Kapahayagan—An Mamuraway na Kulminasyon Kaiyan Harani Na
Kapitulo 27: Namundag an Kahadean nin Dios!
Bisyon 7—Kapahayagan 12:1-17
Tema: Nangaki an langitnon na babae, nakipaglaban si Miguel ki Satanas asin ihinolog sia sa daga
Panahon nin kaotoban: Magpoon kan pagtukaw sa trono ni Cristo Jesus kan 1914 sagkod sa dakulang kahorasaan
1. Paano an pakasabot sa mga tanda na ilinadawan sa Kapahayagan kapitulo 12 sagkod 14 makatatabang sa sato?
An banal na hilom nin Dios nabukasan na. (Kapahayagan 10:7) An Kahadean nin Dios paagi sa saiyang Mesiyas saro nang dinamikong katunayan ngonyan. Namamahala na ini! An presensia kaini nangangahulogan nin kapahamakan para ki Satanas asin sa saiyang banhi asin nin mamuraway na kapangganahan para sa Banhi kan langitnon na organisasyon nin Dios. Alagad an ikapitong anghel dai pa tapos sa pagpatanog kan saiyang trumpeta huli ta kadakol pa kan ihahayag nia sa sato manongod sa ikatolong herak man. (Kapahayagan 11:14) An mga tandang ilinadawan sa kapitulo 12 sagkod 14 kan Kapahayagan matabang sato na padakulaon an satong pakasabot sa gabos na kalabot sa herak man na iyan asin sa pagtapos kan banal na hilom nin Dios.
2. (a) Ano an dakulang tanda na naheling ni Juan? (b) Kasuarin ipinahayag an kahulogan kan dakulang tanda?
2 Nakaheling ngonyan si Juan nin dakulang tanda—saro na may pangenot na interes para sa banwaan nin Dios. Iiniintrodusir kaini an makaoogmang makahulang bisyon, na an kahulogan enot na ipinublikar sa luwas kan The Watch Tower na Marso 1, 1925 sa artikulong may titulong “Birth of the Nation” asin liwat kan 1926 sa librong Deliverance. An maliwanag na sinag na ini nin pakasabot sa Biblia nagin makasaysayan na senyal sa pag-oswag kan gibohon ni Jehova. Kaya togotan niato si Juan na iladawan an drama mantang ini nagpopoon nang mangyari: “Asin naheling an dakulang tanda sa langit, sarong babae an nasasamnohan kan aldaw, asin an bulan nasa irarom kan saiyang mga bitis, asin nasa saiyang payo an korona na kagduwang bitoon, asin bados sia. Asin sia nagkukurahaw huli sa saiyang kakologan asin sa saiyang kasakitan sa pangangaki.”—Kapahayagan 12:1, 2.
3. Siisay an babae na naheling sa langit?
3 Sa kaenot-enote, nakaheling si Juan nin babae sa langit. Siyempre, bako siang literal na babae. Imbes, sia sarong tanda, o simbolo. (Kapahayagan 1:1) Ano an isinisimbolo nia? Sa ipinasabong na mga hula, an mga babae kun minsan nagrerepresentar nin mga organisasyon na “agom” nin nangongorog na mga persona. Sa Hebreong Kasuratan, an Israel sinasabing agom na babae ni Jehova Dios. (Jeremias 3:14) Sa Griegong Kasuratan, an kongregasyon nin linahidan na mga Kristiano inaapod na nobya ni Cristo. (Kapahayagan 21:9-14) An babae na naheling digdi ni Juan agom man nin sarong persona, asin sia mangangaki na. Siisay an saiyang agom na lalaki? Bueno, pakatapos an saiyang aki “inagaw pasiring sa Dios asin sa saiyang trono.” (Kapahayagan 12:5) Sa siring inaako ni Jehova na saiya an aki. Kun siring, an babae na naheling ni Juan iyo an simbolikong agom ni Jehova.
4. Sairisay an mga aki kan simbolikong agom nin Dios, asin ano an iinapod ni apostol Pablo sa babaeng naheling ni Juan?
4 Mas amay nin mga walong siglo, sinabihan ni Jehova an simbolikong agom na ini, na nagsabing: “An saimo gabos na aki magigin mga tawo na tinokdoan ni Jehova.” (Isaias 54:5, 13) Kinotar ni Jesus an hulang ini asin ipinaheling na an mga aking ini iyo an saiyang maimbod na mga parasunod, na pakatapos iyo an buminilog sa kongregasyon nin linahidan na mga Kristiano. (Juan 6:44, 45) Kaya an mga miembro kan kongregasyon na ini, na inaapod na mga aki nin Dios, mga aki man kan simbolikong agom nin Dios. (Roma 8:14) Idinugang ni apostol Pablo an pangultimong impormasyon kan sinabi nia: “An Jerusalem na nasa itaas hiwas, asin sia an satong ina.” (Galacia 4:26) Kaya, an “babae” na naheling ni Juan iyo “an Jerusalem na nasa itaas.”
5. Mantang an simbolikong agom ni Jehova nakokoronahan nin 12 bitoon, ano sa katunayan an Jerusalem sa itaas?
5 Alagad ano nanggad an Jerusalem sa itaas? Mantang sinasabi ni Pablo na sia “nasa itaas,” asin naheling sia ni Juan sa langit, malinaw na bako siang daganon na siudad; ni kaagid sia kan “Bagong Jerusalem,” mantang an organisasyon na iyan iyo an nobya ni Cristo, bakong agom ni Jehova. (Kapahayagan 21:2) Mangnohon na nakokoronahan sia nin 12 bitoon. An bilang na 12 asosyado sa pagigin kompleto sa organisasyonal na areglo.a Kaya, an 12 bitoon na ini garo nagpapaheling na sia sarong organisasyonal na areglo sa langit, siring kan suanoy na Jerusalem digdi sa daga. An Jerusalem na nasa itaas iyo an unibersal na organisasyon ni Jehova nin espiritung mga linalang na nag-aakto bilang saiyang agom, kapwa sa paglilingkod sa saiya asin sa pangangaki.
6. (a) Ano an ipinaheheling kan bagay na an babaeng naheling ni Juan nasasamnohan kan aldaw, nasa irarom kan saiyang mga bitis an bulan, asin may koronang mga bitoon? (b) Ano an isinisimbolo kan kolog nin pangangaki kan bados na babae?
6 Naheling ni Juan an babaeng ini na nasasamnohan kan aldaw asin nasa irarom kan mga bitis nia an bulan. Kun idudugang niato an saiyang koronang mga bitoon, lubos siang napalilibotan nin langitnon na mga liwanag. An pag-oyon nin Dios nagsisirang saiya aldaw asin banggi. Angay nanggad ining simbolo kan mamuraway na langitnon na organisasyon ni Jehova! Bados man sia, na nagtitios kan kolog nin pangangaki. An paghagad nia kan tabang nin Dios nagpapaheling na nagdatong na an panahon kan saiyang pangangaki. Sa Biblia, an kolog nin pangangaki parateng nagsisimbolo nin masakit na gibohon na kaipuhan sa pagprodusir nin mahalagang resulta. (Ikomparar an Salmo 90:2; Talinhaga 25:23; Isaias 66:7, 8.) Mayong duwa-duwa na an kolog sa pangangaki na siring kaini naeksperyensiahan mantang an langitnon na organisasyon ni Jehova nag-aandam para sa makasaysayan na pagkamundag na ini.
Sarong Dakulang Mapulang Dragon
7. Ano pang tanda an naheling ni Juan sa langit?
7 Ano an sumunod na naheling ni Juan? “Asin saro pang tanda an naheling sa langit, asin, uya! sarong dakulang mapulang dragon, na igwa nin pitong payo asin sampulong sungay asin sa saiyang payo igwa nin pitong diadema; asin an ikog kaiyan nagguguyod kan ikatolong kabtang kan mga bitoon sa langit, asin iinapon kaiyan sa daga an mga iyan. Asin an dragon padagos na nagtitindog sa atubang kan babae na mangangaki na, tanganing kun sia mangaki na, halonon kaiyan an saiyang aki.”—Kapahayagan 12:3, 4.
8. (a) Siisay an dakulang mapulang dragon? (b) Ano an ipinaheheling kan pagkakaigwa kan dragon nin pitong payo, sampulong sungay, asin diadema sa lambang payo?
8 An dragon na ini iyo si Satanas, “an enot na halas.” (Kapahayagan 12:9; Genesis 3:15) Sia maisog na paralaglag—pito an payong dragon, o parahalon, na lubos na makahahalon kan saiyang biktima. Pambihira nanggad an saiyang hitsura! An pitong payo asin sampulong sungay na idto nagpapaheling na sia an arkitekto kan politikal na mabangis na hayop na dai na mahahaloy ilaladawan sa Kapahayagan kapitulo 13. An hayop man na ini may pitong payo asin sampulong sungay. Mantang si Satanas may diadema sa lambang payo—pito gabos—masisierto niato na an mga kapangyarihan sa kinaban na irinepresentar sa mabangis na hayop na iyan nasa irarom kan saiyang pamamahala. (Juan 16:11) An sampulong sungay angay na simbolo kan pagigin lubos kan kapangyarihan na saiyang kapot sa kinaban na ini.
9. Ano an ipinaheheling kan bagay na an ikog kan dragon “nagguguyod kan ikatolong kabtang kan mga bitoon sa langit” paibaba sa daga?
9 An dragon may autoridad man sa rona nin mga espiritu. Paagi sa saiyang ikog, sia “nagguguyod kan ikatolong kabtang kan mga bitoon sa langit.” An mga bitoon puwedeng magrepresentar sa mga anghel. (Job 38:7) An pagsambit nin “ikatolong kabtang” magdodoon na an dakulang bilang nin mga anghel nadaya ni Satanas. Oras na sinda mapasairarom na sa saiyang kontrol, dai na sinda makadudulag. Dai na sinda makababalik sa banal na organisasyon nin Dios. Sinda nagin mga demonyo, na garo ginuguyod ni Satanas bilang saindang hade, o namamahala. (Mateo 12:24) Ihinolog man sinda ni Satanas sa daga. Mayong duwa-duwa na nagtotokdo ini sa panahon ni Noe bago an Baha, kan tentaran ni Satanas an masumbikal na mga aki nin Dios na humilig sa daga asin mag-agom nin mga aking babae nin mga tawo. Bilang padusa, ining “mga anghel na nagkasala” iinapon nin Dios pasiring sa arog-bilanggoan na kamugtakan na inaapod na Tartaro.—Genesis 6:4; 2 Pedro 2:4; Judas 6.
10. Anong magkakontrang organisasyon an naheheling, asin taano an dragon ta nagmamawot na halonon an aki kun mangaki na an babae?
10 Kaya, duwang magkakontrang organisasyon an malinaw na naheheling—an langitnon na organisasyon ni Jehova na ilinadawan kan babae asin an demonikong organisasyon ni Satanas na nag-aangat sa soberaniya nin Dios. An dakulang isyu nin soberaniya maninigong husayon. Alagad paano? Si Satanas, na guyod-guyod pa an mga demonyo, siring sa maringis na naninibang hayop na binabantayan an potensial na biktima. Naghahalat siang mangaki an babae. Mawot niang halonon an hinahalat na omboy na ini huli ta naaaraman niang ini magtatao nin peligrosong huma sa padagos na pag-eksister nia asin kan kinaban na saiyang pinamamahalaan.—Juan 14:30.
Sarong Aking Lalaki, Sarong Lalaki
11. Paano ilinadawan ni Juan an pagkamundag kan aki kan babae, asin taano an aki ta inaapod na “sarong aking lalaki, sarong lalaki”?
11 An itinalaan na panahon na an mga nasyon mamahala na mayong pag-olang nin Dios natapos kan 1914. (Lucas 21:24) Dangan, sa tamang panahon, an babae nangaki: “Asin sia nangaki nin sarong aking lalaki, sarong lalaki, na magpapastor sa gabos na nasyon paagi sa sogkod na batbat. Asin an saiyang aki inagaw pasiring sa Dios asin sa saiyang trono. Asin an babae nagdulag pasiring sa kapatagan, na duman igwa sia nin lugar na inandam nin Dios, tanganing pakakanon sia ninda duman sa laog nin sangribo may duwang gatos may anom na polong aldaw.” (Kapahayagan 12:5, 6) An aki “sarong aking lalaki, sarong lalaki.” Taano ta ginamit ni Juan an dobleng ekspresyon na ini? Ginibo nia ini tanganing ipaheling an pagigin angay kan aki, an saiyang kakayahan na mamahala sa mga nasyon na may igong kapangyarihan. Nagdodoon man ini kun gurano kahalaga, gurano kagayagaya an okasyon kan pagkamundag na ini! Ini may pangenot na kabtang sa pagtapos kan banal na hilom nin Dios. Tara, an aking lalaking ini ngani “magpapastor sa gabos na nasyon paagi sa sogkod na batbat”!
12. (a) Sa Salmo, ano an makahulang ipinanuga ni Jehova manongod ki Jesus? (b) Ano an isinisimbolo kan pangangaki kan babae nin aki na “magpapastor sa gabos na nasyon paagi sa sogkod na batbat”?
12 Ngonyan, an ekspresyon daw na iyan garo pamilyar? Iyo, si Jehova makahulang nanuga manongod ki Jesus: “Sinda saimong papasaon nin setrong batbat, siring sa lalagan kan paragibo nin koron roronoton mo sinda.” (Salmo 2:9) Ihinula man manongod sa saiya: “An sogkod kan saimong kakosogan ipadadara ni Jehova gikan sa Sion, na nagsasabi: ‘Mandaog ka sa tahaw kan saimong mga kaiwal.’” (Salmo 110:2) Kaya, kalabot nanggad si Jesu-Cristo sa pagkamundag na naheling ni Juan. Bako, iyan bakong an pagkamundag ni Jesus paagi sa sarong birhen bago an enot na siglo kan satong Komon na Kapanahonan; ni nagtotokdo man ini sa pagkabuhay liwat ni Jesus pasiring sa espiritung buhay kan 33 C.E. Dugang pa, bako ining transmigrasyon. Imbes, ini an pagkamundag kan Kahadean nin Dios kan 1914 bilang katunayan, na si Jesus—na nasa langit na sa laog nin haros 19 siglo—nagtutukaw na ngonyan bilang Hade.—Kapahayagan 12:10.
13. Ano an boot sabihon na an aking lalaki “inagaw pasiring sa Dios asin sa saiyang trono”?
13 Nungka na totogotan ni Jehova na halonon ni Satanas an Saiyang agom o an Saiyang aking bagong mamundag! Sa pagkamundag, an aking lalaki “inagaw pasiring sa Dios asin sa saiyang trono.” Sa siring lubos siang napairarom sa proteksion ni Jehova, na lubos na mangangataman sa bagong mamundag na Kahadean na ini, an Saiyang instrumento sa pagpakangbanal sa Saiyang banal na ngaran. Kadungan kaiyan, an babae nagdulag pasiring sa lugar na inandam nin Dios para sa saiya sa kaawagan. An orog pang detalye manongod sa bagay na iyan masunod! Kun manongod ki Satanas, an entablado andam na ngonyan para sa importanteng pangyayari na magpapagin imposible nanggad para sa saiya na maghuma liwat sa Kahadean sa langit. Ano an pangyayaring iyan?
An Ralaban sa Langit!
14. (a) Siring kan sinasabi ni Juan, anong pangyayari an nagpapagin imposible para ki Satanas na maghuma liwat sa Kahadean? (b) Sa anong lugar napopogolan si Satanas asin an saiyang mga demonyo?
14 Sinasabi sato ni Juan: “Asin puminotok an ralaban sa langit: Si Miguel asin an saiyang mga anghel nakipaglaban sa dragon, asin an dragon asin an mga anghel kaiyan nakipaglaban alagad ta iyan dai nanggana, ni may nanompongan pa man na lugar sa sainda sa langit. Kaya ihinolog an dakulang dragon, an enot na halas, an inaapod Diablo asin Satanas, na nandadaya sa bilog na ineerokan na daga; ihinolog sia sa daga, asin an saiyang mga anghel ihinolog kaiba nia.” (Kapahayagan 12:7-9) Kaya bilang dramatikong pangyayari sa pagtapos kan banal na hilom nin Dios, pinalayas si Satanas, ihinolog hale sa langit, asin an saiyang mga demonyo ihinolog sa daga kaiba nia. An saro na nandaya sa bilog na ineerokan na daga sagkod sa pagigin dios kaini sa katapustapusi pinogolan na sa palibot kan planetang ini, kun saen enot na nagpoon an saiyang pagrebelde.—2 Corinto 4:3, 4.
15, 16. (a) Siisay si Miguel, asin paano niato naaraman? (b) Taano ta angay na si Miguel an saro na magholog ki Satanas hale sa langit?
15 Siisay an nagpangyari kan dakulang kapangganahan na ini sa ngaran ni Jehova? An Biblia nagsasabing si Miguel asin an saiyang mga anghel. Alagad siisay si Miguel? An ngaran na “Miguel” nangangahulogan “Siisay an Kapareho nin Dios?” Kaya si Miguel seguradong interesado sa pagbindikar kan soberaniya ni Jehova paagi sa pagpatunay na mayong siisay man na ikakokomparar sa Saiya. Sa Judas bersikulo 9, inaapod siang “Miguel na arkanghel.” Nakaiinteres, an titulong “arkanghel” ginagamit sa ibang kabtang kan Biblia manongod sa saro sanang persona: si Jesu-Cristo.b Sinabi ni Pablo manongod sa saiya: “An Kagurangnan man sana mahilig hale sa langit na may tingog na nagboboot, na may tingog kan arkanghel asin trumpeta nin Dios.” (1 Tesalonica 4:16) An titulong “arkanghel” nangangahulogan “poon kan mga anghel.” Kaya bakong makangangalas na an Kapahayagan nagsasabing si “Miguel asin an saiyang mga anghel.” An ibang lugar na dian sinasambit kan Biblia an mga anghel na nagpapasakop sa sarong matanos na lingkod nin Dios napapanongod ki Jesus. Kaya, sinasabi ni Pablo an manongod “sa kapahayagan kan Kagurangnan na si Jesus hale sa langit kaiba kan saiyang makapangyarihan na mga anghel.”—2 Tesalonica 1:7; helingon man an Mateo 24:30, 31; 25:31.
16 Ini asin an iba pang kasuratan minagiya sa sato sa dai madudulagan na konklusyon na si Miguel daing iba kundi an Kagurangnan na si Jesu-Cristo sa saiyang langitnon na katongdan. Ngonyan, sa aldaw nin Kagurangnan, bako na sanang sinasabi nia ki Satanas: “Sagweon ka logod ni Jehova.” Mantang ini panahon nin paghokom, si Jesus, bilang si Miguel, ihinolog hale sa langit an maraot na si Satanas asin an saiyang mga anghel na demonyo. (Judas 9; Kapahayagan 1:10) Angay nanggad na Sia an Saro na gumibo kaini, huli ta Sia an bagong nombradong Hade. Si Jesus iyo man an Banhi, na ipinanuga kaidto pa sa Eden, na sa katapustapusi maronot sa payo kan enot na halas na iyan, sa siring pinapara sia sa pag-eksister sagkod lamang. (Genesis 3:15) Sa pagpalayas ki Satanas hale sa langit, si Jesus nag-abante pasiring sa pagronot na iyan sa katapustapusi.
“Mag-ogma, Kamo Kalangitan”
17, 18. (a) Anong langitnon na reaksion an ibinareta ni Juan manongod sa pagbagsak ni Satanas hale sa langit? (b) Ano an posibleng pinaghalean kan makosog na tingog na nadadangog ni Juan?
17 Ibinareta ni Juan an magayagayang langitnon na reaksion sa makangangalas na pagbagsak na ini ni Satanas: “Asin nadangog ko an makosog na tingog sa langit na nagsabi: ‘Nangyari na an kaligtasan asin an kapangyarihan asin an kahadean kan satong Dios asin an autoridad kan saiyang Cristo, huli ta ihinolog na an parasumbong sa satong mga tugang, na nagsusumbong sa sainda aldaw asin banggi sa atubang nin satong Dios! Asin sinda nakadaog sa saiya huli sa dugo kan Kordero asin huli sa tataramon kan saindang pagpatotoo, asin dai ninda namotan an saindang kalag minsan sa atubang nin kagadanan. Huli kaini mag-ogma, kamo kalangitan asin kamo na nag-eerok dian!’”—Kapahayagan 12:10-12a.
18 Kiisay an makosog na tingog na iyan na nadadangog ni Juan? Mayong sinasabi an Biblia. Alagad an kaagid na makosog na tingog na ibinareta sa Kapahayagan 11:17 naggikan sa binuhay liwat na 24 magurang sa saindang langitnon na kamugtakan, kun saen ikarerepresentar na ninda ngonyan an 144,000 na banal. (Kapahayagan 11:18) Asin mantang an linalamag na linahidan na mga lingkod nin Dios na uya pa sa daga inaapod digdi bilang “satong mga tugang,” an pahayag na ini angay na maggikan sa iyo man sanang pinaghalean. Mayong duwa-duwa na an mga maimbod na ini makaiiba kan saindang tingog, huli ta an pagbuhay liwat sa sainda masunod dai mahahaloy pakatapos na si Satanas asin an saiyang hukbo nin mga demonyo iholog na hale sa langit.
19. (a) An pagtapos kan banal na hilom nin Dios nagbukas kan dalan ki Jesus tanganing gibohon an ano? (b) Ano an ipinaheheling kan pag-apod ki Satanas bilang “an parasumbong sa satong mga tugang”?
19 An pagtapos sa banal na hilom nin Dios nangangaipo na si Jesus magkapot na kan autoridad sa Kahadean ni Jehova. Sa siring an dalan binuksan na tanganing otobon nin Dios an saiyang mamuraway na katuyohan na iligtas an maimbod na katawohan. Si Jesus nagdadara nin kaligtasan bako sanang sa saiyang natatakot sa Dios na mga disipulo ngonyan sa daga kundi siring man sa dai mabilang na minilyon na gadan na nasa girumdoman nin Dios. (Lucas 21:27, 28) An pag-apod ki Satanas bilang “an parasumbong sa satong mga tugang” nagpapaheling na, minsan ngani an saiyang mga sumbong tumang ki Job napatunayan na falso, padagos pa niang inaangat an integridad kan daganon na mga lingkod nin Dios. Maliwanag na inotro nia sa dakol na okasyon an sumbong na itatao nin tawo an gabos niang rogaring bilang karibay kan saiyang kalag. Miserable nanggad an pagkasudya ni Satanas!—Job 1:9-11; 2:4, 5.
20. Paano an maimbod na mga Kristiano nakadaog ki Satanas?
20 An linahidan na mga Kristiano, na ibinilang na matanos “huli sa dugo kan Kordero,” nagpapadagos na magpatotoo sa Dios asin ki Jesu-Cristo sa ibong nin mga paglamag. Sa labi nang sanggatos na taon, an grupong Juan na ini nagtotokdo sa darakulang isyu na kalabot sa pagtatapos kan mga Panahon kan mga Hentil kan 1914. (Lucas 21:24, King James Version) Asin an dakulang kadaklan maimbod na naglilingkod ngonyan sa lado ninda. Mayo sainda an “natatakot duman sa mga minagadan kan hawak alagad dai nakakagadan kan kalag,” siring kan paorootrong ipinaheling kan tunay sa buhay na mga eksperyensia nin mga Saksi ni Jehova durante kan ika-20 siglong ini. Paagi sa pananaram asin tamang Kristianong paggawe, dinaog ninda si Satanas, na parareho pinatutunayan na sia putikon. (Mateo 10:28; Talinhaga 27:11; Kapahayagan 7:9) Sa pagkabuhay liwat pasiring sa langit, kanigoan kaogma kan linahidan na mga Kristiano, mantang mayo na si Satanas duman sa langit tanganing isumbong an saindang mga tugang! Ini nanggad an panahon na an gabos na hukbo nin mga anghel magayagayang maghimate sa paising: “Mag-ogma, kamo kalangitan asin kamo na nag-eerok dian!”
(Ipagpapadagos sa masunod na luwas.)
[Mga Nota sa Ibaba]
a Ikomparar an 12 tribo kan Israel sa laman, an 12 apostol, an 12 tribo kan espirituwal na Israel, asin an 12 tata, 12 anghel, patin 12 gapong pundasyon kan Bagong Jerusalem.—Kapahayagan 21:12-14.
b Alagad mangnohon na an Kapahayagan 12:9 nagsasabi manongod sa “dakulang dragon . . . asin an saiyang mga anghel.” Kaya an Diablo bako sanang ginigibo an saiyang sadiri na palsipikadong dios kundi nagmamaigot man na magin sarong arkanghel, minsan ngani an Biblia nungka na nagtao saiya kan titulong iyan.