Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 20: An Dai Mabilang na Dakulang Kadaklan
An Dakulang Kadaklan Naglataw
17. (a) Anong hapot an pinalataw kan saro sa 24 kamagurangan, asin an bagay na puwedeng aramon kan magurang an simbag nagsusuherir nin ano? (b) Kasuarin nasimbag an hapot kan magurang?
17 Magpoon kan panahon ni apostol Juan asin padagos sagkod sa aldaw kan Kagurangnan, an linahidan na mga Kristiano nariribong kun sairisay an dakulang kadaklan. Angay nanggad, kun siring, na saro sa 24 kamagurangan, na nagrerepresentar sa mga linahidan na nasa langit na, an magpaisip ki Juan paagi sa pagpalataw nin napanonongod na hapot. “Asin sa pagsimbag an saro sa mga magurang nagsabi sa sako: ‘An mga ini na nagugubingan nin mapuputing gubing, sairisay sinda asin saen sinda nagharale?’ Kaya nagsabi tolos ako sa saiya: ‘Kagurangnan ko, ika an nakaaaram.’” (Kapahayagan 7:13, 14a) Iyo, puwedeng aramon kan magurang na iyan an simbag asin itao ini ki Juan. Isinusuherir kaini na an mga binuhay liwat sa grupo kan 24 kamagurangan puwedeng kalabot sa pagkomunikar kan banal na mga katotoohan ngonyan. Sa kabtang ninda, an mga kabilang sa grupong Juan sa daga nakaaram kun sairisay an dakulang kadaklan paagi sa maingat na pag-obserbar kan ginigibo ni Jehova sa tahaw ninda. Marikas nindang inapresyar an nagkikinang na kilyab nin banal na liwanag sa teokratikong kalangitan kan 1935, sa itinalaan na panahon ni Jehova.
18, 19. (a) Anong paglaom an idinoon kan grupong Juan durante kan mga taon nin 1920 asin 1930, alagad sairisay an naghimate sa mensahe sa nagdadakol na bilang? (b) An pagpamidbid sa dakulang kadaklan kan 1935 nagpaheling nin ano dapit sa 144,000? (c) Ano an ipinaheheling kan estadistika sa Memorial?
18 Durante kan mga taon nin 1920 asin enot na mga taon nin 1930, idinoon kan grupong Juan an langitnon na paglaom, kapwa sa mga publikasyon asin sa gibohon na paghuhulit. Malinaw, an bilog na bilang kan 144,000 kaipuhan pang malubos. Alagad an nag-ooswag na bilang kan mga nagkuyog sa mensahe asin nagpaheling nin kaigotan sa gibohon na pagpatotoo nagpahayag nin interes sa pamumuhay nin daing sagkod sa dagang Paraiso. Mayo sindang pagmawot na magsakat sa langit. Bako iyan an pag-apod sainda. Bako sindang kabtang kan sadangoton na aripompon kundi imbes kan ibang karnero. (Lucas 12:32; Juan 10:16) An pakamidbid sainda kan 1935 bilang an dakulang kadaklan nin ibang karnero nagpapaheling na an pagpili sa 144,000 haros kompleto na kaidto.
19 Sinusuportaran daw kan estadistika an konklusyon na ini? Iyo nanggad. Kan 1938, sa bilog na daga, 59,047 saksi ni Jehova an nakikabtang sa ministeryo. Sa bilang na ini, 36,732 an nakikabtang sa mga emblema sa taonan na selebrasyon kan Memorial kan kagadanan ni Jesus, na nagpapaheling na igwa sinda nin langitnon na pag-apod. Sa mga taon magpoon kaidto, an bilang kan mga nakikakabtang na ini progresibong nag-ina, sa pangenot huli ta an maimbod na mga saksi ni Jehova nakatapos na kan saindang daganon na buhay sa kagadanan. Kan 1990 8,869 sana an nakikabtang sa mga emblema kan Memorial—mayo pang 0.1 porsiento kan 9,950,052 na nag-atender sa panglobong selebrasyon na iyan.
20. (a) Durante kan Guerra Mundial II, anong komento an pribadong sinabi kan presidente kan Sosyedad dapit sa dakulang kadaklan? (b) Anong mga katunayan ngonyan an nagpapaheling na an dakulang kadaklan dakula nanggad?
20 Kan nangyari an ikaduwang guerra mundial, guminibo si Satanas nin mapait na mga paghingoa na paontokon an pag-ani kan dakulang kadaklan. An gibohon ni Jehova ibinawal sa dakol na nasyon. Kan mamondong mga panahon na idto, asin dai naghaloy bago kan saiyang kagadanan kan Enero 1942, si J. F. Rutherford, an presidente kan Watch Tower Society, nadangog na nagsabi: “Bueno . . . garo daing gayo magigin dakula an dakulang kaburonyogan.” Alagad an banal na bendisyon nagpangyari kan kabaliktaran! Kan 1946 an bilang kan mga Saksi na naglilingkod sa bilog na kinaban naglangkaw sagkod sa 176,456—na an kadaklan sainda kabilang sa dakulang kadaklan. Kan 1990 igwa nin 4,017,213 Saksi na maimbod na naglilingkod ki Jehova sa 212 manlaenlaen na kadagaan—tunay nanggad na SARONG DAKULANG KADAKLAN! Asin an bilang padagos na nag-ooswag.
21. (a) Paano an pag-aani kan banwaan ni Jehova durante kan aldaw kan Kagurangnan nagin lubos na kaoyon kan bisyon ni Juan? (b) Paano an nagkapirang mahalagang hula nagpoon na maotob?
21 An pag-ani kan banwaan ni Jehova durante kan aldaw nin Kagurangnan sa siring nagin lubos na kaoyon kan bisyon ni Juan: an enot iyo an gibohon na pagtipon sa mga natatada kan 144,000; dangan an pagtipon sa dakulang kadaklan. Siring kan ihinula ni Isaias, ngonyan “sa huring kabtang kan mga aldaw,” an mga tawo kan gabos na nasyon buronyog na minaabot tanganing makikabtang sa dalisay na pagsamba ki Jehova. Asin naoogma nanggad kita sa pag-apresyar kan paglalang ni Jehova nin “bagong kalangitan asin sarong bagong daga.” (Isaias 2:2-4; 65:17, 18) Tinitipon ni Jehova “giraray an gabos dian ki Cristo, an mga bagay sa kalangitan asin an mga bagay sa daga.” (Efeso 1:10) An linahidan na mga paramana kan langitnon na Kahadean—na pinili sa laog nin mga siglo magpoon kan panahon ni Jesus—iyo “an mga bagay sa kalangitan.” Asin ngonyan, an dakulang kadaklan kan ibang karnero naglataw bilang an mga enot na kabtang kan “mga bagay sa daga.” An paglilingkod nindo kaoyon kan areglong iyan puwedeng mangahulogan nin daing katapusan na kaogmahan para sa saindo.
An mga Bendisyon kan Dakulang Kadaklan
22. Anong dugang na impormasyon an inako ni Juan manongod sa dakulang kadaklan?
22 Paagi sa banal na pinakapaagihan, nag-ako si Juan nin dugang na impormasyon manongod sa dakulang kadaklan na ini: “Asin sia [an magurang] nagsabi sa sako: ‘An mga ini an nagluwas sa dakulang kahorasaan, asin hinugasan ninda an saindang mga gubing asin pinaputi iyan sa dugo kan Kordero. Kaya ngani sinda yaon sa atubang kan trono nin Dios; asin sinda nagtatao sa saiya nin banal na paglilingkod aldaw asin banggi sa saiyang templo; asin an Saro na nakatukaw sa trono mabiklad kan saiyang tabernakulo sa sainda.’”—Kapahayagan 7:14b, 15.
23. Ano an dakulang kahorasaan na hale dian “nagluwas” an dakulang kadaklan?
23 Sa mas naenot na okasyon, sinabi ni Jesus na an saiyang presensia na may kamurawayan kan Kahadean magkakaigwa nin kulminasyon sa “dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” (Mateo 24:21, 22) Bilang kaotoban kan hulang iyan, bubutasan kan mga anghel an apat na doros kan daga tanganing laglagon an pankinaban na sistema ni Satanas. An enot na malalaglag iyo an Dakulang Babilonya, an pankinaban na imperyo nin falsong relihiyon. Dangan, sa kainitan kan kahorasaan, ililigtas ni Jesus an mga natatada sa daga kan 144,000, kairiba an dai mabilang na dakulang kadaklan.—Kapahayagan 7:1; 18:2.
24. Paano an mga indibiduwal sa dakulang kadaklan makakuwalipikar para sa kaligtasan?
24 Paano an mga indibiduwal sa dakulang kadaklan makakuwalipikar sa kaligtasan? Sinabi kan magurang ki Juan na “hinugasan ninda an saindang mga gubing asin pinaputi iyan sa dugo kan Kordero.” Sa ibang pananaram, naggibo sinda nin pagtubod ki Jesus bilang saindang Paratubos, nagdusay ki Jehova, sinimbolisaran an saindang pagdusay paagi sa bautismo sa tubig, asin “pinagdadanay an marahay na konsensia” paagi kan saindang matanos na paggawe. (1 Pedro 3:16, 21; Mateo 20:28) Kaya, malinig sinda asin matanos sa pagheling ni Jehova. Asin saindang pinagdadanay an saindang sadiri na “daing digta kan kinaban.”—Santiago 1:27.
25. (a) Paano an dakulang kadaklan nagtatao ki Jehova nin “banal na paglilingkod aldaw asin banggi sa saiyang templo”? (b) Paano si Jehova “mabiklad kan saiyang tabernakulo” sa dakulang kadaklan?
25 Dugang pa, sinda nagin maigot na mga saksi ni Jehova—na “nagtatao sa saiya nin banal na paglilingkod aldaw asin banggi sa saiyang templo.” Saro daw kamo sa nagdusay na dakulang kadaklan na ini? Kun iyo, pribilehiyo nindong maglingkod ki Jehova na mayong ontok sa daganon na patyo kan saiyang mamuraway na espirituwal na templo. Ngonyan, sa irarom kan paggiya kan mga linahidan, an dakulang kadaklan naggigibo kan mas dakulang kabtang kan gibohon na pagpatotoo. Sa ibong nin sekular na mga paninimbagan, an ginatos na ribo sainda nagtao nin lugar sa bilog na panahon na ministeryo bilang mga payunir. Alagad kabilang man kamo sa grupong iyan o dai, bilang nagdusay na miembro kan dakulang kadaklan, puwede kamong maggayagaya na huli kan saindong pagtubod asin mga gibo ipinahahayag kamong matanos bilang katood nin Dios asin inaako bilang bisita sa saiyang tabernakulo. (Salmo 15:1-5; Santiago 2:21-26) Sa siring si Jehova ‘nagbibiklad kan saiyang tabernakulo’ sainda na namomoot saiya asin, bilang sarong marahay na kag-imbitar, pinoprotehiran sinda.—Talinhaga 18:10.
26. Ano pang ibang bendisyon an makakamtan kan dakulang kadaklan?
26 An magurang nagpapadagos: “Dai na sinda magugutom ni mapapaha man, minsan an aldaw dai na matama sa sainda ni an ano man na init, huli ta an Kordero, na nasa tahaw kan trono, aatamanon sinda, asin gigiyahan sinda sa mga burabod kan tubig nin buhay. Asin papahidon nin Dios an gabos na luha sa saindang mga mata.” (Kapahayagan 7:16, 17) Iyo, si Jehova tunay nanggad na mapagpasakat! Alagad gurano kararom an kahulogan kan mga tataramon na ini?
27. (a) Paano naghula si Isaias na kaagid kan mga tataramon kan magurang? (b) Ano an nagpapaheling na an hula ni Isaias nagpoon na maotob sa Kristianong kongregasyon kan panahon ni Pablo?
27 Konsideraron niato an hulang may kaagid na mga tataramon: “Ini an isinabi ni Jehova: ‘Sa panahon nin pag-ako sinimbag taka, asin sa aldaw nin kaligtasan tinabangan taka . . . Dai sinda magugutom, ni mapapaha pa man sinda, ni tatamaan sinda nin nakapapahang init o aldaw. Huli ta an Saro na naheherak sa sainda gigiyahan sinda, asin sa mga burabod nin tubig dadarahon nia sinda.’” (Isaias 49:8, 10; helingon man an Salmo 121:5, 6.) Kinotar ni apostol Pablo an kabtang kan hulang ini asin inaplikar ini sa “aldaw nin kaligtasan” na nagpoon kan Pentecostes 33 C.E. Isinurat nia: “Huli ta sia [si Jehova] nagsasabi: ‘Sa panahon nin pag-ako dinangog taka, asin sa aldaw nin kaligtasan tinabangan taka.’ Uya! Ngonyan na an panahon nin pag-ako. Uya! Ngonyan na an aldaw nin kaligtasan.”—2 Corinto 6:2.
28, 29. (a) Paano an mga tataramon ni Isaias naotob kan enot na siglo? (b) Paano an mga tataramon sa Kapahayagan 7:16 naotob manongod sa dakulang kadaklan? (c) Ano an magigin bunga kan paggiya sa dakulang kadaklan pasiring sa “mga burabod kan tubig nin buhay”? (d) Taano an dakulang kadaklan ta magigin pambihira sa tahaw kan katawohan?
28 Ano an aplikasyon kaidto kan panuga dapit sa dai pagkagutom o pagkapaha o pagtios nin nakapapahang init? Sierto nanggad, an mga Kristiano kan enot na siglo literal na nagutom asin napaha kun minsan. (2 Corinto 11:23-27) Alagad, sa espirituwal na paagi, nagkaigwa sinda nin abundansia. Mayaman sindang tinawan, kaya dai sinda nagutom o napaha sa espirituwal na mga bagay. Dugang pa, dai pinangyari ni Jehova an init kan saiyang kaanggotan na lumaad tumang sainda kan laglagon nia an Judiong sistema nin mga bagay kan 70 C.E. An mga tataramon sa Kapahayagan 7:16 may kaagid na espirituwal na kaotoban sa dakulang kadaklan ngonyan. Kairiba kan linahidan na mga Kristiano, nagkakamit sinda nin abundang espirituwal na mga probisyon.—Isaias 65:13; Nahum 1:6, 7.
29 Kun saro kamo sa dakulang kadaklan na iyan, an saindong marahay na kamugtakan nin puso magpapangyari saindong “magkurahaw sa kagayagayahan,” ano man an dapat nindong tioson na mga kasakitan asin kagipitan durante kan pantapos na mga taon kan sistema ni Satanas. (Isaias 65:14) Sa sentidong iyan, minsan ngonyan, an Kordero puwedeng ‘pahidon an gabos na luha sa saindong mga mata.’ Dai na kamo matatakot sa mainiton na “aldaw” nin bakong paborableng paghokom nin Dios, asin kun butasan na an apat na doros kan kalaglagan, puwede kamong makaligtas sa “init” kan dai pag-oyon ni Jehova. Pakatapos kan kalaglagan na iyan, gigiyahan kamo kan Kordero tanganing makinabang nin lubos sa nakapakokosog liwat na “mga burabod nin tubig nin buhay,” na nagrerepresentar sa gabos na probisyon na ginigibo ni Jehova para sa pag-ako nindo nin buhay na daing katapusan. An saindong pagtubod sa dugo kan Kordero mabibindikar huli ta luway-luway kamong nagkakaigwa nin pagkasangkap bilang tawo. Kamong kabilang sa dakulang kadaklan magigin pambihira sa tahaw kan katawohan bilang an “minilyon” na dai man lamang nagadan! Sa pinakalubos na sentido, an gabos na luha pinahid na sa saindong mga mata.—Kapahayagan 21:4.
Sinisierto an Pag-apod
30. Anong makangangalas na tanawon an ilinadawan sa sato sa bisyon ni Juan, asin sairisay an “makatatagal”?
30 Makangangalas nanggad na tanawon an binubukasan kan mga tataramon na ini sa sato! Si Jehova mismo nasa saiyang trono, asin an gabos niang lingkod, langitnon asin daganon, sararong nag-oomaw saiya. Inaapresyar kan saiyang daganon na mga lingkod an pambihirang pribilehiyong makikabtang sa nagkokosog na korong ini nin pag-omaw. Dai nanggad mahahaloy, gigibohon ni Jehova asin ni Cristo Jesus an paghokom, asin an kurahaw madadangog: “An dakulang aldaw kan saindang kaanggotan nagdatong na, asin siisay an makatatagal?” (Kapahayagan 6:17) An simbag? Solamente an minoriya kan katawohan, kabilang idtong mga tinatakan na 144,000 na nagdadanay pa sa laman asin an dakulang kadaklan nin ibang karnero an “makatatagal,” an boot sabihon, makaliligtas kairiba ninda.—Ikomparar an Jeremias 35:19; 1 Corinto 16:13.
31. Paano an kaotoban kan bisyon ni Juan maninigong makaapektar sa mga Kristiano, kapwa sa mga linahidan asin sa dakulang kadaklan?
31 Huli sa katotoohan na ini, an linahidan na mga Kristiano kan grupong Juan maigot na naghihingoa na “pinupunta an pasohan para sa premyo na pag-apod sa itaas nin Dios paagi ki Cristo Jesus.” (Filipos 3:14) Aram nindang lubos na an mga pangyayari sa mga aldaw na ini nangangaipo nin espesyal na pakatagal sa kabtang ninda. (Kapahayagan 13:10) Pakatapos kan maimbod na paglilingkod ki Jehova sa laog nin kadakol na taon, nagdanay sindang marigon sa pagtubod, naoogma na an saindang ngaran “isinurat sa kalangitan.” (Lucas 10:20; Kapahayagan 3:5) Aram man kan mga kabilang sa dakulang kadaklan na solamente “an makatagal sagkod sa katapusan iyo an maliligtas.” (Mateo 24:13) Mantang an dakulang kadaklan bilang grupo tinandaan nang makaliligtas sa dakulang kahorasaan, an mga indibiduwal na kabilang dian maninigong maghingoang magdanay na malinig asin aktibo.
32. Anong apuradong kamugtakan an itinampok kan bagay na solamente duwang grupo an “makatatagal” sa aldaw kan kaanggotan ni Jehova?
32 Mayong ebidensia na an siisay man apuwera sa duwang grupong ini “makatatagal” sa aldaw kan kaanggotan ni Jehova. Ano an kahulogan kaini para sa minilyon na taon-taon nagpapaheling nin paggalang sa atang ni Jesus paagi sa pag-atender sa selebrasyon kan Memorial kan saiyang kagadanan alagad dai pa naggibo nin pagtubod sa atang ni Jesus sagkod sa punto na magin nagdusay, bautisadong mga lingkod ni Jehova, na aktibo sa paglilingkod saiya? Dugang pa, kumusta idtong kan dati aktibo alagad tinogotan na an saindang puso “manganaan nin . . . mga paghadit sa buhay”? Logod an gabos na siring magmata, asin magdanay na puka, tanganing magin “mapanggana sa pagdulag sa gabos na ining bagay na nakatalagang mangyari, asin sa pagtindog sa atubang kan Aki nin tawo”—si Jesu-Cristo. An panahon halipot na!—Lucas 21:34-36.
[Kahon sa pahina 26]
An mga miembro kan dakulang kadaklan
▪ hale sa gabos na nasyon asin tribo asin banwaan patin tataramon
▪ nagtitindog sa atubang kan trono ni Jehova
▪ pinaputi an saindang mga gubing sa dugo kan Kordero
▪ iinatribuwir an kaligtasan ki Jehova asin ki Jesus
▪ nagluwas sa dakulang kahorasaan
▪ naglilingkod ki Jehova sa saiyang templo aldaw asin banggi
▪ nag-aako kan mamomoton na proteksion asin pangangataman ni Jehova
▪ pinapastoran ni Jesus pasiring sa mga burabod kan tubig nin buhay