An mga “Kingdom Proclaimer” Dayaday na Nagbibiyahe sa Katubigan nin Guyana

GUYANA.a An terminong ini na Amerindian nangangahulogan “daga nin katubigan.” Angay nanggad an paglaladawan kaiyan sa mahiwas na dagang ini nin nagsosolong nasyon na Ingles an lenguahe sa Amerika del Sur. An daga pinag-iibong-ibong nin kadakol na salog asin nin saindang sanga, na nagsisikosiko hale sa mga Kalangkawan nin Guiana pasiring sa tropikong kadlagan sagkod sa Dagat Atlantiko. An mga salog na ini iyo an kabuhayan para sa kadakol na baryo asin oma na burulagbulag sa mga pangpang kaiyan.

Narealisar kan mga Saksi ni Jehova sa Guyana na kan ihula ni Jesus na “an maogmang baretang ini kan kahadean ihuhulit sa bilog na inierokan na daga para sa pagpatotoo sa gabos na nasyon,” magigin kabale dian an paghuhulit kan maogmang bareta sa mga tawo na nag-iistar sa mga teritoryong ini sa pangpang nin salog. (Mateo 24:14) Kaya, sa dakol na taon, an mga grupo nin mga Saksi, na an dakol sa sainda payunir, naggamit nin mga baroto, dakula asin sadit, sa dayaday na pagbiyahe sa katubigan nin Guyana tanganing darahon an maogmang bareta sa mga tawo.

Tanganing makatabang sa gibohon, nagpadalagan an Watch Tower Society sa Guyana, sagkod ngonyan, nin limang barotong gibo sa kahoy na inapod Kingdom Proclaimer I sagkod Kingdom Proclaimer V. An mga iyan 7 metros, mayong atop, korteng-V an irarom, barotong gibo sa kahoy na inaapod balahoo, ginibo asin minantenir nin sarong pamilyang Saksi. Mamomoton na inaapod kan lokal na mga Saksi na Proclaimers, an duwang pinakaenot dai na nagagamit pakalihis nin mga dekada nin paglilingkod. Pero an numero III, IV, asin V aktibo pa sa paglilingkod sa mga salog nin Pomeroon, Mahaica, asin Demerara.

Sa Demerara

Sa Britania asin mga kabtang nin Europa, an terminong “demerara” puwedeng ipagirumdom an garo bulaw, arog-kristal na asukar hale sa tubo, na midbid na hale sa mga tanoman sa pangpang kan malaboy asin matundag na salog na ini. Sa solnopan na pangpang, an tinampo hale sa gilid kan dagat nagtatapos kun saen sagkod an tanoman nin tubo. Sa ibong kaiyan, nagdedepende an mga Saksi sa Kingdom Proclaimer na mga baroto tanganing darahon an mahamis na mensahe kan Kahadean ni Jehova sa mga nag-iistar sa pangpang nin salog​—Hindu, Muslim, asin mga Kristiano sa ngaran.

An mga kampanya nin paghuhulit sa Demerara puwedeng sarong aldaw na pagbiyahe o puwedeng aboton nin pirang semana, hale sa sarong doongan pasiring sa sarong doongan, poon sa aga sagkod sa pagdiklom. Sa bilog na bangging pagbiyahe, an mga payunir bako sanang nagluluto asin nagkakakan sa baroto kundi nagtotorog man dian. Pagkabanggi, iginagakod an Proclaimer sa poon nin sarong bakawan na kahoy o iinaangkla sa gilid nin doongan kun igwa nin bakante. Duwang duwa may kabangang metro na taldok an ibinubugtak sa enotan asin sa likod. Sarong lubid an iginagakod nin higot sa ibabaw kan nakatindog na mga taldok na ini, asin itinatakop an sarong dakulang trapal sa ibabaw kaiyan tanganing magin atop, o pan-ibabaw. An mga tabla nagigin kama, asin an tamong saka bed sheet nagseserbing kutson. Minsan siring, tolos sindang nakakatorog pakatapos nin halawig na aldaw.

“Nagkakarigos kamo sa malibog na tubig?” an ihinahapot sa mga payunir.

“Dai kun malilikayan niamo!” an simbag. “Kun kami nakaaagi nin sarong burabod, pinapano mi an samuyang mga lalagan nin tubig na panluto, inomon, asin pankarigos.”

Binabalosan an saindang pakatagal nin kadakol na marahay na eksperyensia. Sa sarong okasyon, sarong lalaki an nag-abot sa doongan, buka an mga bitis na nagtindog, nakapamiad an mga takyag, asin nagmamasid samo na igwa nin hararom na interes. “Kingdom Proclaimer V”! Makosog na binasa nia an ngaran na nasa enotan kan baroto. “Siertong kamo an mga Saksi ni Jehova. Kamo sana an mga tawong naggagamit kan terminong ‘kingdom’ sa paaging ini. Igwa kamo nin Kingdom Hall nindo asin ngonyan Kingdom Proclaimer.”

Hale sa Gilead Pasiring sa Pomeroon

An gibohon sa pangpang kan Salog nin Pomeroon medyo napapalaen, arog kan nagigirumdoman ni Frederick McAlman. Sarong taon pakagraduwar nia sa Paadalan sa Biblia kan Watchtower sa Gilead kan 1970, nag-abot sia sa Charity, sarong baryo sa salog na 34 kilometros palaog sa sirangan na pangpang kan Pomeroon, na kun saen igwa nin sarong grupo nin limang parahayag kan Kahadean.

“Sa laog nin limang halawig na taon, nagkaigwa kami nin ‘kaogmahan’ na sagwanan an Proclaimer II pabalikbalik sa Pomeroon bago kami nakakua nin segunda mano, anom na horsepower an makinang motor,” an nagigirumdoman ni Tugang na McAlman. “Sa pagsagwan paoyon sa alon, hinuhulitan mi an mga nasa sirangan na pangpang sagkod na kami makaabot sa Hackney, 11 kilometros hale sa bunganga. Duman, komportable kaming makikitorog sa harong ni Tugang na DeCambra, an partira na naglilingkod sa lugar na iyan kan panahon na idto. Amay pa pagkaaga, magpapadagos kami sagkod sa bunganga kan salog bago bumalyo sa solnopan na pangpang. Dangan magbibiyahe giraray kami pabalik nin 34 kilometros pasiring sa Charity.”

An may anom na horsepower an makinang motor naglingkod nin marhay sa sainda sa laog nin sampulong taon. Dangan kan 1986, sinalidahan iyan nin bago, 15 horsepower an makinang modelo. Pakalingkod nin maimbod sa Pomeroon sa laog nin labing 21 taon, makaheheling si Tugang na McAlman na may pagmateng may nagibo sia sa bagong togdok na Kingdom Hall sa Charity, na ngonyan ginagamit nin kongregasyon na 43 an parahayag, na hale sa gabos na parte kan salog. An promedyong nag-aatender sa pagtiripon sobra sa 60, asin kan 1992 na Memorial kan kagadanan ni Jesu-Cristo, nagkaigwa sinda nin nag-atender na 190!

Paghanap sa “Lalaking May Darang Torrengbantayan”

Sa Charity an Lunes aldaw nin saod. Kaya iyan marahay na panahon para sa paghuhulit kan maogmang bareta, asin an mga Saksi yaon dian dara an magasin na Torrengbantayan asin Awake! Sarong aldaw kan amay na mga taon nin 1970, si Monica Fitzallen hale sa Warimuri sa Moruka nag-abot sa sadan asin nag-ako nin duwang magasin ki Tugang na McAlman. Alagad kan sia pumuli, ibinugtak nia an mga magasin sa irarom kan saiyang baol.

“Nagdanay iyan dian sa laog nin duwang taon na dai ko binasa,” an paggirumdom ni Monica. “Dangan naghelang ako asin nasa kama nin kamatean sa laog nin pirang panahon. Mantang ako nagpaparahay, pinonan kong siyasaton an gabos na babasahon sa harong tanganing magin sibot ako. Sa katapustapusi, nagirumdoman ko an duwang magasin sa baol asin pinonan na siyasaton iyan.” Tolos-tolos na namidbid nia an tanog nin katotoohan.

Kan magrahay si Monica, nakiolay sia sa saiyang agom, ki Eugene, na humanap nin trabaho sa Pomeroon tanganing maheling ni Monica an maboot na lalaki na nagtao saiya kan mga magasin. Nag-oyon si Eugene alagad nakakua sana sia nin trabaho sa sarong oma sa lugar nin Pomeroon sa laog nin sarong semana, poon sa Lunes sagkod sa Sabadong odto.

Pag-abot nin Sabado, dai pa man giraray naheheling ni Monica an lalaki na nagtao saiya kan mga magasin. Kan mag-oodto na, hinapot nia an saiyang agom kun totogotan sinda kan alon na magsagwan pasiring sa Charity tanganing hanapon an “lalaking may darang Torrengbantayan.” Kan matapos pa sana siang magtaram, nakadangog sinda nin mga lakad sa dalan asin naheling an naghuhuyom na tugang na babae na nagdadangadang tanganing mag-alok kan pinakahuring mga kopya kan magasin. “Saro ka sa mga tawong nagdadara kan Torrengbantayan?” an hapot ni Monica. Kadakol kan suminunod na hapot kaya kinaipuhan kan tugang na babae na bumalik sa baroto tanganing kumua nin mga masuportar. Siisay an kinua? Mayong iba kundi si Tugang na McAlman!

Iinareglo an pag-adal sa Biblia paagi sa surat. Dai nahaloy, ipinadara ni Monica an saiyang surat nin paghale sa Iglesya Anglikano. Sa pagsimbag naresibi nia an surat hale sa padi: “Dai ka magdangog sa mga JW. Hababaw an saindang pakasabot sa Biblia. Maabot ako tanganing ipakipag-olay an bagay saimo.” Sagkod ngonyan, an padi dai nagpapaheling. Mientras tanto, binautismohan si Monica kan 1975. Pakalihis nin sarong taon, an saiyang agom, na ngonyan mamomoton na inaapod kan mga tugang na Tiyo Eugene, binautismohan man pakatapos na maingat niang siyasaton an Kasuratan. (Gibo 17:​10, 11) Minsan ngani sinda nag-iistar 12 oras paagi sa baroto hale sa pinakaharaning kongregasyon sa Charity, nagdadanay sindang aktibong parahayag kan Kahadean sagkod sa aldaw na ini.

Mga Biyaheng Pagmimisyonero sa Hararayo sa Pangpang

Sa nakaaagi pa sanang mga taon an Watch Tower Society nagsusuportar sa regular na mga biyaheng pagmimisyonero sagkod sa hararayo sa pangpang. Paagi sa mga baroto na may motor, an odok sa boot na mga boluntaryo nananamitan an kaogmahan nin pagdara kan maogmang bareta sa mga tawo na nag-iistar sa mga lugar na reserbado sa mga Amerindian asin sa napasusuhay na mga komunidad nin mga paratroso asin paraoma sa nagkapirang salog sa puwera. Tunay na mga payunir, igwa sinda nin pribilehiyo na darahon sa kaenot-enote an nagliligtas-buhay na “ngaran ni Jehova” sa puwerang mga lugar na ini. (Roma 10:​13-15) Kinaipuhan na tagalan kan mga tugang an dakol na kasakitan, na kun minsan nagbibiyahe sa mga salog sagkod sa bilog na tolong aldaw tanganing maabot an pira sa lugar na ini. Pero bawi an mga balos.

Sarong hoben na lalaki, Pentecostal na nag-iistar harani sa komunidad kan mga paratroso nin Kwebanna sa Salog nin Waini, an nakaolay sa enot na biyaheng pagmimisyonero sa lugar na iyan kan Hulyo 1991. Sa pagdalaw liwat kan Oktubre, naponan an pag-adal sa Biblia. Sa kaenot-enote, nabasa nia sa saiyang sadiring Biblia na an ngaran nin Dios Jehova, na si Jesus bako an Makakamhan sa gabos, asin na an doktrina nin Trinidad bakong Makakasuratan. (Salmo 83:​18; 1 Corinto 11:3) Entusiastikong marhay sia kaya, pakahale kan mga tugang, tinipon nia an pirang kapwa Pentecostal asin pinonan na ipaheling sainda sa saindang sadiring Biblia an katotoohan dapit ki Jehova Dios asin ki Jesu-Cristo. Kan an kadaklan nagsayuma sa katotoohan, nagdesisyon siang panahon nang humale asin lumuwas sa “Dakulang Babilonya.” (Kapahayagan 18:​2, 4) Kan bumalik an mga tugang tanganing maheling sia kan Pebrero 1992, sinabi nia sainda an nangyari asin idinugang: “Boot kong umiba saindo. Gusto kong magin saro sa mga Saksi ni Jehova. Boot kong magtokdo kan katotoohan sa mga tawo!”

An mga eksperyensiang arog kaiyan nakatatabang sa mga tugang na makapadagos sa nakaaangat na gibohon na ini. An mga minaiba sa biyaheng pagmimisyonero maninigong isakripisyo an kaginhawahan nin harong, mameligro sa mga helang arog baga nin malaria, asin tagalan an mga peligro nin buhay sa kadlagan. Alagad an mga nawalat sa harong naggigibo man nin mga pagsasakripisyo. An mga pamilya napupungaw sa saindang mga namomotan, kun minsan sa laog nin dakol na semana. An mga kongregasyon kaipuhan na magpadagos minsan mayo an saindang kamagurangan asin iba pang hoben na lalaki ta, kun beses, sasaro sanang tugang na lalaki an nawawalat tanganing mangataman sa mga pangangaipo kan kongregasyon. Alagad, dakulaon na kagayagayahan asin pagpapakosog kun nakadadangog an kongregasyon nin nakapahihirong mga eksperyensia ninda sa saindang pagbabalik! Garo kakadikit an mga pagsasakripisyo kun ikokomparar sa kagayagayahan.

An mga parabalangibog kan Kahadean na dayaday na nagbibiyahe sa katubigan nin Guyana na dara an maogmang bareta nagkakamit nin tunay na napapalaen na eksperyensia. Kaibanan kan saindang mga katabang sa bilog na kinaban, sinda mapuso asin odok sa boot na ‘nagdodolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.’​—Hebreo 13:15.

[Nota sa Ibaba]

[Mapa sa pahina 24]

(Para sa aktuwal na format, hilingon an publikasyon)

HONDURAS

NICARAGUA

COSTA RICA

PANAMA

VENEZUELA

COLOMBIA

GUYANA

SURINAME

PRANSES NA GUIANA

BRAZIL

BOLIVIA

DAGAT ATLANTIKO

[Mga ritrato sa pahina 26, 27]

Sa itaas: Pakikipag-olay kan maogmang bareta sa Salog nin Demerara

Sa toong itaas: Grupong misyonero na nagsasagwan pabalik sa kampamento