Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 19: Pagtatak sa Israel nin Dios
An Israel nin Dios Ngonyan
14. Ano an nagpapaheling na an mga Saksi ni Jehova padagos na nagtubod na an 144,000 iyo an literal na bilang kan mga minabilog sa espirituwal na Israel?
14 Interesante nanggad, an enot na presidente kan Watch Tower Society, si Charles T. Russell, narealisar na an 144,000 literal na bilang nin mga indibiduwal na minabilog sa espirituwal na Israel. Sa The New Creation, Tomo VI kan saiyang Studies in the Scriptures, na ipinublikar kan 1904, isinurat nia: “Igwa kita kan gabos na dahelan na tumubod na an sierto, depinidong bilang kan mga pili [piniling mga linahidan] iyo an nagkapirang beses na sinambit sa Kapahayagan (7:4; 14:1); na iyo, an 144,000 na ‘binalukat hale sa tahaw nin mga tawo.’” Sa Light, Enot na Libro, na ipinublikar kan 1930 kan ikaduwang presidente kan Watch Tower Society, si J. F. Rutherford, siring man an sinambit: “An 144,000 na miembro kan hawak ni Cristo sa siring nasa katiriponan na ipinaheling bilang pinili asin linahidan, o tinatakan.” An mga Saksi ni Jehova padagos na nangapot sa punto-de-vista na literal na 144,000 na linahidan na Kristiano an minabilog sa espirituwal na Israel.
15. Bago an aldaw nin Kagurangnan, ano an hinona kan sinserong mga estudyante sa Biblia na makakamit kan mga Judio sa laman pakalihis kan katapusan kan Panahon nin mga Hentil?
15 Minsan siring, bako daw na an Israel sa laman ngonyan maninigo sa nagkapirang espesyal na pabor? Sa panahon bago an aldaw nin Kagurangnan, kan an sinserong mga estudyante sa Biblia nakadiskobre liwat kan kadakol na pangenot na katotoohan kan Tataramon nin Dios, hinona na sa pagtatapos kan Panahon nin mga Hentil an mga Judio magkakaigwa liwat nin mapalad na kamugtakan sa atubangan nin Dios. Kaya, an libro ni C. T. Russell na The Time Is at Hand (Tomo II kan Studies in the Scriptures), na ipinublikar kan 1889, iinaplikar an Jeremias 31:29-34 sa mga Judio sa laman, asin nagkomento: “An kinaban saksi sa katotoohan na an padusa sa Israel sa irarom nin pagsakop kan mga Hentil nagpadagos magpoon kan B.C. [607], na ini nagpapadagos pa, asin na mayong rason na laoman an saindang nasyonal na reorganisasyon nin mas amay kisa sa A.D. 1914, an sagkodan kan saindang ‘pitong panahon’—2520 taon.” Kaidto an mga Judio garo makaeeksperyensia nin nasyonal na pagbabalik, asin an paglaom na ini garo baga nagliwanag kan 1917, kan an Deklarasyon nin Balfour nanuga nin Britanong suporta sa paggibo sa Palestina na nasyonal na erokan kan mga Judio.
16. Anong mga pagmamaigot an ginibo kan mga Saksi ni Jehova tanganing maabot an mga Judio sa laman kan Kristianong mensahe, asin ano an resulta?
16 Pakatapos kan enot na guerra mundial, an Palestina nagin inasignar na teritoryo sa irarom kan Gran Britania, asin an dalan nabuksan para sa dakol na Judio na makabalik sa dagang iyan. Kan 1948 naglataw an politikal na Estado nin Israel. Dai daw ini nagpaheling na an mga Judio nakalinya para sa banal na mga bendisyon? Sa dakol na taon, an mga Saksi ni Jehova nagtubod nin siring kaiyan. Kaya, kan 1925 ipinublikar ninda an 128 pahinas na librong, Comfort for the Jews. Kan 1929 ilinuwas ninda an nakaaakit na 360 pahinas na tomo, an Life, na dinisenyo tanganing maakit an mga Judio asin manongod man sa libro nin Biblia na Job. Darakulang pagmamaigot an ginibo, nangorogna sa Siudad nin Nueva York, tanganing mapaabotan an mga Judio kaining Mesiyanikong mensahe. Makaoogma, an nagkapirang indibiduwal naghimate, alagad an kadaklan na Judio, siring kan saindang mga apoon kan enot na siglo, isinikwal an ebidensia kan presensia kan Mesiyas.
17, 18. Ano an nasabotan kan mga oripon nin Dios digdi sa daga manongod sa bagong tipan asin sa mga hula kan Biblia sa pagbabalik?
17 Malinaw na an mga Judio, bilang sarong banwaan asin bilang sarong nasyon, bakong an Israel na ilinadawan sa Kapahayagan 7:4-8 o kan iba pang hula kan Biblia na konektado sa aldaw kan Kagurangnan. Sa pagsunod sa tradisyon, an mga Judio padagos na naglikay sa paggamit kan banal na ngaran. (Mateo 15:1-3, 7-9) Sa pagkonsiderar kan Jeremias 31:31-34, an librong Jehovah, na ipinublikar kan Watch Tower Society kan 1934, nagsabi na may kasiertohan: “An bagong tipan mayong relasyon sa mga gikan ni Israel sa laman asin sa katawohan sa kagabsan, kundi . . . limitado sa espirituwal na Israel.” An mga hula kan Biblia sa pagbabalik mayong koneksion sa mga Judio sa laman ni sa politikal na Israel, na miembro kan Naciones Unidas asin kabtang kan kinaban na sinabi ni Jesus sa Juan 14:19, 30 asin 18:36.
18 Kan 1931 an mga oripon nin Dios digdi sa daga inako, na may dakulang kagayagayahan, an ngaran na mga Saksi ni Jehova. Makaooyon sinda nin bilog na puso sa mga tataramon sa Salmo 97:11: “An liwanag mismo suminirang para sa matanos, asin kagayagayahan para sa mga tanos an puso.” Malinaw nindang nasasabotan na an espirituwal na Israel sana an pinalaog sa bagong tipan. (Hebreo 9:15; 12:22, 24) An dai naghimateng Israel sa laman mayong kabtang dian, ni an katawohan sa kagabsan. An pakasabot na ini an naglinaw kan dalan para sa makinang na sinag nin banal na liwanag, na nangongorog sa mga rekord kan teokratikong kasaysayan. Ipahahayag kaini kun gurano kaabunda na ipinaabot ni Jehova an saiyang pagkaherak, mamomoton na kabootan, asin katotoohan sa gabos na tawo na nagrarani sa saiya. (Exodo 34:6; Santiago 4:8) Iyo, an iba pa apuwera sa Israel nin Dios makikinabang sa pagpogol kan mga anghel sa apat na doros nin kalaglagan. Siisay daw an mga ini? Puwede daw kamong magin saro sa sainda? Helingon niato ngonyan.