Kapahayagan—An Mamuraway na Kulminasyon Kaiyan Harani Na
Kapitulo 24: Sarong Mahamis-Asin-Mapait na Mensahe
Bisyon 6—Kapahayagan 10:1–11:19
Tema: An bisyon kan sadit na balumbon; mga eksperyensia sa templo; an pagpatanog kan ikapitong trumpeta
Panahon nin kaotoban: Poon sa pagtukaw sa trono ni Jesus kan 1914 sagkod sa dakulang kahorasaan
1, 2. (a) Ano an ibinunga kan ikaduwang herak man, asin noarin matatapos an pagpahayag kan herak man na ini? (b) Siisay ngonyan an naheheling ni Juan na naghihilig hale sa langit?
Mapanlaglag nanggad an ikaduwang herak man. Dinamat kaiyan an Kakristianohan asin an mga namomoon dian, “ikatolong kabtang kan mga tawo,” na ibinuyagyag na gadan sa espirituwal. (Kapahayagan 9:15) Seguradong inisip ni Juan kun ano man an dadarahon kan ikatolong herak man. Alagad ta halat ka! An ikaduwang herak man dai pa tapos—sagkod na maabot niato an punto na nasusurat sa Kapahayagan 11:14. Bago kaiyan, si Juan may maheheling na mga pangyayari na dian sia mismo may aktibong kabtang. Iyan minapoon sa makangingirhat na eksena:
2 “Asin ako nakaheling nin saro pang makosog na anghel na naghihilig hale sa langit, na nagugubingan nin panganoron, asin may hablondawani sa saiyang payo, asin an saiyang lalauogon siring sa aldaw, asin an saiyang mga bitis siring sa mga hariging kalayo.”—Kapahayagan 10:1.
3. (a) Siisay an “makosog na anghel”? (b) Ano an kahulogan kan hablondawani sa saiyang payo?
3 Siisay an “makosog na anghel” na ini? Malinaw na iyan an pinamuraway na si Jesu-Cristo sa ibang katongdan. Sia nagugubingan nin panganoron nin pagkadai naheheling, na nagpapagirumdom sato kan mas naenot na mga tataramon ni Juan manongod ki Jesus: “Uya! Sia madatong kaiba kan mga panganoron, asin an gabos na mata makakaheling sa saiya, asin an mga suminaksak sa saiya.” (Kapahayagan 1:7; ikomparar an Mateo 17:2-5.) An hablondawani sa saiyang payo nagpapagirumdom sato kan mas naenot na bisyon ni Juan sa trono ni Jehova, na may “hablondawani na kaagid sa esmeralda kun paghelingon.” (Kapahayagan 4:3; ikomparar an Ezequiel 1:28.) An hablondawaning iyan nagsusuherir kan katrangkilohan asin katoninongan sa palibot kan trono nin Dios. Sa kaparehong paagi, an hablondawaning ini sa payo kan anghel magpapamidbid sa saiya bilang espesyal na mensahero nin katoninongan, an ihinulang “Prinsipe nin Katoninongan” ni Jehova.—Isaias 9:6, 7.
4. Ano an ipinaririsa kan (a) pagigin “siring sa aldaw” kan lalauogon kan makosog na anghel? (b) pagigin “siring sa mga hariging kalayo” kan mga bitis kan anghel?
4 An lalauogon kan makosog na anghel “siring sa aldaw.” Bago kaini, sa saiyang bisyon ki Jesus sa banal na templo, narisa ni Juan na an lalauogon ni Jesus “siring sa aldaw kun iyan nagliliwanag sa bilog na kakosogan kaiyan.” (Kapahayagan 1:16) Si Jesus, bilang “aldaw nin katanosan,” minasirang na may pagpaomay sa saiyang mga pakpak para sa kapakinabangan kan mga natatakot sa ngaran ni Jehova. (Malaquias 4:2) Bako sanang an lalauogon kundi pati an mga bitis kan anghel na ini mamuraway, “siring sa mga hariging kalayo.” An masarig niang tindog tindog nin Saro na tinawan ni Jehova kan “gabos na kapangyarihan sa langit asin sa daga.”—Mateo 28:18; Kapahayagan 1:14, 15.
5. Ano an naheheling ni Juan sa kamot kan makosog na anghel?
5 Namasdan pa ni Juan: “Asin sia igwa sa saiyang kamot nin sadit na balumbon na nabibiklad. Asin ibinatay nia sa dagat an too niang bitis, alagad an wala sa daga.” (Kapahayagan 10:2) Saro pang balumbon? Iyo, pero ngonyan iyan dai selyado. Kaiba ni Juan, malalaoman niato na sa madali na makaheling nin dugang pang makaoogmang mga kapahayagan. Alagad, enot, itinatao sato an mga kamugtakan na nakapalibot sa mangyayari.
6. (a) Taano ta angay na an mga bitis ni Jesus yaon sa daga asin sa dagat? (b) Kasuarin biyong naotob an Salmo 8:5-8?
6 Balikan niato an paglaladawan ki Jesus. An saiyang naglalaad na mga bitis nasa daga asin dagat, na dian sia nagkakapot ngonyan nin lubos na kapangyarihan. Iyan siring nanggad sa sinasabi sa makahulang salmo: “Ginibo mo [ni Jehova] sia [si Jesus] na hababa nin kadikit sa mga arog-dios, asin kinoronahan mo sia nin kamurawayan asin kamahalan. Ipinasasakop mo sa saiya an mga gibo kan saimong mga kamot; an gabos ibinugtak mo sa irarom kan saiyang mga bitis: an saradit na baka asin kapon na baka, sinda gabos, siring man an mga hayop sa kapatagan, an mga gamgam kan kalangitan asin an mga sira sa dagat, an ano man na nag-aagi sa mga dalan kan kadagatan.” (Salmo 8:5-8; helingon man an Hebreo 2:5-9.) An salmong ini biyong naotob kan 1914, kan si Jesus patukawon sa trono bilang Hade kan Kahadean nin Dios asin nagpoon an panahon kan katapusan. Kaya, an naheling ni Juan digdi sa bisyon aplikado poon sa taon na iyan.—Salmo 110:1-6; Gibo 2:34-36; Daniel 12:4.
An Pitong Dagoldol
7. Paano nagkukurahaw an makosog na anghel, asin ano an kahulogan kan saiyang kurahaw?
7 An paghorophorop ni Juan sa makosog na anghel na ini pinutol mismo kan anghel: “Asin sia [an anghel] nagkurahaw sa makosog na tingog siring kun nagngangarob an sarong leon. Asin kan sia kumurahaw, an pitong dagoldol nagpaluwas kan saindang sadiring tingog.” (Kapahayagan 10:3) An siring kakosog na kurahaw makaaapod sa atension ni Juan, na pinatutunayan na si Jesus iyo man nanggad “an Leon kan tribo ni Juda.” (Kapahayagan 5:5) Aram man ni Juan na si Jehova kun beses sinasabi man na “nagngangarob.” An pagngarob ni Jehova makahulang nagpapaisi kan pagtipon liwat sa espirituwal na Israel asin kan pagdatong kan mapanlaglag na “aldaw ni Jehova.” (Oseas 11:10; Joel 3:14, 16; Amos 1:2; 3:7, 8) Malinaw, kun siring, an garo-leon na kurahaw kan makosog na anghel na ini naghuhula man nin kaagid na darakulang pangyayari para sa dagat asin daga. Inaapodan kaiyan an pitong dagoldol na magtaram.
8. Ano an ‘mga tingog kan pitong dagoldol’?
8 Si Juan nakadangog na kaidto nin mga dagoldol na naghahale sa mismong trono ni Jehova. (Kapahayagan 4:5) Kan aldaw ni David, an literal na dagoldol kun beses sinasabing “tingog ni Jehova.” (Salmo 29:3) Kan ipahayag nin makosog ni Jehova an saiyang katuyohan na pamurawayon an saiyang ngaran kan mga aldaw kan ministeryo ni Jesus sa daga, para sa dakol idto garo dagoldol. (Juan 12:28, 29) Kun siring, rasonableng isipon na ‘an mga tingog kan pitong dagoldol’ mga kapahayagan mismo ni Jehova manongod sa saiyang mga katuyohan. An bagay na may “pitong” dagoldol nagsusuherir kan pagkakompleto kan nadangog ni Juan.
9. Ano an ipinagboboot kan sarong tingog hale sa langit?
9 Alagad ta hinanyoga! Nadangog an saro pang tingog. Iyan may pagboot na seguro nagin pambihira para ki Juan: “Ngonyan kan magtaram an pitong dagoldol, ako magsusurat na kutana; alagad ta ako nakadangog nin sarong tingog hale sa langit na nagsabi: ‘Hilomon mo an mga bagay na itinaram kan pitong dagoldol, asin dai mo iyan ipagsurat.’ ” (Kapahayagan 10:4) Segurado na galaga si Juan na madangog asin isurat an nagdadagoldol na mga mensaheng idto, kun paanong an grupong Juan ngonyan galagang naghahalat na ipahayag ni Jehova an saiyang banal na mga katuyohan tanganing ikapublikar. An siring na mga kapahayagan maabot sana sa itinalaan na panahon ni Jehova.—Lucas 12:42; helingon man an Daniel 12:8, 9.
An Katapusan kan Banal na Hilom
10. Sa ngaran niisay na nanunumpa an makosog na anghel, asin sa anong kapahayagan?
10 Mientras tanto, si Jehova may saro pang isusugo ki Juan. Pakatanog kan pitong dagoldol, an makosog na anghel nagtaram liwat: “Asin an anghel na naheling kong nagtitindog sa dagat asin sa daga iinitaas an saiyang toong kamot sa langit, asin sa ngaran kan Saro na nabubuhay sagkod noarin pa man, na naglalang sa langit asin sa mga bagay na yaon dian asin sa daga asin sa mga bagay na yaon dian patin sa dagat asin sa mga bagay na yaon dian, sia suminumpa: ‘Dai na nin pag-atraso.’ ” (Kapahayagan 10:5, 6) Sa ngaran niisay na suminumpa an makosog na anghel? An pinamuraway na si Jesus suminumpa, bakong sa ngaran nia, kundi sa ngaran kan pinakahalangkaw na Autoridad sa gabos, si Jehova, an inmortal na Kaglalang sa kalangitan asin sa daga. (Isaias 45:12, 18) Paagi sa sumpang ini, siniseguro kan anghel ki Juan na dai na mag-aatraso an Dios.
11, 12. (a) Ano an kahulogan kan pagigin “dai na nin pag-atraso”? (b) Ano an tinapos?
11 An termino sa Griego na trinadusir digding “pag-atraso” khroʹnos, na sa literal nangangahulogan “panahon.” Kaya an iba naghohona na an sinabing ini kan anghel maninigong itradusir na: “Dai na nin panahon,” na garo baga an panahon na aram niato matatapos. Alagad ta an terminong khroʹnos digdi ginagamit na mayo nin artikulo depinido. Kaya iyan dai nangangahulogan nin panahon sa pankagabsan kundi, imbes, “sarong panahon” o “sarong peryodo nin panahon.” Sa ibang pagtaram, dai na magkakaigwa nin dugang pang peryodo nin panahon (o, pag-atraso) si Jehova. An berbong Griego na kinua sa khroʹnos ginagamit man sa Hebreo 10:37, na dian si Pablo, sa pagkotar sa Habacuc 2:3, 4, nagsurat na “an nagdadangadang . . . dai mag-aatraso.”
12 “Dai na nin pag-atraso”—an mga tataramon na iyan gustong-gusto kan naggugurang nang grupong Juan ngonyan! Sa anong bagay na dai nin pag-atraso? Sinasabi sato ni Juan: “Kundi sa mga aldaw kan pagpatanog kan ikapitong anghel, kun patatanogon na nia an saiyang trumpeta, an banal na hilom nin Dios sono sa maogmang bareta na saiyang ipinahayag sa saiyang mga oripon na mga propeta tunay na matatapos na.” (Kapahayagan 10:7) Yaon na an panahon ni Jehova sa pagdara kan saiyang banal na hilom sa maogmang kulminasyon kaiyan, na may mamuraway na kapangganahan!
13. Ano an banal na hilom nin Dios?
13 Ano an banal na hilom na ini? Iyan may labot sa banhi na enot na ipinanuga sa Eden, na napatunayan na sa pangenot iyo si Jesu-Cristo. (Genesis 3:15; 1 Timoteo 3:16) Iyan may koneksion man sa kun siisay an babae na luluwasan kan Banhi. (Isaias 54:1; Galacia 4:26-28) Dugang pa, kaiba dian an sekondaryong mga miembro kan grupong banhi asin an Kahadean na paghahadean kan Banhi. (Lucas 8:10; Efeso 3:3-9; Colosas 1:26, 27; 2:2; Kapahayagan 1:5, 6) An maogmang bareta manongod sa pambihirang langitnon na Kahadean na ini kaipuhan na ihulit sa bilog na daga sa panahon kan katapusan.—Mateo 24:14.
14. Taano an ikatolong herak man ta konektado sa Kahadean nin Dios?
14 Tunay nanggad na ini an pinakamaogmang bareta. Pero, sa Kapahayagan 11:14, 15, an ikatolong herak man konektado sa Kahadean. Taano? Huli ta para sa mga tawo na mas gusto an palakaw nin mga bagay ni Satanas, an pagtrumpeta kan maogmang bareta na an banal na hilom nin Dios tapos na—an boot sabihon, an Mesiyanikong Kahadean nin Dios yaon na—kaherakherak na bareta. (Ikomparar an 2 Corinto 2:16.) Iyan nangangahulogan na an areglo sa kinaban na gustong-gusto ninda madali nang laglagon. An mga tingog kan pitong dagoldol, na igwa kan mga patanid sa nagdadangadang na bagyo, nagigin mas klaro asin makosog sa pagdangadang kan dakulang aldaw nin pamalos ni Jehova.—Sofonias 1:14-18.
(Ipagpapadagos sa masunod na luwas.)