Kapahayagan—An Mamuraway na Kulminasyon Kaiyan Harani Na

Kapitulo 22: An Enot na Herak Man​—Mga Doron

1. Siisay an nagpapadangog kaiyan kun pinatatanog kan mga anghel an trumpeta, asin ano an ipinaiisi kan ikalimang tanog nin trumpeta?

An ikalimang anghel nag-aandam na patanogon an saiyang trumpeta. Pinatanog na an apat na langitnon na trumpeta, asin ipinaabot na an apat na damat sa ikatolong kabtang kan daga na ibinibilang ni Jehova na pinakadakula an kasalan​—an Kakristianohan. Nabuyagyag na an saiyang naghihigagdan na kamugtakan. Mantang an mga anghel nagpapatanog kan trumpeta, sinusundan iyan sa daga nin mga parabalangibog na tawo. Ngonyan iaanunsiar na kan ikalimang trumpeta nin anghel an enot na herak man, na orog na makatatakot kisa mga naenot. Iyan konektado sa sarong makatatakot na damat nin doron. Alagad, enot, siyasaton niato an ibang kasuratan na matabang sato na orog na masabotan an damat na ini.

2. Anong libro sa Biblia an naglaladawan nin damat nin mga doron na nakaaagid sa naheheling ni Juan, asin ano an epekto kaiyan sa suanoy na Israel?

² An libro sa Biblia na Joel, na isinurat kan ikasiyam na siglo B.C.E., naglaladawan sa sarong damat nin mga insekto, kaiba an mga doron, na nakaaagid sa naheheling ni Juan. (Joel 2:​1-11, 25)a Idto magbubunga nin grabeng kasakitan para sa apostatang Israel alagad magbubunga man kan pagsolsol nin indibiduwal na mga Judio asin pakabalik sa pag-oyon ni Jehova. (Joel 2:​6, 12-14) Pag-abot kan panahon na iyan, ibububo ni Jehova an saiyang espiritu sa “gabos na klase nin laman,” mantang an makatatakot na mga tanda asin makangingirhat na mga senyal maeenot sa “pagdatong kan dakula asin makatatakot na aldaw ni Jehova.”​—Joel 2:​11, 28-32.

Sarong Damat kan Enot na Siglo

3, 4. (a) Kasuarin naotob an Joel kapitulo 2, asin paano? (b) Paano nagkaigwa nin damat na siring sa mga doron kan enot na siglo C.E., asin gurano an ilinawig kan damat?

³ Nagkaigwa nin kaotoban an Joel kapitulo 2 kan enot na siglo. Kaidto, sa Pentecostes 33 C.E., na an banal na espiritu ibinubo, na linahidan an enot na mga Kristiano asin tinawan sinda nin kapangyarihan na magtaram kan “makangangalas na mga bagay nin Dios” sa dakol na tataramon. Bilang resulta, nagkatiripon an dakulang kadaklan. Si apostol Pedro nagpahayag sa nagngangalas na mga miron na idto, na kinotar an Joel 2:​28, 29 asin ipinaliwanag na naheheling ninda an kaotoban kaiyan. (Gibo 2:​1-21) Pero mayo nin rekord nin literal na damat nin insekto kan panahon na idto, na nagtao nin kasakitan sa nagkapira asin naggiya sa iba na magsolsol.

⁴ Igwa daw nin piguratibong damat kan mga aldaw na idto? Iyo nanggad! Idto bunga kan daing ontok na paghuhulit kan bagong lahidan na mga Kristiano.b Paagi sa sainda, inagda ni Jehova an mga Judiong gustong maghinanyog na magsolsol asin magkamit kan saiyang mga bendisyon. (Gibo 2:​38-40; 3:19) An nagkuyog na mga indibiduwal nag-ako kan saiyang pag-oyon sa pambihirang sokol. Alagad para sa mga nagsayuma sa pag-agda, an mga Kristiano kan enot na siglo nagin siring sa mapanlaglag na mga doron. Poon sa Jerusalem, nakalakop sinda sa bilog na Judea asin Samaria. Dai nahaloy yaon na sinda sa gabos na lugar, na pinasasakitan an daing pagtubod na mga Judio paagi sa pagbalangibog sa publiko kan pagkabuhay liwat ni Jesus, kaiba an gabos na kahulogan kaiyan. (Gibo 1:​8; 4:​18-20; 5:​17-21, 28, 29, 40-42; 17:​5, 6; 21:​27-30) An pagdamat na idto nagpadagos sagkod sa “makatatakot na aldaw,” kan 70 C.E., kan darahon ni Jehova an mga hukbo nin Roma tumang sa Jerusalem tanganing laglagon iyan. Idto sanang mga Kristiano na may pagtubod na nag-apod sa ngaran ni Jehova an naligtas.​—Joel 2:​32; Gibo 2:​20, 21; Talinhaga 18:10.

(Ipagpapadagos sa masunod na luwas.)

[Mga Nota sa Ibaba]