Kapahayagan—An Mamuraway na Kulminasyon Kaiyan Harani Na
Kapitulo 21: An mga Damat ni Jehova sa Kakristianohan
Bisyon 5—Kapahayagan 8:1–9:21
Tema: An pagpatanog kan anom sa pitong trumpeta
Panahon nin kaotoban: Magpoon kan pagtukaw sa trono ni Cristo Jesus kan 1914 sagkod sa dakulang kahorasaan
1. Ano an nangyari kan binuksan kan Kordero an ikapitong tatak?
An apat na doros” pinogolan sagkod na matatakan an 144,000 na espirituwal na Israel asin an dakulang kadaklan maaprobaran para sa kaligtasan. (Kapahayagan 7:1-4, 9) Alagad, bago mangyari an makosogon na bagyong iyan sa daga, an mga silot ni Jehova tumang sa kinaban ni Satanas maninigo man na ipaaram! antang binubuksan kan Kordero an ikapito asin ultimong tatak, siertong galagang nagbabantay si Juan tanganing maheling kun ano an mahahayag. Ngonyan saiyang ihinihiras sato an saiyang eksperyensia: “Asin kan saiyang [an Kordero] buksan an ikapitong tatak, nagin silensio sa langit sa laog nin mga kabangang oras. Asin naheling ko an pitong anghel na nagtitindog sa atubangan nin Dios, asin may itinao sa saindang pitong trumpeta.”—Kapahayagan 8:1, 2.
Panahon Para sa Odok na Pamibi
2. Ano an nangyari durante kan simbolikong kabangang oras na pagsilensio sa langit?
2 Makahulogan nanggad an pagsilensiong ini! An kabangang oras garo haloy na panahon kun naghahalat kamo sa sarong bagay na mangyayari. Ngonyan, maski an daing ontok na langitnon na koro nin pag-omaw dai na nadadangog. (Kapahayagan 4:8) Taano? Naheling ni Juan an rason sa bisyon: “Asin saro pang anghel an nag-abot asin nagtindog sa altar, na igwa nin bulawan na lalagan nin insenso; asin dakol na insenso an itinao saiya tanganing idolot iyan kairiba kan mga pamibi kan gabos na banal sa bulawan na altar na nasa atubangan kan trono. Asin an aso kan insenso nag-itaas hale sa kamot kan anghel kairiba kan mga pamibi kan mga banal sa atubangan nin Dios.”—Kapahayagan 8:3, 4.
3. (a) Ano an ipinagigirumdom sato kan pagtotong nin insenso? (b) Ano an katuyohan kan kabangang oras na pagsilensio sa langit?
3 Nagpapagirumdom ini sato na sa irarom kan Judiong sistema nin mga bagay, an insenso tinototong aroaldaw sa tabernakulo asin, kan suminunod na mga taon, sa templo sa Jerusalem. (Exodo 30:1-8) Durante kan siring na pagtotong nin insenso, an bakong makasaserdoteng mga Israelita naghahalat sa luwas kan banal na lugar, namimibi—mayong duwa-duwa na silensio sa saindang mga puso—sa Saro na sa saiya nag-iitaas an aso kan insenso. (Lucas 1:10) Naheling ngonyan ni Juan an kaagid na nangyayari sa langit. An insenso na idinolot kan anghel may koneksion sa “mga pamibi kan mga banal.” Sa katunayan, sa sarong mas naenot na bisyon, an insenso sinasabing nagrerepresentar sa siring na mga pamibi. (Kapahayagan 5:8; Salmo 141:1, 2) Malinaw, kun siring, an simbolikong pagsilensio sa langit sa pagtaong lugar na madangog an mga pamibi kan mga banal sa daga.
4, 5. Anong makasaysayan na mga pangyayari an makatatabang sato na madeterminaran an lawig nin panahon na katimbang kan simbolikong kabangang oras na pagsilensio?
4 Madedeterminaran daw niato kun kasuarin ini nangyari? Iyo, puwede, paagi sa pagsiyasat niato sa konteksto, kaiba an makasaysayan na mga pangyayari kan enot na kabtang kan aldaw kan Kagurangnan. (Kapahayagan 1:10) Durante kan 1918 asin 1919, an mga pangyayari sa daga risang gayong kaoyon kan mga pangyayaring ilinadawan sa Kapahayagan 8:1-4. Sa laog nin 40 taon bago an 1914, an mga Estudyante sa Biblia—siring kan pag-apod kaidto sa mga Saksi ni Jehova—mapusong nagbabareta na an mga panahon kan mga Hentil matatapos sa taon na iyan. An masakit na mga pangyayari kan 1914 nagpatunay na tama sinda. (Lucas 21:24, King James Version; Mateo 24:3, 7, 8) Alagad dakol sainda an nagtubod man na kan 1914 kukuanon sinda hale sa dagang ini pasiring sa saindang langitnon na mana. Dai iyan nangyari. Imbes, kan enot na guerra mundial, nagtios sinda nin panahon nin makuring paglamag. Kan Oktubre 31, 1916, an enot na presidente kan Watch Tower Society, si Charles T. Russell, nagadan. Dangan, kan Hulyo 4, 1918, an bagong presidente, si Joseph F. Rutherford, asin pitong iba pang representante kan Sosyedad dinara sa bilanggoan sa Atlanta, Georgia, na salang gayong sinentensiahan nin halawig na mga taon sa bilanggoan.
5 An sinserong mga Kristiano kan grupong Juan naribong. Ano an mawot nin Dios na masunod nindang gibohon? Noarin sinda dadarahon sa langit? An artikulong may titulong “An Pag-aani Natapos—Ano an Masunod?” naglataw sa Mayo 1, 1919, isyu kan The Watch Tower. Ipinarisa kaiyan an kamugtakan na ini nin kadaihan nin kasiertohan asin pinakosog an mga maimbod na padagos na magtagal, na idinagdag: “Nagtutubod kami na totoo na ngonyan an pagsabi na an pag-aani sa grupo kan kahadean haman na, na an gabos na siring natatakan na asin na an pinto sirrado na.” Durante kan masakit na panahon na ini, an sinserong mga pamibi kan grupong Juan nag-iitaas, na garo iba kan aso nin dakol na insenso. Asin an saindang mga pamibi dinadangog!
Pag-apon nin Kalayo sa Daga
6. Ano an nangyari pakatapos kan pagsilensio sa langit, asin bilang simbag ini sa ano?
6 Sinasabi sato ni Juan: “Alagad tolos-tolos na kinua kan anghel an lalagan nin insenso, asin pinano nia iyan kan kalayo sa altar asin iinapon iyan sa daga. Asin nangyari an mga dagoldol asin mga tingog asin mga kikilat patin linog.” (Kapahayagan 8:5) Pakatapos kan pagsilensio, nagkaigwa nin biglang dramatikong aktibidad! Malinaw na ini bilang simbag sa mga pamibi kan mga banal, mantang ini pinonan kan kalayo na kinua hale sa altar kan insenso. Kan 1513 B.C.E., sa Bukid nin Sinai, mga dagoldol asin kikilat, makosog na tingog, kalayo, asin linog sa bukid an nagtanda kan pagtaong atension ni Jehova sa saiyang banwaan. (Exodo 19:16-20) An kaagid na mga kapahayagan na ibinareta ni Juan nagpaheling man kan pagtaong atension ni Jehova sa saiyang mga lingkod sa daga. Alagad an naheling ni Juan iinatubang paagi sa mga tanda. (Kapahayagan 1:1) Kaya paano an simbolikong kalayo, mga dagoldol, mga tingog, mga kikilat, asin linog maninigong interpretaron ngonyan?
7. (a) Ano an simbolikong kalayo na sinoloan ni Jesus sa daga durante kan saiyang ministeryo? (b) Paano an espirituwal na mga tugang ni Jesus nagpalaad nin kalayo sa Kakristianohan?
7 Sa sarong okasyon, sinabi ni Jesus sa saiyang mga disipulo: “Ako napadigdi sa pagsolo nin kalayo sa daga.” (Lucas 12:49) Tunay na nagsolo sia nin kalayo. Paagi sa saiyang maigot na paghuhulit, ginibo ni Jesus an Kahadean nin Dios na pangenot na isyu sa atubang kan Judiong banwaan, asin nagpalaad ini nin mainit na kontrobersia sa bilog na nasyon na iyan. (Mateo 4:17, 25; 10:5-7, 17, 18) Kan 1919 an espirituwal na mga tugang ni Jesus sa daga, an sadit na grupo nin linahidan na mga Kristiano na nakaligtas sa masakit na mga panahon kan Guerra Mundial I, nagpalaad nin kaagid na kalayo sa Kakristianohan. Kan Setyembre kan taon na iyan, an espiritu ni Jehova hayag na marhay mantang an saiyang maimbod na mga Saksi nagkatiripon hale sa manlaenlaen na lugar sa Cedar Point, Ohio, E.U.A. Si Joseph F. Rutherford, na dai pa nahahaloy pinaluwas sa bilanggoan asin dai naghaloy lubos na napatunayan na daing sala, mapusong nagpahayag sa kombension na iyan, na nagsabi: “Makinuyog sa pagboot kan satong Kagurangnan, asin nagmimidbid sa satong pribilehiyo asin katongdan na makilaban tumang sa mga kuta nin sala na haloy nang panahon na guminapos sa mga tawo, an satong gibohon kaidto asin ngonyan iyo an pagpahayag kan madatong na mamuraway na kahadean kan Mesiyas.” Iyan an pangenot na isyu—an Kahadean nin Dios!
8, 9. (a) Paano ilinadawan kan presidente kan Sosyedad an kaisipan asin pagmawot kan banwaan nin Dios durante kan masakit na mga taon kan guerra? (b) Paano iinapon an kalayo sa daga? (c) Paano nangyari an mga dagoldol, mga tingog, mga kikilat, asin linog?
8 Sa pagsambit kan dai pa nahaloy na masakit na eksperyensia kan banwaan nin Dios, an espiker nagsabi: “Daing herak an pagsalakay kan kaiwal kaya an dakol sa namomotan na aripompon kan Kagurangnan namungnan asin napaontok sa pagngalas, na namimibi asin naghahalat sa Kagurangnan na ipahayag an saiyang kabotan. . . . Alagad sa ibong kan temporaryong panluluya nin boot, yaon an malaad na pagmawot na ibalangibog an mensahe kan kahadean.”—Helingon an Setyembre 15, 1919 na isyu kan The Watch Tower, pahina 280.
9 Kan 1919 an pagmawot na iyan napanigoan. Ining sadit alagad aktibong grupo nin mga Kristiano pinalaad, sa espirituwal na pananaram, na ponan an pambilog na kinaban na kampanya sa paghuhulit. (Ikomparar an 1 Tesalonica 5:19.) An kalayo iinapon sa daga ta an Kahadean nin Dios ginibong naglalaad na isyu, asin iyan nagpapadagos na siring! Makosog na mga tingog an suminalida sa pagsilensio, na malinaw na ipinahayag an mensahe kan Kahadean. Nakabobongog na mga patanid hale sa Biblia dapit sa bagyo an nadangog nin makosog. Siring kan mga silyab nin kikilat, maliwanag na gayong mga sinag nin katotoohan an nagsirang hale sa makahulang Tataramon ni Jehova, asin, garo siring sa makosog na linog, an relihiyosong rona natanyog sagkod sa mga pundasyon kaini. Nasabotan kan grupong Juan na igwa pa nin gibohon na dapat mahaman. Asin sagkod sa panahon na ini, an gibohon na iyan nagpapadagos na mamuraway na umoswag sa bilog na inierokan na daga!—Roma 10:18.
(Ipagpapadagos sa masunod na luwas.)