Kapahayagan—An Mamuraway na Kulminasyon Kaiyan Harani Na

Kapitulo 29: Pag-awit kan Bagong Awit sa Kapangganahan

Bisyon 9—Kapahayagan 14:1-20

Tema: An 144,000 kaiba kan Kordero sa Bukid nin Sion; an mga kapahayagan nin mga anghel nadadangog sa bilog na daga; inani an mga anihon

Panahon nin kaotoban: 1914 sagkod sa dakulang kahorasaan

1. Ano an nanodan na niato manongod sa Kapahayagan kapitulo 7, 12, asin 13, asin ano ngonyan an manonodan niato?

Nakagiginhawa nanggad na dumanan an sumunod na bisyon ni Juan! Kabaliktaran sa makanos na garo-hayop na mga organisasyon kan dragon, naheheling niato ngonyan an maimbod na mga lingkod ni Jehova asin an saindang mga aktibidad sa aldaw kan Kagurangnan. (Kapahayagan 1:10) Sinabi na sato kan Kapahayagan 7:​1, 3 na an apat na doros nin kalaglagan pinopogolan sagkod na matatakan an gabos na 144,000 na linahidan na mga oripon na ini. Sinabi kan Kapahayagan 12:17 na ining ‘mga natatada kan banhi’ kan babae nagigin an espesyal na punteriya ni Satanas, an dragon, sa panahon na iyan. Asin an Kapahayagan kapitulo 13 buhay na ilinadawan an politikal na mga organisasyon na tinindog ni Satanas digdi sa daga tanganing magtao nin makuring pangigipit asin maisog na paglamag sa maimbod na mga lingkod ni Jehova. Alagad ta dai kayang olangon kan pangenot na kaiwal na iyan an katuyohan nin Dios! Maaaraman niato ngonyan na sa ibong kan may maraot na intension na aktibidad ni Satanas, an gabos na 144,000 mapangganang natipon.

2. Anong patanaw sa maogmang katapusan an itinatao sato ni Juan sa Kapahayagan 14:​1, asin siisay an Kordero?

² Si Juan, asin kaiba nia an grupong Juan ngonyan, tinawan nin patanaw sa maogmang resultang iyan: “Asin ako nagheling, asin, uya! an Kordero nagtitindog sa Bukid nin Sion, asin sa kaibanan nia an sanggatos may apat na polo may apat na ribo na igwa kan saiyang ngaran asin kan ngaran kan saiyang Ama na nasusurat sa saindang angog.” (Kapahayagan 14:1) Arog kan nasabotan na niato, an Korderong ini iyo man sana si Miguel na lininigan an kalangitan paagi sa pagpalayas sa Diablo asin sa saiyang mga demonyo. Sia an Miguel na sinasabi ni Daniel na ‘nagtitindog para sa mga aki kan banwaan’ nin Dios mantang sia nag-aandam na ‘tumindog’ sa pag-otob kan matanos na mga paghokom ni Jehova. (Daniel 12:1; Kapahayagan 12:​7, 9) Magpoon kan 1914 an mapagsakripisyong Kordero nin Dios na ini nagtitindog na sa Bukid nin Sion bilang an Mesiyanikong Hade.

3. Ano an “Bukid nin Sion” na duman “nagtitindog” an Kordero asin an 144,000?

³ Siring nanggad iyan sa ihinula ni Jehova: “Ako mismo nagpatukaw kan sakuyang hade sa Sion, an sakong banal na bukid.” (Salmo 2:6; 110:2) An boot sabihon kaidto bako nang an daganon na Bukid nin Sion, an namumugtakan kan daganon na Jerusalem, na sa siudad na iyan dating naghade an mga hadeng tawo sa linya ni David. (1 Cronica 11:​4-7; 2 Cronica 5:2) Bako, ta si Jesus, pagkatapos kan saiyang kagadanan asin pagkabuhay liwat kan 33 C.E., ibinugtak bilang pasisikadan na gapo kan anggulo sa langitnon na Bukid nin Sion, an langitnon na kamugtakan na duman binoot ni Jehova na ibugtak an “siudad kan nabubuhay na Dios, an langitnon na Jerusalem.” Kun siring, an “Bukid nin Sion” digdi nagrerepresentar sa halangkaw na kamugtakan ni Jesus asin kan saiyang kairibang paramana, na minakompuwesto sa langitnon na Jerusalem, na iyo an Kahadean. (Hebreo 12:​22, 28; Efeso 3:6) Iyan an mamuraway na makahadeng situwasyon na dian sinda ilinalangkaw ni Jehova sa aldaw kan Kagurangnan. Sa nag-aging mga siglo, an linahidan na mga Kristiano, bilang “buhay na mga gapo,” galagang naghalat na tumindog sa langitnon na Bukid nin Sion na iyan, na kasaro kan pinamuraway na Kagurangnan na Jesu-Cristo sa saiyang mamuraway na Kahadean.​—1 Pedro 2:​4-6; Lucas 22:​28-30; Juan 14:​2, 3.

4. Paano na an gabos sa 144,000 nagtitindog sa Bukid nin Sion?

⁴ An naheling ni Juan bako sanang si Jesus kundi an kompletong grupo kan 144,000 na kapwa mga paramana kan langitnon na Kahadean na nagtitindog sa Bukid nin Sion. Sa panahon na irinirepresentar kan bisyon, an dakol, pero bakong gabos, sa 144,000 yaon na sa langit. Sa nahuhuring kabtang kan iyo man sanang bisyon, naaraman ni Juan na an iba sa mga banal kaipuhan pang magtagal asin magadan na maimbod. (Kapahayagan 14:​12, 13) Kun siring, malinaw na an iba sa 144,000 yaon pa sa daga. Kaya taano ta sinda gabos naheling ni Juan na nagtitindog kaiba ni Jesus sa Bukid nin Sion?a Huli ta, bilang mga miembro kan kongregasyon nin linahidan na mga Kristiano, sinda ngonyan “nagdolok sa sarong Bukid nin Sion asin sa siudad kan nabubuhay na Dios, an langitnon na Jerusalem.” (Hebreo 12:22) Kapareho ni Pablo kan sia yaon pa sa daga, sinda​—sa espirituwal na sentido—​binuhay na liwat na makasaro ni Cristo Jesus sa langitnon na mga lugar. (Efeso 2:​5, 6) Saro pa, kan 1919 nagkuyog sinda sa pangagda na, “Sakat kamo digdi,” asin sa piguratibong paagi “sinda nagsakat sa langit sa panganoron.” (Kapahayagan 11:12) Huli kan mga tekstong ini, maheheling niato na an gabos na 144,000​—sa espirituwal na pagtaram—​yaon sa Bukid nin Sion kaiba ni Jesu-Cristo.

5. Kiisay na mga ngaran an nasusurat sa angog kan 144,000, asin ano an kahalagahan kan kada ngaran?

⁵ An 144,000 mayo nin pakikikabtang sa mga parasamba sa mabangis na hayop, na markado kan simbolikong kabilangan na 666. (Kapahayagan 13:​15-18) Kabaliktaran, an mga maimbod na ini nasusuratan kan ngaran nin Dios asin kan Kordero sa saindang angog. Daing duwa-duwa na si Juan, na sarong Judio, naheling an ngaran nin Dios sa letrang Hebreo, יהוה.b Sa simbolikong pagkasurat sa saindang angog kan ngaran kan Ama ni Jesus, an mga natatakan na ini ipinamimidbid sa gabos na sinda mga saksi ni Jehova, mga oripon Nia. (Kapahayagan 3:12) An pagkaigwa man kan ngaran ni Jesus sa saindang angog nagpaparisa na inaadmitir ninda na sinda rogaring nia. Sia an saindang “agom,” asin sinda an saiyang magigin “nobya,” “bagong linalang” na naglilingkod sa Dios na may paglaom sa langitnon na buhay. (Efeso 5:​22-24; Kapahayagan 21:​2, 9; 2 Corinto 5:17) An saindang haraning relasyon ki Jehova asin ki Jesu-Cristo nakaaapektar sa gabos nindang kaisipan asin hiro.

Nag-aawit nin Garo Baga Bagong Awit

6. Anong pag-awit an nadadangog ni Juan, asin paano nia iyan ilinaladawan?

⁶ Kaoyon digdi, si Juan nagbabareta: “Asin ako nakadangog nin sarong tingog hale sa langit na siring sa tingog nin dakol na katubigan asin siring sa tingog nin makosog na dagoldol; asin an tingog na nadangog ko siring sa tingog nin mga paraawit na inaakompanyaran an saindang sadiri sa arpa na nagtotogtog sa saindang arpa. Asin sinda nag-aarawit nin garo baga bagong awit sa atubang kan trono asin sa atubang kan apat na nabubuhay na linalang asin kan mga magurang; asin mayo nin siisay man na nakanood kan awit na iyan kundi an sanggatos may apat na polo may apat na ribo, na binakal hale sa daga.” (Kapahayagan 14:​2, 3) Bakong makangangalas na si Juan, kan madangog an 144,000 na tingog na durungan sa sarong magayon na koro, nakagirumdom sa nagraragobrob na busay asin sunod-sunod na dagoldol. Magayonon nanggad na pagdangogon an klarong garo-arpang pag-akompanyar! (Salmo 81:2) Arin na koro sa daga an makapapantay sa kamurawayan kan pambihirang korong iyan?

7. (a) Ano an bagong awit sa Kapahayagan 14:3? (b) Paano na an awit kan Salmo 149:1 bago sa satong aldaw?

⁷ Asin ano ining “bagong awit”? Arog kan nasabi na sa pagpapaliwanag kan Kapahayagan 5:​9, 10, an awit may koneksion sa mga katuyohan ni Jehova mapadapit sa Kahadean asin sa saiyang makangangalas na probisyon, paagi ki Jesu-Cristo, sa paggibo sa espirituwal na Israel na “kahadean asin mga saserdote kan satuyang Dios.” Iyan awit nin pag-omaw ki Jehova na nagbabalangibog kan bagong mga bagay na saiyang ginigibo paagi sa Israel nin Dios asin para kaiyan. (Galacia 6:16) An mga miembro kan espirituwal na Israel na ini nagkukuyog sa pangagda kan salmista: “Omawa nindo si Jah, kamo banwaan! Mag-awit kamo ki Jehova nin bagong awit, an saiyang kaomawan sa kongregasyon kan saiyang mga banal. Mag-ogma logod an Israel sa mamuraway na Kaggibo saiya, an mga aki nin Sion​—maggayagaya logod sinda sa saindang Hade.” (Salmo 149:​1, 2) Totoo, an mga tataramon na iyan isinurat dakol nang siglo an nakaagi, pero sa satong aldaw, iyan inawit na may bagong pakasabot. Kan 1914 namundag an Mesiyanikong Kahadean. (Kapahayagan 12:10) Kan 1919 an banwaan ni Jehova digdi sa daga nagpoon na ipaisi “an tataramon kan kahadean” na may bagong kaigotan. (Mateo 13:19) Napahiro kan taonan na teksto kan Sosyedad kan 1919 (Isaias 54:17) asin napakosog kan saindang pakabalik sa espirituwal na paraiso, pinonan ninda kan taon na idto na ‘umawit ki Jehova na may musika sa saindang puso.’​—Efeso 5:19.

8. Taano ta an 144,000 sana an tatao sa bagong awit kan Kapahayagan 14:3?

⁸ Alagad taano ta an 144,000 sana an tatao kan awit na sinasabi sa Kapahayagan 14:3? Huli ta iyan may koneksion sa saindang mga eksperyensia bilang piniling mga paramana sa Kahadean nin Dios. Sinda sana an inampon bilang mga aki nin Dios asin linahidan kan banal na espiritu. Sinda sana an binakal sa daga tanganing magin kabtang kan langitnon na Kahadean na iyan, asin sinda sana an “magigin mga saserdote . . . patin maghahade” kaiba ni Jesu-Cristo sa laog nin sangribong taon tanganing darahon sa pagkasangkap an katawohan. Sinda sana an naheling na “nag-aarawit nin garo baga bagong awit” sa mismong atubangan ni Jehova.c An pambihirang mga eksperyensia asin paglaom na ini nagtatao sainda nin napapalaen na pag-apresyar sa Kahadean asin nagpapangyari sainda na mag-awit manongod dian sa paagi na dai kaya nin siisay pa man.​—Kapahayagan 20:6; Colosas 1:13; 1 Tesalonica 2:​11, 12.

9. Paano an dakulang kadaklan nagkuyog sa pag-awit kan mga linahidan, asin anong sadol an inotob ninda?

⁹ Minsan siring, an iba naghihinanyog asin nagkukuyog sa saindang pag-awit. Magpoon kan 1935 an nagdadakol na dakulang kadaklan nin ibang karnero nakadangog sa saindang mapangganang awit asin napahirong umiba sa sainda sa pagbalangibog kan Kahadean nin Dios. (Juan 10:16; Kapahayagan 7:9) Totoo, an mga bagohan na ini dai makakanood na umawit kan eksaktong bagong awit na inaawit kan magigin mga hade sa Kahadean nin Dios. Pero sinda man nag-aawit nin magayon pagdangogon na koro nin pag-omaw ki Jehova na sarong awit na nagpapamuraway ki Jehova huli sa mga bagong bagay na saiyang ginigibo. Kaya inootob ninda an sadol kan salmista: “Awit kamo nin bagong awit ki Jehova. Awit kamo ki Jehova, kamo gabos na yaon sa daga. Mag-awit kamo ki Jehova, pag-omawon nindo an saiyang ngaran. Sa aroaldaw ibalangibog nindo an maogmang bareta kan saiyang pagliligtas. Ipahayag nindo sa mga nasyon an saiyang kamurawayan, sa gabos na banwaan an saiyang makangangalas na mga gibo. Iatribuwir nindo ki Jehova, O kamong mga pamilya kan mga banwaan, iatribuwir nindo ki Jehova an kamurawayan asin kakosogan. Sabihon nindo sa tahaw kan mga nasyon: ‘Si Jehova mismo nagin hade.’”​—Salmo 96:​1-3, 7, 10; 98:​1-9.

10. Paano nahimo kan 144,000 na mag-awit “sa atubang” kan simbolikong 24 magurang?

¹⁰ Paano an 144,000 makaaawit “sa atubang” kan mga magurang, mantang an 24 kamagurangan iyo an 144,000 sa saindang mamuraway na langitnon na kamugtakan? Sa pagpopoon kan aldaw kan Kagurangnan, an “mga nagadan na kasaro ni Cristo” binuhay liwat bilang espiritung mga linalang. Kaya, an maimbod na linahidan na mga Kristiano na nakapanggana yaon na ngonyan sa langit, na simbolikong nag-ootob kan mga trabaho na ikababaing sa 24 dibisyon nin makasaserdoteng mga magurang. Kaiba sinda sa bisyon kan langitnon na organisasyon ni Jehova. (1 Tesalonica 4:​15, 16; 1 Cronica 24:​1-18; Kapahayagan 4:4; 6:11) Kun siring, an natatada sa 144,000 na yaon pa digdi sa daga inaawit an bagong awit sa atubang, o sa pagheling kan, saindang binuhay liwat na mga tugang sa langit.

11. Taano an linahidan na mga ganador ta inaapod na 24 magurang patin 144,000?

¹¹ Sa puntong ini puwede man niatong ihapot: Taano an linahidan na mga ganador na ini ta inaapod na simbolikong 24 magurang patin 144,000? Huli ta pinagheheling kan Kapahayagan an sarong grupong ini sa duwang magkalaen na punto-de-vista. An 24 magurang perming ipinaheheling na yaon sa saindang ultimong kamugtakan sa palibot kan trono ni Jehova, na natutukaw bilang mga hade asin saserdote sa kalangitan. Sinda nagsisimbolo sa bilog na grupo kan 144,000 sa saindang langitnon na kamugtakan, minsan ngani sa presente an kadikit na natatada digdi yaon pa sa daga. (Kapahayagan 4:​4, 10; 5:​5-14; 7:​11-13; 11:​16-18) Minsan siring, an Kapahayagan kapitulo 7 nagtatao nin atension sa 144,000 bilang kinua sa katawohan, asin idinodoon kaiyan an makangangalas na katuyohan ni Jehova na tatakan an kompletong kabilangan nin indibiduwal na espirituwal na mga Israelita asin tawan nin kaligtasan an daing kabilangan na dakulang kadaklan. An Kapahayagan kapitulo 14 nagtatao nin ladawan na nagpapatunay na an kompletong grupong pan-Kahadean nin 144,000 na indibiduwal na mga nakadaog matitipon kaiba kan Kordero sa Bukid nin Sion. An mga kuwalipikasyon na dapat na maabot tanganing ikabilang sa 144,000 sinasabi man, arog kan maheheling niato ngonyan.d

Mga Parasunod sa Kordero

12. (a) Paano ipinagpapadagos ni Juan an paglaladawan nia sa 144,000? (b) Sa anong sentido na an 144,000 inaapod na mga birhen?

¹² Sa pagpapadagos kan saiyang paglaladawan sa 144,000 na “binakal hale sa daga,” sinasabi sato ni Juan: “An mga ini iyo an dai nagpadigta sa mga babae; sa katunayan, sinda mga birhen. An mga ini iyo an padagos na nagsusunod sa Kordero minsan sia magsaen. An mga ini binakal hale sa katawohan bilang enot na mga bunga sa Dios asin sa Kordero, asin mayo nin kaputikan na nakua sa saindang ngoso; sinda mayo nin kaninan.” (Kapahayagan 14:​4, 5) An bagay na an 144,000 “mga birhen” dai nangangahulogan na an mga kabilang sa grupong ini kaipuhan na daing agom sa laman. Si apostol Pablo nagsurat sa mga Kristiano na may langitnon na pagkaapod na, mantang may mga bentaha an pagigin daing agom na Kristiano, an pag-agom mas marahay sa nagkapirang kamugtakan. (1 Corinto 7:​1, 2, 36, 37) An nagpapamidbid sa grupong ini iyo an espirituwal na pagkabirhen. Linikayan ninda an espirituwal na pakikisambay sa kinabanon na politika asin sa falsong relihiyon. (Santiago 4:​4; Kapahayagan 17:5) Bilang an katipan na nobya ni Cristo, pinapagdanay ninda an saindang sadiri na puro, “daing kaninan sa tahaw nin maraot asin bikong kapag-arakian.”​—Filipos 2:15.

13. Taano an 144,000 ta angay na nobya para ki Jesu-Cristo, asin paano sinda “padagos na nagsusunod sa Kordero minsan sia magsaen”?

¹³ Dugang pa, “mayo nin kaputikan na nakua sa saindang ngoso.” Digdi, kapareho sinda kan saindang Hade, si Jesu-Cristo. Bilang sangkap na tawo, “dai sia nakaginibo nin kasalan, ni nakua man sa saiyang ngoso an kadayaan.” (1 Pedro 2:​21, 22) Sa pagigin dungan na daing kaninan asin sadiosan, an 144,000 inandam bilang malinig na nobya para sa dakulang Halangkaw na Saserdote ni Jehova. Kan si Jesus yaon digdi sa daga, inagda nia an mga may matanos na puso na sumunod sa saiya. (Marcos 8:​34; 10:​21; Juan 1:43) An mga naghinanyog nag-arog sa saiyang pamumuhay asin nagkuyog sa saiyang mga katokdoan. Kaya, sa saindang buhay digdi sa daga, sinda “padagos na nagsusunod sa Kordero minsan sia magsaen” mantang sinda ginigiyahan nia sa paglakaw sa kinaban ni Satanas.

14. (a) Paano na an 144,000 “enot na mga bunga sa Dios asin sa Kordero”? (b) Sa anong sentido na enot man na bunga an dakulang kadaklan?

¹⁴ An 144,000 “binakal hale sa daga,” “binakal hale sa katawohan.” Sinda inampon bilang espiritung mga aki nin Dios, asin pagkabuhay ninda liwat, sinda bako nang laman-asin-dugong mga tawo. Arog kan sinasabi sa bersikulo 4, sinda nagigin “enot na mga bunga sa Dios asin sa Kordero.” Totoo, kaidtong enot na siglo, si Jesus iyo “an enot na bunga kan mga natorog sa kagadanan.” (1 Corinto 15:​20, 23) Pero an 144,000 iyo an “enot na mga bunga” nin bakong sangkap na katawohan, na binakal paagi sa atang ni Jesus. (Santiago 1:18) Minsan siring, an pagtipon sa bunga nin katawohan dai natatapos sa sainda. An libro nin Kapahayagan dati nang nagtokdo sa pag-ani sa daing kabilangan na dakulang kadaklan na nagkukurahaw sa makosog na tingog: “Utang niato an kaligtasan sa satong Dios, na nagtutukaw sa trono, asin sa Kordero.” An dakulang kadaklan na ini makaliligtas sa dakulang kahorasaan, asin mantang padagos sindang narerepreskohan sa “mga burabod kan tubig nin buhay,” sinda dadarahon sa pagkasangkap nin tawo digdi sa daga. Paghaloyhaloy pakalihis kan dakulang kahorasaan, an Hades hahalean nin laog, asin an daing kabilangan na minilyon na ibang tawo bubuhayon liwat asin magkakaigwa kan oportunidad na uminom man sa tubig nin buhay na iyan. Nasa isip ini, tamang apodon an dakulang kadaklan na enot na bunga sa ibang karnero​—sinda an enot na ‘naghugas kan saindang gubing asin pinaputi iyan sa dugo kan Kordero’ na may paglaom na mabuhay sagkod lamang digdi sa daga.​—Kapahayagan 7:​9, 10, 14, 17; 20:​12, 13.

15. Ano an mga pagkakapareho kan tolong laen-laen na enot na bunga asin kan mga kapiyestahan na siniselebrar sa irarom kan Pagboot ni Moises?

¹⁵ An tolong enot na bungang ini (si Jesu-Cristo, an 144,000, asin an dakulang kadaklan) may interesanteng mga katimbang sa mga kapiyestahan na sinilebrar sono sa suanoy na Pagboot ni Moises. Sa Nisan 16, sa Kapiyestahan nin mga Tinapay na Daing Lebadura, an sarong opong kan enot na bunga kan inaning sebada idinodolot ki Jehova. (Levitico 23:​6-14) An Nisan 16 iyo an aldaw na si Jesus binuhay liwat hale sa mga gadan. Sa ika-50 aldaw poon Nisan 16, sa ikatolong bulan, an mga Israelita sinisilebrar an kapiyestahan kan pag-ani sa enot na hinog na bunga kan trigo. (Exodo 23:​16; Levitico 23:​15, 16) An kapiyestahan na ini inapod na Pentecostes (hale sa sarong termino sa Griego na nangangahulogan “ikasingkuwenta”), asin kan Pentecostes 33 C.E. na an enot na mga miembro kan 144,000 linahidan nin banal na espiritu. Ultimo, sa ikapitong bulan kun natipon na an gabos na inani, yaon an Kapiyestahan nin mga Payag-payag, panahon nin magayagayang pagpasalamat na an mga Israelita nag-eerok sa laog nin sarong semana sa mga payag-payag na gibo sa, kabilang sa ibang bagay, mga sanga nin palma. (Levitico 23:​33-43) Katimbang kaini, an dakulang kadaklan, na kabtang kan dakulang pagtipon, nagpapasalamat sa atubangan kan trono na may “mga palma sa saindang kamot.”​—Kapahayagan 7:9.

Nagpapahayag kan Daing Katapusan na Maogmang Bareta

16, 17. (a) Si Juan nakaheling nin sarong anghel na naglalayog saen, asin ano an ipinahahayag kan anghel? (b) Sairisay an kalabot sa paghuhulit kan Kahadean, asin anong mga eksperyensia an nagpaparisa kaini?

¹⁶ Sumunod si Juan nagsurat: “Asin naheling ko pa an sarong anghel na naglalayog sa tahaw kan langit, asin igwa sia nin daing katapusan na maogmang bareta na ipahahayag sa mga nag-eerok sa daga, asin sa lambang nasyon asin tribo asin tataramon patin banwaan, na nagsasabi sa makosog na tingog: ‘Matakot sa Dios asin pamurawayon sia, huli ta nag-abot na an oras kan saiyang paghokom, asin kaya sambahon an Saro na naglalang kan langit asin daga asin dagat asin mga burabod nin tubig.’” (Kapahayagan 14:​6, 7) An anghel naglalayog sa “tahaw kan langit,” na duman naglalayog an mga gamgam. (Ikomparar an Kapahayagan 19:17.) Kaya, an saiyang tingog madadangog sa bilog na globo. An lakop sa kinaban na proklamasyon kan anghel na ini mas mahiwas an nalalakopan kisa arin man na bareta sa telebisyon!

¹⁷ An gabos sinasadol na matakot, bakong sa mabangis na hayop asin sa ladawan kaiyan, kundi ki Jehova, na mas makapangyarihan nanggad kisa arin man na simbolikong hayop na kontrolado ni Satanas. Tara, linalang ni Jehova an langit asin daga, asin ngonyan nag-abot na an panahon na saiyang hokoman an daga! (Ikomparar an Genesis 1:​1; Kapahayagan 11:18.) Kan nasa daga, si Jesus naghula manongod sa satong aldaw: “Asin an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) An kongregasyon nin linahidan na mga Kristiano nag-ootob sa sugong ini. (1 Corinto 9:​16; Efeso 6:15) Ipinaheheling digdi kan Kapahayagan na an dai naheheling na mga anghel kalabot man sa paghuhulit na ini. Parate nanggad na narisa an paggiya nin anghel sa pagdara sa saro kan mga Saksi ni Jehova sa harong na duman may nagmomondong kalag na nagmamawot, namimibi pa ngani, para sa espirituwal na tabang!

18. Sono sa anghel na naglalayog sa tahaw kan langit, nag-abot na an oras para sa ano, asin siisay pa an matao nin dagdag na mga paisi?

¹⁸ Arog kan sabi kan anghel na naglalayog sa tahaw kan langit, nag-abot na an oras nin paghokom. Anong paghokom an gigibohon ngonyan nin Dios? An mga talinga mangigirabo sa mga ipaiisi ngonyan nin ikaduwa, ikatolo, ikaapat, asin ikalimang anghel.​—Jeremias 19:3.

[Mga Nota sa Ibaba]