmate na ika may nahaman, kontento, tunay na iginagalang o namomotan.”
4 Dai man boot sabihon na an praktikal na tawo lubos na matalikod sa kuwarta. Ipinaheheling kan Biblia an timbang na gayong kadonongan sa pagsabi kaiyan: “An kadonongan para sa proteksion kun paanong an kuwarta para sa proteksion; alagad an bentaha nin kaaraman iyo na an kadonongan mismo nagpapadanay na buhay sa mga nakasasadiri kaiyan.” (Eclesiastes 7:12) Sa siring, tinatabangan kita kan Biblia na masabotan na an kuwarta, minsan ngani mahalaga, bakong pinakamahalaga. Iyan instrumento sana, asin limitado an halaga kaiyan kun mayo kita kan kadonongan na gamiton iyan nin tama.
5, 6. (a) Taano ta madonong an hatol kan Biblia na likayan an maraot na pag-iriba? (b) Paano kita nakikinabang sa ‘paglakaw kaiba nin mga madonong’?
5 Totoo man an tataramon na ini sa Biblia: “Sia na naglalakaw na kaiba nin mga madonong magigin madonong, alagad sia na nakiiiba sa mga mangmang maraot an aabotan.” (Talinhaga 13:20) Narisa na daw nindo kun gurano kakosog kan epekto sa sato kan satong kairiba? An impluwensia nin mga kairiba nagdara sa mga hobenes sa pagbuburat, pag-abuso sa droga, asin inmoralidad. Kun kita makisasalak sa mga naggagamit nin rapsak na pagtaram, sa huri maririsa niato na kita naggagamit naman nin rapsak na pagtaram. An pakikiiba sa mga madaya may tendensiang gibohon kitang madaya. Totoo nanggad, arog kan sabi man kan Biblia, “An maraot na pag-iriba nakararaot sa marahay na mga ugale.”—1 Corinto 15:33.
6 Sa ibong na lado, mapakakarhay kita nin marahay na pag-iriba. Paagi sa ‘paglakaw na kaiba nin mga madonong,’ kita man magigin orog na madonong. An marahay na mga ugale nakaoolakit, arog nin maraot na mga ugale. Liwat, an Biblia nagpapaheling nin kadonongan sa pagsadol sato na maingat na pilion an satong mga kaibaiba.
7. Ano an nagpapalaen sa Biblia bilang burabod nin hatol?
7 An Biblia may dakol na mga preseptong arog kaiyan tanganing tabangan kitang magiyahan an satong buhay. Bilang burabod nin hatol, iyan napapalaen. An hatol kaiyan perming kapakipakinabang. Nungka na iyan teoretiko sana, asin iyan nungka na nakadadanyar sato. Daing kabaing an mahiwas na sakop kan hatol sa Biblia. An mga nag-aaplikar kaiyan sa saindang buhay, asin nakaheheling kun paano iyan perming nagbubunga kan saindang ikararahay, napahahalagahan an Biblia bilang napapalaen na burabod nin kadonongan.