Binalosan kan “Korona nin Buhay”
SA ANGHEL kan kongregasyon sa Smirna, pinasurat si apostol Juan: “Patunayan mo na ika maimbod sagkod sa kagadanan, asin ta itatao ko sa saimo an korona nin buhay.” (Kapahayagan 2:8, 10) Kun siring, kapwa makamomondo asin makaoogma na ipinaiisi digdi na si Frederick William Franz, presidente kan Watch Tower Bible and Tract Society of Pennsylvania, kan Watchtower Bible and Tract Society of New York, Inc., saka nin nagkapira pang ibang teokratikong organisasyon, tinapos an saiyang daganon na buhay kan aga nin Disyembre 22, 1992.
Iyan makamomondong paisi ta ibinabareta kaiyan an katapusan kan daganon na mga aktibidad nin sarong namomotan na marhay asin pambihira sa kaimbodan na lingkod ni Jehova. Pero, iyan makaoogma man na paisi ta aplikado na ngonyan sa namomotan niatong si Tugang na Franz an mga tataramon kan Kapahayagan 14:13: “Maogma an mga gadan na nagagadan na kasaro kan Kagurangnan poon sa panahon na ini padagos. Iyo, sabi kan espiritu, magpahingalo na sinda sa saindang mga pagpapagal, huli ta an mga bagay na saindang ginibo kaibanan ninda.” Si Tugang na Franz hababa an boot asin mapakumbaba, mahigos asin mabungang marhay na ministro na ginamit ni Jehova Dios sa mapangyaring paagi bilang miembro kan “maimbod asin madonong na oripon” sa pagtabang sa pagtagama nin espirituwal na kakanon para sa “mga domestiko” asin sa saindang kairiba.—Mateo 24:45-47.
Si Tugang na Franz namundag kan Setyembre 12, 1893, sa Covington, Kentucky. Nadangog nia an manongod sa katotoohan paagi sa matua niang tugang. Kaidto nag-eeskuwela sia sa Unibersidad nin Cincinnati, na nag-aandam na magin ministrong Presbiteriano. Imbes, suminiblag sia sa Iglesia Presbiteriano asin nakiasosyar sa Mga Estudyante sa Biblia, na apod kaidto sa mga Saksi ni Jehova. Nabautismohan sia kan Nobyembre 30, 1913, asin kan sumunod na taon, naghale sia sa unibersidad asin naglaog sa gibong colporteur (pagpayunir). Kan Hunyo 1, 1920, sia nagin miembro kan pamilyang Bethel sa Brooklyn. Dai nahaloy, ibinugtak siang mamahala sa mga aktibidad kan mga colporteur, asin kan 1926, ibinalyo sia sa departamento editoryal, na dian sia mabungang marhay na naglingkod. Kan 1945 sia nagin bise presidente kan Watch Tower Society asin iba pang asosyadong organisasyon. Kan magadan an presidente kaidto, si Nathan H. Knorr, kan 1977, nagin sia presidente kan Watch Tower Society, katongdan na pinaglingkodan nia sagkod sa saiyang kagadanan. Sa saiyang buhay, naheling ni Tugang na Franz na dumakol an mga Saksi ni Jehova poon sa pirang ribo sagkod sa mga apat may kabangang milyon. Nagkamit sia nin kadakol na pribilehiyo sa paglilingkod, kaiba an pagpahayag sa internasyonal na mga kombension asin pagsongko sa mga sangang opisina asin erokan nin mga misyonero sa dakol na parte kan kinaban. An kasaysayan kan saiyang buhay nagluwas sa Mayo 1, 1987 na The Watchtower.
Kan Lunes na banggi, Disyembre 28, 1992, ginibo an pahayag sa gadan sa Kingdom Hall kan Bethel sa Brooklyn. Itinao an mainiton asin nakapakokosog sa espirituwal na pahayag ni Tugang na Albert D. Schroeder kan Namamahalang Grupo. Konektado paagi sa telepono an mga pamilyang Bethel sa Watchtower Farms, Patterson, Mountain Farm, asin Kingdom Farm, saka an pamilyang Bethel sa sangang opisina sa Canada.
An gabos, nangorogna an kairiba nia sa trabaho, mapupungaw na marhay ki Tugang na Franz. Sia mapagsabot, nakapakokosog, asin pasensioso sa gabos na kaiba nia sa paglilingkod asin pagbibiyahe. Tunay nanggad, an reaksion sa saiya nin mga kapagtubod sa espiritu kan Hebreo 13:7: “Girumdoma nindo idtong mga nangengenot saindo, na nagsabi saindo kan tataramon nin Dios, asin mantang pinaghohorophorop nindo an saindang gawe aroga nindo an saindang pagtubod.”
Kan Disyembre 30, 1992, si Tugang na Milton G. Henschel napili na ikalimang presidente kan Sosyedad na masalihid ki Tugang na Franz.
[Mga ritrato sa pahina 31, 32]
Si Frederick W. Franz kan 1913
Sa pabrika kan Sosyedad sa Myrtle Avenue kan 1920
Kaiba ni Nathan H. Knorr sa Yankee Stadium kan 1953