Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 26: Banal na Hilom nin Dios—An Mamuraway na Kulminasyon Kaiyan!
Helinga an Kaban kan Saiyang Tipan!
12. (a) Sono sa Kapahayagan 11:19, ano an naheling ni Juan sa langit? (b) Sa ano nagin simbolo an kaban kan tipan, asin ano an nangyari digdi pakatapos na magin bihag an Israel sa Babilonya?
12 Naghahade si Jehova! Paagi sa saiyang Mesiyanikong Kahadean, ginagamit nia an saiyang soberaniya sa katawohan sa makangangalas na paagi. Pinatutunayan ini kan suminunod na naheling ni Juan: “Asin an santuaryo kan templo nin Dios na yaon sa langit binukasan, asin an kaban kan saiyang tipan naheling sa saiyang santuaryo kan templo. Asin nagkaigwa nin mga kikilat asin mga tingog asin mga dagoldol asin nin linog patin makosog na pag-oran nin graniso.” (Kapahayagan 11:19) Ini an solamenteng pagsambit sa Kapahayagan kan kaban kan tipan nin Dios. An Kaban iyo an nagin naheheling na simbolo kan presensia ni Jehova sa saiyang banwaan na Israel. Sa tabernakulo, asin dangan sa templo na ipinatogdok ni Salomon, ibinugtak ini sa Kabanalbanale. Alagad kan an Israel dinarang bihag sa Babilonya kan 607 B.C.E., ginaba an Jerusalem asin an kaban kan tipan nawara. Kaidto an mga representante kan harong ni David nag-ontok na “sa pagtukaw sa trono ni Jehova bilang hade.”—1 Cronica 29:23.a
13. Ano an ipinaheheling kan bagay na an kaban kan tipan nin Dios naheheling sa langitnon na santuaryo nin Dios?
13 Ngonyan, pagkaagi nin labing 2,500 na taon, an Kaban naheling liwat. Alagad sa bisyon ni Juan an Kaban na ini mayo sa sarong daganon na templo. Naheheling ini sa langitnon na santuaryo nin Dios. Liwat, namamahala si Jehova paagi sa sarong hade sa makahadeng linya ni David. Alagad ngonyan an Hade, si Cristo Jesus, nakatukaw sa trono sa langitnon na Jerusalem—sa pinalangkaw na kamugtakan na dian ginigibo nia an mga paghokom ni Jehova. (Hebreo 12:22) An minasunod na mga kapitulo kan Kapahayagan maghahayag kaini sa sato.
14, 15. (a) Sa suanoy na Jerusalem, siisay sana an nakaheling kan kaban nin tipan, asin taano? (b) Sa langitnon na santuaryo kan templo nin Dios, sairisay an makaheheling kan kaban kan saiyang tipan?
14 Sa suanoy na daganon na Jerusalem, an Kaban dai naheling kan kagabsan na Israelita, minsan kan mga saserdote na naglilingkod sa templo, huli ta ini nasa laog kan Kabanalbanale na nalilipodan hale sa Banal na Lugar paagi nin sarong kurtina. (Bilang 4:20; Hebreo 9:2, 3) Solamente an halangkaw na saserdote an nakaheheling kaini kun minalaog sia sa Kabanalbanale sa taonan na Aldaw nin Pagtubos. Alagad, kan nabukasan an santuaryo kan templo sa kalangitan, an simbolikong kaban naheheling bako sanang kan Halangkaw na Saserdote ni Jehova, si Jesu-Cristo, kundi siring man kan saiyang katabang na mga saserdote, an 144,000, kabilang si Juan.
15 An enot na mga binuhay liwat pasiring sa langit nakaheheling sa simbolikong kaban na ini sa harani, huli ta nakatukaw na sinda bilang kabtang kan 24 magurang sa palibot kan trono ni Jehova. Asin an grupong Juan sa daga naliwanagan kan espiritu ni Jehova tanganing mamansayan an Saiyang presensia sa Saiyang espirituwal na templo. Nagkaigwa man nin mga tanda tanganing ipaaram sa katawohan sa kagabsan an makangangalas na pangyayaring ini. Sinasambit sa bisyon ni Juan an mga kikilat, tingog, dagoldol, linog, asin graniso. (Ikomparar an Kapahayagan 8:5.) Ano an isinisimbolo kan mga ini?
16. Paano nagkaigwa nin mga kikilat, tingog, dagoldol, linog, patin pag-oran nin darakulang graniso?
16 Magpoon kan 1914 nagkaigwa nin grabeng kariribokan sa rona nin relihiyon. Alagad makaoogma, an “linog” na ini may kairibang nagdusay na mga tingog na nagtatao nin malinaw na mensahe manongod sa naestablisar na Kahadean nin Dios. An nakabobongog na ‘mga patanid manongod sa bagyo’ hale sa Biblia ipinaaram na. Siring sa kikilat, naheling asin ipinublikar na an mga sinag nin pakasabot manongod sa makahulang Tataramon nin Dios. An makosog tumamang “graniso” nin banal na mga paghokom binutasan na tumang sa Kakristianohan asin sa falsong relihiyon sa kagabsan. Ini gabos dapat na makaapod sa atension kan mga tawo. Alagad makamomondo, an mayoriya—siring kan mga tawo sa Jerusalem kan panahon ni Jesus—dai nakasabot kan kaotoban kan mga tandang ini sa Kapahayagan.—Lucas 19:41-44.
17, 18. (a) An pagpatanog nin mga trumpeta kan pitong anghel nagdara nin anong paninimbagan sa nagdusay na mga Kristiano? (b) Paano inootob kan mga Kristiano an pagboot sainda?
17 An pitong anghel padagos na nagpapatanog kan saindang mga trumpeta, na nagtatanda kan makasaysayan na mga pangyayari digdi sa daga. An nagdusay na mga Kristiano may dakulang paninimbagan na padagos na ipahayag an mga paising ini sa kinaban. Magayagaya nanggad nindang inootob an pagboot na iyan! Ipinaheheling ini sa bagay na, sa laog sana nin sampulong taon, magpoon kan 1981 sagkod 1990, sobra pa sa doble an oras na ginamit ninda taon-taon sa saindang panglobong ministeryo—poon sa 358,581,547 sagkod sa 895,229,424—sarong 150-porsientong pag-oswag. Tunay, an “banal na hilom nin Dios sono sa maogmang bareta” ipinahahayag “sagkod sa kaporoporohi kan inierokan na daga.”—Kapahayagan 10:7; Roma 10:18.
18 An iba pang bisyon naghahalat sa sato mantang an mga katuyohan kan Kahadean nin Dios padagos na ihinahayag.
[Nota sa Ibaba]
a Ibinareta kan Romanong historyador na si Tacito na kan masakop an Jerusalem kan 63 B.C.E. asin si Cneius Pompeius naglaog sa santuaryo kan templo ni Herodes, nanompongan nia ining mayong laog. Mayo na sa laog an kaban kan tipan.—History ni Tacito, 5.9.