Kapahayagan—An Mamuraway na Kulminasyon Kaiyan Harani Na

Kasumpay kan Kapitulo 18: Mga Linog sa Aldaw kan Kagurangnan

“An Langit” Nahale

21. Sa saiyang bisyon, ano an naheheling ni Juan dapit sa “langit” asin “gabos na bukid asin gabos na isla”?

²¹ An bisyon ni Juan nagpapadagos: “Asin an langit nahale na siring sa balumbon na linululon, asin an gabos na bukid asin gabos na isla hinale sa saindang mga kamugtakan.” (Kapahayagan 6:​14) Malinaw na bako ining literal na kalangitan o literal na mga bulod asin isla. Alagad ano an isinisimbolo kaiyan?

22. Sa Edom anong klaseng “kalangitan” an “malululon, siring sa balumbon nin libro”?

²² Mapadapit sa “langit,” matatabangan kita sa pakasabot niato nin kaagid na hula na nagsasabi kan kaanggotan ni Jehova tumang sa gabos na nasyon: “Asin an gabos na nasa hukbo kan kalangitan magkakaralapa. Asin an kalangitan malululon, siring sa balumbon nin libro.” (Isaias 34:4) An Edom partikularmente maninigong magtios. Paano? Dinaog sia kan mga taga-Babilonya pakatapos tolos kan kalaglagan kan Jerusalem kan 607 B.C.E. Kan panahon na iyan, mayo nin pambihirang mga bagay na ibinaretang nangyari sa literal na kalangitan. Alagad igwa nin mga pangyayari nin biyong kalaglagan sa “kalangitan” kan Edom.a An saiyang mga kapangyarihan sa gobyerno nin tawo ibinaba hale sa saindang halangkaw, siring sa langit na kamugtakan. (Isaias 34:5) ‘Linulon’ iyan asin garo baga iginilid, siring sa daan na balumbon na dai na magagamit nin siisay man.

23. Ano “an langit” na ‘mahahale na siring sa balumbon,’ asin paano an mga tataramon ni Pedro nagpapatunay sa pakasabot na ini?

²³ Kaya, an “langit” na “nahale na siring sa balumbon” nagtotokdo sa tumang sa Dios na mga gobyerno na namamahala sa ibabaw kaining daga. Hahaleon sinda nin lubos kan nandadaog sa gabos na Nakasakay sa maputing kabayo. (Kapahayagan 19:​11-16, 19-21) Pinatunayan ini kan sinabi ni apostol Pedro kan tanawon nia an mga pangyayari na ilinadawan kan pagbubukas kan ikaanom na tatak: “An kalangitan asin daga ngonyan itinagama sa kalayo asin inaandam sa aldaw nin paghokom asin kalaglagan kan maraot na mga tawo.” (2 Pedro 3:7) Alagad ano an boot sabihon kan mga tataramon na, “an gabos na bukid asin gabos na isla hinale sa saindang mga kamugtakan”?

24. (a) Noarin, sa hula kan Biblia, sinasabing an mga bukid asin mga isla magkukunogkunog o mapupukan? (b) Paano “nagkunogkunog an mga bukid” kan bumagsak an Ninive?

²⁴ Sa hula kan Biblia, sinasabing an mga bukid asin isla magkukunogkunog o mapupukan sa mga panahon nin darakulang politikal na kariribokan. Bilang halimbawa, sa paghula kan mga paghokom ni Jehova tumang sa Ninive, nagsurat si propeta Nahum: “Nagkunogkunog an mga bukid huli sa saiya, asin an mismong mga bulod nagkaturunaw. Asin an daga mariribok huli kan saiyang lalauogon.” (Nahum 1:5) Mayong rekord nin ano man na pagkagaba nin literal na mga bukid kan aktuwal na bumagsak an Ninive kan 632 B.C.E. Alagad an kapangyarihan pankinaban na kan dati garo siring sa bukid an kapangyarihan kaini biglang natumpag.​—Ikomparar an Jeremias 4:24.

25. Sa madatong na katapusan kan sistemang ini nin mga bagay, paano magkakaharale sa saindang mga lugar an “gabos na bukid asin gabos na isla”?

²⁵ Kaya, an “gabos na bukid asin gabos na isla” na sinambit sa pagbubukas kan ikaanom na tatak rasonable sanang an politikal na mga gobyerno asin nagdedependeng mga organisasyon kan kinaban na ini na garo marigon na gayo sa pagheling kan kadaklan sa katawohan. Mahahale an mga ini sa saindang mga puwesto, na ikangangalas asin ikatatakot kaidtong kan dati mga nananarig sa sainda. Siring kan padagos na isinaysay kan hula, mayong pagduwaduwa na an dakulang aldaw kan kaanggotan ni Jehova asin kan saiyang Aki​—an pangultimong paglinog na maghahale kan bilog na organisasyon ni Satanas—​nagdatong na may pagbalos!

“Rumpagi Kami Nindo Asin Tagoa Kami Nindo”

26. Paano mahiro an mga tawong tumang sa soberaniya nin Dios huli sa saindang grabeng takot, asin anong kapahayagan nin grabeng takot an masasambit ninda?

²⁶ An mga tataramon ni Juan nagpadagos: “Asin an mga hade kan daga asin an mga pinakanamomoon saka an mga komandante militar asin an mayayaman asin makokosog asin an gabos na oripon asin gabos na hiwas nagtarago sa mga lungib asin sa mga gapo kan mga bukid. Asin sinda nagsarabi sa mga bukid asin sa mga gapo: ‘Rumpagi kami nindo asin tagoa kami nindo sa lalauogon kan Saro na nagtutukaw sa trono asin sa kaanggotan kan Kordero, huli ta an dakulang aldaw kan saindang kaanggotan nagdatong na, asin siisay an makatatagal?’”​—Kapahayagan 6:​15-17.

27. Anong mga agrangay an nasambit kan bakong maimbod na mga Israelita sa Samaria, asin paano naotob an mga tataramon na idto?

²⁷ Kan ipinahahayag ni Oseas an paghokom ni Jehova sa Samaria, an kabesera kan kahadean sa amihanan nin Israel, sinabi nia: “An haralangkaw na lugar kan Bet-aven, an kasalan kan Israel, paparaon nanggad. Mga tonok saka binit mismo an matubo sa saindang mga altar. Asin sa katotoohan an mga tawo masarabi sa mga bukid, ‘Tagoa kami nindo!’ asin sa mga bulod, ‘Rumpagi kami nindo!’” (Oseas 10:8) Paano naotob an mga tataramon na ini? Bueno, kan nasakop an Samaria kan maringis na mga taga-Asiria kan 740 B.C.E., mayong madulagan an mga Israelita. An mga tataramon ni Oseas nagpahayag kan pakamate nin kadaihan nin maginibo, grabeng takot, asin nin pagkaabandonado kan nasakop na banwaan. Minsan an literal na mga bulod o an arog-bukid na mga institusyon kan Samaria dai nakaprotehir sainda, maski ngani garo permanente nanggad an mga ini kan nakaagi.

28. (a) Anong patanid an itinao ni Jesus sa mga babae kan Jerusalem? (b) Paano naotob an patanid ni Jesus?

²⁸ Sa kaagid na paagi, kan si Jesus giniyahan pasiring sa saiyang kagadanan kan Romanong mga soldados, nagpahayag sia sa mga babae sa Jerusalem asin nagsabi: “Madatong an mga aldaw na an mga tawo magsasarabi, ‘Maogma an mga babaeng baog, asin an mga tulak na dai nangaki asin an mga suso na dai nagpasuso!’ Dangan mapoon sindang magsabi sa mga bukid, ‘Rumpagi kami nindo!’ asin sa mga bulod, ‘Tagoa kami nindo!’” (Lucas 23:​29, 30) An paglaglag sa Jerusalem kan mga Romano kan 70 C.E. dokumentadong gayo, asin malinaw na an mga tataramon ni Jesus igwa nin kahulogan na kaagid kan ki Oseas. Mayo nin madudulagan na lugar kaidto para sa mga Judio na nagdanay sa Judea. Saen man ninda probaran na magtago sa Jerusalem, o maski pa kan dumulag sinda sa kuta nin Masada na nasa alitoktok nin bukid, dai ninda nadulagan an madahas na kapahayagan kan paghokom ni Jehova.

29. (a) Kun dumatong na an aldaw nin kaanggotan ni Jehova, ano an magigin kamugtakan kaidtong mga desididong magsuportar sa sistemang ini nin mga bagay? (b) Anong hula ni Jesus an maootob kun ipahayag na ni Jehova an Saiyang kaanggotan?

²⁹ Ngonyan, an pagbubukas kan ikaanom na tatak nagpaheling na may kaagid na mangyayari durante kan maabot na aldaw kan kaanggotan ni Jehova. Sa pangultimong paglinog sa daganon na sistemang ini nin mga bagay, an mga desididong magsuportar digdi may pagkadesesperar na maghahanap nin matataguan, alagad ta dai sinda nin manonompongan. An falsong relihiyon, an Dakulang Babilonya, biyo na sindang sinudya. Minsan an mga lungib sa literal na mga bukid o simbolikong arog-bukid na politikal asin komersial na mga organisasyon dai magtatao nin pinansial na seguridad o nin ano pa man na ibang klase nin tabang. Mayo nin magtatago sainda sa kaanggotan ni Jehova. An grabeng takot ninda ilinadawan nin marhay ni Jesus: “Dangan an tanda kan Aki nin tawo malataw sa langit, asin an gabos na tribo kan daga mananangis, asin maheheling ninda an Aki nin tawo na nagdadangadang sa mga panganoron nin langit na may kapangyarihan asin dakulang kamurawayan.”​—Mateo 24:30.

30. (a) Ano an ipinaririsa kan hapot na: “Siisay an makatatagal?” (b) Igwa daw nin makatatagal sa panahon nin paghokom ni Jehova?

³⁰ Iyo, idtong mga nagsayumang midbidon an autoridad kan mapangganang Nakasakay sa maputing kabayo mapipiritan na akoon an saindang sala. An mga tawong gikan sa boot na nagin kabtang kan banhi kan Halas mapaaatubang sa kalaglagan kun lumihis na an kinaban ni Satanas. (Genesis 3:​15; 1 Juan 2:17) An kamugtakan sa kinaban sa panahon na iyan magigin makuri an sakit kaya an kadaklan garo baga mahapot: “Siisay an makatatagal?” Malinaw na hohonaon ninda na mayo nin siisay man na makatatagal na inoyonan sa atubangan ni Jehova sa aldaw na iyan nin saiyang paghokom. Alagad magigin sala sinda, siring kan padagos na ipinaheheling kan libro nin Kapahayagan.

[Nota sa Ibaba]