Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 21: An mga Damat ni Jehova sa Kakristianohan
Kadikloman!
36. Ano an nangyari pakapatanoga kan ikaapat na anghel sa saiyang trumpeta?
36 “Asin pinatanog kan ikaapat na anghel an saiyang trumpeta. Asin naparong an ikatolong kabtang kan aldaw asin ikatolong kabtang kan bulan asin ikatolong kabtang kan mga bitoon, tanganing an ikatolong kabtang kan mga ini magdiklom asin an aldaw dai magliwanag sa ikatolong kabtang kaiyan, asin siring man an banggi.” (Kapahayagan 8:12) An ikasiyam na damat sa Egipto damat nin literal na kadikloman. (Exodo 10:21-29) Alagad ano an simbolikong kadikloman na ini na minadatong tanganing mandamat sa mga tawo sa satong ika-20 siglo?
37. Paano ilinadawan ni apostol Pedro asin Pablo an espirituwal na kamugtakan kan mga nasa luwas kan Kristianong kongregasyon?
37 Sinabihan ni apostol Pedro an saiyang mga kapagtubod na sinda nasa kadikloman, sa espirituwal na pagtaram, bago sinda nagin Kristiano. (1 Pedro 2:9) Ginamit man ni Pablo an terminong “kadikloman” sa paglaladawan kan espirituwal na kamugtakan kan mga nasa luwas kan Kristianong kongregasyon. (Efeso 5:8; 6:12; Colosas 1:13; 1 Tesalonica 5:4, 5) Alagad kumusta man an mga nasa Kakristianohan na naghihingakong nagtutubod sa Dios asin nagsasabi na inaako ninda si Jesus bilang saindang Paraligtas?
38. Ano an bagay na ipinadadangog kan ikaapat na anghel manongod sa “liwanag” kan Kakristianohan?
38 Si Jesus nagsabi na an tunay na mga Kristiano mamimidbid paagi sa saindang mga bunga asin na an dakol na naghihingakong saiyang mga parasunod “mga paragibo nin katampalasanan.” (Mateo 7:15-23) Mayo nin siisay man na nagmamasid sa mga bunga kan ikatolong kabtang kan kinaban na sakop nin Kakristianohan an makaninigar na sia nagkakapkap sa makuring espirituwal na kadikloman. (2 Corinto 4:4) Sia an pinakamagabat an kasalan, ta sia naghihingakong Kristiano. Kaya, tama sana na ipadangog kan ikaapat na anghel an bagay na an “liwanag” nin Kakristianohan, sa katotoohan, kadikloman, asin an ginigikanan kan saiyang “liwanag” Babiloniko—bakong Kristiano.—Marcos 13:22, 23; 2 Timoteo 4:3, 4.
39. (a) Paano ilinaladawan kan resolusyon na inaprobaran sa kombension kan 1925 an falsong liwanag kan Kakristianohan? (b) Ano pang dagdag na pagbuyagyag an ginibo kan 1955?
39 Kaoyon sa langitnon na proklamasyon na iyan, an dakulang kadaklan kan banwaan nin Dios nagtiripon sa sarong kombension sa Indianapolis, Indiana, E.U.A., kan Agosto 29, 1925, asin inaprobaran na ipublikar an sarong prangkang resolusyon na may titulong “Mensahe nin Paglaom.” Sa liwat, mga 50 milyones na kopya an iwinaras sa nagkapirang tataramon. Ilinadawan kaiyan an falsong liwanag na itinao kan magkairibang komersial na mga usurero, politikal na mga namomoon, asin relihiyosong klero, na an resulta “an mga tawo napasa kadikloman.” Asin itinokdo kaiyan an Kahadean nin Dios bilang an tunay na paglaom sa pag-ako “kan mga bendisyon na katoninongan, prosperidad, salud, buhay, libertad asin daing sagkod na kaogmahan.” Kinaipuhan an kapusoan na ipahayag kan sadit na grupo nin linahidan na mga Kristiano an siring na mga mensahe tumang sa higanteng organisasyon nin Kakristianohan. Alagad, dai nin ontok, magpoon kan enot na mga taon nin 1920 sagkod ngonyan, ginibo ninda iyan. Sa mas bagong mga panahon, kan 1955, ginibo an dagdag pang pagbuyagyag sa grupong klero paagi sa lakop sa kinaban na pagwaras sa dakol na tataramon nin sarong pulyeto na may titulong Christendom or Christianity—Which One Is “the Light of the World”? Ngonyan, risa nang gayo an pagsaginsagin kan Kakristianohan na iyan naheheling na mismo kan dakol sa kinaban. Alagad an banwaan ni Jehova dai nag-ontok sa pagbuyagyag kun ano man nanggad sia: sarong kahadean nin kadikloman.
Sarong Naglalayog na Agila
40. An apat na tanog nin trumpeta nagpaheling na ano an Kakristianohan?
40 An enot na apat na tanog na ini kan trumpeta talagang nagbunga kan pagkabuyagyag kan gaba asin nakagagadan na kamugtakan nin Kakristianohan. An kabtang kan “daga” na sakop nia ibinuyagyag na maninigo sa paghokom ni Jehova. An rebolusyonaryong mga gobyerno na minaralataw sa saiyang kadagaan asin sa iba pa ipinaheling na nakadadanyar sa espirituwal na buhay. Ihinayag an pagbagsak kan saiyang klero, asin an pankagabsan na kadikloman kan saiyang espirituwal na kamugtakan ibinuyagyag tanganing maheling kan gabos. An Kakristianohan tunay na iyo an pinakamakasalan na kabtang kan palakaw nin mga bagay ni Satanas.
41. Sa panahon nin halipot na pag-ontok sa sunod-sunod na pagpatanog nin trumpeta, ano an naheling asin nadangog ni Juan?
41 Ano pa an kaipuhan na ibuyagyag? Bago niato maaraman an simbag sa hapot na ini, may halipot na pag-ontok sa sunod-sunod na pagpatanog nin trumpeta. Ilinaladawan ni Juan an sumunod niang naheling: “Asin ako nakaheling, asin ako nakadangog nin sarong agila na naglalayog sa tahaw nin langit na nagsabi sa makosog na tingog: ‘Herak man, herak man, herak man sa mga nag-eerok sa daga huli sa natatada pa kan mga tanog nin trumpeta kan tolong anghel na madali nang magpatanog kan saindang trumpeta!’”—Kapahayagan 8:13.
42. Ano an puwedeng irepresentar kan naglalayog na agila, asin ano an mensahe kaiyan?
42 An agila halangkaw an layog, kaya naheheling iyan nin mga tawo sa mahiwas na lugar. Iyan may pambihira kalinaw na pagheling asin nakaheheling nin harayoon sa enotan nia. (Job 39:29) An saro sa apat na kerubin na nabubuhay na linalang sa palibot kan trono nin Dios ilinadawan na sarong naglalayog na agila. (Kapahayagan 4:6, 7) Baga man iyan an kerubin na ini o saro pang harayo an pananaw na lingkod nin Dios, iyan makosog na nagbabalangibog nin dinamikong mensahe: “Herak man, herak man, herak man”! Maghimate an mga nag-eerok sa daga, mantang nadadangog an tolong natatada pang tanog nin trumpeta, na an lambang saro konektado sa saro kan mga herak man na ini.
[Tsart sa pahina 24]
An Katubigan kan Kakristianohan Nabuyagyag na Ajenjo
An mga Paniniwala Asin Gawe nin Kakristianohan
Bakong mahalaga an personal na ngaran nin Dios: “An paggamit nin ano man na ngaran para sa saro asin solamenteng Dios . . . biyong dai maninigo para sa unibersal na pagtubod kan Iglesya Kristiana.” (Introduksion sa Revised Standard Version)
An Dios sarong Trinidad: “An Ama Dios, an Aki Dios, asin an Espiritu Santo Dios, pero bakong tolo an Dios kundi sarong Dios.” (The Catholic Encyclopedia, edisyon kan 1912)
An kalag nin tawo inmortal: “Pagkagadan nin tawo nagkakasiblag an saiyang kalag asin hawak. An saiyang hawak . . . nalalapa . . . Pero an kalag nin tawo dai nagagadan.” (What Happens After Death, sarong publikasyon na Romano Katoliko)
An mga maraot pinasasakitan pagkagadan sa impierno: “Sono sa tradisyonal na paniniwalang Kristiano, an impierno lugar nin daing sagkod na sakit asin kolog.” (The World Book Encyclopedia, edisyon kan 1987)
“An titulong Mediadora [mediador o parapangoltanan na babae] iinaaplikar ki Nuestra Señora.” (New Catholic Encyclopedia, edisyon kan 1967)
An mga omboy maninigong bunyagan: “Poon sa kapinonan ipinaotob na kan Iglesya an Sakramentong Pagbunyag sa mga omboy. Bako sana na ibinilang na sono sa pagboot an kaugalean na ini, kundi itinokdo man iyan na kaipuhan na gayo para sa kaligtasan.” (New Catholic Encyclopedia, edisyon kan 1967)
An kadaklan na iglesya nababanga sa grupong lego asin grupong klero, na nagmiministro sa lego. An klero parateng sinusuweldohan para sa saindang ministeryo asin ilinalangkaw sa lego paagi sa mga titulo na arog kan “Reberendo,” “Padre,” o “An Saiyang Kadakulaan.”
An mga imahen, ladawan, asin krus ginagamit sa pagsamba: “An mga imahen . . . ni Cristo, kan Birhen na Ina nin Dios, asin kan iba pang santo dapat na . . . ibugtak sa mga simbahan asin tawan nin maninigong paggalang asin onra.” (Deklarasyon kan Konsilyo sa Trent [1545-63])
An mga miembro kan iglesya tinotokdoan na an mga katuyohan nin Dios maootob paagi sa politika. An nagadan nang si Kardinal Spellman nagsabi: “Sasaro sana an dalan pasiring sa katoninongan . . . , an tinampo nin demokrasya.” Sinasabi nin mga bareta an pakilalabot nin relihiyon sa politika kan kinaban (pati sa mga rebelyon) asin an pagsuportar kaiyan sa NU bilang “an ultimong paglaom para sa pagkaoroyon asin katoninongan.”
An Tunay na Sinasabi kan Biblia
Si Jesus namibi na pakangbanalon logod an ngaran nin Dios. Si Pedro nagsabi: “An lambang nag-aapod sa ngaran ni Jehova maliligtas.” (Gibo 2:21; Joel 2:32; Mateo 6:9; Exodo 6:3; Kapahayagan 4:11; 15:3; 19:6)
Sinasabi kan Biblia na si Jehova orog na dakula ki Jesus asin iyo an Dios saka payo ni Cristo. (Juan 14:28; 20:17; 1 Corinto 11:3) An banal na espiritu iyo an puwersa aktiba nin Dios. (Mateo 3:11; Lucas 1:41; Gibo 2:4)
An tawo sarong kalag. Pagkagadan an kalag minapondo sa pag-isip o pakamate asin minabuwelta sa kabokabo na gikan dian iyan ginibo. (Genesis 2:7; 3:19; Salmo 146:3, 4; Eclesiastes 3:19, 20; 9:5, 10; Ezequiel 18:4, 20)
An bayad sa kasalan kagadanan, bakong buhay na pinasasakitan. (Roma 6:23) An mga gadan nagpapahingalong daing pakaaram sa impierno (Hades, Sheol), na naghahalat na buhayon liwat. (Salmo 89:48; Juan 5:28, 29; 11:24, 25; Kapahayagan 20:13, 14)
An solamenteng parapangoltanan sa Dios asin sa mga tawo iyo si Jesus. (Juan 14:6; 1 Timoteo 2:5; Hebreo 9:15; 12:24)
An bautismo para sa mga ginibong disipulo asin tinokdoan na magkuyog sa mga pagboot ni Jesus. Tanganing makuwalipikar sa bautismo, an saro dapat na makasabot sa Tataramon nin Dios asin tumubod. (Mateo 28:19, 20; Lucas 3:21-23; Gibo 8:35, 36)
An gabos na Kristiano kan enot na siglo ministro asin nakikabtang sa paghuhulit kan maogmang bareta. (Gibo 2:17, 18; Roma 10:10-13; 16:1) An Kristiano maninigong ‘magtao nin daing bayad,’ bakong may suweldo. (Mateo 10:7, 8) Estriktong ipinangalad ni Jesus an paggamit nin relihiyosong mga titulo. (Mateo 6:2; 23:2-12; 1 Pedro 5:1-3)
An mga Kristiano dapat na lumikay sa gabos na klase nin idolatriya, pati an inaapod na relatibong pagsamba. (Exodo 20:4, 5; 1 Corinto 10:14; 1 Juan 5:21) Sinasamba ninda an Dios bakong sa pakaheling kundi sa espiritu asin katotoohan. (Juan 4:23, 24; 2 Corinto 5:7)
Ihinulit ni Jesus an Kahadean nin Dios, bakong sarong politikal na palakaw, bilang an paglaom nin katawohan. (Mateo 4:23; 6:9, 10) Nagsayuma siang makilabot sa politika. (Juan 6:14, 15) An Kahadean nia bakong kabtang kan kinaban na ini; kaya an saiyang mga parasunod dapat na bako man na kabtang kan kinaban. (Juan 18:36; 17:16) Si Santiago nagpatanid tumang sa pakikikatood sa kinaban. (Santiago 4:4)