Kapahayagan—An Mamuraway na Kulminasyon Kaiyan Harani Na

Kapitulo 19: Pagtatak sa Israel nin Dios

Bisyon 4—Kapahayagan 7:1-17

Tema: Tinatakan an 144,000, asin an dakulang kadaklan naheling na nagtitindog sa atubangan kan trono ni Jehova asin kan Kordero

Panahon nin kaotoban: Magpoon kan pagtukaw ni Cristo Jesus sa trono kan 1914 sagkod sa saiyang Milenyal na Pamamahala

1. “Siisay an makatatagal” durante kan dakulang aldaw nin banal na kaanggotan?

“Siisay an makatatagal?” (Kapahayagan 6:17) Iyo, siisay man nanggad? Kun an dakulang aldaw kan banal na kaanggotan laglagon na an sistema ni Satanas, an mga namamahala asin mga banwaan kan kinaban puwede nanggad na maghapot kaiyan. Para sa sainda an nagdadangadang na dakulang kalaglagan na iyan mapoho sa gabos na buhay nin tawo. Alagad siring daw? Makaoogma, sinisierto sato kan propeta nin Dios: “An gabos na mag-arang sa ngaran ni Jehova makaliligtas.” (Joel 2:32) Pinatunayan ni apostol Pedro asin Pablo an katotoohan na iyan. (Gibo 2:​19-21; Roma 10:13) Iyo, idtong mga nag-aarang sa ngaran ni Jehova an mga makaliligtas. Sairisay an mga ini? Mantang nabubukasan an masunod na bisyon, maheheling niato.

2. Taano ta pambihira na magkakaigwa nin mga makaliligtas sa aldaw nin paghokom ni Jehova?

² Tunay nanggad na pambihira na an siisay man makaligtas na buhay sa aldaw nin paghokom ni Jehova, huli ta saro pa sa mga propeta nin Dios an nagladawan kaini sa mga tataramon na ini: “Uya! An bagyo ni Jehova, an kaanggotan mismo, nagluwas, an daing ontok na ariporos. Sa payo kan mga maraot mahoyop ini. An naglalaad na kaanggotan ni Jehova dai masibog sagkod na magadan nia asin sagkod na magibo nia an mga ideya kan saiyang puso.” (Jeremias 30:​23, 24) Apuradong gumibo kita nin mga paagi tanganing makaligtas sa bagyong iyan!​—Talinhaga 2:​22; Isaias 55:​6, 7; Sofonias 2:​2, 3.

An Apat na Doros

3. (a) Anong espesyal na paglilingkod na ginigibo kan mga anghel an naheheling ni Juan? (b) Ano an isinisimbolo kan “apat na doros”?

³ Bago butasan ni Jehova an kabangisan na ini, an langitnon na mga anghel naggigibo nin espesyal na paglilingkod. Naheheling ini ngonyan ni Juan sa bisyon: “Pakalihis kaini ako nakaheling nin apat na anghel na nagtitindog sa apat na kanto kan daga, na nagpopogol sa apat na doros kan daga, tanganing dai nin doros na maghoyop sa daga o sa dagat o sa arin man na kahoy.” (Kapahayagan 7:​1) Ano an boot sabihon kaini para sa sato ngonyan? An “apat na doros” na ini malinaw na simbolo nin nakalalaglag na paghokom na bubutasan na sa maraot na daganon na sosyedad, sa mabalodon na “dagat” nin tampalasan na katawohan, asin sa mapalangkaw na arog-kahoy na mga namamahala na nagkukua nin suporta asin tabang sa mga tawo sa kinaban.​—Isaias 57:​20; Salmo 37:​35, 36.

4. (a) Ano an irinirepresentar kan apat na anghel? (b) Ano an magigin epekto sa daganon na organisasyon ni Satanas kun butasan na an apat na doros?

⁴ Mayong duwa-duwa, an apat na anghel na ini nagrirepresentar sa apat na grupo nin mga anghel, na ginagamit ni Jehova tanganing pogolan an paghokom sagkod sa itinalaan na panahon. Kun butasan na kan mga anghel an mga doros nin banal na kaanggotan tanganing sarabay na maghoyop hale sa amihanan, timog, sirangan, asin solnopan, an kalaglagan magigin dakulaon. Makaaagid ini, alagad sa dakulaon na sokol, sa paggamit ni Jehova kan apat na doros tanganing iwarak an suanoy na mga Elamita, na rinoronot asin pinopoho sinda. (Jeremias 49:​36-38) Iyan magigin grabe nanggad na doros nin bagyo na orog na gayong mapanlaglag kisa sa “ariporos” na ipinanlaglag ni Jehova sa nasyon nin Amon. (Amos 1:​13-15) Mayong kabtang kan organisasyon ni Satanas digdi sa daga an makatatagal sa aldaw nin kabangisan ni Jehova, kun ibindikar na nia an saiyang soberaniya sagkod lamang.​—Salmo 83:​15, 18; Isaias 29:​5, 6.

5. Paano nakatatabang sato an hula ni Jeremias na masabotan na apektado kan mga paghokom nin Dios an bilog na daga?

⁵ Makasisierto daw kita na an mga paghokom nin Dios makalalaglag sa bilog na daga? Magdangog liwat sa saiyang propetang si Jeremias: “Uya! Sarong kalamidad an maabot hale sa sarong nasyon pasiring sa sarong nasyon, asin malataw an sarong dakulang bagyo hale sa kaporoporohi kan daga. Asin an pangagaradanon ni Jehova sa aldaw na iyan paghale sa sarong poro kan daga sagkod sa ibong na poro kan daga.” (Jeremias 25:​32, 33) Durante kan makosogon na bagyong ini na an dagang ini mapapatos nin kadikloman. An namamahalang mga ahensia kaini matatanyog sagkod sa malingawan na. (Kapahayagan 6:​12-14) Alagad an ngapit dai magigin madiklom para sa gabos. Kun siring, para kiisay na pinopogolan an apat na doros?

An Pagtatak sa mga Oripon nin Dios

6. Siisay an nagsasabi sa mga anghel na pogolon an apat na doros, asin para sa ano ini nagtao nin panahon?

⁶ Padagos na ilinadawan ni Juan kun paano an iba tinatakan para sa kaligtasan, na nagsasabi: “Asin ako nakaheling nin saro pang anghel na nag-iitaas hale sa sirangan, na igwa nin tatak kan buhay na Dios; asin sia nagkurahaw sa halangkaw na tingog sa apat na anghel na tinogotan na magratak kan daga asin kan dagat, na an sabi: ‘Dai nindo pagratakan an daga o an dagat o an mga kahoy, sagkod na dai pa niamo natatatakan an mga oripon kan satong Dios sa saindang angog.’ ”​—Kapahayagan 7:​2, 3.

7. Siisay man nanggad an ikalimang anghel, asin anong ebidensia an nakatatabang sato na patunayan kun siisay sia?

⁷ Minsan ngani dai nginaranan an ikalimang anghel na ini, an gabos na ebidensia nagpapaheling na sia an pinamuraway na Kagurangnan na Jesus. Huli sa pagigin Arkanghel ni Jesus, ipinaheling sia digdi na igwa nin autoridad sa iba pang anghel. (1 Tesalonica 4:​16; Judas 9) Nag-iitaas sia hale sa sirangan, siring “kan mga hade na hale sa pagsirang kan aldaw”​—si Jehova asin an saiyang Cristo—​na nagdatong sa paghokom, siring kan ginibo kan mga hadeng si Dario asin Ciro kan ibagsak ninda an suanoy na Babilonya. (Kapahayagan 16:​12; Isaias 45:​1; Jeremias 51:​11; Daniel 5:31) An anghel na ini nakaaagid man ki Jesus huli ta sia pinaniwalaan na tatakan an linahidan na mga Kristiano. (Efeso 1:​13, 14) Dugang pa, kun butasan na an mga doros, si Jesus an mangengenot sa langitnon na hukbo sa paghokom sa mga nasyon. (Kapahayagan 19:​11-16) Makatanosan kun siring na si Jesus an magboot na pogolon nguna an paglaglag sa daganon na organisasyon ni Satanas sagkod na matatakan an mga oripon nin Dios.

8. Ano an pagtatak, asin kasuarin ini nagpoon?

⁸ Ano an pagtatak na ini, asin sairisay an mga oripon na ini nin Dios? An pagtatak nagpoon kan Pentecostes 33 C.E. kan linahidan nin banal na espiritu an enot na Judiong mga Kristiano. Dangan, an Dios nagpadagos na apodon asin lahidan “an mga tawo nin mga nasyon.” (Roma 3:​29; Gibo 2:​1-4, 14, 32, 33; 15:14) Nagsurat si apostol Pablo dapit sa pagkaigwa nin linahidan na mga Kristiano nin garantiya na sinda “sadiri ni Cristo” asin idinugang na an Dios “nagbugtak man kan saiyang tatak sa sato asin nagtao sa sato kan garantiya para sa maabot, arin na baga, an espiritu, sa satong puso.” (2 Corinto 1:​21, 22; ikomparar an Kapahayagan 14:1.) Kaya, kun an mga oripon na ini inaampon bilang espirituwal na mga aki nin Dios, patienot sindang nag-aako nin patotoo kan saindang langitnon na mana​—sarong tatak, o garantiya. (2 Corinto 5:​1, 5; Efeso 1:​10, 11) Dangan puwede nindang masabi: “An espiritu man sana nagpapatotoo kaiba kan satong espiritu na kita mga aki nin Dios. Kun siring, kun kita mga aki, kita man mga paramana: mga paramana nin Dios, alagad kapwa mga paramana ni Cristo, basta kita iribang magtios tangani man kitang iribang mapamuraway.”​—Roma 8:​15-17.

9. (a) Pakatagal sa ano an hinahagad sa kabtang kan mga natatada kan pinaniaki sa espiritung mga aki nin Dios? (b) Gurano kahaloy magpapadagos an pagbalo sa mga linahidan?

⁹ “Basta kita iribang magtios”​—ano an boot sabihon kaiyan? Tanganing akoon an korona nin buhay, an linahidan na mga Kristiano maninigong makatagal, maimbod minsan sagkod sa kagadanan. (Kapahayagan 2:10) Bako ining ‘oras na maligtas, permi nang ligtas.’ (Mateo 10:​22; Lucas 13:24) Imbes, sinasadol sinda: “Gibohon an saindong bilog na makakaya tanganing masierto an pag-apod asin pagpili sa saindo.” Siring ki apostol Pablo, sa katapustapusi maninigong masabi ninda: “Nakipaglaban ako kan marahay na pakilaban, natapos ko an paorumbasan, naingatan ko an pagtubod.” (2 Pedro 1:10, 11; 2 Timoteo 4:​7, 8) Kaya kaipuhan na magpadagos digdi sa daga an pagbalo asin pagsaligsig sa natatada kan pinaniaki sa espiritung mga aki nin Dios sagkod na marigon na ikabugtak ni Jesus asin kan saiyang kairibang mga anghel an tatak ‘sa angog’ kan gabos na ini, na nagpapamidbid sainda nin sierto, dai maliliwat, bilang nabalo asin maimbod na “mga oripon kan satong Dios.” Dangan an tatak na iyan nagigin permanenteng tanda. Malinaw na, kun butasan na an apat na doros kan kahorasaan, an gabos sa espirituwal na Israel natatakan na nin sierto, minsan an nagkapira nabubuhay pa sa laman. (Mateo 24:​13; Kapahayagan 19:7) An bilog na kabilangan nin miembro magigin kompleto!​—Roma 11:​25, 26.

Pira an Tinatakan?

10. (a) Anong mga kasuratan an nagpapaheling na limitado an bilang kan mga tinatakan? (b) Ano an total na bilang kan mga tinatakan, asin paano sinda ilinista?

¹⁰ Sinabi ni Jesus sa mga nalilinya para sa pagtatak na ini: “Dai kamo matakot, sadangoton na aripompon, huli ta an saindong Ama nag-oyon na itao sa saindo an kahadean.” (Lucas 12:32) An ibang kasuratan, siring kan Kapahayagan 6:​11 asin Roma 11:​25, nagpapaheling na an bilang kan sadangoton na aripompon na ini limitado nanggad asin, sa katunayan, patienot nang dineterminaran. An masunod na mga tataramon ni Juan nagpapatunay kaini: “Asin nadangog ko an kabilangan kan mga tinatakan, sanggatos may apat na polo may apat na ribo, na tinatakan hale sa lambang tribo kan mga aki ni Israel: Hale sa tribo ni Juda kagduwang ribo an tinatakan; hale sa tribo ni Ruben kagduwang ribo; hale sa tribo ni Gad kagduwang ribo; hale sa tribo ni Aser kagduwang ribo; hale sa tribo ni Neftali kagduwang ribo; hale sa tribo ni Manases kagduwang ribo; hale sa tribo ni Simeon kagduwang ribo; hale sa tribo ni Levi kagduwang ribo; hale sa tribo ni Isacar kagduwang ribo; hale sa tribo ni Zabulon kagduwang ribo; hale sa tribo ni Jose kagduwang ribo; hale sa tribo ni Benjamin kagduwang ribo an tinatakan.”​—Kapahayagan 7:​4-8.

11. (a) Taano an pagkasambit sa 12 tribo ta bakong aplikado sa literal, sa laman na Israel? (b) Taano ta ilinilista kan Kapahayagan an 12 tribo? (c) Taano ta mayo nin esklusibong makahade o makasaserdoteng tribo sa Israel nin Dios?

¹¹ Dai daw ini nagtotokdo sa literal, sa laman na Israel? Dai, huli ta an Kapahayagan 7:​4-8 dai na sinunod an dating paglista nin mga tribo. (Bilang 1:​17, 47) Malinaw nanggad na an paglista digdi bakong sa katuyohan na ngaranan an mga Judio sa laman paagi kan saindang mga tribo kundi tanganing ipaheling an kaagid na organisasyonal na estruktura kan espirituwal na Israel. Timbang ini. Magkakaigwa sana nin eksaktong 144,000 na miembro an bagong nasyon na ini​—12,000 hale sa lambang saro kan 12 tribo. Mayong tribo sa Israel nin Dios na ini na esklusibong makahade o makasaserdote. An bilog na nasyon mamamahala bilang mga hade, asin an bilog na nasyon maglilingkod bilang mga saserdote.​—Galacia 6:​16; Kapahayagan 20:​4, 6.

12. Taano ta angay na an 24 magurang umawit sa atubangan kan Kordero kan mga tataramon sa Kapahayagan 5:9, 10?

¹² Minsan ngani an natural na mga Judio asin Judiong mga proselita an tinawan nin enot na oportunidad na pilion para sa espirituwal na Israel, minoriya sana kan nasyon na iyan an naghimate. Kaya ipinaabot ni Jehova an imbitasyon sa mga Hentil. (Juan 1:​10-13; Gibo 2:​4, 7-11; Roma 11:7) Siring sa kamugtakan kan mga taga-Efeso, na kaidto “isiniblag sa estado nin Israel,” ngonyan an mga bakong Judio puwede nang tatakan kan espiritu nin Dios asin magin kabtang kan kongregasyon kan linahidan na mga Kristiano. (Efeso 2:​11-13; 3:​5, 6; Gibo 15:14) Angay kun siring na an 24 magurang umawit sa atubangan kan Kordero: “Paagi kan saimong dugo binakal mo an mga tawo manongod sa Dios hale sa lambang tribo asin tataramon asin banwaan patin nasyon, asin ginibo mo sinda na mani kahadean asin mga saserdote kan satuyang Dios, asin sinda magsasakop bilang hade sa daga.”​—Kapahayagan 5:​9, 10.

13. Taano ta angay sana na isurat kan tugang sa ina ni Jesus na si Santiago an saiyang surat “sa kagduwang tribo na wararak”?

¹³ An Kristianong kongregasyon “rasang pinili, makahadeng pagkasaserdote, banal na nasyon.” (1 Pedro 2:9) Sa pagsalihid sa natural na Israel bilang nasyon nin Dios, ini nagigin bagong Israel na iyo an “tunay na ‘Israel.’ ” (Roma 9:​6-8; Mateo 21:43)a Huli sa rason na ini, angay sana para sa tugang sa ina ni Jesus na si Santiago na isurat an saiyang pankongregasyon na surat “sa kagduwang tribo na wararak,” an boot sabihon, sa pambilog na kinaban na kongregasyon nin linahidan na mga Kristiano na sa maabot na panahon magigin 144,000.​—Santiago 1:1.

(Ipagpapadagos sa masunod na luwas.)

[Nota sa Ibaba]