An mga Ayuda Nagpapabanaag nin Kristianong Pagkamoot
“MAMOOT kamo sa bilog na kasararoan nin mga tugang,” an isinadol ni apostol Pedro sa saiyang mga kapwa Kristiano. (1 Pedro 2:17) An siring na pagkamoot dapat na makalampas sa rasyal, sosyal, asin nasyonal na mga linderos, na binobogkos an mga tawo sa tunay na pagkamagturugang. Kan magkaigwa nin materyal na pangangaipo an enot na mga Kristiano, an pagkamoot nagmotibar sa dakol na tumao nin mga donasyon sa mga apostol tanganing ikawaras sa mga nangangaipo. Sinasabi kan rekord na “an gabos na bagay pankagabsan.”—Gibo 2:41-45; 4:32.
Ikinapaheling an siring na pagkamoot kan agdahon kan Namamahalang Grupo nin mga Saksi ni Jehova, kaidtong katapusan nin 1991, an nagkapirang sanga kan Watch Tower Society sa Solnopan na Europa na tumao nin kakanon asin gubing para sa saindang nangangaipong mga tugang sa Sirangan na Europa, kaiba an mga kabtang kan dating Unyon Sobyet. Itinatao mi digdi an serye nin mga report hale sa nagkapirang sangang napalabot.
Sweden
Kan Disyembre 5, 1991, an sarong surat na nagpapaliwanag kan pangangaipo ipinadara sa gabos na 348 kongregasyon sa Sweden. Listo an simbag. Sa laog sana nin pirang aldaw, an enot na semitrailer pasiring na sa St. Petersburg, Rusya, na may kargang 15 toneladang harina, lana, de latang karneng baka, pinolbong gatas, asin iba pang kaagid kaiyan. Dineskarga nin lokal na mga Saksi ni Jehova an trak asin listong iwinaras an 750 pakete sa mga nangangaipo. Kan huri, may duwa pang semitrailer na naghatod nin kakanon sa Rusya. Sa kagabsan, labing 51.5 toneladas an ipinadara hale sa Sweden.
An pagkaandam na magdonar nin mga gubing asin sapatos labi sa gabos na linalaoman. An tambak na mga patos nin gubing madaling natipon sa mga Kingdom Hall. An dakol na Kristiano nagdonar nin gubing hale sa saindang aparador. An iba buminakal nin mga bago. An sarong tugang na lalaki buminakal nin limang amerikana. Kan maaraman kan napangalas na kagsadiri kan tindahan an katuyohan, nagdonar sia nin lima pang amerikana. An saro pang tugang buminakal nin sarong kahon na medyas, guwantis, asin baliog. Kan ipaliwanag nia an katuyohan kaiyan, inopresiran sia kan kagsadiri nin 30 bagong amerikana sa presyo nin duwa. An kagsadiri nin tindahan nin mga gubing na pankawat nagdonar nin 100 na padis nin bagong sapatos asin bota.
An gabos na ini dinara sa sangang opisina para sa paglaenlaen, pagpatos, asin pagkarga. An mga gubing—na katimbang nin makakarga nin 40 semitrailer—nakapano sa mahihiwas na lugar sa sangang opisina! Nagtrabaho nin dakol na semana an mga tugang na lalaki asin babae sa paglaenlaen kaiyan para sa mga lalaki, babae, asin aki saka pag-impake kaiyan sa mga kahon. Kinseng laen-laen na semitrailer an ginamit sa paghatod kan mga gubing sa Rusya, Ukraine, asin Estonia.
An sarong tugang na walong beses na nagmaneho kan saro sa mga trak kan Sosyedad sa dating Unyon Sobyet nagsabi: “An pagsabat samo kan satong mga tugang sa mga padudumanan mi dakulang balos. Kami saindang kinugos asin hinadokan, asin sa ibong kan kadikiton nindang pagbuhay, tinawan ninda kami nin marahay na leksion sa Kristianong pagkamatinao.”
Finlandia
Sa ibong kan grabeng pagluya ekonomiko sa Finlandia, lakop na kadaihan nin trabaho, asin mga problema sa pagbuhay, nagin pambihira an pagigin andam kan mga 18,000 na tugang na Finlandes na tabangan an saindang mga tugang sa dating Unyon Sobyet. Nagpadara sinda nin labing 58 toneladas na kakanon sa 4,850 kahon sa St. Petersburg, Estonia, Latvia, Lituania, asin Kaliningrad. Pinano man ninda nin 12 metros kubikong gubing an bakanteng mga lugar sa mga trak. Mga 25 segunda manong kotse asin van an idinonar man tanganing magamit sa gibong pan-Kahadean.
An ibang kahon nin kakanon nakaabot sa sarong kongregasyon nin 14 parahayag sa Slanti sa lugar kan St. Petersburg. Nagpahayag sinda nin dakulang pagpasalamat sa sarong surat. “Igwa kami nin sampulong gurang nang mga tugang na babae sa samong kongregasyon. An dakol sa samo may magabat na helang asin dai kayang pumila nin dakol na oras sa pagkua nin kakanon. Pero an satuyang langitnon na Ama dai kami tinatawan nin dahelan na manluya an boot sa masakit na mga panahon na ini kundi pinapano an samong puso nin kagayagayahan. May ginigibo kaming 43 na pag-adal sa Biblia.” Kan maresibi nin sarong tugang na babae sa St. Petersburg an saiyang paketeng ayuda, napahiro siang marhay na duwang oras sia sa kahihibi bago binukasan iyan.
Denmark
Sa sadit na nasyon na ini sa palaog sa Dagat Baltico, an mga 16,000 na Saksi ni Jehova nagtiripon asin nagpadara sa Ukraine nin 19 trak na may kargang 64 toneladas na kakanon sa 4,200 na kahon; 4,600 na kahon nin de kuwalidad na gubing; asin 2,269 padis nin bagong sapatos. Ipinagamit sa sangang opisina nin sarong tugang sa Alemania an limang trak, na idinonar na nia sa mga tugang sa Ukraine. Kan magpuli, an saro sa mga drayber nagsabi: “Nadiskobre mi na mas dakol an ipinuli mi kisa dinara mi. An pagkamoot asin espiritu nin pagsasakripisyo na ipinaheling kan satong mga tugang sa Ukraine nakapakosog na gayo sa samong pagtubod.”
An mga drayber kinaipuhan na magmaan sa mga parahabon sa mga tinampo sa dating Unyon Sobyet. Mga pirang aldaw bago umagi an saro sa mga trak na Danes, may nangyaring harabonan sa rutang idto. An kumboy nin limang trak na may darang kakanon hale sa saro pang organisasyon na nan-aayuda pinapondo nin mga parahabon na nakahelikopter asin submasinggan. Kinua ninda gabos an limang trak, na binayaan sa gilid nin tinampo an mga drayber. Sa ibong nin siring na mga peligro, an gabos na suplay hale sa sangang opisina nin Denmark nakaabot na ligtas sa mga tugang. Bilang balos, ipinapuli ninda sa sarong drayber an minasunod na surat, na an orihinal nasakitan na marhay na isurat sa Ingles: “Namomotan na mga tugang na Danes: Naresibi mi an saindong ayuda. Babalosan kamo ni Jehova.”
Netherlands
An sangang opisina sa Netherlands nagpadara nin 52 toneladas na kakanon sa 2,600 na pakete. Ihinatod idto sa Ukraine sakay nin duwang magkalaen na kumboy. Sa kada pagduman an anom na trak iwinawalat na, ta iyan idinonar kan mga tugang sa Alemania para sa gibong pan-Kahadean sa Sirangan. An mga tugang sa Ukraine ipinadara an kadaklan na kakanon sa Moscow, Siberia, asin iba pang lugar na dakula an pangangaipo. Dugang pa, may 736 metros kubikong gubing asin sapatos na idinonar an mga tugang na Holandes. Dinara idto sa Lviv sa Ukraine sakay nin 11 trak sa kumboy na may kasabay na sarong kotse.
Pakalihis nin halawig na biyahe sa Alemania asin Polandia, an kumboy madalion na nakaagi sa adwana sa Ukraine, asin nakaabot sa luwas nin Lviv alas 3:00 n.a. An bareta kan mga drayber: “Dai nahaloy, yaon na an 140 tugang na madiskarga sa mga trak. Bago pumoon na magtrabaho, an mapakumbabang mga tugang na ini nagpaheling kan saindang pagsarig ki Jehova, na nagdolot nin sararong pamibi. Pagkatapos kan trabaho, nagtiripon giraray sinda para sa pamibi nin pasasalamat ki Jehova. Pakatapos na kamtan an pag-istimar kan lokal na mga tugang, na abundang nagtao kan kadikit na nasa sainda, ihinatod kami sa mayor na tinampo, na duman namibi sinda sa gilid kan dalan bago kami binayaan.
“Sa halawig na biyahe papuli, kadakol kan samong nagirumdoman—an pagigin mapagpasakat kan mga tugang sa Alemania asin Polandia, asin kan satong mga tugang sa Lviv; an saindang marigon na pagtubod asin mapagngayongayong kaisipan; an saindang pagigin mapagpasakat sa pagtagama nin mga dadagusan asin kakanon mantang sinda mismo nangangaipo; an saindang pagpaheling nin pagkasararo asin pagkadayupot; asin an saindang pagtanaw nin utang na boot. Naisip mi man an samong mga tugang na lalaki asin babae sa sadiri ming nasyon, na daing kaimotan na nagtao.”
Switzerland
An sangang opisina sa Switzerland pinonan an report kaiyan paagi sa pagkotar sa Santiago 2:15, 16: “Kun an sarong tugang na lalaki o babae huba asin kulang nin pagkakan sa aroaldaw, alagad an saro sa saindo nagsasabi sa sainda: ‘Lakaw kamo sa katoninongan, magpakahimbong kamo asin magpakabasog kamo,’ alagad dai man nindo sinda tinatawan kan mga pangangaipo para sa saindang hawak, ano an pakinabang kaiyan?” Dangan ipinadagos kan report: “Suminabong sa isip an Kasuratan na ini kan imbitaran kami kan Namamahalang Grupo nin mga Saksi ni Jehova na tumao nin materyal na tabang sa satong mga tugang na nangangaipo.
“Tolos-tolos nasibot an gabos! Sa laog sana nin duwang aldaw, 12 toneladas na kakanon sa 600 na pakete an ipinadara sa Ukraine paagi sa tolong trak hale sa Alemania, na idinonar sa gibohon duman. An bareta na an gabos ligtas na nakaabot ginikanan nin dakulang kagayagayahan kan samong mga tugang digdi. Mientras tanto, nagtipon nin mga gubing an mga kongregasyon, asin dai nahaloy an samong sangang opisina natahoban nin mga kahon, maleta, asin bag! An mga may laog na gubing sa aki may kaibang mga kawatan hale sa mga aking Suizo para sa dai midbid na mga katood sa Norte. Dakol man na kending tsokolate an ibinugtak sa pag-oltanan nin mga gubing.”
Paano daw ikahahatod an gabos na ini? An report nagsasabi: “Tinabangan kami kan sangang opisina sa Pransia paagi sa pagpagamit samo nin duwang semitrailer asin apat na drayber. Dugang pa, kaipuhan an sarong trak hale sa samong sangang opisina asin apat pa na rogaring nin lokal na mga tugang para sa paghakot sa 72 toneladas pasiring sa Ukraine.” An kumboy, na 150 metros an laba, ligtas na nakaabot sa bodega sa Lviv, na duman naghahalat an mga sanggatos na lokal na tugang sa pagdiskarga sa mga trak. Ibinareta kan mga drayber na dai nagin problema an tataramon ta an saindang mga lalauogon nagpabanaag nin hararom na pag-apresyar.
Austria
An mga tugang sa Austria nagpadara nin 48.5 toneladas na kakanon, 5,114 karton na gubing, asin 6,700 na padis nin sapatos sa Lviv asin Uzhgorod sa Ukraine. Nagpadara man sinda nin 7 toneladas na kakanon, 1,418 kahon na gubing, asin 465 padis nin sapatos sa Belgrade, Mostar, Osijek, Sarajevo, asin Zagreb sa dating Yugoslavia. An report kan sangang opisina nagsasabi: “Igwa kami nin 12 semitrailer na kargado, na nagbiyahe nin 34,000 kilometros. An kadaklan kan pagbiyaheng ini ginibo nin sarong tugang na lalaki asin kan saiyang aki na an negosyo pagbiyahe nin mga trak.”
Kun dapit sa donasyon na mga gubing, an report nagpapadagos: “Ginamit mi an sarong Assembly Hall bilang mayor na bodega. Trak-trak an nag-aabot, sagkod na mayo na nin lugar. Kapareho kaidtong kaaldawan ni Moises, an mga tawo kinaipuhan na pogolan sa pagdara pa. (Exodo 36:6) Minsan an ibang bakong Saksi ni Jehova nagdonar nin kuwarta, ‘ta,’ sabi ninda, ‘paagi kaini aram mi na iyan aakoon kan mga tawong nangangaipo.’ Nakakua man kami nin kaipuhan na marhay na mga basiyong karton sa kinabanon na mga kompanya nin libre.” An mga tugang na lalaki asin babae na naglaenlaen asin nag-impake kan gabos poon 9 sagkod 80 anyos an edad. Hiningoa pa ngani nindang ipadis an angay na kurbata asin polo sa kada amerikana.
Sinasabi kan report: “An mga autoridad sa Austria asin sa mga sagkodan nagin matinabang na marhay sa pagpangyaring magin posible an laen-laen na pagbiyahe nin ayuda asin sa pagtao kan kinakaipuhan na mga papeles tanganing an gabos na paghatod magibo nin mas madali.”
Italia
Hale sa Roma 188 toneladas na kakanon an ipinadara sa duwang darakulang kumboy nin trak na nag-agi sa Austria, Czechoslovakia, asin Polandia pasiring sa dating Unyon Sobyet. An kada kumboy may kaibang anom na drayber, sarong mekaniko, sarong elektrisista sa sasakyan, sarong interprete, sarong paralakaw nin papeles sa pagpaktura, sarong kusinero, sarong doktor, sarong lider sa kumboy na sakay sa dyip, asin sarong tugang na may lunadan na matotorogan.
An kakanon kinua sa pitong kompanya. An sangang opisina nagrireport: “Kan mabaretaan kan mga kompanyang binabakalan mi an dahelan kan proyekto, an iba sa sainda nagmawot na magpartisipar. An nagkapirang gatos na libra nin mga kakanon na gibo sa harina asin bagas, saka mga kahon na bubugtakan, idinonar kan kinabanon na mga kompanya. Igwa man nin nagdonar nin mga gomang pangniyebe para sa mga trak o nag-opresir na magdonar nin kuwarta.
“Inapresyar kan mga tugang sa Italia an oportunidad na ining tumabang. An mga aki gusto man na magkontribuwir. An sarong singko anyos na aking lalaki nagpadara nin kadikit na kontribusyon na linaoman niang makabakal nin ‘sarong lata nin tuna na abot sa langit kalangkaw para sa mga tugang sa Rusya.’ Huli sa haralangkaw niang marka sa eskuwelahan, an sarong aking babae tinawan nin kuwarta kan saiyang mga apoon tanganing ibakal nin regalo para sa saiyang mga magurang. ‘Pero,’ an surat nia, ‘kan maaraman ko na an dakol kong tugang mayo kan masisiram na pagkakan na nasa sako, inisip ko na an pinakamarahay na regalong mababakal ko para sa sakong mga magurang tabangan an mga tugang na iyan.’ Ihinolog nia an darudakulang kuwarta sa kahon nin kontribusyon. ‘Naglalaom akong padagos na makakua nin haralangkaw na marka, tanganing makapadara pa ako nin kuwarta,’ sabi nia.” An report kan sangang opisina tinapos sa pagsabing an mga surat nin mainit na pag-apresyar hale sa mga tugang sa Ukraine, an kadakol na kapahayagan nin pag-apresyar kan mga tugang na Italiano, asin an mararahay na eksperyensia sa pag-andam asin paghatod kan mga suplay nakapahihiro, nakapakokosog, asin nakabobogkos.
Kakanon Para sa Rinibong Delegado
An enot na internasyonal na kombension nin mga Saksi ni Jehova sa dating Unyon Sobyet ginibo sa Istadyum sa Kirov sa St. Petersburg sa Rusya, kan Hunyo 28-30, 1992. An makahulogan na kombension na ini, na may temang “Mga Paradara nin Liwanag,” inatenderan nin labing 46,200 na delegado hale sa 28 nasyon. Iyan nagtao nin saro pang oportunidad na magpaheling nin Kristianong pagkamoot para “sa bilog na kasararoan nin mga tugang.”—1 Pedro 2:17.
An tonetoneladang kakanon hale sa Denmark, Finlandia, Sweden, asin iba pang nasyon sa Solnopan na Europa iwinaras nin libre sa rinibong delegado sa kombension hale sa dating U.S.S.R., na pagkakan ninda sa panahon kan kombension. Kan pahale na sinda sa kombension pakatapos kan ultimong sesyon, tinawan man sinda nin pakete nin pagkakan na may kaibang balon para sa saindang pagbiyahe papuli.
An mga report na nasabihan digdi nagpapaheling na bako sanang sarong direksion an pagtao—na pasirangan—sana. Nagkaigwa nin pagtinaohan. Kakanon asin gubing pasirangan, iyo, pero pasolnopan an kadakol na nakapaoogma sa pusong mga kapahayagan nin pagkamoot asin nakapakokosog sa pagtubod na mga eksperyensia na nagpapabanaag kan paghihingoa asin kaimbodan nin rinibong parasamba ki Jehova sa laog nin dakol na dekada nin pangigipit asin kasakitan. Kaya, an man-ibong-ibong na lado nakaeksperyensia kan katotoohan kan mga tataramon ni Jesus: “Igwang orog na kaogmahan sa pagtao kisa sa pag-ako.”—Gibo 20:35.
[Diagram/Ritrato sa pahina 21]
1. Hale sa Finlandia: St. Petersburg, Rusya; Tallinn asin Tartu, Estonia; Riga, Latvia; Vilnius asin Kaunas, Lituania; Kaliningrad, Rusya; Petrozavodsk, Karelia
2. Hale sa Netherlands: Lviv, Ukraine
3. Hale sa Sweden: St. Petersburg, Rusya; Lviv, Ukraine; Nevinnomyssk, Rusya
4. Hale sa Denmark: St. Petersburg, Rusya; Lviv, Ukraine
5. Hale sa Austria: Lviv, Ukraine; Belgrade, Mostar, Osijek, Sarajevo, Zagreb (sa dating Yugoslavia)
6. Hale sa Switzerland: Lviv, Ukraine
7. Hale sa Italia: Lviv, Ukraine
[Mga Ritrato sa pahina 23]
Karton-karton na mga gubing sa sangang opisina sa Sweden
Pagkarga kan mga ayuda
Mga kakanon sa laog nin sarong pakete
Bekon asin hamon hale sa Denmark
Kumboy nin 11 trak asin 1 kotse
Mga pakete asin maleta sa sangang opisina sa Austria
Pagdiskarga nin trak sa Lviv, Ukraine