Kapahayagan—An Mamuraway na Kulminasyon Kaiyan Harani Na

Kasumpay kan Kapitulo 15: “Siisay an Angay na Bumuka sa Balumbon?”

Sarong Langitnon na Koro

20. Anong awit nin pag-omaw sa Kordero an nadadangog ngonyan?

²⁰ Ano an reaksion kan iba sa mahiwas na langitnon na hukbo kan organisasyon ni Jehova sa bagong awit na ini? Ikinaogma ni Juan na maheling an saindang odok na pag-oyon: “Asin ako nakaheling, asin ako nakadangog nin tingog nin dakol na anghel sa palibot kan trono asin kan buhay na mga linalang asin kan mga magurang, asin an kabilangan ninda manampulong ribo nin manorosampulong ribo asin rinibo nin manriboribo, na nagsasabi sa makosog na tingog: ‘An Kordero na ginadan angay na mag-ako kan kapangyarihan asin kayamanan asin kadonongan asin kosog asin dangog asin kamurawayan patin pag-omaw.’” (Kapahayagan 5:​11, 12) Pambihira nanggad ining awit nin pag-omaw!

21. An pag-omaw daw sa Kordero nakaiina sa soberaniya o posisyon ni Jehova? Ipaliwanag.

²¹ Ini daw nangangahulogan na ngonyan sinalidahan na ni Jesus si Jehova Dios asin na sia na an inoomaw kan gabos na linalang imbes na an saiyang Ama? Dai nanggad! Imbes, an awit na ini nin pag-omaw kaoyon kan isinurat ni apostol Pablo: “Ilinangkaw [si Jesus] nin Dios sa superyor na kamugtakan asin may kabootan na itinao saiya an ngaran na halangkaw kisa lambang ibang ngaran, tanganing sa ngaran ni Jesus an lambang tuhod lumuhod kaidtong mga nasa langit asin sa daga asin mga nasa irarom kan daga, asin an lambang dila hayag na magmidbid na si Jesu-Cristo iyo an Kagurangnan para sa kamurawayan nin Dios na Ama.” (Filipos 2:​9-11) Inoomaw digdi si Jesus huli sa saiyang kabtang sa paghusay sa pangenot na isyu na nasa atubangan kan gabos na linalang​—an pagkabindikar sa may diretsong soberaniya ni Jehova. Kanigoan na kamurawayan nanggad an itinao kaini sa saiyang Ama!

Nakapahihirong Awit

22. Sa anong awit minaiba an mga tingog hale sa daga?

²² Sa eksenang ilinadawan ni Juan, an mga hukbo sa langit nagtatao nin magayon an tonong pag-omaw ki Jesus bilang pagmidbid sa saiyang kaimbodan asin sa saiyang langitnon na autoridad. Digdi, sinda iniibanan nin mga tingog hale sa daga mantang an mga ini man nakikakabtang sa pag-omaw kapwa sa Ama asin sa Aki. Kun paanong an mga nagigibo nin sarong aking tawo nakatatao nin dakulang kaomawan sa mga magurang, siring man an kaimbodan ni Jesus minasagkod sa “kamurawayan nin Dios na Ama” sa tahaw nin gabos na linalang. Kaya, si Juan nagpapadagos sa pagbareta: “Asin an gabos na linalang na yaon sa langit asin nasa ibabaw nin daga asin nasa irarom nin daga patin nasa dagat, asin an gabos na bagay na yaon dian, nadangog kong nagsasarabi: ‘Sa Saro na nagtutukaw sa trono asin sa Kordero mapasainda an kaomawan asin an kagalangan asin an kamurawayan patin an kakosogan sagkod noarin pa man.’”​—Kapahayagan 5:13.

23, 24. (a) Ano an nagpaparisa kun noarin mapoon sa langit an pag-awit, asin kun noarin sa ibabaw nin daga? (b) Paano nagkokosog an awit sa pag-agi nin mga taon?

²³ Noarin madadangog an magayonon na awit na ini? Iyan nagpoon sa pagpopoon kan aldaw kan Kagurangnan. Pakatapos na si Satanas asin an saiyang mga demonyo pinalayas sa kalangitan, “an gabos na linalang na yaon sa langit” puwede nang magsararo sa pag-awit na ini nin pag-omaw. Asin, arog kan ipinaheheling kan rekord, magpoon kan 1919 an nagdadakol na kadaklan sa ibabaw nin daga pinagsararo an saindang tingog sa pag-omaw ki Jehova, na nagdadakol magpoon sa pirang ribo sagkod sa labing apat na milyon kan enot na mga taon nin 1990.a Pagkalaglaga sa daganon na palakaw ni Satanas, “an gabos na linalang na . . . nasa ibabaw nin daga” mag-aawit nin mga pag-omaw ki Jehova asin sa saiyang Aki. Sa itinalaan na panahon ni Jehova, mapoon an pagbuhay liwat sa dai mabilang na minilyon na gadan, dangan “an gabos na linalang na . . . nasa irarom nin daga” na nasa paggirumdom nin Dios magkakaoportunidad na umiba sa pag-awit kan awit na iyan.

²⁴ Ngonyan pa, “magpoon sa kaporoporohi kan daga, dagat asin . . . mga isla,” minilyon na tawo an nag-aawit nin bagong awit kaasosyar kan panglobong organisasyon ni Jehova. (Isaias 42:​10; Salmo 150:​1-6) An magayagayang pag-omaw na ini maabot sa pinakamakosog sa katapusan kan Milenyo, kun an katawohan nadara na sa pagkasangkap. An gurang na Halas na iyan, an pinakadeprimerang paradaya, si Satanas mismo, lalaglagon bilang lubos na kaotoban kan Genesis 3:​15, asin sa mapangganang kulminasyon, an gabos na buhay na linalang, espiritu asin tawo, maawit nin durungan: “Sa Saro na nagtutukaw sa trono asin sa Kordero mapasainda an kaomawan asin an kagalangan asin an kamurawayan patin an kakosogan sagkod noarin pa man.” Dai magkakaigwa nin tingog na nagkokontra sa bilog na uniberso.

25. (a) An pagbasa sa tala ni Juan manongod sa unibersal na awit nagpapahiro sato na gibohon an ano? (b) Anong marahayon na halimbawa an itinatao sa sato kan apat na buhay na linalang asin kan 24 magurang sa pagtatapos kan bisyon?

²⁵ Iyan magigin magayagaya nanggad na panahon! Tunay na an ilinaladawan digdi ni Juan nagpapataba sa satong puso huli sa kaogmahan asin nagpapahiro sato na umiba sa langitnon na mga hukbo sa pag-awit nin odok sa pusong mga pag-omaw ki Jehova Dios asin ki Jesu-Cristo. Bako daw na kita orog na determinado kisa kasuarin pa man na magtagal sa tamang mga gibo? Kun gigibohon niato iyan, makalalaom kita na, sa tabang ni Jehova, an lambang saro sa sato yaon duman sa maogmang kulminasyon, na idinudugang an satong tingog sa unibersal na korong iyan nin pag-omaw. Tunay na an apat na buhay na linalang na mga kerubin asin an binuhay liwat na linahidan na mga Kristiano biyong oyon, ta an bisyon natatapos sa mga tataramon na: “Asin an apat na buhay na linalang nagsarabi: ‘Auot pa!’ asin an mga magurang nagralaob asin nagsaramba.”​—Kapahayagan 5:14.

26. Sa ano kita maninigong tumubod, asin an Kordero nag-aandam na gibohon an ano?

²⁶ Kamo logod, namomotan na parabasa, magkaigwa nin pagtubod sa atang kan Kordero​—an ‘angay na saro’—​asin bendisyonan sa saindong mapakumbabang mga paghihingoa na sumamba asin maglingkod ki Jehova​—an “Saro na nagtutukaw sa trono.” Patabang kamo ngonyan sa grupong Juan mantang iyan nagtatagama kan kinakaipuhan na espirituwal na “kakanon sa igong panahon.” (Lucas 12:42) Alagad helinga! An Kordero nag-aandam na buksan an pitong tatak. Ano daw na makaoogmang mga kapahayagan an natatagama sa sato ngonyan?

[Nota sa Ibaba]