Nagigirumdoman daw Nindo?

Maingat daw nindong hinorophorop an bago pa sanang mga luwas kan The Watchtower asin An Torrengbantayan? Kun iyo, posible na mawiwili kamo sa paggirumdom kan minasunod:

▫ Ano an “tanda na nangangahulogan nin karahayan” na ginigibo ni Jehova para sa mga parasunod ni Jesus? (Salmo 86:17)

An “kagayagayahan nin banal na espiritu” iyo an nagpakosog sa enot na mga Kristiano na tagalan an laen-laen na klase nin paglamag na nangyari sa sainda. (1 Tesalonica 1:6) Iyo man ngonyan, asin si Jehova, an Paratao nin “lambang marahay na balaog asin lambang sangkap na regalo,” naoogmang “magtao nin banal na espiritu sa mga naghahagad sa saiya.” (Santiago 1:​17; Lucas 11:13) Kaya an kagayagayahan nin banal na espiritu iyo an nagigin “tanda na nangangahulogan nin karahayan” para sa mga parasunod ni Jesus.​—w-E 12/15, pahina 18-19.

▫ Taano ta kaipuhan na akoon niato an punto-de-vista nin Dios sa pagputik?

An Salmo 5:​6 nagsasabi na an Dios “lalaglagon . . . an mga nagtataram nin putik.” An Kapahayagan 21:​8 nagsasabi pa na an masasagkodan nin gabos na putikon iyo “an ikaduwang kagadanan.” Kaya an pag-ako sa punto-de-vista nin Dios sa pagputik nagtatao sato nin makosog na dahelan na magtaram nin katotoohan asin kun siring akoon an saiyang balaog na buhay.​—w-E 12/15, pahina 23.

▫ Ano an pagsamba kan mga Samaritano? (Juan 4:20)

An mga Samaritano, sa saindang saralak na pagsamba, inako sana bilang Kasuratan an enot na limang libro ni Moises, an Pentateuco. Kaidtong mga ikaapat na siglo B.C.E., tinindog ninda an sarong templo sa Bukid nin Gerizim, na kakompetensia kan templo nin Dios sa Jerusalem. Minsan ngani nalaglag an templo kan mga Samaritano, sagkod ngonyan nagseselebrar sinda nin taonan na Paskua sa Gerizim.​—w-E 1/1, pahina 25.

▫ Hinahagad daw sa mga Kristiano na sumuportar sa mga paaging pangontra sa polusyon asin paglinig?

Kan yaon sia digdi sa daga, dai hiningoa ni Jesus na resolberan an gabos na problema nin sosyedad kan saiyang kaaldawan. Kun ipaotob na ni Jehova paagi sa saiyang Mesiyanikong Kahadean an saiyang matanos na mga prinsipyo sa bilog na kinaban, mareresolberan na nin permanente an mga problema sa palibot. Kaya, timbang an punto-de-vista nin mga Saksi ni Jehova. An pagkamoot sa kapwa nagpapahiro sainda na igalang an rogaring nin iba, alagad tama sanang inienot ninda an paghuhulit kan mensahe manongod sa Kahadean nin Dios. (Mateo 6:33)​—w-BI 1/15, pahina 31.

▫ Sa anong mga paagi na si Jesus naglingkod bilang paradara nin liwanag? (Juan 8:12)

Idinusay ni Jesus an saiyang sadiri sa paghuhulit kan maogmang bareta kan Kahadean nin Dios. (Lucas 4:​43; Juan 18:37) Ibinuyagyag man nia an relihiyosong mga kaputikan asin sa siring tinawan nin espirituwal na katalingkasan an mga oripon nin relihiyon. (Mateo 15:​3-9) Nangongorog, sia nagin liwanag kan kinaban paagi sa pagtao kan saiyang sangkap na buhay na tawo bilang pantubos. (Mateo 20:​28; Juan 3:16)​—w-BI 1/15, pahina 10-11.

▫ Ano an pira sa mga dahelan kun taano ta utang niato ki Jehova Dios an pagpapasakop?

Si Jehova iyo an Unibersal na Soberano, asin sa dahelan na ini utang niato sa saiya an pagpapasakop. Saro pa, mantang si Jehova makakamhan sa gabos, mayo nin makatutumang sa saiya, kaya dai niato puwedeng pagpalimanlimanan an pagpapasakop sa saiya. An gabos na intelihenteng linalang linalang na mag-otob sa katuyohan kan Kaggibo sa sainda, asin inoobligar kaini an gabos na pumasakop sa Dios sa gabos na bagay.​—w-BI 2/1, pahina 10-11.

▫ Ano an nakatabang ki Jose na paglabanan an pakikisaro sa agom ni Potifar?

Si Jose may makosog na puwersang nagpapahiro sa saiyang isip. Ginigirumdom nia an saiyang relasyon ki Jehova asin nakasasabot sia na an pakikisaro pagkakasala bako sanang tumang sa agom kan babae kundi, orog na mahalaga, tumang sa Dios.​—w-BI 2/15, pahina 17.

▫ Ano an boot sabihon ni Jesus kan sia magsabi: “Ako iyo . . . an katotoohan”? (Juan 14:6)

Si Jesus bako sanang nagtaram asin nagtokdo kan katotoohan; sia namuhay sono dian asin ipinaghalimbawa iyan. Kaya, an Kristianismo bako sanang sarong ideya; iyan sarong dalan nin pamumuhay.​—w-BI 3/1, pahina 15.

▫ Ano an nakararangang leksion sa Salmo 51?

An salmong ini nakatatabang sato na marealisar na kun kita magkasala pero tunay na magsolsol, dadangogon kan satong mamomoton na langitnon na Ama an satong agrangay na kaherakan asin ililigtas kita sa pagkadesesperar. Minsan siring, maninigo na an pangenot niatong pagmakolgan iyo an langhad na dadarahon sa ngaran ni Jehova.​—w-BI 3/15, pahina 18.

▫ Ano an isinisimbolo nin bautismo sa tubig?

An bautismo panluwas na simbolo kan pagdusay nin saro ki Jehova Dios. An paglubog sa tubig nagpapaheling na an mga binabautismohan nagagadan sa pamumuhay na nasesentro sa saindang sadiri. An paghawas sa tubig nagsisimbolo na sinda ngonyan nabuhay na sa pag-otob kan kabotan nin Dios, na inienot iyan sa saindang buhay. (Mateo 16:24)​—w-BI 4/1, pahina 5-6.